news

ఆంధ్రప్రదేశ్ ప్రభుత్వం, నిధుల కోసం, మిషిన్ బిల్డ్ ఏపి పేరిట, గుంటూరు, విశాఖపట్నం నగరాల్లో ఉన్న విలువైన ఆస్తుల అమ్మకానికి సంబంధించి రాష్ట్ర ప్రభుత్వం నోటిఫికేషన్ జారీ చేసింది. అయితే, ఇలా రాష్ట్ర సంపద అయిన, ప్రభుత్వ ఆస్తులు అమ్మి, రాష్ట్ర ప్రభుత్వ ఖజానాకు ఆదాయం సమకూర్చుకోవాలని, ప్రభుత్వం తీసుకున్న నిర్ణయాన్ని వ్యతిరేకిస్తూ, హైకోర్టులో ప్రజా ప్రయోజన వ్యాజ్యాలు దాఖలు అయ్యాయి. గుంటూరుకు చెందిన సామాజిక కార్యకర్త తోట సురేష్, దీని పై ఒక పిటీషన్ దాఖలు చేసారు. ఆయనతో పాటు, మరో తొమ్మిది మంది కూడా, మొత్తం 10 ప్రజా ప్రయోజన వ్యాజ్యాలు దాఖలు చేసారు. ఈ పిటీషన్ల పై గత మూడు నెలలుగా, రాష్ట్ర హైకోర్టులో విచారణ జరుగుతుంది. ఈ రోజు కూడా హైకోర్టులో ధర్మాసనం ముందు ఈ పిటీషన్ విచారణకు వచ్చింది. విచారణ సందర్భంగా పిటీషనర్ తరుపు న్యాయవాదులు, అదే విధంగా ప్రభుత్వం తరుపు న్యాయవాదులు కూడా తమ వాదనలు వినిపించారు. అయితే ఈ వాదనల నేపధ్యంలోనే, హైకోర్టు ధర్మాసనం ఆసక్తికరమైన వ్యాఖ్యలు చేసింది. దేశంలో ఆర్ధిక ఎమర్జెన్సీ ఏమైనా నడుస్తుందా ఏంటి అంటూ, హైకోర్టు ప్రశ్నించింది. దీంతో పాటు, ఆంధ్రప్రదేశ్ లో ఆస్తులు అమ్మి మరీ, ఆదాయాన్ని సమకూర్చుకోవాల్సిన పరిస్థితి ఏర్పడిందా అని ప్రశ్నించింది.

అయితే ఇదే సందర్భంలో, హైకోర్టు కొంచెం వెటకారంగా, క-రో-నా కాలంలో, అత్యధిక ధరలకు, పెద్ద ఎత్తున మద్యం కొనుగోలు చేసి, మందు బాబులు, రాష్ట్ర ఖజానాలో డబ్బులు నింపటానికి పాటుపడ్డారని, వాళ్లకు కృతఙ్ఞతలు చెప్పాల్సిన అవసరం ఉంది అంటూ వ్యంగ్యంగా వ్యఖ్యానించింది. అయితే ప్రభుత్వ తరుపు న్యాయవాది మాట్లాడుతూ, తాము ఎందుకు భూములు అమ్మి, డబ్బు సమకూర్చుకోవాలని అనుకుంటున్నామో చెప్పారు. తమ ప్రభుత్వం, ఈ దేశంలోనే ఎవరూ చేయనటువంటి సంక్షేమ కార్యక్రమాలు చేస్తుందని, ఎన్నో కార్యక్రమాలు అమలు చేస్తున్నామని అందుకే అవసరం అని చెప్పగా, మీరు ఎంత బాగా అమలు చేస్తున్నారో అందరికీ తెలుసు అంటూ ధర్మాసనం వ్యాఖ్యానించింది. ఈ కేసులో ప్రభుత్వం వేసిన కౌంటర్లు అన్నీ కూడా, పిటీషనర్లకు అందచేలయని హైకోర్టు ఆదేశించింది. వాదనలు పూర్తయిన అనంతరం, కౌంటర్లను వారికి అందచేయాలని చెప్తూ, ఈ కేసుని ఈ నెల 17కు వాయిదా వేసింది.

2014తో విభజనతో రోడ్డున పడ్డ ఆంధ్రప్రదేశ్ ప్రజలకు, మొదటగా భరోసా ఇచ్చింది, రాజధాని అమరావతి. రాజధాని లేని రాష్ట్రం, ఆదయ వనరులు లేని రాష్ట్రంగా ఏర్పడిన ఆంధ్రప్రదేశ్ రాష్ట్రానికి, ఒక అడ్డ్రెస్, ఒక గుర్తింపు,మనకంటూ ఒక రాజధాని ఉండాలి అంటే కల సాకారం చేస్తూ, రాష్ట్రం మధ్యలో, కృష్ణా నది ఒడ్డున, అమరావతి అంకురార్పణం జరిగింది. అప్పటి నుంచి అమరావతి అనేది మనకు గర్వ కారణంగా మారింది. అమరావతి ప్రణాళికలు, గ్రౌండ్ అయిన పనులు చేసి, ఒక అద్భుతం మన ముందు సాక్షాత్కారిస్తుందని అందరూ అనుకున్నారు. ఆంధ్రప్రదేశ్ రాష్ట్రానికి బంగారు భవిష్యత్తు ఉంటుందని, 13 జిల్లాల ప్రజలకు ఉపాధి కేంద్రంగా తయారు అవుతుందని అందరూ అనుకున్నారు. కానీ నిర్మాణాలు మధ్యలో ఉండగా, ప్రజల తీర్పు వేరేలా వచ్చింది. మన కళ్ళ ముందు అమరావతి నాశనం అయిపోతుంది. ఏ నోటితో స్మశానం అన్నారో, నిజంగానే అది స్మశానంలా మారిపోతుంది. అయితే అమరావతి రైతుల పోరాటంతో, ఇంకా అమరావతి పై ఆశలు సజీవంగా ఉన్నాయి. అమరావతి అంటే మరణం లేనిది. ఇప్పటికి కాకపొతే ఏ నాటికైనా దాని వైభవం రాక మానదు. అయితే ఇప్పుడు ఇదంతా ఎందుకు అనుకుంటున్నారా ? ఈ రోజు ఢిల్లీలో కొత్తగా పార్లమెంట్ భవనం నిర్మాణం జరుగుతుంది. ఇది కూడా మన అమరావతి ప్రాజెక్ట్ లాంటిదే.

అమరావతిలో పరిపాలన మొత్తం ఒక చోటు ఉండేలా, హౌసింగ్ మొత్తం పని చేసుకునే చోటుకు దగ్గరగా ఉండేలా ఎలా ప్లాన్ చేసారో, ఇప్పుడు ఢిల్లీలో కూడా సెంట్రల్ విస్టా అనే ప్రాజెక్ట్ కేంద్ర ప్రభుత్వం మొదలు పెట్టింది. ఇందులో భాగంగానే, ఈ రోజు పార్లమెంట్ నిర్మాణం చేపట్టారు. అయితే ఈ సందర్భంగా మాజీ ముఖ్యమంత్రి చంద్రబాబు ప్రధాని మోదికి అభినందనలు తెలిపారు. మన దేశ చరిత్రలో సెంట్రల్ విస్టా ప్రాజెక్ట్ ఒక మైల్ స్టోన్గా నిలిచిపోతుందని అన్నారు. అన్ని ప్రభుత్వ శాఖలు ఒకే చోటుకు చేర్చటం, ఎంతో ఉపయోగం అని చెప్తూ, చంద్రబాబు అమరావతిని తలుచుకుని భావోద్వేగానికి లోనయ్యారు. సెంట్రల్ విస్టా లాగే, అమరావతిలో సెంట్రల్ స్పైన్ ప్రాజెక్ట్ పేరుతొ గవర్నమెంట్ కాంప్లెక్స్ నిర్మాణం చేపట్టామని, ఇప్పటికే హౌసింగ్ ప్రాజెక్ట్ లు 60 శాతం పైగా పూర్తయ్యాయి అని, సెక్రటేరియట్, హైకోర్టు పనులు మొదలయ్యాయని, అలాగే ఇక్కడ రాజ్ భవన్ కూడా వచ్చేలా ప్లాన్ చేసామని, అయితే ఇప్పుడు అమరావతిని నాశనం చేస్తున్నారని ఆవేదన వ్యక్తం చేసారు. అమరావతి నిర్మాణం జరిగితే, దేశానికీ కూడా సంపదగా మారుతుందని అనుకున్నామని, అయితే అమరావతి అనేది దైవ నిర్ణయం అని, కాలమే దిక్సూచి చూపిస్తుంది అంటూ, చంద్రబాబు భావోద్వేగంతో ట్వీట్ చేసారు.

అమరావతి రైతుల పై మళ్ళీ కేసులు పెట్టారు. గతంలో పొరుగు ఊరుల నుంచి మూడు రాజధానుల అంటూ, దీక్షలు, ధర్నాలు పేరుతో ఇక్కడ లా అండ్ ఆర్డర్ సమస్య సృష్టిస్తున్నారు అంటూ, రెండు నెలల క్రిందట, అమరావతి రైతుల పైనే ఎదురు కేసులు పెట్టిన విషయం తెలిసిందే. ఇక్కడ మరో విశేషం ఏమిటి అంటే, ఎస్సీల పైనే ఎస్సీ ఎస్టీ కేసు పెట్టారు. అయితే అప్పట్లో ఇది ఒక పెద్ద సంచలనం అయ్యింది. చివరకు కోర్టు చీవాట్లు పెట్టటంతో, ఈ వ్యవహారం ఒక కొలిక్కి వచ్చింది. తాజాగా ఉద్దండరాయనిపాలెంలో, అమరావతి ఉద్యమంలో చనిపోయిన రైతు కుటుంబాలకు సహాయం అందించేందుకు, ప్రవాసాంధ్రులు ఒక కార్యక్రమం ఏర్పాటు చేసారు. ఆ సమయంలో కార్యక్రమం ముగిసిన తరువాత, మహిళా రైతులు ఇంటింటింకీ వెళ్లి, అమరావతి ఉద్యమంలో ఇంకా పెద్ద ఎత్తున పాల్గునాలని ఉద్యమం చేసారు. ఈ సందర్భంగా, అదే ఊరిలో ఉన్న ఎంపీ నందిగామ సురేష్ ఇంటి వద్ద, జై అమరావతి అనే నినాదాలు చేసారని, ఎంపీకి వ్యతిరేకంగా నినాదాలు చేసారని, తమను రెచ్చగొట్టారు అంటూ, మూడు రాజధానుల శిబిరం నుంచి, ఎంపీ మనుషులు వచ్చి, అమరావతి శిబిరం మీదకు వచ్చారు. వారం క్రితం ఈ విషయంలో పరస్పరం వాగ్వాదం జరిగి, అమరావతి రైతులు రాత్రంతా చలిలో కుర్చుని నిరసన తెలపటం, పోలీసులు చర్చలు చేయటం, చివరకు పోలీసులు హామీతో, నిరసన విరమించటం తెలిసిందే.

అయితే ఆ సమయంలో తమను కులం పేరుతో దూషించారు అంటూ, మూడు రాజధానుల శిబిరంలో ఉన్న కొంత మంది, కేసులు నమోదు చేయటంతో, అప్పట్లోనే 5 గురు అమరావతి రైతుల పై కేసులు పెట్టారు. అయితే అప్పుడే ఎంపీ నందిగామ సురేష్ ని కూడా కులం పేరుతో దుషించారని, 19 మంది పైన ఎస్సీ ఎస్టీ కేసు నమోదు చేసారు. దీనికి సంబంధించి కేసు నెంబర్ లు కూడా ఇవ్వటం జరిగింది. ఎస్సీ ఎస్టీ కేసులు రైతుల పై నమోదు చేసారు. మొత్తంగా 24 మంది పై కేసులు నమోదు అయ్యాయి. అయితే రైతుల తరుపున కూడా ఎదురు కేసు పెట్టగా, ప్రస్తుతం ఆ కేసు విచారణలో ఉంది. దాని పై కూడా కేసు నమోదు అయినట్టు సమాచారం. మొత్తంగా మూడు రాజధానుల శిబిరం వారు కావచ్చు, ఎంపీ నందిగామ సురేష్ అనుచరులు అమరావతి రైతుల పై కేసులు నమోదు చేసినట్టు తెలుస్తుంది. దీంతో మరోసారి ప్రభుత్వం, అమరావతి రైతుల పై ఎస్సీ, ఎస్టీ కేసు పెట్టినట్టు అయ్యింది. అయితే ఇది కక్ష సాధింపులో భాగంగానే ఈ కేసులు పెట్టారని, తమ పని తాము చేసుకుంటుంటే, తమ పైకి వచ్చి, ఎదురు తమ పై కేసులు పెట్టటం ఏమిటని రైతులు వాపోతున్నారు.