news

ఆంధ్రప్రదేశ్ రాష్ట్రంలో ప్రభుత్వానికి, సినిమా ఇండస్ట్రీకి మధ్య నెలకొన్న వివాదం మళ్ళీ రేగింది. ఇటీవిల సినీ ఇండస్ట్రీకి చెందిన టాప్ హీరోలు, చిరంజీవి, ప్రభాస్, మహేష్ బాబు , రాజమౌళి, కొరటాల శివ లాంటి వారు వచ్చి, జగన్ మోహన్ రెడ్డిని బ్రతిమిలాడినా కూడా, ఇప్పటికీ టికెట్ల అంశం పై జీవో రాలేదు. సినిమా టికెట్ల అంశం పై హైకోర్టు ఆదేశాల మేరకు ప్రభుత్వం నియమించిన కమిటీ, ఇప్పటి వరకు కూడా నాలుగు సమావేశాలు నిర్వహించింది. మొన్న జరిగిన సమావేశంలో, జీవో విడుదల చేస్తామని చెప్పారు. అయితే రెండు రోజుల్లో భీమ్లా నాయక్ సినిమా విడుదలకు సిద్దంగా ఉండటంతో, అక్కడ నుంచి సినీ పెద్దలు, మంత్రుల పై ఒత్తిడి తెస్తున్నారు. మంత్రులు మాత్రం,జగన్ కోసం ప్రయత్నం చేయగా, అటు వైపు నుంచి అపాయింట్మెంట్ లేదు. మేకపాటి మరణంతో, మొత్తం అటు వైపే ఉన్నారు. ఈ తరుణంలో ఇప్పుడు భీమ్లా నాయక్ సినిమా విడుదల కావటంతో, అప్పటి వరకు కూడా టికెట్ల అంశం పై జీవో వచ్చే అవకాసం లేదని చెప్తున్నారు. అయితే ఇప్పుడు జరిగే విషయాలు కూడా, ప్రభుత్వ వైఖరిని తెలియ చేస్తున్నాయి. ఈ నెల 25వ తేదీన భీమ్లా నాయక్ సినిమా విడుదల అవుతుంది. ఈ భీమ్లా నాయక్ సినిమా కోసం, ఏవైతే టికెట్ ధరలు అమలులో ఉన్నాయో అవి ఫైనల్ అని ప్రభుత్వం చెప్తుంది.

ధరల ప్రకారమే సినిమీ టికెట్ల ధరలు ఉండాలని, భీమ్లా నాయక్ ప్రదర్శించే సినిమా థియేటర్లకు ఫోన్లు చేసి చెప్పారు. అయితే సాయంత్రానికి, డైరెక్ట్ గా రిటెన్ గా కూడా రాసి నోటీసులు ఇస్తున్నారు. బెనిఫిట్ షోలు కానీ, అదనపు షోలు కానీ, వేయరాదని ఆదేశాలు జారీ చేసారు. టికెట్ ధరలు ఇప్పుడు ఎంత ఉన్నాయో అంతే ఉండాలని, పెంచటానికి వీలు లేదని తేల్చి చెప్పారు. డైరెక్ట్ గా నోటీసులు ఇచ్చి, నిబంధనలు అతిక్రమిస్తే చర్యలు తప్పవని థియేటర్లను హెచ్చరించారు. నిబంధనలు ఉల్లంఘిస్తే కేసులు కూడా పెడతాం అంటూ నోటీసుల్లో తెలిపారు. రెవిన్యూ అధికారులతో పాటు, తాహసిల్దార్లు ఈ ఆదేశాలు ఇస్తున్నారు. అయితే ఇదంతా పవన్ కళ్యాణ్ మీద కక్షతోనే ప్రభుత్వం చేస్తుందని, అఖండ, పుష్ప సినిమాలకు కూడా ఇలాగే చేసారని, ఇప్పుడు మళ్ళీ పవన్ కళ్యాణ్ సినిమాకు మళ్ళీ మొదలు పెట్టారని, ఇండస్ట్రీ పెద్దలు వచ్చి, బ్రతిమిలాడినా, జగన్ ఇగో satisfy చేసినా, జగన్ మనసు మాత్రం కరగలేదని వాపోతున్నారు.

మాజీ మంత్రి వివేక కేసులో చాలా కీలక పరిణామాలు చోటు చేసుకుంటున్నాయి. అవినాష్ రెడ్డి పాత్ర ఉంది అంటూ గతంలో దస్తగిరి, సిఐ శంకరయ్య,ఇతరులు ఇచ్చిన స్టేట్మెంట్ బయటకు రావటంతో, ఈ కేసులు దర్యాప్తుకు సంబంధించి, అత్యంత కీలక పరిణామాలు చోటు చేసుకుంటున్నాయి. ఈ నేపధ్యంలోనే ఉదయ కుమార్ రెడ్డి అనే వ్యక్తి తనను సిబిఐ వాళ్ళు వేధిస్తున్నారు అంటూ, ఈ నెల 15వ తేదీన కడప పోలీసులకు ఫిర్యాదు చేసారు. ఈ ఫిర్యాదు చేసిన అనంతరం అతను నేరుగా కోర్టుకు వెళ్ళాడు. కోర్టులో కూడా తెలిసిన విషయాలు అన్నీ చెప్పినా కూడా, సిబిఐ అధికారులు మానసికంగా, శారీరకంగా వేధిస్తున్నారు అంటూ, కడప కోర్టులో పిటీషన్ వేసారు. అయితే అక్కడ నుంచి ఉత్తర్వులు వచ్చాయని చెప్తూ, కడప పోలీసులు, వివేక కేసు దర్యాప్తు చేస్తున్న ఎస్పీ స్థాయి అధికారి రామ్‍సింగ్‍పై కడప పోలీసులు కేసు నమోదు చేసి, FIR కూడా నమోదు చేసారు. ఈ నేపధ్యంలోనే ఈ FIR పైన సిబిఐ రాష్ట్ర హైకోర్టు ని ఆశ్రయించింది. ఈ విధంగా దేశంలో, దర్యాప్తు చేస్తున్న ఒక అధికారి పైనే ఏకంగా కేసు నమోదు చేయటం అనేది కరెక్ట్ కాదు అంటూ, సిబిఐ తరుపు న్యాయవాది హైకోర్టులో గట్టి వాదనలు వినిపించారు. ఈ వాదనల నేపధ్యంలోనే హైకోర్టు తీవ్రంగా రియాక్ట్ అయ్యింది.

ఇందులో ప్రధానంగా, ఈ కేసుకు సంబంధించి, ఎలాంటి చర్యలు ఉండకూడదు అంటూ సిబిఐ స్టే ఇచ్చింది. కడప కోర్టు ఆదేశాలు మేరకే, తాము కేసు నమోదు చేసామని కడప పోలీసులు చెప్తూ ఉండటంతో, ఈ కేసుకు సంబంధించి, పూర్తి వివరాలు కూడా హైకోర్టుకు ఇవ్వాలని, రాష్ట్ర హైకోర్టు ఆదేశించింది. ఈ విధంగా దర్యాప్తు అధికారి అయిన రామ్‍సింగ్‍పై కేసు నమోదు చేయటం పట్ల సిబిఐ తీవ్ర అభ్యంతరం వ్యక్తం చేసింది. కింద కోర్టు ఇచ్చిన ఆదేశాల ప్రకారమే కేసు నమోదు చేసాం అని చెప్తున్నా, అందులో పేర్కొన్న సెక్షన్లు ఏవి అయితే ఉన్నాయో, ఆ సెక్షన్లు కూడా అసమంజసంగా ఉన్నాయని, న్యాయవాదులు వాదించారు. ఈ నేపధ్యంలోనే, ఒక కీలక అధికారి మీద, అదీ ఒక క్రైమ్ కేసు దర్యాప్తు అధికారి మీద, ఇలా కేసులు పెట్టటం, దేశంలోనే సంచలనంగా మారింది. దీంతో హైకోర్టు ఈ కేసుల పైన ఆగ్రహం వ్యక్తం చేస్తూ, సిబిఐ అధికారి పైన పెట్టిన కేసు విషయంలో, ఎలాంటి చర్యలకు ముందుకు వెళ్లొద్దు అంటూ, ఆదేశాలు జారీ చేసింది.

ఆంధ్రప్రదేశ్ హైకోర్టు, ఈ రోజు పీఆర్సీకి సంబంధించిన అంశం పైన, విచారణ చేసింది. ఈ అంశం పైన స్పందించిన హైకోర్టు, కన్ని అంశాల పై తీవ్రంగా పరిగణిస్తాం అంటూ ప్రభుత్వాన్ని హెచ్చరించింది. పీఆర్సీ వ్యవహారానికి సంబంధించి, జీతాల నుంచి రికవరీ చేయటం అనేది, దేశంలోనే మొదటి సారిగా జరుగుతుందని, ఇది ఆంధ్రప్రదేశ్ ప్రభుత్వంలో పని చేస్తున్న ఉద్యోగులకు తీవ్రంగా నష్టం కలిగించే అంశంగా ఉందని కూడా, గతంలో పిటీషన్లు దాఖలు అయ్యాయి. అమరావతి ప్రభుత్వ గజిటెడ్ ఉద్యోగుల సంఘం అధ్యక్షుడు కృష్ణయ్య దాఖలు చేసిన పిటీషన్ పై గతంలో విచారణ జరిగింది. దీని పైన విచారణ గతంలో వాయిదా పడి, ఈ రోజుకు కోర్టు ముందుకు విచారణకు వచ్చింది. ఈ విచారణ సందర్భంగా హైకోర్టు కీలక వ్యాఖ్యలు చేసింది. కృష్ణయ్య తరుపు న్యాయవాది వాదనలు వినిపించారు. ఈ సందర్భంగా హైకోర్టు, ప్రభుత్వం పై ఘాటుగా స్పందించింది. పీఆర్సీ వ్యవహారంలో జీతం నుంచి, రికవరీ చేస్తే మాత్రం తీవ్రంగా పరిగణిస్తామని ప్రభుత్వాన్ని హైకోర్టు హెచ్చరించింది. అంతే కాకుండా, పీఆర్సీ నివేదికను కోర్టుకు సమర్పించాలని, తమ ముందు పీఆర్సీ నివేదిక ఉంచాలని కూడా, ఈ రోజు ప్రభుత్వానికి హైకోర్టు స్పష్టమైన ఆదేశాలు జారీ చేసింది.

ఉద్యోగులు వేసిన పిటీషన్ పై కౌంటర్ కూడా దాఖలు చేయాలని, కోరింది. పీఆర్సి విషయంలో, ప్రభుత్వం జారీ చేసిన జీవోలు అన్నీ, అలాగే దానికి సంబంధించిన పత్రాలు అన్నీ కూడా పిటీషనర్లకు ప్రభుత్వం ఎందుకు ఇవ్వలేదని, కోర్టు ప్రశ్నించింది. వెంటనే వాటి అన్నిటినీ కూడా పిటీషనర్ కు ఇవ్వాలని ఆదేశించింది. పీఆర్సీ వ్యవహారం పై, హైకోర్టులో జరిగిన విచారణ సందర్భంగా, హైకోర్టు ధర్మాసనం ఈ కీలక వ్యాఖ్యలు చేసింది. ప్రధానంగా పీఆర్సీకి సంబంధించి, ఉద్యోగులు జీతాల నుంచి రికవరీ చేయటం అనేది ఎక్కడా లేదని, న్యాయవాది కోర్టు దృష్టికి తీసుకు రాగా, ఒకవేళ రికవరీ చేయటం అనేది నిజం అయితే మాత్రం, ఈ అంశాన్ని తీవ్రంగా పరిగణిస్తామని కోర్టు స్పష్టం చేసింది. అయితే ఈ సందర్భంగా హైకోర్టు పీఆర్సి రిపోర్ట్ ఇవ్వాలని చెప్పటం ఇప్పుడు గమనించల్సిన అంశం. ఉద్యోగులకు ఈ రిపోర్ట్ ఇవ్వటానికి ప్రభుత్వం ఇప్పటి వరకు ససేమీరా అన్న విషయం తెలిసిందే. ఇప్పుడు ఈ రిపోర్ట్ కోర్టుకు వస్తే, ప్రభుత్వం బండారంతో పాటు, ఆ నలుగురు ఉద్యోగ సంఘాల బండారం కూడా, సామాన్య ఉద్యోగులకు అర్ధం అవుతుంది.