news

విజయవాడలో నిత్యం రద్దీగా ఉండే కనకదుర్గమ్మ వారిధీ పై వెలిసిన ఫ్లెక్సీలు చూసి అందరూ అవాక్కయ్యారు. ఈ ఫ్లెక్సీలు ఎవరిని టార్గెట్ చేసి పెట్టినవి ? ఇది ఎవరికీ అయినా వార్నింగ్ ఇస్తున్నారా అనే అనుమానాలు కలుగక మానవు. ఇంకా విడ్డూరం ఏమిటి అంటే, ఈ ఫ్లెక్సీలు పెట్టింది అధికార పార్టీ నేతలే. వైఎస్ఆర్ కాంగ్రెస్ పార్టీ టియుసి నాయకులు పేర్లు, ఫోటోలతో ఈ ఫ్లెక్సీలు వెలిసాయి. ఇందులో వైసీపీ ముఖ్య నాయకుడు, ఎమ్మెల్యే జోగి రమేష్ ఫోటోలు కూడా ఉండటం కొస మెరుపు. అయితే ఆ వివాదాస్పద ఫ్లెక్సీలు చూసి అందరూ అవాక్కయ్యారు. అందులో ఏమి ఉంది అంటే, రాజ్యాంగ వ్యవస్థల పేరుతో మా ప్రభుత్వానికి సంకెళ్ళు వెయ్యాలని ప్రయత్నాలు చేస్తే మేము ఊరుకోం. మా ప్రభుత్వం ప్రజల అభిమానం ఆమోదం పొంది గెలిచింది, మా ప్రభుత్వాన్ని ప్రశ్నించే హక్కు మీకు ఎవరు ఇచ్చారు అంటూ, ఆ ఫ్లెక్సీల్లో ఇది రాసి విజయవాడ వారధి పై అనేక ఫ్లెక్సీలు పెట్టారు. అయితే ఇప్పుడు ఈ ఫ్లెక్సీలు చర్చనీయంసం అయ్యాయి.

ఏకంగా జగన్ మోహన్ రెడ్డి ఫోటో కూడా ఆ ఫ్లెక్సీల్లో ఉంది. వైసిపీ టియుసి నాయకుడు మాడు శివరామ కృష్ణ ఈ ఫ్లెక్సీలు తన పేరిట పెట్టారని తెలుస్తుంది. అయితే ఇప్పుడు ఈ ఫ్లెక్సీల్లో ఉన్న మాటలు పై తీవ్ర అభ్యంతరాలు వ్యక్తం అవుతున్నాయి. ఈ వ్యాఖ్యలు ఎవరిని టార్గెట్ చేసి పెట్టారు ? మా ప్రభుత్వాన్ని అడ్డుకుంటే ఊరుకోం అంటే, వార్నింగ్ ఇస్తున్నారా ? ఎవరిని బెదిరించటానికి ఇంత బహిరంగంగా, ఈ ఫ్లెక్సీలు పెట్టారు అనే చర్చ మొదలైంది. రాజ్యాంగా సంస్థ అని చెప్పి మరీ, వార్నింగ్ ఇస్తున్నారు. మా ప్రభుత్వం ఎన్నికల్లో గెలిచింది, మేము ఏమైనా చేస్తాం, మీరు ఎవరు ప్రశ్నించటానికి అనే ధోరణి కరెక్ట్ ఏనా ? ప్రతిపక్ష పార్టీని అయితే డైరెక్ట్ గా తిట్టే వారని, ఇది కేంద్రాన్ని కానీ, లేకపోతే కోర్టులను కానీ ఉద్దేశించి రాసినట్టు ఉందని, విశ్లేషకులు అంటున్నారు. ఇలాంటి అత్యుత్సాహంతో పెట్టే ఫ్లెక్సీలను వైసీపీ అధిష్టానం కానీ, ప్రభుత్వ పెద్దలు కానీ ఖండించాలని, లేకపోతే ఈ ధోరణి ఎక్కువ అయితే, చాలా దూరం వెళ్తుందని విశ్లేషకులు అంటున్నారు.

గతంలో పోలీస్ స్టేషన్ పై దాడి ఘటనకు సంబంధించి, ఈ రోజు ఆంధ్రప్రదేశ్ హైకోర్టుల విచారణ జరిగింది. విచారణ సందర్భంగా హైకోర్టు కొన్ని కీలక వ్యాఖ్యలు చేసింది. ఈ దాడిలో పాల్గున్న వారి అందరి పై గతంలో, అప్పటి ప్రభుత్వంలో ఎఫ్ఐఆర్ నమోదు చేసారు. అయితే ఈ కేసు పై, ఇప్పటి ప్రభుత్వంలో ఉన్న రాష్ట్ర డీజీపీ గౌతం సవాంగ్, కేసుల ప్రాసిక్యూషన్ ని ఉపసంహరించుకుంటున్నట్టు , రాష్ట్ర ప్రభుత్వానికి ఓక లేఖ రాసారు. డీజీపీ లేఖను ఆమోదించిన ప్రభుత్వం, ఒక జీవోని విడుదల చేసింది. అయితే ఈ జీవో విడుదలే చట్ట విరుద్ధం అని చెప్పి హైకోర్టు వ్యాఖానించింది. ముఖ్యంగా స్టేషన్ హౌస్ ఆఫీసర్, పబ్లిక్ ప్రాసిక్యూటర్ పై అభ్యంతరాలు వ్యక్తం చేసింది. ఈ అంశం మొత్తం పై పసుపులేటి రమేష్ అనే వ్యక్తి, హైకోర్టులో ప్రజా ప్రయోజన వ్యాజ్యం దాఖలు చేసారు. ఈ రోజు హైకోర్టులో ఈ కేసు విచారణకు రావటంతో, పిటీషనర్ తరుపు న్యాయవాదులు, గట్టిగా వాదనలు వినిపించారు. స్టేషన్ పై దాడిలో, పోలీసులే ప్రాసిక్యూషన్ ని ఉపసంహరించు కోవటం అనే అంశం ప్రజా ప్రయోజనాలకు విరుద్ధం అని వారు గట్టిగా వాదించారు.

ఇటువంటి నేరాలు మళ్ళీ జరక్కుండా ఉండాలి అంటే, ఇలాంటి జీవోలు ఇవ్వకూడదని వారు వాదించారు. వాదనలు విన్న న్యాయమూర్తులు, పోలీసుల పైన, ఈ ఉత్తర్వులు ఇచ్చిన అధికారుల పైనా ఆగ్రహం వ్యక్తం చేసారు. లౌకిక ప్రజాస్వామ్య దేశంలో, ముస్లిం యువత అంటూ ప్రస్తావించి, ఇలాంటి జీవోలు ఇస్తే కనుక, భ్యవిష్యత్తులో కేసులు పెట్టటానికి కూడా పోలీసులు ఇబ్బంది పడే పరిస్థితి ఉంటుందని కోర్టు వ్యాఖ్యానించింది. ఈ పిటీషన్ లో నేషనల్ ఇన్వెస్టిగేటివ్ ఏజెన్సీని ఒక పార్టీగా చెయ్యాలని, పిటీషనర్ కు హైకోర్టు ఆదేశాలు ఇచ్చింది. కేసు తదుపరి విచారణను అక్టోబర్ 1కి వాయిదా పడింది. పోలీసుల పైనే నేరుగా దాడి జరిగితే, కేసుని ఉపసంహరించుకుంటూ ఎలా ఆదేశాలు ఇస్తారు, దాన్ని ప్రభుత్వం ఎలా ఆమోదించింది అంటూ హైకోర్టు సీరియస్ అయ్యింది. దీని పై మధ్యంతర ఉత్తర్వులు కూడా ఇస్తే, ఈ కేసుని రద్దు చెయ్యటం కుదరదు, కొనసాగించాలని ఆదేశించింది.

ఆంధ్రప్రదేశ్ మాజీ మంత్రి, జగన మోహన్ రెడ్డి బాబాయ్ అయిన వైఎస్ వివేక కేసు హైకోర్టు ఆదేశాల మేరకు, సిబిఐ విచారణ చేస్తున్న సంగతి తెలిసిందే. హైకోర్టు ఆదేశాలు ప్రకారం, రెండు నెలల క్రితమే సిబిఐ రంగంలో దిగింది. మొదటి విడతగా సిబిఐ 15 రోజులు పాటు పులివెందుల, కడపలో విచారణ చేసింది. తరువాత 40 రోజులు విచారణకు బ్రేక్ ఇచ్చిన సిబిఐ, వారం రోజుల క్రితం రెండో దఫా విచారణ ప్రారంభించింది. ఈ సారి విచారణలో కొన్ని కీలక పరిణామాలు చోటు చేసుకున్నాయి. ముఖ్యంగా గత రెండు రోజులుగా జరిగిన విచారణలో, కొన్ని ఆసక్తికర విషయాలు బయటకు వస్తున్నాయి.. నిన్నటి విచారణలో కొన్ని కీలక ఆధారాలు బయట పడినట్టు తెలుస్తుంది. పులివెందులలో చెప్పుల షాపు యజమానిగా ఉన్న మున్నా అనే వ్యక్తితో పాటు అతని కుటుంబ సభ్యులను కూడా సిబిఐ విచారణ చేసింది. వివేక బ్రతి ఉండగా, ఆ కుటుంబానికి సంబంధించి ఒక సెటిల్మెంట్ చేసినట్టు చెప్తున్నారు. ఈ క్రమంలోనే సిబిఐ వారిని విచారణ చేసింది.

అయితే ఆ విచారణలో మున్న బ్యాంక్ లాకర్ లో, భారీగా నగదు గుర్తించారు. దాదాపుగా ఒకే బ్యాంక్ లాకర్లో, 48 లక్షల నగదుతో పాటుగా, 25 తులాల బంగారాన్ని కూడా సిబిఐ గుర్తించింది. అలాగే మరిన్ని బ్యాంకు ఖాతాలను కూడా సిబిఐ గుర్తించింది. ఈ మొత్తం నగదు పై కూడా సిబిఐ ఆరా తీస్తుంది. అయితే ఇదే క్రమంలో ఈ రోజు పులివెందులలో మరి కొంత మందిని విచారణ చేసారు. ఏడుగురిని ఈ రోజు పులివెందులలో విచారణ చేసారు. అయితే ఈ క్రమంలో వైసీపీ ఎంపీకి చెందిన సన్నిహితుడు ఉదయ్ కుమార్ రెడ్డిని విచారణ చేసిన సిబిఐ, మరింత విచారణ కోసం తన ఫోన్ ని స్వాధీనం చేసుకున్నారు. ఫోన్ ని సీజ్ చేసి, లోతుగా విశ్లేషణ చెయ్యనున్నారు. ఉదయ్ కుమార్ రెడ్డి అనే వ్యక్తీ యురేనియం ఫాక్టరీలో ఉద్యోగిగా పని చేస్తున్నారు. ఈ మొత్తం వ్యవహారంలో, రెండు రోజుల నుంచి కీలక పరిణామాలు ఎదురు అవుతున్నాయి.