news

ఆంధ్రాకు ద్రోహం చేసిన మోడీకి, బుద్ధి చెప్పేలా, చంద్రబాబు ఏ అవకాసం వదులుకోవటం లేదు. మొన్న కర్ణాటక అయినా, ఈ రోజు తెలంగాణా అయినా, రాష్ట్రానికి ద్రోహం చేసిన మోడీకి బుద్ధి చెప్పే దిశలోనే రాజకీయం నడుస్తుంది. సెప్టెంబర్ 6 వ తేదీన కెసిఆర్ అసెంబ్లీ రద్దు చేసిన సంగతి తెలిసిందే. అసెంబ్లీ రద్దు అనంతరం టీడీపీ అనుసరించాల్సిన వ్యూహంపై పార్టీ జాతీయ అధ్యక్షుడు సీఎం చంద్రబాబు శుక్రవారం సాయంత్రం అందుబాటులో ఉన్న మంత్రులు, పార్టీ సీనియర్‌ నేతలతో భేటీ అయ్యారు. అసెంబ్లీ సమావేశం అనంతరం సీఎం చాంబర్‌లో సుమారు గంట పాటు తెలంగాణ రాజకీయ పరిణామాలపై సుదీర్ఘ చర్చ కొనసాగింది. శనివారం హైదరాబాద్‌లో జరగనున్న టీడీపీ కీలక సమావేశం నేపథ్యంలో శుక్రవారం సాయంత్రం జరిగిన అత్యవసర సమావేశం ప్రాధాన్యతను సంతరించుకుంది.

సమావేశానికి హాజరైన మంత్రులు, సీనియర్‌ నాయకులు ప్రధానంగా బీజేపీ ఓటమితో పాటు కాంగ్రెస్‌ తో పొత్తు విషయంలో తమ అభిప్రాయాలను వ్యక్తం చేశారు. తెలంగాణలో పొత్తులపై వేచి చూడాలని కొందరు సూచించగా, కెసీఆర్‌ కు వ్యతిరేకంగా కాంగ్రెస్‌ తో పొత్తు పెట్టుకోవాలని కొందరు సూచించారు. తెలంగాణ అసెంబ్లీ రద్దు పరిణామాలను పరిశీలిస్తే బీజేపీ వ్యూహత్మాకంగానే దక్షిణాదిలో పాగా వేసేందుకు పావులు కడుపుతుందని అభిప్రాయ పడ్డారు. తెలంగాణలో కేసీఆర్‌, ఏపిలో జగన్‌, పవన్‌లతో బీజెపీ నాటకీయంగా వ్యవహారాలు నడుపుతున్నట్లు స్పష్టమవుతుందన్నారు. గత మూడు నెలలుగా జరుగుతున్న పరిణామాలను చూస్తే కేసీఆర్‌ ను ఉపయోగించి బీజేపీకి వ్యతిరేకంగా ఉన్న పార్టీలను కాంగ్రెస్‌ పార్టీ వైపు మళ్ళకుండా పధకంవేస్తున్నట్లు స్పష్టమవుతుందన్నారు. కేసీఆర్‌, మోడీల గాఢమైన స్నేహ బంధాన్ని ప్రజలకు తెలియజేసే విధంగా టీడీపీ కూడా వ్యూహత్మాకంగా పావులు కదపాలని సమావేశంలో నిర్ణయించారు.

ప్రస్తుతం తెలుగుదేశం పార్టీ ముందున్న ఆప్షన్స్‌ను కూడా చర్చించారు. పార్టీకి ప్రధాన శత్రువు మోడీ కాబట్టి మోడీకి వ్యతిరేకంగా వ్యవహరించే శక్తులతో చేతులు కలిపితే బాగుంటుందని చర్చలో కొందరు తమ అభిప్రాయం వ్యక్తం చేశారు. విభజన అనంతరం "కాంగ్రెస్‌ పశ్చాత్తాపాన్ని ప్రకటించి తాము అధికారంలోకి వస్తే ప్రత్యేక హోదానిస్తామని ప్రకటించిందని" బీజేపీ హోదా ఇచ్చేది లేదని నిర్ధ్వంద్వంగా ప్రకటించిందని, అంతే కాకుండా తెలుగుదేశం పార్టీకి వ్యతిరేకంగా దాడులు చేస్తుందని సమావేశంలో చర్చిచారు. కేసీఆర్‌ తీసుకునే నిర్ణయాలలో బీజేపీ పాత్ర ఉందని స్పష్టంచేశారు. కేంద్రం ఎలా చెపితే కెసిఆర్ అల నడుచుకుంటున్నారని పార్టీకి చెందిన సీనియర్‌ నేత సిఎం వద్ద అభిప్రాయం వ్యక్తం చేశారు. కెసీఆర్‌ వ్యతిరేక శక్తులన్ని ఏకమయ్యే పరిస్ధితి తెలంగాణలో కల్పిస్తుందన్నారు. క్షేత్రస్ధాయిలో పార్టీని సమయాత్తం చేసుకుంటునే పరిణామాలు గమనించాలని చంద్రబాబు చెప్పినట్లు తెలుస్తుంది.

ఈ నెల 6 వ తేది నుంచి అసెంబ్లీ సమావేశాలు ప్రారంభం అయిన సంగతి తెలిసిందే. ఈ సభలో ఆంధ్రప్రదేశ్ ముఖ్యమంత్రి చంద్రబాబు మాట్లాడుతూ తన రాజకీయ చరిత్రలో జగన్ లాంటి ప్రతిపక్ష నాయకుడిని చూడలేదని, వైసీపీ అధ్యక్షుడు జగన్‌ పై విరుచుకుపడ్డారు. అసెంబ్లీ సమావేశాలకు రాకుండా పారిపోతున్నారని జగన్‌ పై ముఖ్యమంత్రి ఆగ్రహం వ్యక్తం చేసారు. వైసీపీ అధ్యక్షుడు జగన్‌ చాలా దుర్మార్గంగా వ్యవహరిస్తున్నారన్నారు. శాసనసభలో శుక్రవారం నదుల అనుసంధానం పై జరిగిన చర్చలో ఆయన మాట్లాడుతూ, సభకు హాజరుకాని సభ్యత్వం వృథా.. ప్రతి సమావేశానికి హాజరుకావడం సభ్యుడి ప్రాథమిక బాధ్యతఅని ముఖ్యమంత్రి చంద్రబాబు స్పష్టం చేశారు.

ప్రతిపక్షం అంటే ప్రజా సమస్యలపై శాసనసభ వేదికగా వచ్చి పోరాడాలి. అలా కాకుండా ఎదో కారణం చూపించి అసెంబ్లీ సమావేశాలకు దూరంగా పారిపోతున్నారు. బయట రోడ్ల పై నోటికి వచ్చినట్లు మాట్లాడుతున్నారు. పోలవరం ప్రాజెక్టు పూర్తికాకుండా విషం చిమ్ముతున్నారు. పోలవరం ప్రాజెక్టు పూర్తికాకుండా అడ్డుకునేందుకు జాతీయ హరిత ట్రైబ్యునల్‌ (ఎన్‌జీటీ) నుంచి సుప్రీంకోర్టు దాకా కేసులు వేస్తున్నారు. పోలవరం ప్రాజెక్టు పూర్తి కాదనుకున్నారు. కానీ వేగంగా పూర్తవుతుంటే చూసి తట్టుకోలేకపోతున్నారని, గడువులోగా ప్రాజెక్టులు పూర్తి చేస్తాం అని చంద్రబాబు చెప్పారు.

"పట్టిసీమ, పురుషోత్తపట్నం ఎత్తిపోతల పథకాలు పూర్తయితే, రాయలసీమ, ఉత్తరాంధ్రకు గోదావరి జలాలు తరలిపోతాయని, ఉభయ గోదావరి జిల్లాల వాళ్ళతో మీ జిల్లాకు నీళ్లుండవంటూ జగన్ రెచ్చగొట్టే ప్రయత్నం చేశారు. రాష్ట్రంలోని 13 జిల్లాల్లో తూర్పు, పశ్చిమ గోదావరి జిల్లాలే నాకు మొదటి రెండు ప్రాధాన్యాలని" రైతాంగానికీ, ప్రజా ప్రతినిధులకూ చంద్రబాబు స్పష్టం చేసారు. వైసీపీ ఎలాగూ సభకు రాదని.. బీజేపీ అయినా వస్తుందనుకున్నానని, ఆ రెండు పార్టీలూ ఒక్కటే కదా అని, వ్యవసాయం పై చర్చలో బీజేపీ పాల్గునకపోవటం పై, టీడీపీ ఎమ్మెల్యే ఒకరు వ్యాఖ్యానించారు.

తప్పులు వెదికే భాజపా కూడా తప్పనిసరి పరిస్థితుల్లోనే పోలవరానికి సహకరించే పరిస్థితికి వచ్చిందని పేర్కొన్నారు. ‘భాజపా ఎమ్మెల్యేలు ఈ రాష్ట్రంలోనే ఉంటున్నారు. రేపు ఈ నీరే తాగబోతున్నారు. వారికి రాష్ట్ర అభివృద్ధి పై ఆసక్తి ఉంటే నదుల అనుసంధానం పై అసెంబ్లీలో జరిగే చర్చలో పాల్గొని ఉండాలి అన్నారు. అలాగే ఈ నెల 14, 15, 16 తేదీల్లో జలసిరికి హారతి కార్యక్రమాన్ని నిర్వహించాలని ప్రజా ప్రతినిధులకు ముఖ్యమంత్రి సూచించారు. ఎమ్మెల్యేలంతా నియోజకవర్గాలకు వెళ్లి ఈ కార్యక్రమంలో పాల్గొనాలని ముఖ్యమంత్రి కోరారు. వినాయక చవితి పర్వదినం తర్వాత మూడు రోజులు అసెంబ్లీ సమావేశాలు లేనందున.. నియోజకవర్గాల్లో నీటి వనరుల్లో జల సిరికి హారతిని ఘనంగా నిర్వహించాలన్నారు.

దేశంలో పెట్రోల్‌, డీజిల్‌ ధరలు రికార్డు స్థాయికి చేరుకున్నాయి. రోజువారీ ధరల పేరుతో చమురు సంస్థలు సైలెంట్‌గా వినియోగదారుల జేబుకు చిల్లు పెడుతున్నాయి. శుక్రవారం నాడు పెట్రోలు, డిజల్‌ పై ఒక్క రోజులోనే 50 పైసలు పెరిగాయి. లీటరు పెట్రోలుపై 48 పైసలు, డీజల్‌పై 47 పైసలను చమురు సంస్థలు పెంచాయి. దీంతో రికార్డు స్థాయిలో లీటరు పెట్రోలు ధర ఢిల్లిలో రూ.79.99కి, ముంబైలో రూ.87.39కి చేరుకుంది. డిజల్‌ ఢిల్లిలో రూ.72.07, ముంబైలో రూ.76.51 చేరింది. ఎన్నడూలేని విధంగా పెట్రోల్‌, డీజిల్‌ ధరలు పెరగడంతో సామాన్య వాహనదారులు బెంబేలెత్తుతున్నారు. ఆగస్టు 15 నుంచి ఇప్పటివరకూ లీటర్‌ పెట్రోల్‌ ధర రూ.2.85 మేర, డీజిల్‌ ధర రూ.3.30 మేర పెరిగింది.

ఈ ధరల్లో అత్యధికంగా కేంద్ర, రాష్ట్రాల పన్నులే ఉంటున్నాయి. ప్రస్తుతం కేంద్రం లీటర్‌ పెట్రోల్‌పై రూ.19.48, డీజిల్‌పై రూ.15.33 మేర ఎక్సైజ్‌ సుంకాన్ని వడ్డిస్తోంది. అదనంగా రాష్ట్రాలు కూడా విలువ ఆధారిత పన్ను (వ్యాట్‌)ను వసూలు చేస్తున్నాయి. అత్యధికంగా పెట్రోల్‌ పై మహారాష్ట్ర 39.12%.. డీజిల్‌పై తెలంగాణ 26% వ్యాట్‌ను వర్తింపజేస్తున్నాయి. పెట్రో ధరలు రికార్డు స్థాయి చేరడంతో దేశంలోని ప్రతిప క్షాలు నిరసన బాట పట్టాయి. వచ్చే వారం దేశవ్యాప్తంగా ఆందో ళనలు చేపట్టనున్నాయి. ఎన్డీయే హయాంలో లీటర్‌ పెట్రోల్‌ ధరను రూ.100 మార్కును దాటించాలనుకుంటున్నారా?’ అంటూ ప్రధాని నరేంద్ర మోదీని కాంగ్రెస్‌ ప్రశ్నించింది.

డీజిల్‌ ధరల పెరుగుదలకు నిరసనగా సోమవారం నాడు ‘భారత్‌ బంద్‌’ నిర్వహిస్తున్నట్లు కాంగ్రెస్‌ ప్రకటించింది. ప్రతిపక్షాల ఆందోళనపై నేరుగా స్పందించని ఆర్థికమంత్రి అరుణ్‌ జైట్లీ పెట్రోలు, డీజల్‌ పై విధిస్తున్న ఎక్సైజ్‌ డ్యూటీని తగ్గించడంపై నోరు మెదపటం లేదు. అంతర్జాతీయంగా ముడి చమురు ధరల్లో తేడా రావడంతోనే దేశియంగా పెట్రోలు, డీజల్‌ ధరల్లో హెచ్చు తగ్గులు వస్తున్నాయన్నారు. మరోవైపు డీజిల్‌ ధర రికార్డు స్థాయికి చేరుకోవడంతో రవాణా ఖర్చులు పెరిగి నిత్యావసర ధరల పై పెను ప్రభావం చూపిస్తుంది. ఇప్పటికే కూరగాయల ధరలు ఆకాశాన్నంటి సామాన్యులు కొనలేని పరిస్థితి నెలకొంది. ఇప్పటికైనా కేంద్ర ప్రభుత్వం పెట్రో ఉత్పత్తుల ధరలను జీఎస్‌టీ పరిధిలోకి తీసుకురావాలని ప్రజలు కోరుకుంటున్నారు.