news

అమెరికాలో జరిగిన రోడ్డు ప్రమాదంలో గీతం విశ్వవిద్యాలయం అధినేత, తెదేపా ఎమ్మెల్సీ ఎంవీవీఎస్‌ మూర్తి మృతిచెందారు. మంగళవారం కాలిఫోర్నియా నుంచి అలస్కాలోని ఆంకరేజ్‌‌ సఫారీని సందర్శించేందుకు వెళుతుండగా ఈ ప్రమాదం చోటుచేసుకుంది. వీరు ప్రయాణిస్తున్న వ్యాను ఎదురుగా వస్తున్న ట్రక్కును ఢీకొంది. ప్రమాద సమయంలో ఆయనతో పాటు కారులో ప్రయాణిస్తున్న వెలువోలు బసవపున్నయ్య, వీరమాచినేని శివప్రసాద్, వి.బి.ఆర్‌ చౌదరి మృతి చెందగా.. కడియాల వెంకటరత్నం(గాంధీ) తీవ్రంగా గాయపడ్డారు. ప్రమాద సమాచారం తెలుసుకున్న తానా సభ్యులు ఘటనాస్థలానికి చేరుకున్నారు. ఈ నెల 6వ తేదీన కాలిఫోర్నియా జరగనున్న గీతం పూర్వవిద్యార్థుల సమావేశంలో ఆయన ప్రసంగించాల్సి ఉంది.

విశాఖపట్నం అభివృద్ధిలో ఆయన పాత్ర ఎంతో గొప్పది. నగరాన్ని పారిశ్రామిక కేంద్రంగా, విద్యానిలయంగా మార్చిన తొలి తరం నేతల్లో ఆయన ఒకరు. ఆయనే మతుకుమిల్లి వీర వెంకట సత్యనారాయణ మూర్తి. ఈ పేరు చెబితే ఎవరికీ తెలియదుగానీ, గోల్డ్ స్పాట్ మూర్తి అంటే మాత్రం విశాఖలో ప్రతి ఒక్కరికీ తెలుస్తుంది. ఒకప్పుడు ఎంతో పేరున్న గోల్డ్ స్పాట్ శీతల పానీయాలను తయారు చేసే ఆయన్ను ప్రజలు 'గోల్డ్ స్పాట్ మూర్తి'గా ముద్దుగా పిలుచుకునేవారు. అనతికాలంలోనే ఈ వ్యాపారంలో రాణించిన ఆయన, గీతం యూనివర్శిటీని స్థాపించి వేలాది మందికి విద్యాదానం చేశారు.

ఎంవీవీఎస్‌ మూర్తి మృతి పట్ల ముఖ్యమంత్రి చంద్రబాబు తీవ్ర దిగ్భ్రాంతి వ్యక్తం చేశారు. ఎంపీగా, ఎమ్మెల్సీగా ఆయన చేసిన సేవలు చిరస్మరణీయమన్నారు. విద్యావేత్తగా, విద్యాదాతగా ఆయన ప్రజల్లో చెరగని ముద్ర వేశారన్నారు. గీతం సంస్థను స్థాపించి వేలాది మంది విద్యార్థులను తీర్చిదిద్దారని కొనియాడారు. విద్య, రాజకీయ రంగాలకు మూర్తి లేని లోటు ఎవరూ తీర్చలేరని చంద్రబాబు అన్నారు. ఆయన మృతి తెదేపా, విశాఖ ప్రజలకు తీరని లోటన్నారు. తెదేపా ముఖ్య నేతలందరూ రోడ్డు ప్రమాదాల్లోనే మృతిచెందడం తనను కలిచివేస్తోందని చంద్రబాబు ఆవేదన వ్యక్తం చేశారు.

ప్రస్తుతం దేశం మొత్తం ఎన్నికల ఫీవర్ మొదలైంది. మన పక్క రాష్ట్రం తెలంగాణాలో మరో నెలలో ఎన్నికలు అనే వాతావరణం ఉంది. ఈ టైంలో అనేక మంది అటూ ఇటూ పార్టీలు మారటం, కొత్త పార్టీలు రావటం, ఇవన్నీ సహజం. అయితే ఏపిలో మొదలైన కొత్త రాజకీయ పార్టీ గురించి తెలిస్తే ఆశ్చర్యపోతారు. ముఖ్యంగా, ఆ పార్టీ పేరు వింటే అవాక్కవటం ఖాయం. ఈ పార్టీ పెట్టింది ఎవరో తెలుసా ? భార్య బాధితుల సంఘం బాధితిథులు. విజయవాడలో సమావేశమైన వారందరూ, పొలిటికల్ పార్టీ పెట్టాలని అనుకుంటున్నారు. ఈ సందర్బంగా వారు మాట్లాడుతూ, భార్యల కారణంగా అనేక ఇబ్బందులు పడుతున్నామని న్నారు.

ప్రస్తుతమున్న చట్టాలన్ని భార్యలకు అనుకులంగా ఉన్నాయి, భార్యల కారణంగా ఎంతోమంది జీవితాలు నాశనం అయ్యాయి, అందుకే అందుకే భార్య బాధితులు సంఘాన్ని ఏర్పాటు చేశామని వారంటున్నారు. కేవలం ఒక్క తెలుగు రాష్ట్రాల్లోనే కాక ఆల్ ఇండియా భార్యా బాధితుల సంఘం ఏర్పాటు చేసుకున్నామన్నారు. భార్యలే కాకుండా అత్త , అడపడుచులు, వదిన మరదళ్లు , తోడికోడళ్ల బాధితులు ఇందులో ఉన్నారు. తమకోసం ఏ రాజకీయ పార్టీ పోరాడదు కనుక తామే సొంతంగా రాజకీయ పార్టీని ఏర్పాటు చేస్తున్నామని భార్య బాధితుల సంఘం సభ్యులు వ్యాఖ్యానించారు.

భార్యా బాధితులు, అత్త , అడపడుచులు, వదిన మరదళ్లు , తోడికోడళ్ల రాజకీయ పార్టీ పేరిట రాజకీయ పార్టీ ఏర్పాటు చేసారు. త్వరలోనే ఈ పార్టీ రిజిస్టర్ చేపిస్తామని అన్నారు. ఇప్పుడున్న ఏ రాజకీయ పార్టీ భార్యా, అత్త , అడపడుచులు, వదిన, మరదళ్లు బారి నుంచి మమ్మల్ని కాపాడటం లేదని, మా గురించి ఎవరూ పట్టించుకోవటం లేదని, ఎవరి తప్పు ఉన్నా, మగావారినే లోపల వేస్తున్నారని, మా గురించి అడిగే వారు లేరని, మా గురించి చట్టాలు లేవని, అందుకే ఇవన్నీ సాధించటం కోసం, కొత్త పార్టీ పెడుతున్నామని అన్నారు. ఎవరికి ఏ సమస్య వచ్చినా, అందరం కలిసి పోరాడతామని అన్నారు. మొత్తానికి, కాదేదీ కవితకనర్హం అన్న చందాన, రాజకీయాలకు ఏదీ ఎవరు అతీతం కాదని నిరూపించారు భార్య బాధితుల సంఘం వారు.

తమ డిమాండ్ల సాధన కోసం అన్నదాతలు చేపట్టిన మహా పాదయాత్ర ఉద్రిక్తంగా మారింది. దిల్లీలోని కిసాన్‌ఘాట్‌కు వెళ్లేందుకు ప్రయత్నించిన రైతులపై పోలీసులు లాఠీలు ఝళిపించడంతో పాటు బాష్ప వాయువు, జల ఫిరంగులను ప్రయోగించడాన్ని విపక్షాలు ముక్త కంఠంతో ఖండించాయి. ఢిల్లీ సరిహద్దుల్లో రైతులపై పోలీసులు లాఠీఛార్జ్ చేయడాన్ని ముఖ్యమంత్రి చంద్రబాబు ఖండించారు. గాంధీజీ స్ఫూర్తిని గాంధీ జయంతి నాడే తుంగలో తొక్కడం దారుణమన్నారు. అహింసా మార్గాన్ని ప్రపంచానికి చాటిన గాంధీ ఆశయాలకు తూట్లు పొడిచారని ధ్వజమెత్తారు. జైజవాన్‌.. జైకిసాన్‌ అని నినదించిన లాల్‌బహదూర్‌శాస్త్రి జయంతి రోజే రైతులపై లాఠీఛార్జ్‌ చేశారన్నారు.

రైతుల న్యాయమైన డిమాండ్లను చర్చల ద్వారా పరిష్కరించాలని కోరారు. కేంద్రం, యూపీ ప్రభుత్వం, బీజేపీ నేతలు దేశానికి క్షమాపణ చెప్పాలని చంద్రబాబు డిమాండ్ చేశారు. లాఠీ ఛార్జిని దారుణమైన పోలీస్‌ చర్యగా కాంగ్రెస్‌ అధ్యక్షుడు రాహుల్‌గాంధీ అభివర్ణించారు. దిల్లీ సుల్తాన్‌ అనే ద్రావణాన్ని సేవించారంటూ పరోక్షంగా ప్రధాని మోదీపై విమర్శలు గుప్పించారు. అహింసా దినోత్సవమైన గాంధీ జయంతి రోజున కేంద్ర ప్రభుత్వం దేశ రాజధానిలో రైతుల గోడు కనీసం ఆలకించకుండా వారిపై దారుణంగా వ్యవహరించిందని దుయ్యబట్టారు. అన్నదాతలపై లాఠీఛార్జి ఘటన మోదీ ప్రభుత్వం రైతు వ్యతిరేక వైఖరిని మరోసారి చాటిచెప్పిందని సీపీఎం ప్రధాన కార్యదర్శి సీతారాం ఏచూరి విమర్శించారు.

మరో పక్క అన్నదాతలు శాంతించలేదు. కేంద్రం ఇచ్చిన హామీను రైతు ప్రతినిధులు తోసిపుచ్చారు. ప్రభుత్వ స్పందన తమకు సంతృప్తి కలిగించలేదని, తాము చేసిన డిమాండ్లన్నీ నెరవేరేంత వరకూ ఆందోళన ఆపేది లేదని తేల్చిచెప్పారు. దీంతో చర్చల్లో ప్రతిష్ఠంభన నెలకొంది. కాగా, దీనికి ముందు కేంద్ర హోం మంత్రి రాజ్‌నాథ్ సింగ్ రైతుల్ని శాంతపరచేందుకు ఏం చేయాలన్న దానిపై కేంద్ర వ్యవసాయ మంత్రి రాధామోహన్ సింగ్, తదితరులతో సమాలోచనలు జరిపారు. అనంతరం వ్యవసాయ, రైతు సంక్షేమ శాఖ సహాయ మంత్రి గజేంద్ర సింగ్ షెఖావత్ మీడియాతో మాట్లాడుతూ, రైతు ప్రతినిధులు హోం మంత్రితో సమావేశమయ్యారని, వారి డిమాండ్లపై చర్చించారని తెలిపారు. మెజారిటీ డిమాండ్లపై అవగాహన కుదిరందన్నారు. అయితే రైతు నిరసనలకు సారథ్యం వహించిన భారతీయ కిసాన్ యూనియన్ అధ్యక్షుడు నరేష్ టికాయిత్ మాత్రం ప్రభుత్వ హామీలను రైతులు అంగీకరించలేదని, నిరసనలకు ఆపేది లేదని చెప్పారు.