news

ఆంధ్రప్రదేశ్ రాష్ట్రంలో కరోనా మహమ్మారి విలయతాండవం చేస్తుంది. ఇప్పటికే 88 వేల కేసులు వచ్చాయి. మరో రెండు మూడు రోజుల్లో లక్ష కేసులు దాటిన రాష్ట్రంగా, ఆంధ్రప్రదేశ్ రికార్డులకు ఎక్కుతుంది. రోజుకు 8 వేల కేసులు వస్తున్నాయి. కేసుల్లో ఆంధ్రప్రదేశ్ రాష్ట్రము 5వ స్థానంలో ఉంది. అలాగే ఆక్టివ్ కేసుల్లో 4వ స్థానంలో ఉంది. గత పది రోజులుగా కేసులు పెరుగుదల శాతంలో ఒకటవ స్థానంలో ఉంది. ఈ నేపధ్యంలో, ఏ రాష్ట్ర ప్రభుత్వాలు అయినా, కరోనా కట్టడి చెయ్యాలని, ఆలోచిస్తున్నాయి. మరిన్ని ఆంక్షలు పెడతాయి. అయితే ఇప్పుడు రాష్ట్ర ప్రభుత్వం తీసుకున్న నిర్ణయం విస్మయానికి గురి చేస్తుంది. మద్యం షాపులు తెరిచే సంయమాన్ని పెంచుతూ ఎక్ష్సైజ్ శాఖ నిర్ణయం తీసుకుంది. మద్యం దుకాణాలు ఇక నుంచి రాత్రి 9 గంటల వరకు తెరచుకుంటాయి. ఒక పక్క రాష్ట్ర ప్రభుత్వం మద్య నిషేధం అంటుంది. ఇది పక్కన పెట్టేసారు. ఇక మరో పక్క, ఇప్పుడు కరోనా సమయం. అదీ కాక, కేసులు విపరీతంగా పెరిగిపోతున్నాయి. ఇలాంటి సమయంలో, మద్యం దుకాణాల సమయం తగ్గించాలి కానీ, ఇక్కడ వెరైటీగా పెంచేసారు.

అసలు రాష్ట్రంలో మద్యం దుకాణాలు మూసి ఉన్నంత వరకు, ఏ గోల లేదు. కేసులు కంట్రోల్ లో ఉన్నాయి. పరిస్థితి అదుపులో ఉంది. అయితే, ఎప్పుడైతే, మద్యం దుకాణాలు తెరిచారో, అప్పుడే కరోనా విలయతాండవం రాష్ట్రంలో మొదలైంది. అయితే ఇప్పుడు రోజుకు 8 వేల కేసులు వస్తున్న సమయంలో, మద్యం షాపులు మూసివేయటమో, నియంత్రించటమో చెయ్యాలి కాని, ఇక్కడ మాత్రం వెరైటీగా, ఎక్కువ సమయం తెరిస్తూ ఉత్తర్వులు ఇవ్వటం విస్మయం కలిగించే అంశం అనే చెప్పాలి. ఈ విషయం పై, తెలుగుదేశం పార్టీ నేత, మాజీ మంత్రి లోకేష్ ఘాటుగా స్పందించారు. ఒక పక్క ప్రజలు కరోనాతో ఇబ్బంది పడుతుంటే, వైద్యం సమయానికి అందక, 108లు రాక ఇబ్బందులు పడుతుంటే, డాక్టర్లు, నర్సులు సరైన సదుపాయాలు లేవని ఆవేదన చెందుతుంటే, వారి గురించి పట్టించుకోకుండా, ఇంకా కేసులు పెరిగేలే ఈ నిర్ణయం ఏమిటని నిలదీశారు. జేటాక్స్ వసూలు కోసం, మద్యం షాపులు ఇంకా ఎక్కువ సేపు తెరిచేలా నిర్ణయం తీసుకోవటం పై ఆగ్రహం వ్యక్తం చేసారు.

దేశ వ్యాప్తంగా సంచలనం సష్టించిన తూర్పుగోదావరి జిల్లా రామచంద్రపురంలో దళితుల శిరోముండనం కేసులో బాధితులకు ఇంకా న్యాయం జరగకముందే, జిల్లాలో మరో దళిత యువకునికి తీవ్ర అవమానం జరిగింది. సీతానగరం పోలీస్ స్టేషన్లో ఈ ఘటన చోటుచేసుకుంది. దళితులపై వివక్ష ఇంకా కొనసాగుతుందనడానికి ఇటువంటి ఘటనలు నిదర్శనంగా నిలుస్తున్నాయి. బాధితులకు సత్వర న్యాయం జరగకపోవడం, రాజకీయ నాయకుల జోక్యం, ప్రభుత్వాలు పట్టించుకోకపోవడం వంటి కారణాలతో దళితులపై దాడులు, దారుణాలు పునరావతమవుతున్నాయనే విమర్శలు వెల్లువెత్తుతున్నాయి. 1997లో రామచంద్రాపురంలో పెత్తందార్ల ఆధ్వర్యాన ముగ్గురు దళిత యువకులకు శిరోముండనం జరిగింది. దాదాపు 23 సంవత్సరాలు గడుస్తున్నా ఈ కేసు నేటికీ కొలిక్కి రాలేదు. ఈ కేసులోప్రస్తుత అధికార పార్టీ నేత తోట త్రిమూర్తులు ప్రధాన నిందితుడిగా ఉన్నారు. బాధితులైన కోటి చినరాజు, మరో ఇద్దరికి నేటికీ న్యాయం జరగలేదు. దోషులకు శిక్ష పడకపోవడంతో సీతానగరం లాంటి సంఘటన పునరావత మైందని దళిత సంఘాలు ఆక్షేపిస్తున్నాయి.

సీతానగరం మండలానికి చెందిన అధికార పార్టీ నాయకుడు, ఇసుక వ్యాపారి కె.కష్టమూర్తి ఇచ్చిన ఫిర్యాదుపై పోలీసులు అత్యుత్సాహం ప్రదర్శించి దళిత యువకుడు ఇండగమిల్లి వరప్రసాదు చావబాది, పోలీస్ స్టేషన్లో సోమవారం శిరోముండనం చేసిన సంగతి తెలిసిందే. పోలీసులతో పాటు ఇసుక మాఫియాపైనా ఆట్రాసిటీ చట్టం ప్రకారం కేసులు పెట్టాలని, ఘటనపై రిటైర్డ్ జడ్జితో విచారణ జరిపించాలని కెవిపిఎస్ నాయకులు డిమాండ్ చేస్తున్నారు. అధికార పార్టీ నాయకుల వైఖరి వల్లే తాజాగా మరో బాధితుడు శిరోముండనానికి గురయ్యాడు. ఈ ఘటనను నిరసిస్తూ కెవిపిఎస్, దళిత సంఘాలు ఆందోళనలు చేపడుతున్నాయి. అయితే ఇప్పుడు ఈ విషయంలో, ఘర్షణ వీడియో బయటపడింది. సీతానగరంలో నాలుగు రోజుల క్రితం జరిగిన ఘటనకు సంబంధించి బయటపడ్డ వీడియోలో, ఇసుక లారీ వద్ద మాజీ సర్పంచ్, బాధితుడు గొడవపడినట్టు కనిపించింది. అయితే ఇదే సందర్భంలో, తప్పు తమదేనని, మాజీ సర్పంచ్ ఒప్పుకుంటున్నట్టు కూడా కనిపించింది. అయితే తరువాత ఏమైందో ఏమో కాని, పోలీసుల చేత శిరోముండనం చేపించారు. వీడియో ఇక్కడ చూడవచ్చు., https://youtu.be/au10_ub2Kck

విశాఖపట్నంలోని, అరకులోయ నియోజికవర్గంలో కొత్త వివాదం రాజేసుకుంది. అరకులోయ నియోజికవర్గంలో చేపడుతున్న, పనులు విషయంలో, స్థానిక ఎమ్మెల్యే చెట్టి ఫాల్గుణ, వాటాలు అడుగుతున్నారు అంటూ ఒక అధికారి ఏకంగా ముఖ్యమంత్రి జగన్ కు లేఖ రాయటం సంచలనంగా మారింది. నియోజకవర్గం పరిధిలో చేస్తున్న పంచాయతీరాజ్‌ శాఖలోని ఇంజినీరింగు పనులకు సంబధించి జరుగుతున్న పనుల్లో, వాటాలు వసూలు చేసి ఇవ్వాలి అంటూ, ఎమ్మెల్యే చెప్పారంటూ, పీఆర్‌ జేఈ సమరెడ్డి మాణిక్యం, జగన్ కు రాసిన లేఖలో వివారించారు. ఈ లేఖను, జగన్ మోహన్ రెడ్డితో పాటుగా, ఆ డిపార్టుమెంటు లోని, ఆయా శాఖల అధికారులకు పంపి, ఎమ్మెల్యే పై ఫిర్యాదు చేస్తినట్టు, జేఈ చెప్పారు. ఈ లేఖను ఆయన సోషల్ మీడియాలో కూడా పోస్ట్ చెయ్యటం సంచలంగా మారింది. అరకులోయ నియోజికవర్గంలో ఉన్న, అనంతగిరి మండల జేఈగా, అలాగే అరకులోయ, డుంబ్రిగుడ మండలాలకు సంబంధించి కూడా ఇన్‌ఛార్జి జేఈగా మాణిక్యం, బాధ్యతలు నిర్వహిస్తున్నారు.

ఆయన లేఖలో తెలిపిన వివరాలు ప్రకారం, ఈ మూడు మండలాల పరిధిలో జరుగుతున్న పంచాయతీరాజ్ ఇంజనీరింగ్ పనుల్లో, తనకు మూడు నుంది అయుదు శాతం వాటా ఇవ్వాలని, ఆ డబ్బులు మీరే మాట్లాడి వసూలు చెయ్యాలంటూ, స్థానిక ఎమ్మెల్యే చెట్టి ఫాల్గుణ ఒత్తిడి తెస్తున్నారని లేఖలో రాసారు. నేను అలాంటి పనులు చెయ్యలేనని, ఇలాంటివి నాకు చెప్పవద్దు అని చెప్పటంతో, తనను ఇక్కడ నుంచి బదిలీ చేసి వెళ్ళిపోవాల్సిందిగా, ఎమ్మెల్యే ఒత్తిడి తెస్తున్నారని, ఆ లేఖలో తెలిపారు. అలాగే తన పై తప్పుడు నివేదిక ఇవ్వాల్సిందిగా కొంత మంది అధికారులను వేధిస్తున్నారని ముఖ్యమంత్రికి లేఖలో తెలిపారు. దీని పై స్పందించిన ఎమ్మెల్యే, ఆ ఆరోపణలను ఖండించారు. గత 5 ఏళ్ళలో జరిగిన పనులు పై, ఇప్పటికే విజిలెన్స్ విచారణ జరపాలని లేఖ రాశామని, అలాగే జరిగిన పనుల్లో నాణ్యత లేకపోవటం, జాప్యం అవ్వటం పై, వివరణ కోరటంతోనే, జేఈ తన పై ఆరోపణలు చేస్తున్నారని అన్నారు.