news

బీజేపీ వ్యతిరేక కూటమి తమ బలాన్ని, ఐక్యతను చూపించటానికి, మరో భేటీకి సిద్ధమైంది. భవిష్యత్తు కార్యాచరణపై చర్చించేందుకు ఈనెల 19న కోల్‌కతాలో సమావేశం కానుంది. అదే రోజున కోల్‌కతాలో జరిగే తృణమూల్‌ కాంగ్రెస్‌ ర్యాలీలో పాల్గొన్న అనంతరం నేతలంతా భేటీ కానున్నారు. ఈ మీటింగ్ లో తాజా రాజకీయ పరిస్థితులపై చర్చించి భవిష్యత్తు కార్యాచరణ పై ఒక నిర్ణయం తీసుకునే అవకాశముంది. ఒక రోజు పర్యటన కోసం మంగళవారం దిల్లీ వచ్చిన మన ముఖ్యమంత్రి చంద్రబాబు నాయుడు పలువురు నేతలతో సమావేశమయ్యారు. తొలుత కాంగ్రెస్‌ అధ్యక్షుడు రాహుల్‌తో ఆయన నివాసంలో సుమారు గంటపాటు భేటీ అయ్యారు. అనంతరం ఏపీ భవన్‌లో దిల్లీ ముఖ్యమంత్రి అరవింద్‌ కేజ్రీవాల్‌తో కలిసి భోజనం చేశారు. తర్వాత శరద్‌ పవార్‌ నివాసానికి వెళ్లి ఆయనతోపాటు జమ్మూ కశ్మీర్‌ మాజీ ముఖ్యమంత్రి ఫరూక్‌ అబ్దుల్లాలతో సుమారు గంటపాటు భేటీ అయ్యారు. అనంతరం చంద్రబాబు విలేకరులతో మాట్లాడారు.

‘ఈనెల 19వ తేదీన కోల్‌కతాలో జరిగే ర్యాలీకి మమతా బెనర్జీ మా అందరినీ ఆహ్వానించారు. దీనిపై శరద్‌ పవార్‌తో మాట్లాడాం. వెళ్లాలని నిర్ణయించాం. మిగతా పార్టీలవారూ వస్తారని అనుకుంటున్నాం. 19వ తేదీ మేమంతా అక్కడ కలిస్తే చర్చించుకుంటాం. అవసరమైతే ఢిల్లీలోనూ సమావేశమై ఎలా ముందుకెళ్లాలన్న దానిపై నిర్ణయం తీసుకుంటాం’ అని పేర్కొన్నారు. ఈ ర్యాలీకి ఎన్ని పార్టీలు హాజరవుతాయనుకుంటున్నారన్న ప్రశ్నకు... రేపో, ఎల్లుండో ఆ విషయం చెబుతామన్నారు. ఒకవైపు పార్టీలను కూడగట్టే ప్రయత్నం చేస్తున్నా మరోవైపు ఉత్తర్‌ ప్రదేశ్‌లో ఎస్పీ, బీఎస్పీ సొంతంగా సీట్ల సర్దుబాటు చేసుకుంటున్నాయి కదా? అన్న ప్రశ్నకు... ప్రజాస్వామ్య పరిరక్షణ కోసం అందరూ ఒక్కతాటిపైకి రావాల్సిన అవసరం ఉందని చంద్రబాబు చెప్పారు.

‘దేశంలో ప్రస్తుతం డెమోక్రాటిక్ కంపల్షన్ ఉందని తొలి నుంచీ నేను చెబుతున్నా. దేశాన్ని రక్షించాల్సిన బాధ్యత అందరిపై ఉంది. అందువల్ల అన్ని పార్టీలు చేతులు కలపాలి. కొన్ని రాష్ట్రాల్లో కొన్ని పార్టీలకు ఇబ్బందులున్నప్పటికీ జాతీయ స్థాయిలో అందరూ కలిసి ఎలా ముందుకెళ్లాలన్న అంశంపై కసరత్తు చేస్తున్నాం. లౌకిక పార్టీలన్నింటినీ భాజపా వ్యతిరేక వేదికపైకి తీసుకొచ్చేందుకు అవసరమైన సహకారం అందించాల్సిన బాధ్యత సీనియరు నాయకులుగా మాపై ఉంది’ అని పేర్కొన్నారు. రాహుల్‌ గాంధీతో సాధారణ అంశాలపైనే చర్చ జరిగినట్లు ఒక ప్రశ్నకు సమాధానంగా చెప్పారు. మరోసారి నేతలందరితో మాట్లాడబోతున్నట్లు తెలిపారు. ముఖ్యమంత్రి చంద్రబాబు కేవలం 4 గంటలే దిల్లీలో గడిపారు. రాత్రి 7 గంటలకు దిల్లీ చేరుకున్న ఆయన 11 గంటలకల్లా బయలుదేరి అర్ధరాత్రికి విజయవాడ చేరుకున్నారు.

ఏపీ ముఖ్యమంత్రి చంద్రబాబు నాయుడు ఈరోజు దేశ రాజధాని ఢిల్లీ పర్యటనాకు వెళ్లారు. ఢిల్లీ పర్యటనలో భాగంగా బీజేపీ వ్యతిరేక పార్టీ నేతలతో చంద్రబాబు సమావేశం కానున్నారు. డిసెంబర్‌లో జరిగిన మహాకూటమి సమావేశానికి కొనసాగింపుగా భవిష్యత్‌ కార్యాచరణపై నేతలతో చంద్రబాబు చర్చలు జరపనున్నారు. కాంగ్రెస్‌ పార్టీ జాతీయ అధ్యక్షుడు రాహుల్‌ గాంధీతో పాటు మరో ఐదారుగురు నేతలతో చంద్రబాబు భేటీ కానున్నారు. కేంద్ర ప్రభుత్వ వైఫల్యాలపై మహాకూటమి చేపట్టనున్న దేశ వ్యాప్త కార్యక్రమాలపై చంద్రబాబు చర్చించనున్నారు. ఇప్పటికే ఢిల్లీ చేరుకున్న చంద్రబాబు, రాహుల్‌ గాంధీతో భేటీ అయ్యారు.

బీజేపీ వ్యతిరేకంగా కలిసి వచ్చే పార్టీలను ఏకం చేయాలనే లక్ష్యంతో గతేడాది డిసెంబర్‌ 9న దిల్లీలో సుమారు 28 రాజకీయ పార్టీలతో జరిగిన భేటీకి కొనసాగింపుగా చంద్రబాబు ఈ రోజు దిల్లీ పర్యటన చేపట్టారు. రాహుల్‌తో భేటీ అనంతరం ఎన్సీపీ అధినేత శరద్‌ పవార్‌, నేషనల్‌ కాన్ఫరెన్స్‌ అధినేత ఫరూక్‌ అబ్దుల్లా, దిల్లీ సీఎం కేజ్రీవాల్‌, సీపీఎం ప్రధాన కార్యదర్శి ఏచూరితో చంద్రబాబు సమావేశం కానున్నారు. ఈ నెల 19న కోల్‌కతాలో బహిరంగ సభ తర్వాత దేశవ్యాప్తంగా నిర్వహించే భారీ ర్యాలీలపై నేతలతో చర్చించనున్నారు. ఎన్నికలు సమీపిస్తున్న వేళ కార్యాచరణ ప్రణాళిక రూపొందించడం, ప్రజల్లోకి తీసుకెళ్లాల్సిన ఎజెండాను పూర్తిస్థాయిలో ఖరారు చేసే లక్ష్యంతో చంద్రబాబు దిల్లీ పర్యటనకు వెళ్లినట్టు సమాచారం.

భవిష్యత్తు కార్యాచరణ ఎలా ఉండాలి? జనవరి 19 తర్వాత ఎక్కడ ఎలాంటి సమావేశాలు పెట్టాలి? ఎవరు ఎక్కడ హాజరు కావాలి? ఆయా చోట్ల ప్రజల్లోకి తీసుకెళ్లాల్సిన అంశాలేమిటి? తదితర అంశాలపై చర్చించనున్నట్టు తెలుస్తోంది. జాతీయ నేతలతో భేటీ అనంతరం చంద్రబాబు తెదేపా ఎంపీలతో సమావేశం కానున్నారు. మరో పక్క రాహుల్ గాంధీతో భేటీలో, రాష్ట్ర సమస్యలు కూడా చంద్రబాబు ప్రస్తావించే అవకాసం ఉన్నట్టు తెలుస్తుంది. ఇప్పటికే నరేంద్ర మోడీ, నమ్మించి మోసం చెయ్యటం, విభజన చట్టంలో ఉన్న హామీలు ఒక్కటి కూడా నెరవేర్చకుండా ఉండటం, ప్రత్యేక హోదా ఇవ్వను అని తేల్చి చెప్పటంతో, ఈ విషయం పై కూడా ఏపికి జరిగిన అన్యాయాన్ని, జాతీయ స్థాయిలో చర్చకు పెట్టారు.

కరవుకాటకాలు... వెనుకబాటుతనం... ఉపాధి లేమి... వనరులున్నా వినియోగించుకోలేని స్థితి. ఇప్పటి వరకు ప్రకాశం జిల్లాను తలచుకుంటే గుర్తుకు వచ్చేవి ఇవే... ఇక మీదట ఈ పిలుపు, ఆ తలపు మారనుంది. రాష్ట్రానికి అత్యంత ప్రతిష్ఠాత్మకమైన, జిల్లాకు తలమానికమైన కీలక పరిశ్రమ జిల్లాలో ఏర్పాటు కానుంది. దేశంలోనే అతి పెద్ద FDIగా, రూ.27 వేల కోట్ల పెట్టుబడితో 18 వేల మందికి ఉపాధి లక్ష్యంతో కాగిత గుజ్జు పరిశ్రమ ఏర్పాటు కానుంది. దీనికి సమీపంలోనే 15 వేల మందికి ఉపాధి కల్పించే రామాయపట్నం పోర్టు నిర్మాణం కానుంది. ఈ రెండు కీలక ప్రాజెక్టులకు ఈ రోజు ముఖ్యమంత్రి చంద్రబాబు శంకుస్థాపన చేయనున్నారు. రాష్ట్ర విభజన చట్టం హామీల అమలులో కేంద్రం ప్రదర్శిస్తున్న నిర్లక్ష్యంపై ఒత్తిడి పెంచుతూ వచ్చిన సీఎం చంద్రబాబు.. ఇప్పుడు సొంతగానే రాష్ర్టాన్ని అభివృద్ధి చేసేందుకు నడుం బిగించారు.

ఈ క్రమంలో కీలక ముందడుగు వేశారు. ప్రకాశం జిల్లాలో నిర్మించాలని భావిస్తున్న రామాయపట్నం ఓడరేవుకు కేంద్రం సహకరించకపోయినా.. స్వశక్తితోనే ఈ పోర్టును నిర్మించాలని నిర్ణయించి ఈ రోజు శంకుస్థాపన చేసేందుకు ముహూర్తం కూడా నిర్ణయించారు. పేపరు పరిశ్రమకు కలిసొచ్చిన అంశాలు : ప్రకాశం జిల్లా సమీపంలోని నేలలు అనుకూలంగా ఉండడం, ముడిసరకు (జామాయిల్‌, సుబాబుల్‌) విరివిగా లభించడం, సమీపంలోనే రామాయపట్నం పోర్టు ఏర్పాటు కానుండడం కాగిత గుజ్జు పరిశ్రమ ఏర్పాటుకు కలిసొచ్చే అంశాలు కావడంతో పరిశ్రమ ఏర్పాటుకు అన్ని పనులు చకచకా జరుగుతున్నాయి. ఇండోనేషియా కేంద్రంగా నడుస్తున్న ఈ పరిశ్రమ ప్రపంచవ్యాప్తంగా 120 దేశాలకు తమ ఉత్పత్తులను చేరవేస్తోంది. మన దేశంలో ఉత్పత్తి యూనిట్‌ను నెలకొల్పడం ఇదే తొలిసారి. ఈ నెల 9న ముఖ్యమంత్రి చంద్రబాబు సమక్షంలో పరస్పర ఒప్పంద పత్రాలు మార్చుకుని పూర్తి వివరాలు వెల్లడిస్తారు.

సాకారం దిశగా రామాయపట్నం పోర్టు : * గుడ్లూరు మండలం రావూరులో ప్రభుత్వమే ఈ ఓడరేవును నిర్మించనుంది. * నాన్‌-మేజర్‌ పోర్టుగా దీన్ని నిర్మించనున్నారు. దీనికి 4,652 ఎకరాల భూమి అవసరమని గుర్తించారు. * దీని ద్వారా కనీసం 15 వేల మందికి ఉపాధి కల్పించనున్నారు. * ఈ పోర్టుకు మూడు కిలోమీటర్ల దూరంలోనే చేవూరులో కాగిత పరిశ్రమ నెలకొల్పనున్నారు. * పోర్టు నిర్మాణం పూర్తి చేసి వినియోగంలోకి వచ్చే సమయానికే పరిశ్రమ కూడా కార్యకలాపాలు మొదలు పెడుతుందని అధికారులు చెబుతున్నారు. ఆంధ్రా పేపర్‌ ఎక్సలెన్స్‌ పరిశ్రమ వివరాలు: * పరిశ్రమ పేరు : ఆంధ్రా పేపర్‌ ఎక్సలెన్స్‌ (ఆసియా పేపర్‌ అండ్‌ పల్ప్‌) * పెట్టుబడి : తొలి దశలో రూ. 27 వేల కోట్లు (3.85 బిలియన్‌ డాలర్లు) * ఉత్పత్తి సామర్థ్యం : 5 మిలియన్‌ టన్నులు (ఏడాదికి) * కావాల్సిన భూమి : 2,450 ఎకరాలు * ప్రాంతం : గుడ్లూరు మండలం చేవూరులో (రామాయపట్నం పోర్టు ప్రతిపాదిత స్థలానికి కొద్ది దూరంలోనే) * ఉపాధి కల్పన : 18 వేల మందికి (ప్రత్యక్షంగా 6 వేలు, పరోక్షంగా 12 వేల మందికి)