ప్రస్తుతం వైఎస్ఆర్ కాంగ్రెస్ పార్టీ ప్రభుత్వం పరిస్థితి, రోజు రోజుకీ దారుణంగా తయారు అవుతుంది. ఇప్పటికే ఏపి ప్రజలు అభివృద్ధి అనే మాట మర్చిపోయారు. రోడ్డుల పరిస్థితి దారుణంగా ఉంది. ఆర్ధిక పరిస్థితి చెప్పే పనే లేదు. చిత్ర విచిత్రంగా అప్పులు తెస్తూ నెట్టుకుని వస్తున్నారు. ఎప్పటి వరకు ఈ పరిస్థితి ఉంటుందో చెప్పలేం. ఇక పెట్టుబడులు సంగతి సరే సరి. ఉపాధి లేదు , ఉద్యోగాలు లేవు. ఇలా ఒకటి కాదు, రెండు కాదు, ఏది తీసుకున్నా, జగన్ మోహన్ రెడ్డి ప్రభుత్వం దారుణాతి దారుణంగా ఫెయిల్ అయ్యింది. దీంతో ఇప్పుడు జగన్ మోహన్ రెడ్డి, ఇప్పటికే ప్రశాంత్ కిషోర్ ని దించిన సంగతి తెలిసిందే. ప్రశాంత్ కిషోర్ వ్యూహాలు ఎలా ఉంటాయో, గత ఎన్నికల్లో ప్రజలు చూసారు. అయితే గత ఎన్నికల్లో మాదిరిగా కులాల మధ్య కుంపట్లు, ప్రాంతాల మధ్య కుంపట్లు పెట్టాలని ప్రయత్నం చేస్తున్నా పెద్దగా వర్క్ అవ్వటం లేదు. అనూహ్యంగా కాపులు కూడా టిడిపి వైపు చూస్తూ ఉండటంతో, దీన్ని ప్రస్తుతానికి పక్కన పెట్టినట్టు ఉన్నారు. తాజాగా జూనియర్ ఎన్టీఆర్ ఫాన్స్ ని, టిడిపి అభిమానులను రెచ్చగొట్టే పనిలో ఉన్నారు. ఇందు కోసం కిరాయి మూకలను ఇప్పటికే రంగంలోకి దించారు. జూనియర్ ఎన్టీఆర్ కి, టిడిపికి మధ్య గ్యాప్ ఉంది అనేది సత్యం, అయితే ఇరు వైపులా ఎప్పుడూ బహిరంగంగా అయితే ఈ విషయంలో బయట పడలేదు.
కావాల్సిన అప్పుడు, ఇద్దరూ కలుస్తూనే ఉంటారు. అయినా ఉన్న ఈ గ్యాప్ ని వాడుకుని, ఇద్దరి మధ్య వైషమ్యాలు రెచ్చగొట్టటానికి వైసీపీ ప్లాన్ చేసిందని టిడిపి ఆరోపిస్తుంది. నిజమైన జూనియర్ ఎన్టీఆర్ ఫాన్స్ ఎవరూ కూడా టిడిపి ఓడిపోయి, వైసీపీ గెలవాలని కోరుకోదని టిడిపి నేతలు అంటున్నారు. మొన్నటి దాకా, సోషల్ మీడియా వేదికగా వికృత క్రీడ ఆడిన వైసిపీ, ఇప్పుడు ఈ క్రీడను కింద లెవల్ కు తీసుకుని వెళ్ళింది. కొంత మంది ఎన్టీఆర్ ఫ్యాన్స్ ని రెచ్చగొట్టటం, అలాగే కొంత మంది వైసీపీ ముసుగులో ఉన్న వైఎస్ఆర్ కాంగ్రెస్ పార్టీ కార్యకర్తలను రంగంలోకి దిగి రెచ్చగొడుతున్నారు. నిన్న కుప్పంలో, ఎప్పుడో విడుదలైన జై లవకుశ సినిమాని ఒక సినిమా హాల్ లో వేసుకుని, సియం ఎన్టీఆర్ అంటూ హడావిడి చేయటం, చంద్రబాబుని తిడుతూ స్లోగన్స్ ఇవ్వటం వంటివి చేసి, ఎన్టీఆర్ ఫాన్స్ పైన, టిడిపి కార్యకర్తలను రెచ్చగొట్టే క్రీడకు తెర లేపారు. దీని పైన అటు ఎన్టీఆర్ ఫాన్స్ కానీ, ఇటు టిడిపి కార్యకర్తలు కానీ జాగ్రత్తగా ఉండాలి. ఏ మాత్రం ఆవేశాపడినా, వైసీపీ ట్రాప్ లో పడినట్టే.