news

నారాలోకేశ్ పర్యటనను అడ్డుకోవడానకి, ఆయనపై దాడికి యత్నించడానికి పిచ్చి,పిచ్చి కారణాలుచెప్పిన జగన్ ప్రభుత్వం, అందుకు పురుషోత్తమపట్నం రైతులను సాకుగా చూపిందని టీడీపీనేత, మాజీ ఎమ్మెల్యే పెందుర్తి వెంకటేశ్ మండిపడ్డారు. బుధవారం ఆయన టీడీపీనేత వరుపులరాజాతో కలిసి మంగళగిరిలోని పార్టీ జాతీయ కార్యాలయంలో విలేకరులతో మాట్లాడారు. గతప్రభుత్వం ఎక్కడాకూడా బలవంతపు భూసేకరణ జరపలేదని, నిజంగా అలాచేసుంటే, 330మంది రైతులుంటే, 255మందికి, ఒక్కొక్కరికీ రూ.28లక్షలచొప్పున చెల్లించడం జరిగిందని, మిగిలినవారంతా కోర్టుకు వెళ్లారని వెంకటేశ్ స్పష్టంచేశారు. ఆనాడు కోర్టుకివెళ్లినవారికి రూ.35లక్షలచొప్పున చెల్లిస్తామని వైసీపీనేతలు హామీ ఇచ్చారని, ఆ హామీని ఇప్పటికీ అమలుచేయలేదన్నారు. లోకేశ్ పై దాడికి యత్నించినవారెవరూ రైతులుకారని, వారి ముసుగులో ఉన్న వైసీపీకార్యకర్తలే ఆపని చేశారన్నారు. లోకేశ్ యాత్రకు ముందు వైసీపీ మండల అధ్యక్షుడు విలేకరులతో మాట్లాడుతూ, తాము యాత్రను అడ్డుకుంటామని కూడా చెప్పాడన్నారు. టీడీపీ కార్యక్రమాన్ని అడ్డుకోకుండా చూడాలని పోలీస్ వారిని కోరామని, అయినాకూడా వైసీపీ మూకలు టీడీపీ శ్రేణులపై, ఆపార్టీ జాతీయప్రధాన కార్యదర్శిపై దాడికి యత్నించారని వెంకటేశ్ చెప్పారు.

జగన్మోహన్ రెడ్డికి ధీటైన ప్రత్యర్థిగా లోకేశ్ ఎదుగుతున్నాడన్న భావన వైసీపీలో నానాటికీ పెరిగిపోతోందని, అందులోభాగంగానే లోకేశ్ లక్ష్యంగా ప్రభుత్వం దాడులు చేయిస్తోందన్నారు. లోకేశ్ నాయకత్వంలో వచ్చే ఎన్నికల్లో తెలుగుదేశం విజయం సాధించి తీరుతుందన్నభయాందోళనకూడా వైసీపీవారిలో ఉందని, ఆ భయంతోనే టీడీపీ యువనేతను వారు లక్ష్యంగా ఎంచుకున్నారని పెందుర్తి స్పష్టంచేశారు. స్థానిక (రాజానగరం) శాసనసభ్యుడికి, ఆయన కుటుంబానికి ఉన్న నేరచరిత్ర కూడా లోకేశ్ పై దాడికి ఒక కారణమన్నారు. లోకేశ్ యాత్రను ముగించుకొని తిరిగొచ్చే సమయంలో దారికి అడ్డంగా లారీలుపెట్టి, పోలీసులే ఆయన వాహనాలను దారి మళ్లించారు తప్ప, తమకు తాముగా వేరేదారిలో వెళ్లలేదన్నారు. ప్రభుత్వం తన పాలనా వైఫల్యాలను కప్పిపుచ్చుకోవడానికే, దాడులకు పాల్పడుతోందన్నారు. భవిష్యత్ లో ఇటువంటి సంఘటనలు పురావృతమైతే, టీడీపీనేతలు, కార్యకర్తలుచూస్తూ ఊరుకోరని వెంకటేశ్ ప్రభుత్వాన్ని హెచ్చరించారు. రాజానగరం నియోజకవర్గం గతచరిత్ర చూస్తే, ఏనాడు అటువంటి దాడులు జరగలేదని, ఇప్పుడొచ్చిన కబ్జాకోరు, రౌడీ ఎమ్మెల్యే కారణంగానే అవన్నీ జరుగుతున్నాయన్నారు. నియోజకవర్గం ప్రజలు లోకేశ్ పర్యటనను ప్రేమాభిమానాలతో ఆదరించారని, అదిచూసి ఓర్వలేని వైసీపీమూకలు ఆయన్ని లక్ష్యంగా చేసుకొని దాడికి యత్నించాయని టీడీపీనేత రాజా స్పష్టంచేశారు. పురుషోత్తమపట్నం భూముల విషయంలో గత ప్రభుత్వం ఒక్కరైతుకి కూడా అన్యాయం చేయలేదన్నారు. వైసీపీకార్యకర్తలే రైతుల అవతారమెత్తి, లోకేశ్ పర్యటనను అడ్డగించారని, అంతజరుగుతున్నా పోలీసులు పట్టించుకోలేదన్నారు.

మాకున్న ప్రజాబలం చూసి చివరకు వైసీపీకార్యకర్తలే వెనక్కు తగ్గారని, లోకేశ్ పర్యటన తూర్పుగోదావరి జిల్లా టీడీపీశ్రేణుల్లో నూతనోత్సాహం నింపిందన్నారు. లోకేశ్ పర్యటనలో భద్రతా వైఫల్యం స్పష్టంగా కనిపించిందని, పోలీసులు ఎవరూకూడా సక్రమంగా తమ విధులు నిర్వర్తించలేదన్నారు. దాడులద్వారా లబ్దిపొందాలన్న ప్రయత్నాలను వైసీపీప్రభుత్వం మానుకోవాలని, లేకపోతే ప్రజలే వారిని ప్రతిఘటిస్తారని రాజా హెచ్చరించారు. త్వరలోనే ఉభయగోదావరి జిల్లాల్లో చంద్రబాబునాయుడి పర్యటన ఉంటుందని, ఆ సమయంలో వైసీపీకార్యకర్తలు, కిరాయిమూకలు తోకజాడించాలనిచూస్తే, టీడీపీ కార్యకర్తలు, ప్రజలు ఆతోకలు కత్తిరిస్తారన్నారు. లోకేశ్ పర్యటనలో విలేకరులను కూడా కొట్టారని, వైసీపీమూకల దౌర్జన్యకాండను చిత్రీకరిస్తున్నారన్నఅక్కసుతోనే వారిపై కూడా దాడిచేశారన్నారు. స్థానిక ఎమ్మెల్యే కనుసన్నల్లో, ఆయన ఆదేశాలప్రకారమే సీతానగరంలో లోకేశ్ పై దాడికి పాల్పడ్డారన్నారు. ఎమ్మెల్యే కుటుంబానికి ఎప్పటినుంచో రౌడీ కుటుంబమని పేరుందని, ఆపేరు ఇప్పుడు మరింత ఎక్కువైందన్నారు.

భవిష్యత్ లో నారాలోకేశ్ మరోమారు తూర్పుగోదావరిలో పర్యటిస్తారని, అప్పుడు కూడా ఇదేవిధంగా వైసీపీ శ్రేణులు వ్యవహరిస్తే, టీడీపీ కార్యకర్తలు తగినవిధంగా శాస్తి చేస్తారన్నారు. టీడీపీ ప్రభుత్వం పురుషోత్తమపట్నం రైతులకు సంపూర్ణ న్యాయం చేసిందని, వైసీపీ కార్యకర్తలైన రైతులకు కూడా రూ.28లక్షల చొప్పునపరిహారాన్ని అందచేసిందని రాజా వివరించారు. చంద్రబాబుకు, లోకేశ్ కు ఉన్న ప్రజాదరణ చూసి ఓర్వలేకనే వైసీపీ నేతలు వారిపై దాడికి పాల్పడుతున్నారన్నారు. లోకేశ్ పై జరిగిన దాడికి సంబంధించి, స్థానిక పోలీసులకు ఫిర్యాదుచేశామని, వారేం చర్యలు తీసుకుంటారో చూస్తామన్నారు. ప్రభుత్వ చర్యలను ప్రశ్నిస్తున్నారన్న అక్కసుతోనే మీడియాపై కూడా దాడులు చేస్తున్నారని, జగన్ ప్రభుత్వ దుశ్చర్యలను, దుర్మార్గాలను సమర్థించడం మీడియా కూడా మానుకోవాలన్నారు. జగన్మోహన్ రెడ్డి తమను ఆదరిస్తాడు.. బాగా చూసుకుంటాడన్న దురాలోచనతోనే వైసీపీ నేతలు ప్రతిపక్షనేతపై, ఆయన కుమారుడిపై దాడులు చేయడానికి ప్రయత్నిస్తున్నారన్నారు.

బీసీల రిజర్వేషన్ ను తమ పేలవమైన వాదనలతో, హైకోర్ట్ లో రిజర్వేషన్ కొట్టేసేలా చేసి, ఇప్పుడు సుప్రీం కోర్ట్ కు వెళ్ళకుండా, బీసీ రిజర్వేషన్ తగ్గించి, ఎన్నికలకు వెళ్ళటం పై, చంద్రబాబు మండి పడ్డారు. ఈ రోజు ఆయన మీడియా సమావేశం ఏర్పాటు చేసారు. చంద్రబాబు ఏమన్నారంటే... "బిసిల పట్ల రాష్ట్ర ప్రభుత్వం వ్యవహరిస్తున్న తీరును గర్హిస్తున్నాం, ఖండిస్తున్నాం. ఇది పద్దతి కాదని హెచ్చరిస్తున్నాం. ఆర్ధికంగా, సామాజికంగా బీసిలు శాశ్వతంగా వెనకబడి ఉండకుండా తగిన ఆదరణ, గుర్తింపు ఇవ్వాలి. బిసిల జనాభా 48%-50% కాబట్టి 34% రిజర్వేషన్లను 04.09.2013న అప్పటి ప్రభుత్వం కల్పించింది. 1995నుంచి 2020దాకా బిసిలకు రిజర్వేషన్లను 25ఏళ్లు కాపాడాం. వాటివల్ల బిసిలకు ఎనలేని లబ్ది చేకూరింది. 1987నుంచి 33ఏళ్లపాటు బిసిలకు రిజర్వేషన్ల లబ్ది చేకూరింది. అలాంటిది ఇప్పుడీ వైసిపి ప్రభుత్వం నిర్వాకం వల్ల బిసి రిజర్వేషన్లు 24%కు తగ్గుతాయి. 10% రిజర్వేషన్లను బిసిలు కోల్పోతారు. 16వేల మంది బిసిలు పదవులను కోల్పోతారు. ఇది మీ( వైసిపి ప్రభుత్వ) అసమర్ధత కాదా..? బిసిల పట్ల మీ కక్షకాదా..? 33ఏళ్లు కాపాడిన బిసి రిజర్వేషన్లను మీరు కాపాడలేక పోయారంటే ఇప్పుడు మిమ్మల్ని బిసి ద్రోహి అనాల్నా..? బిసి వ్యతిరేకి అనాల్నా..? మీ కేసులలో వాదించడానికి బ్రహ్మాండమైన లాయర్లను పెడతారు.

"ప్రజాధనం వాళ్లకు ఫీజులుగా కట్టబెడతారు. మరి బిసి రిజర్వేషన్ల కేసును ఎందుకు అనాధగా చూశారు..? కౌన్సిల్ రద్దుపై ఢిల్లీ వెళ్లి లాబీయింగ్ చేశారు, ప్రధానిని కలిశారు, అదే బిసి రిజర్వేషన్లపై వారితో ఎందుకని మాట్లాడలేదు..? బిసి రిజర్వేషన్లకు వ్యతిరేకంగా కోర్టుకు వెళ్లిన ఇద్దరూ వైసిపి వాళ్లే..రాఫ్తాడు మండల వైసిపి అధ్యక్షుడు బి రామాంజనేయులు ఒకరు కాగా, రెడ్ల సంక్షేమ సంఘం ప్రధాన కార్యదర్శి బిర్రు ప్రతాప్ రెడ్డి మరొకరు. నిన్న ఇచ్చిన తీర్పుపై సుప్రీంకోర్టుకు ఎందుకు పోవడం లేదో బిసిలకు సంజాయిషీ ఇవ్వాలి. డివిజన్ బెంచ్ వ్యతిరేకంగా తీర్పు ఇచ్చినా సుప్రీంకోర్టుకు వెళ్లి బిసి రిజర్వేషన్లను గత ప్రభుత్వాలు కాపాడాయి. ఈ 9నెలలు ఎందుకని నిద్రపోయారు..? అమరావతి నాశనం చేయాలి, పోలవరం నిలిపేయాలి, ప్రతిపక్షాలను నిర్వీర్యం చేయాలి,ఆర్ధిక మూలాలను దెబ్బతీయాలి, తప్పుడు కేసులతో మానసికంగా హింసించాలి అనేవాటిపైనేనా మీ దృష్టి అంతా..? బిసి రిజర్వేషన్లపై నిముషం కూడా ఆలోచించే తీరిక లేకుండా పోయిందా..? ఇప్పుడు పరీక్షల సీజన్ వచ్చింది, ఇన్నాళ్లు ఎందుకు నిద్రపోయారు..? ఆర్ధిక సంఘం డబ్బులు రావాలి కాబట్టి బిసిలకు అన్యాయం చేస్తారా..? దీనినింతటితో వదిలిపెట్టం, 131కులాల తరఫున సుప్రీంకోర్టుకు వెళ్లి పోరాడతాం. బిసి రిజర్వేషన్ల పరిస్థితి కేంద్రానికి వివరించి సాయం చేయమని ఎందుకు కోరలేదు..? కౌన్సిల్ రద్దుకు సాయం అడిగిన వాడివి బిసి రిజర్వేషన్లపై ఎందుకని అడగలేదు..? "

"గత ప్రభుత్వాలకు ఉన్న చిత్తశుద్ది మీకెందుకు లేకుండా పోయింది..? బిసిలకు 33% రిజర్వేషన్లు ఇవ్వాలని దేశం అంతా ఒత్తిడి చేస్తుంటే స్థానిక సంస్థల్లో బిసిలకు గతంనుంచి ఉన్న రిజర్వేషన్లలో కోత పెట్టడాన్ని ఏమనాలి..? ఇది బిసిలకు నమ్మక ద్రోహం కాదా..? ఇక్కడే బిసిలపై మీకున్న కక్ష బైటపడింది. మీరు ఇవ్వకపోతే పోయారు, మేము ఇచ్చింది తీసేసే హక్కు ఎవరిచ్చారు..? కావాలని ఎన్నికలు తెచ్చి శాశ్వతంగా బిసిలకు ద్రోహిగా మిగిలిపోవద్దు. నిన్న తీర్పు వస్తే కులసంఘాలతో, రాజకీయ పార్టీలతో మీరెందుకని చర్చించలేదు..? ఆరోజు కిరణ్ కుమార్ రెడ్డికి ఉన్న చిత్తశుద్ది,ఇంగిత జ్ఞానం మీకు లేదా..? 34% రిజర్వేషన్లను 40%కు పెంచాలిగాని, 24%కు తగ్గిస్తారా..? నోరుతెరిస్తే అన్నీ అబద్దాలే.. ఒక్కరోజైనా వాస్తవాలు చెప్పారా..? అబద్దాల కోరు పార్టీ వైసిపి.. మిగలబెడ్తామన్నారు పోలవరాన్ని ఏం మిగిలింది..? ఉద్దరిస్తామన్నారు రాష్ట్రాన్ని ఏం ఉద్దరించారు..? అమరావతిని ఉద్దరిస్తామన్నారు ఏం ఉద్దరించారు..? వీళ్లవల్ల మా పరువు పోయిందని కేంద్రమంత్రే అన్నారు. డిజిపిని హైకోర్టు పిలిచే పరిస్థితి. పర్యటనకు అనుమతి ఇచ్చి నాకు 151నోటీసు ఇస్తారు. రాష్ట్రాన్ని భ్రష్టు పట్టించారు, అప్రదిష్టపాలు చేశారు. భావితరాల భవిష్యత్తు అంధకారం చేశారు. మీ చేతగానితనానికి బిసిలు మాల్యం చెల్లించాలా..? బిసిల రాజకీయ భవిష్యత్తును శాశ్వతంగా సమాధి చేస్తారా..? వైసిపి ఉన్మాద చర్యలపై ప్రజలంతా ఆలోచించాలి. " అని చంద్రబాబు అన్నారు.

ఇప్పుడు ప్రభుత్వాలు, పారదర్శకత వైపు పరుగులు తీస్తున్నాయి. ప్రతి విషయం ప్రజలకు జవాబుదారీగా ఉంటున్నారు. ఆంధ్రప్రదేశ్ లో చంద్రబాబు ముఖ్యమంత్రిగా ఉండగా, ప్రతి డిపార్టుమెంటు ఏమి చేస్తుంది,ఎంత ఖర్చు పెడుతుంది అనే వివరాలు, సియం డ్యాష్ బోర్డు లో పెట్టేవారు. ఇప్పుడు ప్రభుత్వం మారిన తరువాత, ఆ డ్యాష్ బోర్డు కూడా సరిగ్గా పని చెయ్యటం లేదని, ఒకరోజు వస్తే, ఒక రోజు రాదు అంటూ విమర్శలు వచ్చాయి. ఇక మరో పక్క ప్రభుత్వం వరుస పెట్టి ఇస్తున్న రహస్య జీవోల విషయంలో కూడా, ఇలాగే విమర్శలు వస్తున్నాయి. ప్రజల దగ్గర దాయటానికి ఏమి ఉంటుంది ? ప్రతి విషయం ప్రజలకు తెలియాలి కదా ? ఏదన్నా మరీ రహస్యం అయితే, ఒకటో రెండో ఉంటాయి కాని, ఇలా వందల జీవోలు ఎందుకు ఉంటాయి అనే ప్రశ్నలు వస్తున్నాయి. అయితే ఇది ఇలా ఉంటే, నిన్న అర్ధరాత్రి, 11:45 గంటల నుంచి 11:55 మధ్య, 10 నిమిషాల్లో 10 రహస్య జీవోలు వచ్చాయి. ఈ జీవోలు పంచాయతీరాజ్ గ్రామీణాభివృద్ధి శాఖ, మున్సిపల్ పట్టణాభివృద్ధి శాఖకు చెందినవి కావటంతో, ఇవి ఎన్నికల విషయంలో ఇచ్చిన జీవో లు అంటూ ప్రచారం జరుగుతుంది. స్థానిక సంస్థలు ఎన్నికలు, 59.85 శాతం రిజర్వేషన్లతో కాకుండా, కేవలం 50 శాతం వరకే ఉండాలి అని కోర్ట్ చెప్పిన విషయం తెలిసిందే.

అయితే ప్రభుత్వం ఈ విషయంలో సరిగ్గా వాదనలు వినిపించలేదు అనే ఆరోపణలు వస్తున్నాయి. దానికి తగ్గట్టే వ్యవహరం కూడా నడించింది. హైకోర్ట్ 59.85 శాతం రిజర్వేషన్ రద్దు చేసిన వెంటనే, ప్రభుత్వం ఒకే అంటూ, బీసీల రిజర్వేషన్ తగ్గించి 50 శాతంతో ఎన్నికలకు వెళ్ళటానికి రెడీ అయ్యింది. అయితే, 59 శాతం పై చిత్తసుద్ధి ఉంటే, ప్రభుత్వం సుప్రీం కోర్ట్ కు వెళ్ళాలి కాని, ఇలా 50 శాతానికి ఎందుకు ఒప్పుకుంది ? బీసీలకు న్యాయం చేస్తాం అంటూ 59 శాతం రిజర్వేషన్ ఇచ్చినప్పుడు, దాని కోసం పోరాడాలి కదా ? ఎందుకు సరిగ్గా వాదనలు వినిపించలేదు అనే సందేహాలు కూడా కలుగుతున్నాయి. 24 ఏళ్ళుగా బీసీలకు 34 శాతం రిజర్వేషన్ ఉందని, ఇప్పుడు జగన్ ప్రభుత్వం నిర్వాకంతో, అది 25కి పడిపోయింది ఆనే వాదన వినిపిస్తుంది.

ఇదే సమయంలో, ప్రభుత్వం రహస్య జీవోలు ఇచ్చింది. బీసీ రిజర్వేషన్లను కుదిస్తూ, కొత్త రిజర్వేషన్లు ఖరారు చేస్తూ, ప్రభుత్వం జీవోలు ఇచ్చిందని, ప్రజా వ్యతిరేకత, న్యాయ పరమైన చిక్కులు వస్తాయనే, అవి రహస్యంగా ఉంచారని, వాదనలు వినిపిస్తున్నాయి. చివరి నిమిషం వరకు ఇవి చెప్పకుండా, ఎవరూ కోర్ట్ కు వెళ్ళకుండా, వీటిని రహస్య జీవోలో ఉంచి, ఎన్నికల నోటిఫికేషన్ వచ్చిన తరువాత, ఎలాగూ చెప్పాలి కాబట్టి, అప్పుడు బయటకు చెప్పే అవకాసం ఉన్నట్టు సమాచారం. నోటిఫికేషన్ ఇచ్చిన తరువాత, కోర్ట్ కు వెళ్ళినా, కోర్ట్ ఎన్నికలు ఆపమని ఆదేశాలు ఇచ్చే అవకాసం ఉండదని ప్రభుత్వం భావిస్తుంది. మొత్తానికి, రహస్య జీవోల ద్వారా, 24 ఏళ్ళుగా బీసీలకు ఉన్న 34 శాతం రిజర్వేషన్ ను ఎత్తేసే కుట్ర జగన్ చేస్తున్నారని, టిడిపి ఆరోపిస్తుంది.