news

వారం క్రితం, లోక్‌సభ ఎన్నికల్లో, ఈవీఎం విధానంలో జరిగిన ఎన్నికల్లో బీజేపీతో పాటు, దాని మిత్రపక్షాలు, రహస్య మిత్రులు, ఏకపక్షంగా ఎలా గెలిచారో చూసాం. అయితే, ఆ జోష్ మీద ఉన్న బీజేపీకి, బ్యాలట్ విధానంలో జరిగిన కర్ణటక స్థానిక సంస్థల ఫలితాలు స్పీడ్ బ్రేక్ వేశాయి. దాదాపు తుడిచిపెట్టుకు పోయిందనుకున్న కాంగ్రెస్ పార్టీ వారం రోజుల్లోనే పుంజుకుంది. బ్యాలెట్ విధానంలో జరిగిన స్థానిక సంస్థల ఎన్నికలో బీజేపీని వెనక్కునెట్టి దూసుకుపోయింది. రాష్ట్ర వ్యాప్తంగా 19 పట్టణ పంచాయతీలు, 7 నగర సభలు, 30 పురసభలతో పాటు పలు పాలికెలో ఖాళీగా వుండే వార్డులకు జరిగిన ఎన్నికలకు సంబంధించి ఫలితాలు శుక్రవారం వెలువడ్డాయి. 19 పట్ణణ పంచాయతీలకుగాను 8 చోట్ల బీజేపీ, మూడు చోట్ల కాంగ్రెస్‌, ఇతరులు 8 చోట్ల గెలుపొందారు. పురసభలో 30 చోట్లకుగాను బీజేపీ ఆరు స్థానాలతో సరి పెట్టుకోగా.. కాంగ్రెస్‌ ఏకంగా 12 చోట్ల తిరుగులేని రికార్డు నమోదు చేసింది. జేడీఎస్‌ రెండింటికే పరిమితం కాగా ఇతరులు 10 చోట్ల గెలుపొందారు.

7 నగర సభలకుగాను రెండు చోట్ల కాంగ్రెస్‌, 5 చోట్ల ఇతరులు గెలుపొందారు. వార్డుల ప్రకారం పరిశీలిస్తే 714 పురసభల్లో కాంగ్రెస్‌ 322, బీజేపీకి 184, జేడీఎస్‌ 102, ఇతరులు 107 చోట్ల గెలుపొందారు. పట్టణ పంచాయితీల పరిధిలో 290 వార్డులకు గాను కాంగ్రెస్‌ 97, బీజేపీ 126, జేడీఎస్‌ 34, ఇతరులు 33 చోట్ల, నగరసభల పరిధిలో 217కు గాను కాంగ్రెస్‌ 90, బీజేపీ 56, జేడీఎస్‌ 38, ఇతరులు 33 చోట్ల గెలుపొందారు. మొత్తంగా వార్డులను పరిశీలిస్తే 1221కిగాను కాంగ్రెస్‌ 509, బీజేపీ 365, జేడీఎస్‌ 174, స్వతంత్రులు 172 చోట్ల గెలుపొందారు. ఉదయం 8 గంటలకు కౌంటింగ్‌ ప్రక్రియ ప్రారంభం కాగా మధ్యాహ్నానికే ఫలితాలు వెల్లడయ్యాయి. బెంగళూరులో పాలికెలో సగయపుర వార్డు నుంచి కాంగ్రెస్‌ అభ్యర్థి పళణియమ్మ గెలుపొందగా కావేరిపుర వార్డు నుంచి బీజేపీ అభ్యర్థి పల్లవి చెన్నప్ప విజయం సాధించారు. రెండు వా ర్డులకు గాను జరిగిన కౌంటింగ్‌ కేంద్రాల వద్ద బీజేపీ, కాంగ్రెస్‌ సంబరాలు చేసుకున్నారు.

బళ్లారి జిల్లాలో మే 29వ తేదీన జరిగిన నాలుగు స్థానిక సంస్థల ఎన్నికల కౌంటింగ్‌ శుక్రవారం ఆయా తాలుకా తహసీల్దారు కార్యాలయాల్లో జరిగాయి. ఈ ఎన్నికల ఫలితాలలో హొసపేటె తాలుకా కమలాపురం పట్టణపంచాయతికి జరిగిన ఎన్నికల్లో మొ త్తం 20 స్థానాలకు ఓట్ల లెక్కింపు జరగ్గా... ఇందులో కాంగ్రె్‌సపార్టీ 14స్థానాల్లో, ఒక స్థానం బిజేపీ, మిగిలిన ఐదు స్థానాల్లో ఇండిపెండెండ్లు గెలుపొందారని జిల్లా ఎన్నికల అధికారి డా.రామ్‌ ప్రసాత్‌ మనోహర్‌ తెలిపారు. లోక్‌సభ ఎన్నికల్లో 28స్థానాలకు గాను బీజేపీ 25 స్థానాలు గెలుచుకోగా.. కాంగ్రెస్‌, జేడీఎస్‌ పార్టీలకు చెరో సీటు మాత్రమే సాధ్యమైంది. లోక్‌సభ ఎన్నికల ఫలితాల తర్వాత జరిగిన స్థానిక సమరంలోను బీజేపీకి తిరుగులేని రీతిలో ఫలితాలు ఉంటాయని భావించిన ఆ పార్టీ నేతలకు ఎదురుదెబ్బ తగిలింది. సార్వత్రిక ఎన్నికల్లో కాంగ్రెస్- జేడీఎస్‌లు కలిసి పోటీ చేయగా.. స్థానికంలో మాత్రం ఎవరికివారుగానే పోటీ చేశారు. అయినా బీజేపీ మాత్రం వెనుకబడింది.

అమెరికాలోని తమ దేశ ప్రత్యేక రాయబారి కిమ్‌ హయెక్‌ చోల్‌కు ఉత్తర కొరియా మరణశిక్ష అమలు చేసింది. ఉత్తర కొరియా అధ్యక్షుడు కిమ్‌ జోంగ్‌ ఉన్‌ను మోసం చేశారన్న ఆరోపణలతో ఆయనకు మరణశిక్ష అమలు చేసినట్టు దక్షిణ కొరియా న్యూస్‌పేపర్‌ ‘ది చోసన్‌ ఎల్బో’ వెల్లడించింది. అమెరికా అధ్యక్షుడు డోనాల్డ్‌ ట్రంప్, ఉత్తర కొరియా అధ్యక్షుడు కిమ్‌ జోంగ్‌ ఉన్‌ల మధ్య వియత్నాం రాజధాని హనోయ్‌లో జరిగిన రెండురోజుల శిఖరాగ్ర సదస్సులో హయెక్‌ చోల్‌ కీలకంగా వ్యవహరించారు. కిమ్‌తో పాటు ఆయన ప్రైవేటు రైలులో ప్రయాణించి హనోయ్‌ చేరుకున్నారు. ‘మార్చిలో మిరిమ్‌ విమానాశ్రయంలో కిమ్‌ హయెక్‌ చోల్‌కు ఫైరింగ్‌ స్క్వాడ్‌ మరణశిక్ష అమలు చేశారు. ఆయనతో నలుగురు విదేశాంగ అధికారులకు కూడా ఇదే శిక్ష విధించార’ని గుర్తు తెలియని వర్గాలు వెల్లడించినట్టు ‘ది చోసన్‌ ఎల్బో’ తెలిపింది. మరణశిక్షకు గురైన నలుగురు అధికారుల పేరు వెల్లడికాలేదు.

ఈ వ్యవహారంపై స్పందిం​చేందుకు ఉత్తర కొరియా ఆంతరంగిక వ్యవహారాల శాఖ నిరాకరించింది. ట్రంప్‌తో జరిగిన శిఖరాగ్ర సదస్సులో తప్పు చేశారన్న ఆరోపణలతో కిమ్‌కు దుబాసి(ట్రాన్స్‌లేటర్‌)గా వ్యవహరించిన షిన్‌ హయి యంగ్‌ను కూడా జైలుకు పంపినట్టు దక్షిణ కొరియా న్యూస్‌పేపర్‌ తెలిపింది. చర్చలు విఫలమైన నేపథ్యంలో ట్రంప్‌కు కిమ్‌ చేసిన కొత్త ప్రతిపాదనను అనువదించడంలో షిన్‌ హయి విఫలమయ్యారని ఆమెపై అభియోగాలు నమోదు చేసినట్టు వెల్లడించింది. కాగా, హనోయ్‌లో కిమ్‌, ట్రంప్‌ మధ్య ఫిబ్రవరిలో జరిగిన రెండురోజుల శిఖరాగ్ర సదస్సు ఒప్పందాలేమీ లేకుండానే ముగిసింది.

హనోయ్‌ శిఖరాగ్ర సమావేశం విఫలం కావడానికి అమెరికా, కొరియా అప్పట్లో వేర్వేరు కారణాలు చెప్పాయి. యాంగ్‌బియాన్‌ అణు కేంద్రాన్ని ధ్వంసం చేస్తామని, అందుకు ప్రతిఫలంగా తమపై విధించిన ఆంక్షలన్నీ ఎత్తేయాలని కిమ్‌ కోరినట్టు అమెరికా తెలిపింది. అక్కడున్న రెండో అణుకేంద్రాన్ని సైతం ధ్వంసం చేస్తేనే ఆంక్షలు సంపూర్ణంగా ఎత్తేస్తామని తాము చెప్పడంతో చర్చల్లో ప్రతిష్టంభన ఏర్పడిందని వెల్లడించింది. అమెరికా అమలు చేస్తున్న 11 ఆంక్షల్లో అత్యంత కీలకమైన అయిదింటిని మాత్రమే రద్దు చేయమని అడిగామని ఉత్తర కొరియా తెలిపింది.

తగిన పర్యావరణ అనుమతులు వచ్చే వరకు ‘గోదావరి-కృష్ణా-పెన్నా’ నదుల అనుసంధానం ప్రాజెక్టు పనులు నిలిపేయాలని జాతీయ హరిత ట్రైబ్యునల్‌ (ఎన్జీటీ) ఆదేశించింది. అనుమతులు లేకుండా ప్రాజెక్టు పనులు చేస్తున్నారంటూ మాజీ మంత్రి వట్టి వసంత్‌కుమార్‌, త్రినాథరెడ్డిలు దాఖలు చేసిన పిటిషన్‌ను జస్టిస్‌ ఆదర్శకుమార్‌ గోయెల్‌ నేతృత్వంలోని ధర్మాసనం విచారించింది. తుది ఆదేశాలను శుక్రవారం వెబ్‌సైట్లో పెట్టింది. ‘సీడబ్ల్యూసీ, పర్యావరణ, అటవీ, వాతావరణ శాఖ అనుమతులు లేకుండా ప్రాజెక్టు పనులు చేస్తున్నారంటూ పిటిషన్‌ దాఖలైంది. దీంతో కేంద్ర పర్యావరణ శాఖ, రాష్ట్ర కాలుష్య నియంత్రణ మండలి(ఎస్‌పీసీబీ)ల నివేదిక కోరాం. ఎస్‌పీసీబీ నివేదిక ప్రకారం ప్రాజెక్టుకు పర్యావరణ అనుమతులు కావాల్సి ఉంది.

కేంద్ర పర్యావరణ శాఖ ఇప్పటివరకు నివేదిక ఇవ్వలేదు. అవసరమైన పర్యావరణ అనుమతులు వచ్చేవరకు ప్రాజెక్టును అనుమతించలేం. ఈ అంశంలో ఏపీ ప్రభుత్వ స్పందన అవసరం. ప్రాజెక్టు పనులు ముందుకు సాగకుండా మేం నిరోధిస్తాం. కేంద్ర కాలుష్య నియంత్రణ మండలి, ఎస్‌పీసీబీలతో కలిసి కేంద్ర పర్యావరణ, అటవీ, వాతావరణ మంత్రిత్వశాఖ చెన్నైలోని ప్రాంతీయ కార్యాలయం నెల రోజుల్లో ప్రాజెక్టును తనిఖీ చేసి నివేదిక ఇవ్వాలి. ఈ ఆదేశాల ప్రతులు రాష్ట్ర ప్రభుత్వం, కేంద్ర పర్యావరణ శాఖ చెన్నై కార్యాలయం, ఎస్‌పీసీబీ, సీపీసీబీలకు ఈమెయిల్‌ ద్వారా పంపుతున్నాం. తదుపరి విచారణ ఆగస్టు 13న జరుపుతాం’ అని ఆదేశాల్లో స్పష్టం చేసింది.