news

ఎన్నికల ఫలితాలకు నెల రోజులు ముందు నుంచే అధికార, ప్రతిపక్ష పార్టీలు ఘాటైన విమర్శలు చేసుకుంటున్నాయి. ఆపద్ధర్మ ముఖ్యమంత్రిగా ఉన్న సీఎం చంద్రబాబు నాయుడు అధికారికంగా సమీక్షలు సమావేశాలు నిర్వహిస్తున్నారంటూ వైసీపీ నేతలు విమర్శిస్తున్నారు. దీనిపై ఈసీకి ఫిర్యాదు చేశారు. వెంటనే ఈసీ కూడా విజయసాయి ఏది చెప్తే అది చేసేస్తుంది. సీఎం సమీక్షలు జరిపితే తప్పేంటి అని టీడీపీ నేతలు మండిపడుతున్నారు. ఈ నేపథ్యంలో ఏపీ వ్యవసాయశాఖ మంత్రి సోమిరెడ్డి చంద్రమోహన్ రెడ్డి ఆసక్తికరమైన వ్యాఖ్యలు చేశారు. ఎన్నికల సంఘానికి,వైసీపీకి ఆయన సవాల్ విసిరారు. వ్యవసాయ శాఖపై సమీక్ష జరుపుతామన్నారు.

ఎవరు అడ్డొస్తారో చూస్తానన్నారు సోమిరెడ్డి. ఎవరైనా తన సమీక్షను అడ్డుకొంటే దానిపై సుప్రీంకోర్టుకు వెళ్తానన్నారు. సీఎం మంత్రులు ఇంట్లో కూర్చోవాలా ? అంటూ ఆయన మండిపడ్డారు. 43 రోజులు ప్రజలను గాలికి వదిలేయ్యమంటారా అని అన్నారు. పరిపాలించే హక్కు రాజ్యంగం మాకు కల్పించిందన్నారు. తెలంగాణలో విద్యార్థులు చనిపోతుంటే, ఈసీ బాధ్యత వహిస్తుందా? లేక ప్రభుత్వమా అంటూ సోమిరెడ్డి నిలదీశారు. రిజర్వ్ బ్యాంక్ గైడ్ లైన్స్ తెలియని ఆనం ఆర్థిక మంత్రిగా ఎలా పనిచేశారంటూ ఎద్దేవా చేశారు. ఇంటర్ విద్యార్థుల ఆత్మహత్యల పై తెలంగాణ ప్రభుత్వమే సమాధానం చెప్పాలన్నారు. ఎన్నికల కోడ్ అమలులో ఉన్న సమయంలో ఎమ్మెల్యేలు, టీడీపీ నేతలతో.. ప్రభుత్వ సదుపాయం అయిన ప్రజావేదికలో ముఖ్యమంత్రి సమావేశం నిర్వహిస్తున్నారన్నది విజయసాయి అభ్యంతరమట.

ఇది ఇలా ఉంటే, తెలంగాణాలో మాత్రం, అసలు ఏ విధమైన హద్దులు లేకుండా ప్రభుత్వం నడిచేస్తుంది. ఓవైపు ఎన్నికల నియమావళిపై తీవ్రస్థాయిలో చర్చ జరుగుతున్న సమయంలోనే తెలంగాణ సర్కారు ఏకంగా 49 మంది ఉన్నతాధికారులకు పదోన్నతి కల్పించడం ఆశ్చర్యం కలిగిస్తోంది. ఎన్నికల కోడ్ అమల్లో ఉండడంతో ఈసీ అనుమతితో తెలంగాణ సర్కారు ఈ నిర్ణయం తీసుకుంది. పదోన్నతి పొందినవారిలో 26 మంది ఐఏఎస్ లు, 23 మంది ఐపీఎస్ అధికారులున్నారు. ఇందుకోసం టి-సర్కారు 15 జీవోలు జారీచేసింది. కేంద్ర సర్వీసుల్లో ఉన్న అధికారులకు కూడా ఈ సందర్భంగా ప్రమోషన్ ఇచ్చారు.

కలియుగ వైకుంఠం, తిరుమల శ్రీవారి సాక్షిగా ఆంధ్రప్రదేశ్ కు ప్రత్యేక హోదా హామీ ఇచ్చి మాట తప్పారు. తరువాత శ్రీవారి ఆలయన్ని మన ఆంధ్రప్రదేశ్ ఆధీనంలో లేకుండా చెయ్యాలని ప్లాన్ వేసారు. దీనికి బీజం వేస్తూ, తిరుమలను, రాష్ట్ర ప్రభుత్వం నుంచి వేరు చెయ్యవలసిందిగా సుప్రీంలో కేసు వేసారు రాజ్యసభ సభ్యుడు, భాజపా నేత సుభ్రమణ్య స్వామి. ఈ విషయం పై అప్పట్లో తన ట్విట్టర్ లో పోస్ట్ చేసారు.. ఇలా కేసులు వేసి, మన వెంకన్న స్వామిని తన, హ్యాండ్ ఓవర్ లో ఉంచుకోవాలని, బీజేపీ పన్నాగం పన్నింది. అయితే కేంద్రం కంటే, రాష్ట్రం కంటే, వెంకన్నకు తనని తాను కాపాడుకోవటం బాగా తెలుసు. పావురాల గుట్ట సాక్షిగా అది రుజువైంది కూడా. టీటీడీ పై బీజేపీ నేత సుబ్రమణ్యస్వామి వేసిన పిటిషన్‌ను సుప్రీంకోర్టు తిరస్కరించింది. హైకోర్ట్ లో తేల్చుకోవాలని చెప్పెంది. దీంతో ఈ కేసు హైకోర్ట్ కు వచ్చింది.

తిరుమల తిరుపతి దేవస్థానానికి (తితిదే) చెందిన గత మూడేళ్ల ఖర్చులపై బయటి వ్యక్తులతో ఆడిట్‌ నిర్వహించేలా ఆదేశించాలని అభ్యర్థిస్తూ సుబ్రమణ్యస్వామి దాఖలు చేసిన అనుబంధ పిటిషన్‌పై హైకోర్టులో వాదనలు ముగిశాయి. ఇరువైపులా వాదనలు విన్న ధర్మాసనం నిర్ణయాన్ని వాయిదా (రిజర్వు) వేసింది. హైకోర్టు తాత్కాలిక ప్రధాన న్యాయమూర్తి జస్టిస్‌ సి.ప్రవీణ్‌ కుమార్‌, జస్టిస్‌ ఎం.సత్యనారాయణమూర్తితో కూడిన ధర్మాసనం ఈ మేరకు ఆదేశాలిచ్చింది. సోమవారం విచారణలో సుబ్రమణ్యస్వామి నేరుగా వాదనలు వినిపిస్తూ.. దేవాలయాల నిర్వహణలో వివాదం తలెత్తినప్పుడే పరిపాలనాంశాల్లో ప్రభుత్వానికి పరిమిత కాలంతో అజమాయిషీ ఉంటుందని సుప్రీంకోర్టు తీర్పు ఇచ్చిందన్నారు.

ఆలయాల నిర్వహణ ప్రభుత్వం పనికాదని స్పష్టంగా పేర్కొందని తెలిపారు. 85ఏళ్ల నుంచి ప్రభుత్వం తితిదేను నియంత్రిస్తోందని చెప్పారు. సర్కారు తరఫున అడ్వొకేట్‌ జనరల్‌ (ఏజీ) దమ్మాలపాటి శ్రీనివాస్‌ వాదనలు వినిపిస్తూ.. తితిదే విషయంలో ప్రభుత్వ జోక్యం లేదని తెలిపారు. తితిదే వ్యవహారాల్ని పర్యవేక్షించేందుకు ఓ కమిటీ ఉందని చెప్పారు. తితిదే తరఫు న్యాయవాది లలిత వాదనలు వినిపిస్తూ.. ఆర్థిక సలహాదారు, చీఫ్‌ అకౌంట్స్‌ అధికారి (ఎఫ్‌ఏసీఏవో) ఆడిట్‌ వ్యవహారాలను చూస్తుంటారని వెల్లడించారు. ఆడిట్‌ నిర్వహించలేదని పిటిషనరు చెబుతున్నదాంట్లో వాస్తవం లేదని స్పష్టం చేశారు.

ఇటీవల కర్ణాటక లోక్ సభ ఎన్నికల్లో జేడీఎస్-కాంగ్రెస్ కూటమి తరఫున ప్రచారం నిర్వహించిన టీడీపీ అధినేత, ఏపీ ముఖ్యమంత్రి చంద్రబాబు నాయుడు మరో పర్యటనకు సిద్ధమయ్యారు. ఈరోజు చంద్రబాబు నాయుడు మహారాష్ట్రలో ఎన్నికల ప్రచారం నిర్వహించనున్నారు. మహారాష్ట్రలోని ఎన్సీపీ-కాంగ్రెస్ కూటమి తరఫున ఆయన ప్రచారం నిర్వహిస్తారు. ఇందులో భాగంగా ఇప్పటికే ముంబైకి చేరుకున్నారు. ఈ పర్యటనలో భాగంగా తొలుత ముంబైకి చేరుకున్న అనంతరం ఈవీఎంలు, వీవీప్యాట్ల పనితీరులో ఉన్న లోపాలపై అఖిలపక్ష నేతలతో చంద్రబాబు చర్చించారు. మరి కాసేపట్లో వీబీ చవాన్ కూడలిలో కాంగ్రెస్-ఎన్సీపీ కూటమి అభ్యర్థి తరఫున ప్రచారం నిర్వహిస్తారు. తిరిగి సాయంత్రం విజయవాడకు చంద్రబాబు చేరుకుంటారు.

వీవీ ప్యాట్‌ స్లిప్‌ల లెక్కింపు పై నిర్వచించిన అఖిల పక్ష సమావేశానికి తెజస రాష్ట్ర అధ్యక్షుడు కోదండరాం కూడా హయరయ్యారు. తెదేపా అధ్యక్షుడు నారా చంద్రబాబునాయుడు ఆహ్వానం మేరకు ఆయన ఆ భేటీలో పాల్గున్నారు. ఈవీఎంలలో లోపాలను సరిదిద్దడంలో ఎన్నికల సంఘం విఫలమవుతోందని చంద్రబాబు ఆరోపించారు. చాలా దేశాలు బ్యాలెట్‌ పద్ధతిలోనే ఎన్నికలు నిర్వహిస్తున్నాయని చెప్పారు. 50 శాతం వీవీప్యాట్‌ స్లిప్పులు లెక్కించాలని 23 పార్టీలు సుప్రీంకోర్టును ఆశ్రయించినట్లు చంద్రబాబు గుర్తుచేశారు. ఓట్ల లెక్కింపునకు 6రోజులు పడుతుందని ఎన్నికల సంఘం చెప్పడం హాస్యాస్పదమన్నారు. ఎవరికి ఓటు వేశామనేది వీవీప్యాట్‌లో 7 సెకన్లు కనపడాలని.. అది కేవలం 3 సెకన్లు మాత్రమే కనిపిస్తోందని ఆరోపించారు.

వీవీప్యాట్‌ల కోసం రూ.9వేల కోట్లు ఖర్చు పెట్టి ఏం చేశారని ఈసీని చంద్రబాబు ప్రశ్నించారు. ఈవీఎంలోని ఓట్లు, వీవీప్యాట్‌ స్లిప్పులు సరిపోలాలన్నారు. ఈవీఎంల్లో లోపాలు వస్తే సరిచేసేందుకు సరైన సిబ్బంది లేకపోవడం ఆశ్చర్యకరంగా ఉందన్నారు. ఉదయం లోపాలు వస్తే మధ్యాహ్నానికి సరిచేసే పరిస్థితి ఉందని చెప్పారు. ఏపీలో సీఈవో కూడా ఓటు వేసేందుకు ఇబ్బంది పడాల్సిన పరిస్థితి ఎదురైందని గుర్తు చేశారు. ప్రజాస్వామ్యాన్ని కాపాడుకోవాల్సిన అవసరం ఉందన్నారు. మోదీ హయాంలో స్వతంత్ర దర్యాప్తు సంస్థలు నిర్వీర్యమయ్యాయని, కేంద్ర ప్రభుత్వానికి వ్యతిరేకంగా మాట్లాడితే ఐటీ, సీబీఐ, ఈడీ వంటి సంస్థలతో దాడులు చేయిస్తూ కక్షపూరితంగా వ్యవహరిస్తున్నారని చంద్రబాబు మండిపడ్డారు.