news

ఎన్నికల సంఘం పనితీరుపై సుప్రీం కోర్టు తీవ్ర అభ్యంతరం వ్యక్తం చేసింది. ప్రధాన పార్టీల నేతలు ఎన్నికల కోడ్‌ ఉల్లంఘిస్తున్నా ఈసీ చర్యలు తీసుకోకపోవడంపై.. సుప్రీం కోర్టులో పిటిషన్ దాఖలైంది. దీనిపై సోమవారం విచారించిన సుప్రీం ధర్మాసనం.. ఎన్నికల సంఘం పనితీరుపై అసంతృప్తి వ్యక్తం చేసింది. ‘‘అసలు మీరేం చేస్తున్నారు. ఎంత మందికి నోటీసులు పంపారు. మీ అధికారాలు ఏంటో మీకు తెలుసా? ఒక వేళ సరైన సమాధానాలు ఇవ్వకపోతే.. చీఫ్ ఎలక్షన్ కమిషనర్‌ను పిలవాల్సి వస్తుంది’’ అంటూ ఘాటుగా వ్యాఖ్యానించింది. ఈ సందర్భంగా చీఫ్ జస్టిస్ రంజన్ గొగొయ్ మాట్లాడుతూ.. యూపీ ముఖ్యమంత్రి యోగి ఆదిత్యానాథ్ వ్యాఖ్యలను ప్రస్తావించారు. ఆయనపై ఎలాంటి చర్యలు తీసుకున్నారని ఈసీ తరఫు న్యాయవాదిని ప్రశ్నించగా.. ఈ కేసు క్లోజ్ అయ్యిందని తెలిపారు. అనంతరం ధర్మాసనం స్పందిస్తూ.. ఈసీ ప్రతినిధి హాజరు కావాలని.. కుల, మతపర విద్వేషపూరిత వ్యాఖ్యలు చేసేవారిపై నిబంధనల ప్రకారం ఎలాంటి శిక్షలు ఉంటాయో పూర్తి వివరణ ఇవ్వాలని ఆదేశించింది.

అయితే, కేంద్ర ఎన్నికల సంఘం తీరుపై సుప్రీంకోర్టు తీవ్ర అసంతృప్తి వ్యక్తంచేసిన నేపథ్యంలో ఉత్తర్‌ప్రదేశ్‌ ముఖ్యమంత్రి యోగి ఆదిత్యనాథ్‌, బీఎస్పీ అధినేత్రి, మాజీ సీఎం మాయావతిపై ఈసీ కొరడా ఝళిపించింది. ఎన్నికల వేళ ఇరువురు నేతల ప్రచారంపై పలు ఆంక్షలు విధించింది. వివరాల్లోకి వెళ్తే.. ఈ నెల 7న యోగి ఆదిత్యనాథ్‌, మాయావతి చేసిన మతపరమైన వ్యాఖ్యలపై ఈసీకి పలు ఫిర్యాదులు అందాయి. ఈ నేపథ్యంలో సుప్రీంకోర్టులో అ అంశాన్ని పలువురు న్యాయవాదులు ప్రస్తావించారు. ఫిర్యాదులు అందినా ఎన్నికల సంఘం ఎలాంటి చర్యలూ తీసుకోలేదని న్యాయస్థానం దృష్టికి తీసుకొచ్చారు. ఈ నెల 7న ఇద్దరు నేతలూ మతపరమైన వ్యాఖ్యలు చేసినప్పటికీ ఈసీ కనీసం ప్రస్తావించడంగానీ, దానిపై చర్యలు తీసుకుంటున్నట్టు ప్రకటన గానీ చేయలేదని.. దీనిపై న్యాయస్థానం జోక్యంచేసుకొని ప్రత్యేక చర్యలు తీసుకోవాలని కోరారు. దీంతో సుప్రీంకోర్టు ఎన్నికల సంఘం తీరును తీవ్రంగా తప్పుపట్టింది.

మతపరమైన, సైనికపరమైన, దేశభద్రతకు సంబంధించిన అంశాలపై రాజకీయ నేతలు తమ ఎన్నికల ప్రసంగాల్లో విచ్చలవిడిగా మాట్లాడుతున్న సందర్భాల్లో ఎలాంటి చర్యలు తీసుకుంటున్నారని ప్రశ్నించింది. అసలు ఎన్నికల సంఘం పనిచేస్తోందా? ఇలాంటి ఎందుకు పట్టించుకోవడంలేదని ప్రశ్నించింది. రాజకీయ నాయకులు ఇలాంటి వ్యాఖ్యలతో ఎన్నికల ప్రవర్తనా నియమావళిని ఉల్లంఘిస్తుంటే ఏం చేస్తున్నారని ఆగ్రహం వ్యక్తంచేసిన ఒకట్రెండు గంటల్లోనే ఈసీ చర్యలు చేపట్టింది. మతపరమైన వ్యాఖ్యలు చేసిన యూపీ సీఎం యోగి ఆదిత్యనాథ్‌ మంగళవారం ఉదయం 6గంటల నుంచి 72 గంటల పాటు ప్రచారంలో పాల్గొనరాదని ఆదేశించింది. అలాగే ఆయన చేసిన వ్యాఖ్యలకు ప్రతిస్పందిస్తూ వ్యాఖ్యలుచేసిన మాయావతిపై 48గంటల పాటు ఎన్నికల ప్రచారం చేయవద్దని ఆంక్షలు విధించింది.

జనసేన అధినేత పవన్‌ కల్యాణ్‌ పోటీ చేసిన విశాఖలోని గాజువాక నియోజకవర్గంలో పోలింగ్‌ సరళి ఉత్కంఠభరింతంగా సాగింది. ఆయన గెలుస్తారా? లేదా? అన్నది రాష్ట్రవ్యాప్తంగా అత్యంత ఆసక్తికర అంశంగా మారింది. మొత్తం 3,09,326 ఓటర్లతో జిల్లాలోనే అతి పెద్ద నియోజకవర్గంగా ఉన్న గాజువాకలో తెదేపా నుంచి పల్లా శ్రీనివాసరావు నుంచి తీవ్ర పోటీ ఎదురవుతుందని తొలుత ప్రచారం జరిగింది. అనూహ్యంగా వైకాపా అభ్యర్థి తిప్పల నాగిరెడ్డి బలమైన పోటీనిచ్చారు. 2009 ఎన్నికల్లో స్వతంత్ర అభ్యర్థిగా, 2014లో వైకాపా అభ్యర్థిగా పోటీచేసిన నాగిరెడ్డి సానుభూతి అస్త్రంగా ప్రచారం చేశారు. వయసురీత్యా పెద్దవారైన ఆయన ఇప్పుడు తాను గెలవకపోతే మరో ఐదేళ్ల తరువాత తాను పోటీ చేసే పరిస్థితి కూడా ఉండదని ఓటర్లకు చెబుతూ వచ్చారు.

మరోవైపు వైకాపా వర్గీయులు గత అయిదు రోజులుగా భారీస్థాయిలో తాయిలాలు పంచారు. ఈ నియోజకవర్గంపై ప్రత్యేక దృష్టి సారించి వ్యూహం ప్రకారం వెళ్లారు. దీంతోపాటు పవన్‌కల్యాణ్‌కు గాజువాకలో ఆది నుంచి పలు అవాంతరాలు ఎదురవుతానే ఉన్నాయి. ఒక బహిరంగసభ రద్దు కావడం, వడదెబ్బ కారణంగా గాజువాకలో విస్తృత ప్రచారం చేసే అవకాశం దొరక్కపోవడం ఇబ్బందిగా మారాయి. గురువారం పోలింగ్‌ సందర్భంగా నెలకొన్న పరిస్థితులు కూడా పవన్‌ విజయావకాశాల్ని సంక్లిష్టం చేశాయని తెలుస్తోంది. చాలామంది పవన్‌ అభిమానులు పోలింగ్‌ బూత్‌లకు వచ్చినా.. ఈవీఎంలు మొరాయించడంతో కొందరు వెనక్కి వెళ్లిపోయారు. ఓటు వేయడానికి క్యూలైన్లలో గంటలపాటు నిరీక్షించాల్సిన పరిస్థితుల్లో చాలామంది నిష్క్రమించారు.

మరోపక్క ఎండ కూడా తీవ్రంగా ఉండడంతో చాలామంది ఓటింగ్‌కు హాజరుకాలేదు. అయితే పవన్‌కు గంగవరం, అగనంపూడి, కూర్మన్నపాలెం, దువ్వాడ, మింది, వడ్లపూడి తదితర ప్రాంతాల నుంచి గట్టి మద్దతు లభించినట్టు తెలుస్తోంది. అలాగే తెదేపా అభ్యర్థి, ప్రస్తుత ఎమ్మెల్యే పల్లా శ్రీనివాసరావు నియోజకవర్గంలో సౌమ్యుడిగా, కష్టపడి పనిచేసే వ్యక్తిగా, పలు సమస్యల్ని సమర్థంగా పరిష్కరించిన నేతగా గుర్తింపు పొందారు. తెదేపాకున్న బలమైన ఓటుబ్యాంకు, తన అభిమానులు, తన నిర్ణయాల కారణంగా లబ్ధి పొందిన వారు ఓటేస్తే తాను సునాయాసంగా విజయం సాధిస్తానని పల్లా ధీమాగా ఉన్నారు.

ఓటుహక్కు వినియోగించుకునేందుకు పోలింగ్‌ కేంద్రాలకు వెళ్లిన తొమ్మిదిమంది వృద్ధులు తుదిశ్వాస విడిచారు. గురువారం గుంటూరు జిల్లా వేమూరు మండలం కుచ్చెళ్లపాడుకు చెందిన షేక్‌ బీజాన్‌బీ(100) కుటుంబసభ్యుల సాయంతో పోలింగ్‌ బూత్‌లోకి వెళ్తూ ఒక్కసారిగా కుప్పకూలి ప్రాణాలొదిలారు. అదే జిల్లా అమరావతి మండలం కర ్లపూడికి చెందిన రిటైర్డ్‌ పోస్టల్‌ ఉద్యోగి దేవరకొండ ప్రసాద్‌(70) మనవరాళ్లతో పోలింగ్‌ బూత్‌కు వెళ్లి సిబ్బందికి గుర్తింపుకార్డు చూపిస్తూనే కుప్పకూలి మరణించారు. తూర్పు గోదావరి జిల్లా కోటనందూరు మండలం కేఈ చిన్నయ్యపాలెంకు చెందిన శీరం మాణిక్యం(64) పోలింగ్‌ క్యూలో ఎండ తీవ్రతకు సొమ్మసిల్లి పడిపోయారు. ఆస్పత్రికి తరలిస్తుండగా మరణించారు. కృష్ణాజిల్లా ఆత్కూరు గ్రామానికి చెందిన షేక్‌ మస్తాన్‌(57) క్యూలో విపరీతంగా చెమటలు పట్టి గుండెపోటుతో కుప్పకూలారు. ఆస్పత్రికి తరలించేలోగానే మరణించారు.

శ్రీకాకుళం జిల్లా టెక్కలి మండలం తొలుసూరుపల్లికి చెందిన బగాది సరస్వతి(85) కుటుంబసభ్యుల సాయంతో వీల్‌చైర్‌లో పోలింగ్‌ కేంద్రానికి వచ్చి ఓటు వేశారు. తిరిగి ఇంటికి వెళ్తూ మార్గం మధ్యలోనే ఆమె మరణించారు. కృష్ణాజిల్లా కంచికచర్ల మండలం మోగులూరుకు చెందిన బోజేడ్ల లీలావతి(75) ఎండ 40 డిగ్రీలు ఉందని కుటుంబసభ్యులు వారిస్తున్నా పోలింగ్‌ కేంద్రానికి వచ్చారు. ఓటు వేసి బయటకు వచ్చి ఒక్కసారిగా కుప్పకూలిపోయారు. ఆస్పత్రికి తరలిస్తుండగానే ఆమె మృతిచెందారు. చిత్తూరు జిల్లాలో పెద్దపంజాణి మండలం ముత్తుకూరుకు చెందిన మొగిలమ్మ(85) ఓటు వేసి ఇంటికి వెళ్లగానే వడదెబ్బతో మృతి చెందారు. అనంతపురం జిల్లా రొద్దం మండలంలో మండ్లి గంగమ్మ(70) ఉదయం 11 గంటలకు జెడ్పీ స్కూల్‌లో ఓటు వేసి ఎండలో ఇంటికి తిరిగివచ్చి ప్రాణాలు వదిలారు. పోలింగ్‌ కేంద్రాల వద్ద సరైన సౌకర్యాలు కల్పించనందునే వృద్ధులు వడదెబ్బకు మరణించారని వారి కుటుంబసభ్యులు ఆరోపించారు.

చివరి ఓటు చంద్రబాబుకే.. పశ్చిమగోదావరి జిల్లా తణుకు మండలం దువ్వ గ్రామానికి చెందిన బండారు ముసలయ్య(75) ‘పింఛన్‌ పెంచిన చంద్రబాబునే గెలిపించాలి.. మా బాబునే గెలిపించాలి..’ అంటూ ఎన్నికల ముందు నుంచి అందరికీ చెబుతూ ఉండేవారు. గురువారం ఉదయం 10 గంటలకు ఆయన హుషారుగా నడుచుకుంటూ గ్రామంలోని 15వ నంబరు పోలింగ్‌బూత్‌కు వెళ్లి ఓటు వేశారు. అంతే ఉత్సాహంగా బయటకు వచ్చి ఒక్కసారిగా కుప్పకూలిపోయారు. ఆయన మరణించినట్టు తెలియడంతో కుటుంబ సభ్యులు ఘొల్లుమన్నారు. చంద్రబాబును గెలిపించాలంటూ ఉదయం కూడా హడావుడి చేశాడని కన్నీరుమున్నీరుగా విలపించారు.