news

మంత్రి దేవినేని ఉమ.. సీఎం చంద్రబాబుకు అత్యంత సన్నిహితుడు. కీలకమైన జలవనరుల శాఖకు మంత్రిగా ఉన్నారు. 1999 నుంచి ఓటమెరుగని నేత.. మైలవరం బరిలో వరుసగా మూడోసారీ గెలిచి హ్యాట్రిక్‌ సాధించేందుకు సర్వశక్తులు ఒడ్డుతున్నారు.. ఇటు వైసీపీ తరపున బరిలోకి దిగిన వసంత కృష్ణప్రసాద్‌.. ఆయన తండ్రి వసంత నాగేశ్వరరావు ఒకప్పుడు టీడీపీలో సీనియర్‌ నేత. ఎన్టీఆర్‌ కేబినెట్‌లో హోంమంత్రిగా కూడా పనిచేశారు. కాలక్రమంలో కాంగ్రెస్‌లోకి వెళ్లి.. ఇప్పుడు వైసీపీలో చేరారు. తన కుమారుడిని మైలవరం నుంచి వైసీపీ అభ్యర్థిగా బరిలోకి దించారు. ఇద్దరిదీ ఒకే సామాజికవర్గం. అంగబలం, అర్థ బలంలో ఒకరికొకరు తీసిపోరు. ఇద్దరు ఉద్దండుల నడుమ ఈ నియోజకవర్గంలో హోరాహోరీ సమరం సాగుతోంది.

కృష్ణా జిల్లా మైలవరంలో ఈ దఫా రాజకీయ వైరమే ప్రాతిపదికగా ఎన్నికలు జరుగుతున్నాయి. దేవినేని నందిగామ జనరల్‌ స్థానంలో 1999లో కాంగ్రెస్‌ అభ్యర్థి వసంత వెంకట కృష్ణప్రసాద్‌ను 23 వేలకుపైగా ఓట్ల ఆధిక్యంతో ఓడించారు. 2004 ఎన్నికల్లో వసంత నాగేశ్వరరావే కాంగ్రెస్‌ తరపున బరిలోకి దిగారు. దేవినేనికి గట్టి పోటీ ఇచ్చినా పరాజయం పాలయ్యారు. నాటి రాజకీయ వైరం ఇంకా కొనసాగుతోంది. కాలక్రమంలో నందిగామ ఎస్సీ రిజర్వుడు నియోజకవర్గంగా మారడంతో దేవినేని మైలవరం స్థానాన్ని ఎంచుకుని 2009, 14ల్లో విజయం సాధించారు. రాష్ట్ర విభజన తర్వాత చంద్రబాబు మంత్రివర్గంలో కీలక మంత్రిగా మారారు. వైసీపీ అధ్యక్షుడు జగన్‌ను ఎప్పటికప్పుడు తీవ్రంగా విమర్శించే దేవినేనిని ఈ సారి ఎలాగైనా ఓడించాలని వైసీపీ కంకణం కట్టుకుంది.. అన్ని విధాలుగా ఆయన్ను ఎదుర్కోగలవారెవరా అని అన్వేషించింది.

వసంత కృష్ణప్రసాద్‌ను ఎంచుకుంది. ఆరు నెలల ముందే ఆయన్ను రంగంలోకి దించడంతో ఇది ప్రతిష్ఠాత్మక పోరుగా మారింది. మైలవరంలో మరోసారి టీడీపీ జెండా ఎగురవేసే లక్ష్యంతో దేవినేని పావులు కదుపుతున్నారు. చేసిన అభివృద్ధి కార్యక్రమాలు.. చంద్రబాబు ప్రభుత్వ సంక్షేమ పథకాలు తనను గెలుపు తీరాలకు చేరుస్తాయని విశ్వసిస్తున్నారు. ఇంకోవైపు.. కృష్ణప్రసాద్‌ విస్తృతంగా ప్రచారం చేస్తున్నారు. ఇదే సమయంలో ఆయన పార్టీ మైండ్‌గేమ్‌ ఆడుతోంది. టీడీపీ బూత్‌ స్థాయి కన్వీనర్లకు వైసీపీ కాల్‌సెంటర్‌ నుంచి ఫోన్లు చేస్తూ వారిని వైసీపీలోకి తీసుకెళ్లేందుకు ప్రయత్నించడం పెద్దదుమారమే రేపింది. వసంత అనుచరులు ఏకంగా పోలీసులనే ప్రలోభపెడుతూ అడ్డంగా దొరికిపోయారు. జగన్‌ అక్రమార్జన కేసులో కృష్ణప్రసాద్‌కూ ప్రమేయం ఉంది. ఆయన కూడా జగన్‌తోపాటు సీబీఐ కోర్టుకు హాజరవుతుంటారు. టీడీపీకి అనాదిగా బీసీలే అండగా ఉంటూ వస్తున్నారు. మైలవరంలో మొత్తం 2,68,463 మంది ఓటర్లు ఉంటే బీసీలు 1.20 లక్షలు.

విజయనగరం పట్టణంలోని మూడు లాంతర్ల సెంటర్ లో టీడీపీ అధినేత చంద్రబాబునాయుడు రోడ్ షోలో పాల్గొన్నారు. ఈ సందర్భంగా ఆయన మాట్లాడుతూ, జగన్ లోటస్ పాండ్ లోనే ఉంటే మంచిదని అన్నారు. కేసీఆర్, మోదీల చేతిలో జగన్ కీలుబొమ్మ అని, కేసులకు భయపడి ఎప్పుడో లొంగిపోయాడని వ్యాఖ్యానించారు. తన జీవితంలో హింసలేదని, ఎవరైనా రౌడీయిజం చేస్తే అణచివేస్తామని హెచ్చరించారు. జగన్ కు ఏమైనా పరిపాలన తెలుసా అని ప్రశ్నించారు. "జగన్ కు ఏమైనా అనుభవం ఉందా? ప్రతిరోజూ అడుగుతుంటాడు, ఒక్క అవకాశం ఇవ్వండి, ప్లీజ్ ఒక్క అవకాశం ఇవ్వండి అని. ఏంటిది తమ్ముళ్లూ! ప్లీజ్ కేమైనా విలువ ఉందా! ఇదేమన్నా చాక్లెట్టా పోతే పోయిందిలే అనుకుని ఇవ్వడానికి. వంద రూపాయలా అడగ్గానే ఇచ్చేయడానికి. ప్లీజ్ అనగనే కనికరిస్తే మరణవాంగ్మూలాన్ని రాసుకున్నట్టే. మన పిల్లల భవిష్యత్తును పాడుచేసుకుంటామా? ఏదోలే పాపం అని కొందరు అనుకుంటారు, కానీ ఒక్క అవకాశం ఇస్తే బీహార్ అయిపోతుంది" అంటూ తీవ్రవ్యాఖ్యలు చేశారు.

ఇక, కేసీఆర్ పైనా చంద్రబాబు నిప్పులు చెరిగారు. రేపటి ఎన్నికల్లో వైసీపీని చిత్తుచిత్తుగా ఓడించి మన శక్తేంటో చాటిచెప్పాలని, అప్పుడే టీఆర్ఎస్ కు, కేసీఆర్ కు అర్థమవుతుందని అన్నారు. మా ప్రజలు అనుకుంటే మిమ్మల్ని చుట్టుముట్టి ఊడ్చిపారేస్తారు తప్ప వదిలిపెట్టరని నిరూపించాలని పిలుపునిచ్చారు. తెలంగాణలోనే సెంటిమెంట్ ఉందని కేసీఆర్ భావిస్తున్నాడని, కానీ, 60 ఏళ్ల కష్టాన్ని వదులుకున్న ఏపీ ప్రజలకు ఎంత సెంటిమెంట్ ఉంటుందో తెలుసుకోవాలన్నారు. ‘మన ఆస్తులు దోచుకుని, మనపై దాడి చేస్తున్న కేసీఆర్‌తో జగన్‌ చేతులు కలిపారు. నాకు రిటర్న్‌ గిఫ్టు ఇస్తానన్న కేసీఆర్‌... నన్ను ఓడించడానికి జగన్‌కు వెయ్యి కోట్ల గిఫ్టు ఇచ్చారు. కేసీఆర్‌ రక్షణలో ఉన్న జగన్‌ రేపు సీఎం అయితే కేసీఆర్‌కు రాష్ట్రాన్ని అమ్మేస్తారు’ అని చంద్రబాబు పేర్కొన్నారు.

‘రాష్ట్రం ఆర్థిక ఇబ్బందుల్లో ఉన్నప్పటికీ పింఛన్‌ పదిరెట్లు పెంచి రూ.2వేలు అందిస్తున్నాను. పెద్దన్నగా బాధ్యత తీసుకుని మహిళలకు రెండుసార్లు పసుపు కుంకుమ సాయం అందించాను. రైతులకు రూ.24,500 కోట్లు రుణమాఫీ చేశాను. అన్నదాత సుఖీభవ పథకం కింద కేంద్రం రైతుకు రూ.6వేలు ఇస్తే... రాష్ట్రం తరపున మరో రూ.9వేలు ఇస్తున్నాను. పెద్ద రైతులకు కూడా రూ.10వేల సాయం, కౌలురైతులకు సాయం అందించేలా చర్యలు చేపడుతున్నాం’’ అని చంద్రబాబు అన్నారు. యువతకు నిరుద్యోగ భృతి ఏప్రిల్‌ 1వ తేదీ నుంచి రూ.2వేలు అందిస్తున్నామని గుర్తు చేశారు. దేశంలో మరే రాష్ట్రంలోనూ నిరుద్యోగ భృతి అందించడం లేదన్నారు. రాష్ట్ర తలసరి ఆదాయం రూ.82వేల నుంచి లక్షా 65వేల రూపాయలకు పెంచామని గుర్తు చేశారు. దీనిని భవిష్యత్తులో రూ.3.50లక్షలకు పెంచుతాను. రాష్ట్ర ప్రజలను కడుపులో పెట్టి కాపాడుకుంటాను అని ముఖ్యమంత్రి భరోసా కల్పించారు.

శ్రీవిద్యానికేతన్ సంస్థల అధినేత, ప్రముఖ నటుడు మంచు మోహన్‌బాబుపై నటుడు శివాజీ సంచలన వ్యాఖ్యలు చేశారు. ఏపీలో ఐటీ దాడులు, జీఎస్టీ దాడులపై రాష్ట్ర ఎన్నికల ప్రధానాధికారి గోపాలకృష్ణ ద్వివేదికి శివాజీ ఫిర్యాదు చేశారు. ఈ సందర్భంగా మీడియాతో మాట్లాడుతూ.. వ్యాపార ప్రయోజనాల కోసమే మోహన్‌బాబు విద్యా సంస్థలు నడుపుతున్నారని ఆరోపించారు. ఎన్నికల సమయంలోనే మోహన్‌బాబు ఆందోళనకు దిగడం వెనుక కారణమేంటని శివాజీ ప్రశ్నించారు. ప్రత్యేక హోదా, రాష్ట్ర ప్రయోజనాలపై ఏనాడైనా మోహన్‌బాబు మాట్లాడారా అని నిలదీశారు. హక్కులు అడిగే సమయంలో బాధ్యతలు కూడా నెరవేర్చాలని సూచించారు. శ్రీవిద్యానికేతన్ ఇంజనీరింగ్ కాలేజీకి సంబంధించి ఫీజు బకాయిలు వెంటనే చెల్లించాలని రాష్ట్ర ప్రభుత్వాన్ని డిమాండ్ చేస్తూ విద్యా సంస్థల అధినేత మంచు మోహన్‌బాబు తిరుపతిలో నిరసనకు దిగిన విషయం తెలిసిందే.

ఇక ప్రధాని మోదీ, తెలంగాణ ముఖ్యమంత్రి కేసీఆర్ లపై శివాజీ తీవ్ర వ్యాఖ్యలు చేశారు. ఏపీని నాశనం చేసే దిశగా కుట్రలకు పాల్పడుతున్నారని విమర్శించారు. ఏపీలో మీకు ఒక నాయకుడు అవసరం లేదు అనుకుంటే... ఆయనను చంపిపడేయాలని... దరిద్రం వదిలిపోతుందని మండిపడ్డారు. మీకు అనుకూలమైన ప్రభుత్వం ఏపీలో రావాలనే ఇదంతా చేస్తున్నారని... అందులో భాగంగా రాష్ట్రంలో భయాందోళనలు సృష్టిస్తున్నారని అన్నారు. రానున్న 15 రోజులు రాష్ట్రంలో దారుణ పరిస్థితులు ఉంటాయని తనకు అనిపిస్తోందని చెప్పారు. రాష్ట్రానికి ఇవ్వాల్సిన నిధులు ఇవ్వకుండా, హామీలు నెరవేర్చకుండా... హైదరాబాదు కేంద్రంగా రాజకీయాలను చేస్తున్నారని శివాజీ మండిపడ్డారు. హైదరాబాదులో ఆస్తులు ఉన్నవారిని బెదిరిస్తున్నారని... కులాల మధ్య చిచ్చు పెడుతున్నారని విమర్శించారు. హైదరాబాదులో ఉన్న ఆస్తులను చట్టపరంగా ఏపీ ప్రభుత్వానికి ఇంతవరకు పంచలేదని దుయ్యబట్టారు. ఏపీకి ఏమీ చేయకపోగా... కుట్రలకు పాల్పడుతున్నారని మండిపడ్డారు.

శివాజీ ఏపీ ఎన్నికల సంఘం ప్రధానాధికారి గోపాలకృష్ణ ద్వివేదిని కలిశారు. రాష్ట్రంలో జరుగుతున్న ఐటీ, జీఎస్టీ దాడులపై ఫిర్యాదు చేశారు. ఎన్నికలు జరుగుతున్న సమయంలో.. ఈ దాడులు సామాన్య ప్రజలను ఇబ్బందిపెట్టేలా ఉన్నాయని ఆరోపించారు. బ్యాంకుల నుంచి తగిన ఆధారాలతో డబ్బు తీసుకెళుతున్నా సీజ్‌ చేస్తున్నారని ఫిర్యాదు చేశారు. సామాన్యులకు ఇబ్బందులు లేకుండా చూడాలని సీఈవోకి వినతిపత్రం సమర్పించారు. ఎన్నికల వేళ ఏపీలో అలజడి సృష్టించేందుకు కుట్ర జరుగుతోందని శివాజీ ఆరోపించారు. రాష్ట్రంలో ఎన్నికలు సజావుగా జరగకూడదని.. వాళ్లకు అనుకూలమైన ప్రభుత్వం రావాలని కేంద్రం ప్రయత్నాలు చేస్తోందన్నారు. హైదరాబాద్‌లో కూర్చొని కుట్రలు చేయడం కాదని.. కేసీఆర్‌ వచ్చి ధైర్యంగా ఏపీలో పోటీ చేయాలని సవాల్ విసిరారు. కేసీఆర్ ఎవరికైనా బహిరంగంగా మద్దతు ప్రకటించొచ్చని.. ఆయన స్వార్థ ప్రయోజనాల కోసం ప్రజల్ని బలిచేయొద్దన్నారు. ఆంధ్రప్రదేశ్‌లో ఓట్ల తొలగింపులో కేసీఆర్ పాత్ర లేదా అని ప్రశ్నించారు.