news

మాజీ మంత్రి వైఎస్‌ వివేకానందరెడ్డి హత్యకు ఆస్తి తగాదాలే కారణమా? అనుచరులే ఆయన్ని చంపేశారా? పోలీసులు ఈ అంశాలనే దర్యాప్తులో గుర్తించినట్లు తెలుస్తోంది. పరమేశ్వర్‌రెడ్డి, ఎర్ర గంగిరెడ్డి అనే వారు సూత్రధారులైతే.. పాత్రధారిగా చంద్రశేఖర్‌రెడ్డి అండ్‌ గ్యాంగ్‌ ఈ దారుణానికి పాల్పడినట్లుగా పోలీసుల విచారణలో తేలినట్లు సమాచారం. మరో పక్క, ఈ కేసులో జగన్‌ ముఖ్య అనుచరుడు దేవిరెడ్డి శివశంకర్‌రెడ్డిని పోలీసులు అదుపులోకి తీసుకున్నారు. నిన్ననే కడప పార్లమెంట్‌ ఆర్జేడీ అభ్యర్థిగా శివశంకర్‌రెడ్డి నామినేషన్ దాఖలు చేయడం గమనార్హం. ఇప్పటికే శివశంకర్‌రెడ్డిని పోలీసులు రెండు సార్లు విచారించారు.

అలాగే ఈ కేసులో గురువారం మరో ఇద్దరు కీలక వ్యక్తులను అదుపులోకి తీసుకుని, ఓ స్కార్పియో వాహనాన్ని పోలీసులు స్వాధీనం చేసుకున్నారు. ఇప్పటి వరకు 40 మందిని రహస్య ప్రదేశాల్లో విచారిస్తున్నారు. కేసు కొలిక్కి వస్తుండటంతో ఒకటి రెండురోజుల్లోనే అధికారికంగా అరె్‌స్టలు చూపించే అవకాశం ఉన్నట్లు పోలీస్‌ వర్గాలు పేర్కొంటున్నాయి. పులివెందులలో ఈ నెల 15న వివేకా హత్యకు గురయ్యారు. టీడీపీ నేతలే చంపేశారని వైసీపీ అధ్యక్షుడు జగన్‌ ఆరోపించారు. ఇది ఇంటి దొంగల పనేనని, ఇందులో తమకెలాంటి సంబంధం లేదని టీడీపీ నేతలు ప్రకటించారు. రాజకీయంగా ప్రాధాన్యం సంతరించుకోవడంతో సిట్‌తోపాటు జిల్లా ఎస్పీ రాహుల్‌దేవ్‌ శర్మ నేతృత్వంలోని 12 పోలీస్‌ బృందాలు హంతకుల వేటలో ఉన్నాయి.

హత్య జరిగిన రాత్రి 11.30గంటల ప్రాంతంలో చిన్న అనే వ్యక్తికి చెందిన స్కార్పియో వాహనంలో అతను పులివెందులలో తిరిగినట్లు సీసీ ఫుటేజీల్లో పోలీసులు గుర్తించినట్లు సమాచారం. దీని ఆధారంగా పోలీసులు చంద్రశేఖర్‌రెడ్డిని అదుపులోకి తీసుకుని ఓ రహస్య ప్రదేశంలో విచారిస్తున్నారు. చంద్రశేఖర్‌రెడ్డి ఓ న్యాయవాది వద్ద గుమస్తాగా పనిచేస్తూ చట్టంలోని లొసుగులు తెలుసుకుని హత్యలకు పాల్పడేవాడని పోలీసులు పేర్కొంటున్నారు. అలాగే.. పోలీసులు అదుపులోకి తీసుకోకముందు పరమేశ్వర్‌రెడ్డి మీడియాతో మాట్లాడారు. హత్య ఇంటి దొంగల పనే అని పేర్కొంటూ.. ఆ ఇంటి దొంగలెవరో త్వరలోనే తెలుస్తుందని నర్మగర్భంగా చెప్పారు. పరమేశ్వర్‌రెడ్డికి ఈ హత్య గురించి తెలుసుకాబట్టే అలా అన్నాడని, విచారణలో ఆ మేరకు పోలీసులు వివరాలు సేకరించారని తెలుస్తోంది.

ఎన్నికలు మొదలైతే చాలు, ఐటి దాడులు కూడా మొదలవుతాయి. అది కూడా కేంద్ర పెద్దలు, ఎవరి మీద అయితే కోపంగా ఉంటారో, వారి మీదే జరుగుతాయి. కర్ణాటక ఎన్నికల్లో చూసాం, మొన్న జరిగిన తెలంగాణా ఎన్నికల్లో కూడా చూసాం. తెలంగాణా ఎన్నికల సమయంలో అయితే, తెలుగుదేశం నాయకలు కాంగ్రెస్ తో కలిసారు అనే కక్షతో, వరుస పెట్టి, అందరి పై దాడులు చేపించారు. వేల కోట్లు దొరికాయి అంటూ, మీడియాలో హడావిడి చేసి, చివరకు పది రూపాయలు కూడా అవినీతి జరిగినట్టు అధికారికంగా చెప్పలేదు. ఎందుకు చేస్తున్నారో చెప్పారు, ఏమి పట్టుకున్నారో చెప్పరు, చివరకు కేసు ఏమైందో తెలియదు, ఇలా ఐటి దాడుల స్టొరీ నడిచింది. అయితే, ఇప్పుడు ఆంధ్రప్రదేశ్ లో ఎన్నికలు వస్తూ ఉండటంతో, మళ్ళీ దాడులు మొదలు పెట్టారు.

నెల్లూరు నారాయణ మెడికల్ కాలేజీలో ఐటీ దాడులు జరుగుతున్నాయి. మెడికల్ కాలేజీ కార్యాలయం, మంత్రి నారాయణ నివాసంలో సైతం ఐటీ అధికారులు సోదాలు నిర్వహిస్తున్నారు. దాదాపు నాలుగు బృందాలు కాలేజీ లోపలికి ప్రవేశించి కార్యాలయంలో, మంత్రి నారాయణ ఇంట్లో సోదాలు నిర్వహిస్తున్నారు. ఎన్నికల సమయంలో అదీ ప్రచార సమయంలో ఈ దాడులు జరగడంతో అందరూ ఉలిక్కిపడ్డారు. మరోవైపు విజయనగరం జిల్లా చీపురుపల్లి సభలో చంద్రబాబు మాట్లాడుతూ నేడో, రేపో దాడులు జరిగే అవకాశముందని అనుమానం వ్యక్తం చేసిన కొద్ది నిమిషాల్లోనే ఈ దాడులు జరగడం కొసమెరుపు. ఈ దాడులపై మాత్రం మంత్రి నారాయణ, ఆయన కుటుంబ సభ్యులు ఇప్పటివరకైతే స్పందించలేదు.

మరో పక్క నిన్న, విజయనగరం జిల్లా కేంద్రంలోని ఎయిమ్‌ విద్యాసంస్థల కార్యాలయంలో ఐటీ అధికారులు సోదాలు నిర్వహించారు. ఈ సంస్థ అధినేత కడగల ఆనంద్‌కుమార్‌ విద్యాసంస్థలతో పాటు బిల్డర్‌, రియల్‌ ఎస్టేట్‌ వ్యాపారంలోనూ ఉన్నారు. నెల్లిమర్ల నియోజకవర్గంలో టీడీపీ వ్యవహారాల్లో కీలకంగా వ్యవహరిస్తున్న ఆయన సంస్థలో ఐటీ సోదాలు జరగడం చర్చనీయాంశంగా మారింది. దాడుల సందర్భంగా విశాఖపట్నానికి చెందిన ఐటీ అధికారులు పలు కీలక పత్రాలను స్వాధీనం చేసుకున్నట్లు తెలిసింది. అయితే ఇది జరిగిన మరుసటి రోజే, ఏకంగా నారాయణ ఇంటి పైనే దాడులు చేసారు. తెలుగుదేశం పార్టీ నేతలు టార్గెట్ గా, రాబోయే రోజుల్లో, ఈ దాడులు మరింత ఉదృతం అవుతాయని తెలుస్తుంది.

సరిగ్గా మూడు, నాలుగు నెలల ముందు, పవన్ కళ్య, జగన్ ను కలపాలని, అక్కడ మోడీ, ఇక్కడ కేసీఆర్ ప్రయత్నిస్తున్నారని, వీళ్ళిద్దరినీ కలిపితే, చంద్రబాబును రాజకీయాల నుంచి తప్పించవచ్చు అని, అప్పుడు ఏపిని ఆడుకోవచ్చు అని, వీళ్ళు వ్యూహాలు పన్నుతున్నట్టు, వార్తలు వచ్చిన సంగతి తెలిసిందే. అయితే, ఇవి వార్తలు మాత్రమే కావటం, సరైన ఆధారం లేకపోవటంతో, కొన్నాళ్ళుకు ఈ వార్తలు ఆగిపోయాయి. అయితే, ఇదంతా నిజమే అని ఇప్పుడు తేలిపోయింది. టీఆర్‌ఎస్, వైసీపీ రహస్య చర్చలు ప్రజలకు తెలిసిపోయాయని జనసేన అధ్యక్షుడు పవన్‌ కల్యాణ్ అన్నారు. శుక్రవారం ఆయన మీడియాతో మాట్లాడుతూ తెలంగాణ సీఎం కేసీఆర్‌, చంద్రబాబుకు ఇచ్చిన రిటర్న్‌ గిఫ్ట్‌ ఆయనకు గిఫ్ట్‌గా మారుతుందన్నారు.

పదేళ్లు భావోద్వేగాలతోనే గడిచిపోయాయని.. ఇక చాలు ఆపండని అన్నారు. ఏపీలో జగన్‌తో కలిసి పోటీచేయాలని కొంతమంది చెప్పారన్నారు. ముందు మీరు ఇద్దరూ కలిసి, చంద్రబాబుని తప్పించండి, టీడీపీని లేకుండా చేసి ఆ తర్వాత మీరిద్దరూ తేల్చుకోండని సూచించారని ఆయన చెప్పారు. అయితే జగన్‌పై తన అభిప్రాయాలు ఎలా మార్చుకుంటానని చెప్పానని పవన్‌ అన్నారు. వైసీపీకి అధికారాన్ని కట్టబెడితే భూకబ్జాలే కాదు... మీ ఇల్లు, ఆ కొండ, కొండ మీద పుట్ట, కొండపైనున్న చెట్టును కూడా దోచేస్తారని పవన్ తీవ్ర వ్యాఖ్యలు చేశారు. పులివెందుల కిరాయి మూకలకు, రౌడీలకు భయపడమని చెప్పారు. చంద్రబాబుకు రిటర్న్ గిఫ్ట్ ఇవ్వాలనుకుంటే... నేరుగా ఏపీలో కేసీఆర్ పోటీ చేయాలని, రాజమార్గంలో రావాలని అన్నారు.

జనసేనలో చేరతామంటూ కొందరు నేతలు వచ్చారని... ఆ తర్వాత వారంతా వైసీపీలోకి వెళ్లారని పవన్ కల్యాణ్ తెలిపారు. వీరంతా వైసీపీలోకి ఎందుకు వెళ్లారా? అని ఆరాతీస్తే అసలు విషయం తెలిసిందని... వారికి హైదరాబాదులో ఆస్తులు ఉన్నాయని చెప్పారు. ఆస్తులకు సంబంధించి తమకు సమస్యలు ఉన్నాయని వారు చెప్పారని తెలిపారు. జరుగుతున్నవన్నీ గమనిస్తుంటే... అసలు రాజకీయం అర్థమవుతోందని చెప్పారు. నాయకులను బెదిరించి రాజకీయాలు చేయడం సరికాదని అన్నారు. కోడికత్తి దాడిపై నానా హంగామా చేసిన వైసీపీ అధినేత జగన్... సొంత బాబాయ్ వివేకా హత్యకు గురైతే మౌనంగా ఎందుకు ఉన్నారని ప్రశ్నించారు. హత్యారాజకీయాలు చేసేవారు అధికారంలోకి వస్తే... రాష్ట్రం ఏమవుతుందో అనే భయం తనను వెంటాడుతోందని చెప్పారు.