news

వైసీపీలో అసమ్మతి జ్వాలలు ఇంకా చెలరేగుతూనే ఉన్నాయి. విజయవాడ పశ్చిమ సెగ్మెంట్‌లో ముస్లిం మైనారిటీలకు టికెట్ ఇవ్వాలంటూ వైసీపీ కార్యకర్తలు ఆందోళనకు దిగారు. ఆర్ఎస్ఎస్‌కు చెందిన వెల్లంపల్లి శ్రీనివాసరావుకు టికెట్ ఇవ్వొద్దంటూ ప్లకార్డులతో నిరసన తెలిపారు. సమాచారం తెలుసుకున్న వైసీపీ నేతలు వీర్ల అప్పిరెడ్డి తదితరులు వచ్చి వైసీపీ కార్యకర్తలను బుజ్జగించే ప్రయత్నం చేశారు. జగన్‌తో మాట్లాడేందుకు పది సార్లు హైదరాబాద్ లోటస్‌పాండ్‌కు వెళ్లినా కనీసం కలిసేందుకు అవకాశం ఇవ్వలేదంటూ ముస్లిం మైనారిటీ కార్యకర్తలు అసహనం వ్యక్తం చేశారు. వైసీపీ కార్యకర్తలను బుజ్జింగించిన అప్పిరెడ్డి.. జగన్ దగ్గరకు తీసుకెళతామని హామీ ఇచ్చారు.

విజయవాడ పశ్చిమ నియోజకర్గం ముస్లిం మైనారిటీలకు సంబంధించిన సీటు అని, అలాంటి స్థానాన్ని ఆరెస్సెస్‌ నుంచి వచ్చిన వ్యక్తికి ఎలా ఇస్తారంటూ వైకాపా అసంతృప్త నేత ఎంఎస్‌ బేగ్‌ ఆగ్రహం వ్యక్తం చేశారు. చర్చల తర్వాత పరిస్థితి సర్దుకుంటుందని అప్పిరెడ్డి చెప్పగా... బేగ్‌ మాత్రం ఈ విషయంపై పార్టీ అధ్యక్షుడు జగన్‌ ఎలా స్పందిస్తారో చూశాక తన నిర్ణయం ప్రకటిస్తానని అన్నారు. ఒక్క గుంటూరు మినహా నెల్లూరు నుంచి శ్రీకాకుళం వరకు ఎక్కడా ముస్లింలకు అవకాశం కల్పించలేదని విమర్శించారు. పొన్నూరు వైసీపీలోనూ అసంతృప్తి జ్వాలలు రాజుకున్నాయి. రావిని కాదని కిలారి రోశయ్యకు టికెట్ కేటాయించడంతో అసంతృప్తి వ్యక్తం చేస్తున్నారు. అటు విశాఖ జిల్లా యలమంచలి నియోజకవర్గంలో వైసీపీకి చెందిన ముగ్గురు సమన్వయకర్తలు పార్టీకి రాజీనామా చేశారు.

ప్రకాశం జిల్లా పర్చూరులో అసంతృప్త నేత రావి రామనాథంబాబు వైకాపాకు రాజీనామా చేసి జిల్లా పర్యటనకు వచ్చిన ముఖ్యమంత్రి చంద్రబాబు సమక్షంలో తెదేపాలో చేరారు. పాలకొల్లు నేత గుణ్ణం నాగబాబు విజయవాడలో జనసేన అధ్యక్షుడు పవన్‌కల్యాణ్‌ను కలిసి ఆ పార్టీలో చేరారు. పాలకొల్లులో పోటీ చేసేందుకు తనకు అవకాశమివ్వాలని విజ్ఞప్తి చేశారు. పవన్‌ కూడా నాగబాబును పాలకొల్లు జనసేన అభ్యర్థిగా ప్రకటించారు. విశాఖ తూర్పు, విశాఖ దక్షిణ నియోజకవర్గాల్లో టికెట్‌ దక్కని వైకాపా నేతలు వంశీకృష్ణ, కోళా గురువులు మంత్రి గంటా శ్రీనివాసరావుతో భేటీ అయ్యారు. పెడనలో రాంప్రసాద్‌, కొండపిలో అశోక్‌ ఆయా నియోజకవర్గాల్లో స్వతంత్ర అభ్యర్థులుగా పోటీకి సిద్ధమవుతున్నట్లు వారి అనుచరులు చెబుతున్నారు.

నవ్యాంధ్ర రాజధాని అమరావతిలో హైకోర్టు కార్యకలాపాలు మొదలయ్యాయి. నేలపాడులో కొత్తగా నిర్మించిన జ్యుడీషియల్‌ కాంప్లెక్స్‌ భవనంలో హైకోర్టు సోమవారం నుంచి విధులు ప్రారంభించింది. న్యాయవాదులు, చుట్టుపక్కల గ్రామస్థులు భారీగా తరలిరావడంతో కోర్టు ప్రాంగణం సందడిగా కనిపించింది. తొలిరోజు కావడంతో న్యాయమూర్తులు, న్యాయవాదులు కోర్టు విధుల కంటే గంట ముందుగానే భవనానికి చేరుకున్నారు. ఈ సందర్భంగా తాత్కాలిక ప్రధాన న్యాయమూర్తి జస్టిస్‌ సి.ప్రవీణ్‌కుమార్‌తోపాటు మిగిలిన న్యాయమూర్తులకు న్యాయవాదులు, కోర్టు సిబ్బంది, నేలపాడు గ్రామస్థులు సాదర స్వాగతం పలికారు. భవన సముదాయంలో ఏర్పాటైన హైకోర్టు అడ్వకేట్స్‌ అసోసియేషన్‌, మహిళా న్యాయవాదల అసోసియేషన్‌ హాళ్లను ప్రధాన న్యాయమూర్తి లాంఛనంగా ప్రారంభించారు. అనంతరం న్యాయమూర్తులు, ఏజీ తదితరులంతా తమకు కేటాయించిన చాంబర్లలో ప్రత్యేక పూజలు నిర్వహించారు. హైకోర్టు ప్రాంగణంలో ఏర్పాటు చేసిన క్యాంటీన్‌ను సీజే ప్రవీణ్‌కుమార్‌ ప్రారంభించారు.

నూతన భవనంలో తొలిరోజు విధులు కావడంతో న్యాయవాదులు భారీగా తరలివచ్చారు. కేసులు లేకపోయినా నూతన భవనాన్ని వీక్షించేందుకు సుదూర ప్రాంతాల నుంచి వచ్చారు. భవనం మొత్తం తిరుగుతూ ఏ అంతస్తులో ఏఏ విభాగాలున్నాయో తెలుసుకుంటూ, తక్కువ కాలంలో త్వరితగతిన నిర్మితమైన భవనం గురించి చర్చించుకుంటూ కనిపించారు. పని చేయని ఏసీలు: తొలిరోజు కోర్టు విధులు ప్రారంభమైనా సుమారు గంటపాటు వివిధ కోర్టుల్లో ఏసీలు పని చేయలేదు. దీంతో న్యాయమూర్తులు, న్యాయవాదులు అల్లాడిపోయారు. అసలే వేసవి, అందులోనూ నల్లకోటు ధరించి ఉండడంతో ఉక్కపోతతో తీవ్ర ఇబ్బందులు పడ్డారు. అయినా ఎక్కడా ఆ అసంతృప్తి కనిపించనీయకుండా న్యాయమూర్తులు చిరునవ్వుతోనే విధులు నిర్వర్తించడం విశేషం. ఇదిలా ఉండగా గోవా ముఖ్యమంత్రి పర్రీకర్‌ మృతికి సంతాప సూచకంగా హైకోర్టు ముందున్న జాతీయ పతాకాన్ని అవనతం చేశారు.

నేలపాడు రైతుల విందు... తమ ప్రాంతంలో హైకోర్టు ప్రారంభమైందన్న ఆనందంలో రాజధానికి భూములిచ్చిన నేలపాడు రైతులు సోమవారం మధ్యాహ్నం భోజనాలు ఏర్పాటు చేశారు. న్యాయమూర్తుల నుంచి కోర్టుకొచ్చిన అందరికీ సుమారు 2వేల మంది వరకూ వారు విందు ఏర్పాటు చేశారు. ఈ సందర్భంగా రైతులు మాట్లాడుతూ.. ‘ఎలాంటి గుర్తింపు లేని మా ప్రాంతానికి సీఎం చంద్రబాబు తీసుకున్న నిర్ణయంవల్ల రాజధాని అయింది. సరిగా బస్‌ సౌకర్యమే లేని మా గ్రామానికి వందల సంఖ్యలో బస్సులు, కార్లు, ఇతర వాహనాలు వచ్చిపోతుంటే ఆనందంతో నోట మాట రావడం లేదు’ అని వారు సంతోషం వ్యక్తం చేశారు.

కాంగ్రెస్‌కు రాజీనామా చేసిన బైరెడ్డి రాజశేఖర్‌రెడ్డి టీడీపీలో చేరేందుకు సిద్ధమయ్యారు. సొంతగూటికి చేరేందుకు టీడీపీ అధిష్టానంతో మంతనాలు జరుపుతున్నారట. రెండు రోజుల్లో పసుపు కండువా కప్పుకోవడం ఖాయమని ప్రచారం జరుగుతోంది. తనకు శ్రీశైలం నుంచి ఎమ్మెల్యేగా పోటీచేసేందుకు అవకాశం ఇవ్వాలని కోరుతున్నారట. శ్రీశైలం నుంచి తనకు అవకాశం కల్పిస్తే.. లోక్‌సభ అభ్యర్థి గెలుపునకు కలిసొస్తుందని చెబుతున్నారు. సీటు కేటాయించే అంశంపై టీడీపీ అధిష్టానం కసరత్తు చేస్తోందట. టీడీపీలో సీనియర్ నేతగా ఉన్న బైరెడ్డి రాష్ట్ర విభజనకు ముందు పార్టీని వీడారు. తర్వాత రాయలసీమ హక్కుల కోసం పార్టీని స్థాపించారు. ఇటీవలే కాంగ్రెస్‌ పార్టీలో కూడా చేరారు.. ఆరు నెలల పాటూ పార్టీలో కొనసాగిన ఆయన.. ఇటీవలే ఆ పార్టీకి రాజీనామా చేశారు. తిరిగి ఇప్పుడు సొంతగూటికి చేరేందుకు సిద్ధమయ్యారు. టీడీపీతో చర్చలు సఫలమైతే రెండు రోజుల్లో బైరెడ్డి టీడీపీలో చేరే అవకాశం ఉందట.

శ్రీశైలం నియోజకవర్గ ఎమ్మెల్యే అభ్యర్థి బుడ్డా రాజశేఖర్ రెడ్డి పోటీ నుంచి తప్పుకున్నారు. తన నిర్ణయాన్ని అధినేత చంద్రబాబుకు చెప్పారు. తన బదులుగా.. తన తమ్ముడికి సీటు ఇవ్వాలని రాజశేఖర్‌రెడ్డి కోరుతున్నారు. రాజకీయాల నుంచి తప్పుకుంటున్నానని.. తన భార్యకు ఆరోగ్యం సరిగా లేకపోవడం వల్లే ఈ నిర్ణయం తీసుకున్నానంటున్నారు. బుడ్డా బరి నుంచి తప్పుకోవడంతో.. శ్రీశైలం టికెట్ టీడీపీ సీనియర్ నేత ఏవీ సుబ్బారెడ్డికి ఇచ్చేందుకు అధిష్టానం ప్రతిపాదన తీసుకొచ్చింది. ఈ ప్రతిపాదనపై అనుచరులతో చర్చించి, ఆలోచించి తన నిర్ణయాన్ని చెబుతానన్నారు సుబ్బారెడ్డి. ఆయన కూడా శ్రీశైలం నుంచి పోటీకి అంత సుముఖంగా లేరట. దీంతో బైరెడ్డి తనకు ఆ స్థానాన్ని కేటాయించాలని కోరుతున్నారు.