news

ఏపీలో ఈసారి రెండు ఫ్యాన్ లు వస్తున్నాయంటూ ముఖ్యమంత్రి చంద్రబాబు చమత్కరించారు. ఆంధ్రప్రదేశ్ లో ఈసారి టీడీపీ, ప్రజాశాంతి పార్టీ మధ్యే పోటీ ఉంటుందన్న కేఏ పాల్ వ్యాఖ్యలను ఓ విలేకరి ఈ సందర్భంగా ప్రస్తావించగా, చంద్రబాబు ఆసక్తికర వ్యాఖ్యలతో అందరినీ నవ్వించారు. జగన్ ఫ్యాన్ కంటే హెలికాప్టర్ ఫ్యానే పవర్ ఫుల్ అంటూ వ్యాఖ్యానించారు. "జగన్ మోహన్ రెడ్డి గింజుకుంటున్నాడు. అది కూడా ఫ్యానే, నాది కూడా ఫ్యానే అని తెగ బాధపడిపోతున్నాడు. డెఫినెట్ గా పవర్ ఫుల్ ఫ్యాన్ వచ్చేసి హెలికాప్టర్ ఫ్యానే. జగన్ ఫ్యాన్ కు రేంజ్ తక్కువ. ఆ ఫ్యాన్ కు పెద్ద రేంజ్ ఉంటుంది" అంటూ మీడియా సమావేశంలో నవ్వులు పూయించారు.

ప్రతిపక్ష నేత జగన్‌పై చంద్రబాబు తీవ్రస్థాయిలో ధ్వజమెత్తారు. ఆంధ్రప్రదేశ్‌ బ్రాండ్‌ ఇమేజ్‌ని దెబ్బతీస్తున్నారని మండిపడ్డారు. జగన్‌ జీవితం అడ్డదారి, వైసీపీది చెడుదారి అని వివరించారు. చట్టంలో ఎన్ని నేరాలు ఉన్నాయో జగన్‌ అన్నీ చేశారన్నారు. జగన్‌ ఇప్పటి వరకు ఆర్థిక నేరాలే చేశారని, కానీ ఇప్పుడు రాజకీయాల్లోనూ కొత్త నేరాలు చేస్తున్నారని ఆరోపించారు. దేశ చరిత్రలో ఇంతటి దివాళాకోరు రాజకీయాలు ఎప్పుడూ చూడలేదన్నారు. టీడీపీ డేటా దొంగిలించడానికి ప్రయత్నించి జగన్‌ అడ్డంగా దొరికిపోయారని పేర్కొన్నారు. ఒక ప్లాన్‌ ప్రకారం పాయింట్ల వారీగా రాసుకుని మరీ టీడీపీపై కుట్ర చేశారన్నారు. ఈసీకి విజయసాయిరెడ్డి ఇచ్చిన లేఖలో వివరాలన్నీ ఉన్నాయని తెలిపారు.

వైసీపీ, టీఆర్‌ఎస్‌, బీజేపీ కలిసి ఈ డ్రామా నడిపారని తెలిపారు. ఇంతకు ముందు కూడా పంటలు తగలబెట్టడం లాంటి అరాచకాలు చాలా చేశారని గుర్తుచేశారు. నేరాలు చేయడంలో గ్రాండ్‌ మాస్టర్‌ అంటూ జగన్‌ను చంద్రబాబు విమర్శించారు. ప్రజలకు మెరుగైన జీవన ప్రమాణాలు, పేదరికం తొలగింపుపై తాను వినూత్న ఆలోచనలు చేసి అమలు చేస్తుండగా... నేరాలు వినూత్నంగా ఎలా చేయాలన్నది జగన్‌ ఆలోచిస్తుంటారని చంద్రబాబు ఎద్దేవా చేశారు. ‘‘నేను రాష్ట్ర ప్రజలకు ఒకటే హామీ ఇచ్చా. మీ భవిష్యత్తు-నా బాధ్యత అని చెప్పాను. కానీ, జగన్‌ నినాదం... నా భవిష్యత్తు- మీ బాధ్యత. జైలుకు పోవడం జగన్‌ భవిష్యత్తు. దాన్నుంచి తప్పించడం ప్రజల బాధ్యత అంటారు’’ అని విమర్శించారు.

ఏపీ ఎన్నికల్లో తెలివైన నిర్ణయం తీసుకోవాలని టీఆర్‌ఎస్‌ అధినేత, తెలంగాణ సీఎం కేసీఆర్‌ ఆ రాష్ట్ర ప్రజలకు త్వరలోనే ఒక అప్పీల్‌ చేయబోతున్నారని ఆ పార్టీ వర్కింగ్‌ ప్రెసిడెంట్‌ కేటీఆర్‌ తెలిపారు. టీడీపీ అధినేత, ఏపీ సీఎం చంద్రబాబునాయుడు గందరగోళపడుతున్నారని విమర్శించారు. లోక్‌సభ, ఏపీ అసెంబ్లీ ఎన్నికల తర్వాత ఆయన రాజకీయ జీవితం ముగిసిపోతుందని జోస్యం చెప్పారు. రాజకీయాల నుంచి చంద్రబాబుకు వీడ్కోలు పలికేందుకు ఏపీ ప్రజలు సిద్ధంగా ఉన్నారని స్పష్టం గా తెలుస్తోందన్నారు. బుధవారం ఇక్కడ పీటీఐతో కేటీఆర్‌ మాట్లాడారు. తెలంగాణ కేంద్రంగా పనిచేస్తున్న తమ పార్టీ టీఆర్‌ఎస్ కు ఏపీలో అడుగుపెట్టాలన్న ఆలోచనలేమీ లేవని చెప్పారు.

టీడీపీ, కేసీఆర్‌ మధ్య పోరుగా ఏపీ ఎన్నికలను చిత్రీకరించాలని బాబు ప్రయత్నించడం చాలా విచిత్రంగా ఉందన్నారు. టీఆర్‌ఎస్ కు ఏపీలో ఒక్క చోట కూడా పార్టీ కార్యాలయం లేదని, ఎన్నికల్లో కూడా అక్కడ తాము పోటీ చేయడం లేదని చెప్పారు. అక్కడ ఎవరో ఒకరి అవకాశాలను తాము ప్రభావితం చేస్తామనడం వాస్తవాన్ని వక్రీకరించడమేన్నారు. ‘‘ఏపీ ఎన్నికలలో ఎటువంటి ఫలితం రాబోతోందో సుస్పష్టం. చంద్రబాబు గద్దె దిగి బయటకు వెళ్లిపోయే దారిలో ఉన్నా రు. ఆయన రాజకీయ జీవితం ముగింపునకు చేరిం ది. ఆంధ్రప్రదేశ్‌ ప్రజలు ఆయనకు దీర్ఘకాలిక సెలవు ఇవ్వాలనే నిర్ణయం తీసుకుంటారు’’ అని చెప్పారు. ‘‘ఆంధ్రప్రదేశ్‌ ప్రజలు తెలివైన నిర్ణయం తీసుకునేలా చూడాలనుకుంటున్నాం. అందుకే ఆంధ్రప్రదేశ్‌ ప్ర యోజనాల కోసం ఒక అభ్యర్థన చేయాలని భావిస్తు న్నాం. అది ఎప్పుడు చేయాలనేది మా ముఖ్యమంత్రి నిర్ణయిస్తారు’’ అని తెలిపారు.

రానున్న లోక్‌సభ, మున్సిపల్‌, స్థానిక సంస్థల ఎన్నికల్లో పార్టీని విజయ తీరాలకు చేర్చడం, టీఆర్‌ఎస్ ను క్షేత్ర స్థాయిలో బలోపేతం చేయడమే తన ముందున్న ప్రధాన లక్ష్యమని స్పష్టం చేశారు. అన్ని జిల్లా కేంద్రాల్లో పార్టీ కార్యాలయాలు ఏర్పాటు చేస్తామన్నారు. తెలంగాణ అసెంబ్లీ ఎన్నికల్లో కాంగ్రెస్-టీడీపీ కూటమిని టీఆర్‌ఎస్‌ ఓడించి ఘన విజయం సాధించింది. దరిమిలా చంద్రబాబుకు ‘రిటర్న్‌ గిఫ్ట్‌’ ఇస్తానని కేసీఆర్‌ సంచలన వ్యాఖ్య చేశారు. తెలంగాణ మంత్రి తలసాని శ్రీనివాస్‌ రెండుసార్లు ఏపీకి వెళ్లి చంద్రబాబుపై విమర్శలు చేశారు. కేసీఆర్‌, ఆయన పార్టీ, ఏపీ ప్రతిపక్ష నాయకుడు, వైసీపీ అధ్యక్షుడు వైఎస్‌ జగన్‌ కుమ్మక్కయారని టీడీపీ ఆరోపిస్తోంది. ఈ నేపథ్యం లో కేసీఆర్‌ ఏంమాట్లాడతారోనని ఆసక్తిగా మారింది.

రాష్ట్రంలో సామాన్యులకు అండగా నిలిచిన ‘చంద్రన్న బీమా’ పథకం కింద అందించే పరిహారాన్ని రూ.10 లక్షలకు పెంచే అంశాన్ని టీడీపీ పరిశీలిస్తోంది. కుటుంబ యజమాని మరణిస్తే ప్రస్తుతం ఈ పథకం కింద రూ.5లక్షలు అందిస్తున్నారు. ఈ మొత్తాన్ని రెట్టింపు చేయాలని తెలుగుదేశంపార్టీ ఆలోచిస్తోంది. వ్యవసాయానికి ప్రస్తుతం ఇస్తున్న ఉచిత విద్యుత్‌ను 9గంటల నుంచి 12గంటలకు పెంచే అంశంపైనా దృష్టి పెట్టింది. వీటిని మేనిఫెస్టోలో చేర్చేందుకు టీడీపీ నాయకులు నిర్ణయించారు. టీడీపీ మేనిఫెస్టో కమిటీ బుధవారం ఉండవల్లిలోని ప్రజావేదికలో యనమల రామకృష్ణుడి అధ్యక్షతన సమావేశమైంది. కాల్వ శ్రీనివాసులు, పుష్పరాజ్‌ తదితరులు ఈ సమావేశానికి హాజరయ్యారు.

కొత్తగా మ్యానిఫెస్టోలో ఏం పెట్టాలి? ప్రస్తుతం అమలవుతున్న సంక్షేమ కార్యక్రమాలపై ఏం చేయాలి? అన్నదానిపై చర్చ జరిగింది. మహిళలకు పసుపు-కుంకుమ పథకం, రైతులకు పెట్టుబడి నిధి అందిస్తున్న అన్నదాత సుఖీభవ, యువతకు నిరుద్యోగ భృతితోపాటు ఇతర సంక్షేమ పథకాలను కొనసాగిస్తారు. రైతులకు గిట్టుబాటు ధర వచ్చేలా ఏర్పాటుచేసిన ప్రత్యేకనిధిని పెంచడం, యువతకు సాయం చేసేందుకు యువజన కార్పొరేషన్‌ ఏర్పాటు తదితర అంశాలపై సమావేశంలో చర్చ జరిగింది. గురువారం మరోదఫా సమావేశం కానున్నారు. అనంతరం టీడీపీ జాతీయ అధ్యక్షుడు చంద్రబాబుతో భేటీ అయి తుది నిర్ణయం జరిగాక మేనిఫెస్టోను విడుదల చేయనున్నారు. రెండు, మూడురోజుల్లోనే మేనిఫెస్టో విడుదల ఉంటుందని సమాచారం.

తెదేపా మేనిఫెస్టోలో పొందుపరచనున్న మరికొన్ని ముఖ్యాంశాలు * ప్రత్యేక యువజన కార్పొరేషన్‌ ఏర్పాటు. * పార్లమెంటు నియోజకవర్గానికి ఒక నైపుణ్యాభివృద్ధి కేంద్రం. * వ్యవసాయాన్ని లాభసాటిగా మార్చేందుకు స్వామినాథన్‌ కమిటీ సిఫార్సుల్ని పూర్తి స్థాయిలో అమలు చేసేందుకు చర్యలు. * వ్యవసాయ ఉత్పత్తులకు గిట్టుబాటు ధరలు ఇవ్వడంతో పాటు, సకాలంలో ఉత్పత్తుల్ని కొనుగోలు చేసేందుకు చర్యలు. మార్కెట్‌ జోక్యం పథకం బలోపేతం. * అన్నదాత-సుఖీభవ, పసుపు-కుంకుమ పథకాల కొనసాగింపు. * ఐదు నదుల అనుసంధానం ద్వారా రాష్ట్రంలో ప్రతి ఎకరాకి సాగునీరు.