news

ప్రధాని నరేంద్ర మోదీకి ఏపీ సీఎం చంద్రబాబు నాయుడు బహిరంగ లేఖ రాశారు. 2014 ఎన్నికల సందర్భంగా ఏపీకి ఇచ్చిన హామీలను గుర్తు చేస్తూ బాబు లేఖ రాయడం జరిగింది. గత ఐదేళ్లుగా ఆంధ్రప్రదేశ్ రాష్ట్ర ప్రభుత్వానికి, మీరు, మీ నాయకత్వంలోని కేంద్ర ప్రభుత్వం చేసిన అన్యాయాన్ని ఐదు కోట్ల రాష్ట్ర ప్రజానీకం తీవ్రంగా నిరసిస్తున్నారని లేఖలో పేర్కొన్నారు. ఉమ్మడి ఆంధ్రప్రదేశ్ రాష్ట్రాన్ని హేతుబద్ధత లేకుండా విభజించడంలో భారతీయ జనతా పార్టీ ప్రముఖ పాత్ర వహించిన సంగతి మీకు గుర్తుండే ఉంటుందని బాబు చెప్పుకొచ్చారు. ఎన్నికల ప్రచారంలో మీరు ‘తల్లిని చంపి బిడ్డను బయటకు తీసిన’ కాంగ్రెస్ పార్టీ తీరును విమర్శిస్తూ, తల్లీని, బిడ్డనూ కాపాడుతానని, సీమాంధ్ర ప్రాంతాన్ని అన్ని విధాలుగా, అన్ని రంగాలలో అభివృద్ధి చేస్తానని ఎన్నికల ముందు తిరుపతి, నెల్లూరు, భీమవరం, మదనపల్లి, గుంటూరు సభలలో చెప్పిన మాటలు ఒకసారి గుర్తు చేసుకోండి" అని ఘాటుగా చంద్రబాబు వ్యాఖ్యానించారు.

చంద్రబాబు లేఖలోని ముఖ్యాంశాలు.. :-" అమరావతి రాజధాని శంకుస్థాపన సందర్భంలో ఢిల్లీ కూడా చిన్నబోయే రాజధానిని నిర్మించేందుకు సహకరిస్తానని మీరిచ్చిన మాట మీకు గుర్తుందా.? అంతేకాకుండా విభజన చట్టంలోని అన్ని అంశాలను తు.చ. తప్పకుండా అమలుచేస్తానని చెప్పారు. అన్నివిధాలుగా ఆంధ్రప్రదేశ్‌ను అభివృద్ధి చేస్తానని చెప్పి ‘నీరు-మట్టి’ ఇచ్చి వెళ్లారు. :- దురదృష్టవశత్తూ, మీరు ప్రధానమంత్రి అయిన వెంటనే అంతకు ముందు చేసిన వాగ్దానాలన్నీ ‘గజనీ’లాగా మరచిపోవడమే కాకుండా, ఆంధ్రప్రదేశ్ విభజన చట్టంలో పొందుపరచిన పలు అంశాల అమలు పట్ల తీవ్ర నిర్లక్ష్యాన్ని ప్రదర్శించడం మా రాష్ట్ర ప్రజల గుండెలను గాయపరచింది. అంతేకాకుండా, ఆనాడు రాజ్యసభలో అప్పటి ప్రధానమంత్రి శ్రీ మన్మోహన్ సింగ్ ప్రకటించిన రాయితీలతో కూడిన ప్రత్యేక హోదా, మరియు ఇతర హామీలను తుంగలో తొక్కి రాష్ట్రానికి మీరు చేసిన తీవ్ర అన్యాయం ఆంధ్రప్రదేశ్ ప్రజలను ఆందోళనకు, కలతకు గురిచేసింది. :- విభజన చట్టంలోని అంశాలను, అప్పటి ప్రధాని రాజ్యసభలో ఇచ్చిన హామీలను అమలుపరచే దిశగా కేంద్ర ప్రభుత్వాన్ని నడిపే మీ వద్దకు, మీ మంత్రుల వద్దకు 29 పర్యాయాలు నేను వచ్చి విజ్ఞప్తులు ఇచ్చిన విషయం మీకు అసలు గుర్తున్నదా.? హామీల అమలు చేయాలని కోరుతూ నేనూ, నా మంత్రిమండలి సహచరులు కేంద్ర ప్రభుత్వ కార్యాలయాల చుట్టూ పలుమార్లు తిరిగినప్పటికీ మాకు చట్టపరంగా, హక్కుగా రావాల్సిన అనేక ప్రయోజనాలను కక్షపూరితంగా రాకుండా చేయడం శోచనీయం. :- ముఖ్యంగా ప్రత్యేక హోదా ప్రకటించాలని అనేకసార్లు కోరినప్పటికీ 14 వ ఆర్థిక సంఘం సిఫారసులు అడ్డు వస్తున్నాయని నమ్మబలికి దాని స్థానంలో ప్రత్యేక ప్యాకేజీ ప్రకటించి రాష్ట్రానికి తీరని అన్యాయం చేశారు. :- ప్రత్యేక హోదాకు ఆర్థిక సంఘం సిఫారసులు అడ్డురావని 14 వ ఆర్థిక సంఘం అధ్యక్షుడు, సభ్యులు స్పష్టత ఇచ్చారు. 14వ ఆర్థిక సంఘం సిఫారసుల ఆమోదం తరువాత ప్రత్యేక హోదా ఏ రాష్ట్రానికి ఇవ్వడం లేదని చెప్పి, ఆ తరువాత కొన్ని రాష్ట్రాలకు ప్రత్యేక హోదా రాయితీను కొనసాగించడం ఆంధ్రప్రదేశ్‌ ప్రజలను మోసం చేయడం కాదా? రాష్ట్ర ప్రజల మనసులో ప్రబలంగా ఉన్న ప్రత్యేక హోదా ఆకాంక్ష అమలు కోసం గత సంవత్సర కాలంగా ధర్మపోరాటాలు చేస్తున్నప్పటికీ, మీరు నిమ్మకు నీరెత్తినట్టుగా ప్రవర్తించడం బాధ్యతారాహిత్యం కాదా? :- రాష్ట్రానికి జీవనాడిగా నిలిచే పోలవరం ప్రాజెక్టును యుపీఏ ప్రభుత్వ హయాంలోనే జాతీయ ప్రాజెక్టుగా గుర్తించి, అన్ని అనుమతులూ వచ్చినట్టుగా భావించి అమలు చేస్తామన్నారు. నీతిఆయోగ్ కోరిన మీదట దాన్ని సత్వరమే పూర్తి చేసి సాగునీటి కోసం తపిస్తున్న జిల్లాలకు నీరందించేందుకు రాష్ట్ర ప్రభుత్వమే చొరవ తీసుకుని రాత్రింబవళ్లూ పనులు చేయిస్తున్నది. ఫలితంగా 64% పనులు ఇప్పటికే పూర్తి చేయగలిగాం. కానీ, సకాలంలో నిధులు విడుదల చేయకుండా, పోలవరం రివైజ్డ్ డీపీఆర్‌కు ఆమోదం తెలపకుండా రాష్ట్ర ప్రభుత్వం ఖర్చు చేసిన సుమారు రూ.4వేల కోట్ల నిధులను తిరిగి చెల్లించకుండా మాపై ఆర్థిక భారాన్ని మోపుతున్నారు.

:- ఎన్నో ఏళ్లుగా ఎదురు చూస్తున్న విశాఖ రైల్వే జోన్ ప్రకటనను కావాలని వాయిదాల వేస్తూ రాష్ట్రానికి అన్యాయం చేస్తున్నారు. కేంద్ర ప్రభుత్వం కోరిన భూమి, గనులు, రాయితీలు కల్పిస్తామని రాష్ట్ర ప్రభుత్వం ముందుకొచ్చిన్నప్పటికీ కడప ఉక్కు కర్మాగారం ఇంకా ఇవ్వలేదు. :- కేవలం ఆరు మాసాలలో తొలిదశ పూర్తిచేయాలని విభజన చట్టంలో నిర్దేశించినప్పటికీ ఇప్పటికీ దుగరాజపట్నం పోర్టుపై ఏ నిర్ణయమూ ప్రకటించలేదు. రాష్ర్టానికి రావాల్సిన జాతీయ సంస్థల విషయంలో కూడా మీరు అన్యాయమే చేశారు. పలు విద్యా సంస్థలను ఇచ్చినట్టే ఇచ్చి వాటికి సరైన నిధులు ఇవ్వకుండా కాలయాపన చేస్తున్నారు. :- ఇలా అరకొర నిధులిస్తే అవి పూర్తిచేయడానికి కనీసం 30 ఏళ్లు పడుతుందనే విషయం మీకు తెలియనిదా..? కాకినాడలో హెచ్‌పీసీఎల్ రిఫైనరీ ప్రారంభించాలని చట్టంలో ఉన్నప్పటికీ కుంటిసాకులతో నిరాకరించడం మా పట్ల మీ నిర్లక్ష్య ధోరణి కాదా? :- ఇటువంటి అనేక అంశాలు, హామీల పట్ల వివక్ష పూరితంగా వ్యవహరిస్తూ మీరు ఆంధ్రప్రదేశ్ రాష్ట్రానికి తీరని ద్రోహం చేస్తున్నారని గ్రహించి ఆంధ్రప్రదేశ్ ప్రజలు ఆగ్రహంగా ఉన్నారు. మేము ఈ రాష్ట్రం నుంచి పన్నులు కడుతున్నాం. మేము ఈ దేశంలో భాగం కాదా? కేవలం రూ.1500 కోట్లతో ఢిల్లీని తలదన్నే రాజధానిని నిర్మించడం సాధ్యం అవుతుందా? నీతిఆయోగ్ సిఫార్సు చేసినప్పటికీ వెనుకబడిన ఏడు జిల్లాలకు గాను రాష్ట్ర ఖజానాకు జమచేసిన రూ.350 కోట్లను ఏకపక్షంగా, రాష్ట్ర అనుమతి లేకుండా తిరిగి వెనక్కి తీసుకోవడం భారత సమాఖ్య స్ఫూర్తికి గొడ్డలిపెట్టు కాదా? :- మీరు ఈవిధంగా రాష్ట్రానికి నమ్మకద్రోహం చేసి ఇప్పుడు తీరిగ్గా రావడం బాధాకరం. ఇంతకాలంగా ఆంధ్రప్రదేశ్ ప్రజలు చేస్తున్న ఆందోళన, వారి మనోభావాలు, వారి ధర్మాగ్రహం గమనించండి. అన్నీ తెలిసీ కూడా ఆంధ్రప్రదేశ్ ప్రజల న్యాయమైన, చట్టపరమైన హక్కులను నెరవేర్చకుండా మొండిచేతులతో రావడం మీకు ధర్మమా? :- కనుక, ప్రత్యేక హోదా ఆంధ్రుల హక్కుగా గుర్తించి, రాజ్యసభలో అప్పటి ప్రధానమంత్రి ఇచ్చిన రాయితీలతో కూడిన ప్రత్యేక హోదా హామీని, ఇతర హామీలను నెరవేర్చాలని డిమాండ్ చేస్తున్నాను. అలాగే, ఆంధ్రప్రదేశ్ పునర్ వ్యవస్థీకరణ చట్టం-2014లోని అన్ని అంశాలను వెంటనే అమలు పరచాలని డిమాండ్ చేస్తున్నాను" అని చంద్రబాబు లేఖలో పేర్కొన్నారు. అయితే ఈ లేఖకు కేంద్రం నుంచి ఎలాంటి స్పందన వస్తుందో వేచి చూడాల్సిందే.

ఆంధ్ర ప్రదేశ్ పునర్విభజన చట్టంలో కేంద్ర ప్రభుత్వం చేసిన హామీలను నెరవేర్చాలని ఆంధ్ర ప్రదేశ్ రాష్ట్ర ముఖ్య మంత్రి నారా చంద్రబాబు నాయుడు ఫిబ్రవరి 11వ తేదీ సోమవారం చేపట్టనున్న "ధర్మపోరాట దీక్ష" కు ఢిల్లీ లోని ఆంధ్ర ప్రదేశ్ భవన్ ప్రాంగణంలో ఏర్పాట్లు చురుకుగా సాగుతున్నాయి. రాష్ట్ర ముఖ్యమంత్రి నారా చంద్రబాబు నాయుడు సోమవారం ఉదయం 8గంటల నుంచి రాత్రి 8గంటల వరకు చేపట్టనున్న "ధర్మపోరాట దీక్ష" ఏర్పాట్లను ఆంధ్ర ప్రదేశ్ భవన్ రెసిడెంట్ కమీషనర్ ప్రవీణ్ ప్రకాష్, శాసనమండలి సభ్యులు సత్యనారాయణ రాజు, ఎపి భవన్ కమీషనర్ డా. అర్జా శ్రీకాంత్, ఎపి భవన్ ఓఎస్ డి. శ్రీమతి భావన సక్సెనాలతో కలసి ఎపి భవన్ అధికారులు, సిబ్బంది, తెలుగు సంఘాల ప్రతినిధులతో ఏర్పాట్లను సమీక్షించారు.

దీక్షలో పాల్గొనేందుకు ఆంధ్ర ప్రదేశ్ రాష్ట్ర నలుమూలల నుంచి భారీగా తరలివస్తున్న ప్రజాప్రతినిధులు, ప్రజలకు ఏవిధమైన అసౌకర్యం కలుగకుండా ప్రణాళికాబద్ధంగా సకల ఏర్పాట్లను పూర్తిచేయాలని ప్రవీణ్ ప్రకాష్ సూచించారు. ఆంధ్ర ప్రదేశ్ రాష్ట్ర పునర్విభజన చట్టంలో కేంద్ర ప్రభుత్వం ఇచ్చిన హామీల అమలులో రాష్ట్రానికి జరుగుతున్న అన్యాయాన్ని పవర్ పాయింట్ ప్రజంటేషన్ ద్వారా భవన్ అధికారులు, సిబ్బందికి విశదీకరిస్తూ రాష్ట్ర ముఖ్యమంత్రి చేపట్టనున్న ధర్మపోరాట దీక్ష విజయవంతం చేయుటకు అధికారులు, సిబ్బందిని సమాయత్త పరచారు. రాష్ట్రం నుంచి తరలివస్తున్న వారికి ముందుగా గుర్తించిన హోటల్స్, ఇతర భవనాలలో ఏర్పాటు చేస్తున్న బస ఏర్పాట్లను, వారికి అవసరమైన భోజనవసతి, రవాణా సౌకర్యాలలో ఏవిధమైన లోపం లేకుండా చూడాలని భవన్ సిబ్బందికి సూచించారు.

ప్రధాన దీక్షా వేదిక వద్ద అవసరమైన పెండాల్స్, పబ్లిక్ అడ్రస్ సిస్టం, పోలీసు రక్షణ వలయం, మంచినీటి సరఫరా, మీడియా లాంజ్, ప్రసారమాధ్యమాల ద్వార ప్రత్యక్ష ప్రసార ఏర్పాట్లను పకడ్బందీగా చేయాలని రెసిడెంట్ కమీషనర్ ప్రవీణ్ ప్రకాష్ తగు సూచనలు చేశారు. ఆంధ్ర రాష్ట్రం నుంచి తరలివస్తున్న ప్రజలతోపాటు దేశ రాజధానిలోని తెలుగు ప్రజలు విరివిగా పాల్గొనేలా స్థానిక తెలుగు సంఘాలు తమవంతు చేయూతనిచ్చి సహకరించాలని రెసిడెంట్ కమీషనర్ ప్రవీణ్ ప్రకాష్ విజ్ఞప్తి చేశారు. 11వ తేది సోమవారం ఉదయం 7గంటలకు రాజఘాట్ లోని మహాత్మాగాంధీ సమాధిని సందర్సించి నివాళులు అర్పిస్తారు. అనంతరం ఆంధ్ర ప్రదేశ్ భవన్ కు చేరుకొని డా. బి. ఆర్. అంబెడ్కర్ విగ్రహానికి పుష్పమాల వేసి అంజలిఘటించి భవన్ ప్రాంగణంలో ఏర్పాటుచేసిన ధర్మపోరాట దీక్ష ప్రధాన వేదికపై ఉదయం 8గంటల నుంచి రాత్రి 8గంటల వరకు "ధర్మపోరాట దీక్ష" చేపట్టనున్నారు.

తెలుగుదేశం పార్టీ రాజ్యసభ సభ్యుడు సీఎం రమేశ్‌కు వాట్సాప్ యాజమాన్యం షాకిచ్చింది. తన వాట్సాప్ ఖాతా పనిచేయడం లేదని రమేశ్ ఇచ్చిన ఫిర్యాదుకు ఆ సంస్థ దిమ్మతిరిగే సమాధానం ఇచ్చింది. మీరు వాట్సాప్ సేవలు వాడుకునేందుకు అర్హత కోల్పోయారంటూ ఆ సంస్థ చెప్పడంతో ఆయన షాక్‌కు గురయ్యారు. ఆయన ఖాతాపై అనేక ఫిర్యాదులు రావడంతో పరిశీలించి చివరకు బ్యాన్ చేసినట్లు చెప్పింది. అయితే కంప్లైంట్స్ ఎవరిచ్చారు, ఎందుకిచ్చారు అన్న దానిపై మాత్రం యాజమాన్యం స్పష్టత ఇవ్వలేదు. సీఎం రమేశ్ వాట్సాప్ ఖాతా బ్యాన్‌కు గురైన సంగతి ఏపీ రాజకీయాల్లో హాట్ టాపిక్‌గా మారింది.

కేంద్ర తన ఫోన్‌, వాట్సాప్ ఖాతాపై నిఘా పెట్టడం వల్లనే ఈ పరిస్థితి వచ్చిందని రమేశ్ అనుమానిస్తున్నట్లు ఆయన సన్నిహిత వర్గాలు చెబుతున్నాయి. దీనిపై ఆయన న్యాయ పోరాటానికి సిద్ధపడుతున్నట్లు వార్తలు వస్తున్నాయి. కేంద్రంలోని ఎన్డీయే ప్రభుత్వం విపక్ష పార్టీలకు చెందిన కీలక నేతల ఫోన్లను ట్యాప్ చేస్తోందని ఎప్పటి నుంచో ఆరోపణలు వెల్లువెత్తిన సంగతి తెలిసిందే. ఎన్డీయే నుంచి బయటకు వచ్చిన తర్వాత టీడీపీ నేతలు సైతం ఇలాంటి ఆరోపణలు చేశారు. టీడీపీలో కీలకనేతగా, సీఎం చంద్రబాబుకు అత్యంత సన్నిహితుడిగా కొనసాగుతున్న సీఎం రమేశ్ కేంద్రంపై ఎన్నోసార్లు తీవ్ర ఆరోపణలు చేశారు. కడపలో ఉక్కు పరిశ్రమ ఏర్పాటు చేయాలని డిమాండ్ చేస్తూ ఆమరణ నిరాహార దీక్ష సైతం చేశారు.

ఈ క్రమంలోనే సీబీఐ అధికారులు ఆయన ఆస్తులపై దాడులు చేయడం కలకలం రేపింది. విభజన హామీలపై పోరాడుతున్నందునే తమపై కేంద్రంపై కక్ష గట్టిందని రమేశ్ ఆరోపించారు. ఇప్పుడు ఆయన వాట్సాప్ ఖాతా బ్యాన్ కావడం వెనుక కేంద్రం కుట్ర ఉండొచ్చని టీడీపీ నేతలు అనుమానిస్తున్నారు. సంస్థ నిబంధనలు ఉల్లంఘించడంతో సీఎం రమేశ్‌ వాట్సాప్‌ అకౌంట్‌ను రద్దు చేసింది. వాట్సాప్‌ ఇతర వినియోగదారుల నుంచి అందిన ఫిర్యాదులపై విచారణ అనంతరం ఈ మేరకు నిర్ణయం తీసుకున్నట్లు సదరు సంస్థ తెలిపింది. తన వాట్సాప్ అకౌంట్ పనిచేయడం లేదంటూ సీఎం రమేశ్‌ పంపిన లేఖకు స్పందించిన సంస్థ పై విధంగా వివరణ ఇచ్చుకుంది. అయితే ఇలా కీలకమైన ఎన్నికల సమయంలో కేంద్ర ప్రభుత్వం కావాలనే తనపై ఇలాంటి కుట్రలు చేస్తోందని సీఎం రమేష్ ఆరోపిస్తున్నారు. పొరపాటున తప్పు జరిగి వుంటే.. ఇకపై అలాంటిది జరగకుండా చూసుకుంటానని తన ఖాతాను పునరుద్ధరించాలని ఆయన వాట్సాప్‌ను కోరారు.