news

అసెంబ్లీలో ఈ రోజు చంద్రబాబు బీజేపీ పై విరుచుకు పడ్డారు. మోడీ, అమిత్ షా చేస్తున్న ద్రోహాన్ని ఎండగట్టారు. బీజేపీ, వైసీపీల వ్యవహారశైలిని తీవ్రంగా తప్పుపట్టారు చంద్రబాబు. ఈ సందర్భంగా, తిరుమల కొట్టేయటానికి, మోడీ పన్నిన పన్నాగం గురించి వివరిస్తూ, మోడీని హెచ్చరించారు. తిరుమల పై కూడా రాజకీయాలు చేస్తున్నారు, ఆయన ఈ రాష్ట్రాన్ని కాపాడే కలియుగ దైవం. ఆయన జోలికి వస్తే, ఆయనే చూసుకుంటాడు. కాలియుగ వేంకటేశ్వరస్వామితో ఎవరైనా ఆడుకోవాలని అనుకుంటే ఆయన వారితో ఆడుకుంటాడు. వచ్చే జన్మదాకా ఆగాల్సిన అవసరం లేదు. ఆయన ఈ జన్మలోనే చూసుకుంటాడు. ఈ విషయంలో నాకు బాగా నమ్మకం ఉంది’ అని తెలిపారు.

హిందువులను రక్షిస్తామని చెప్పే బీజేపీ నేతలు, టీటీడీ పవిత్రతను దెబ్బతీసేందుకు వెనుకాడటం లేదని ఆగ్రహం వ్యక్తం చేశారు. బీజేపీ నేతలు తిరుమల తిరుపతి దేవస్థానం విషయంలో ఇటీవల కోర్టులకు వెళ్లడంపై సీఎం ఆగ్రహం వ్యక్తం చేశారు. అలాగే కేరళలో శబరిమల విషయంలో, ఎలా రచ్చ చేసి రాజకీయ రంగు పులిమింది చెప్పారు. అక్కడ లాగే, ఇక్కడ కూడా చేద్దామని చూసారని, కాని వారి ఆటలు ఇక్కడ సాగలేదని అన్నారు. నరేంద్ర మోదీ గుజరాత్ సీఎంగా ఉన్నప్పుడు రాకేశ్ అస్థానా ఇంటెలిజెన్స్ డీజీగా ఉండేవారని ఏపీ సీఎం చంద్రబాబు తెలిపారు. ఆయనపై చాలా అవినీతి ఆరోపణలు ఉన్నాయన్నారు. అలాంటి వ్యక్తిని మోదీ ఇప్పుడు సీబీఐలోకి తీసుకెళ్లి కూర్చోబెట్టారని విమర్శించారు. అందుకే సీబీఐకి ఆంధ్రప్రదేశ్ లో సమ్మతి ఉత్తర్వులను రద్దుచేశామని స్పష్టం చేశారు.

ప్రధాని నరేంద్ర మోదీ పెట్టించిన కొత్త ప్రపోజల్ పేరే ఫెడరల్ ఫ్రంట్ అని ఏపీ సీఎం చంద్రబాబు ఆరోపించారు. ఈ ఫెడరల్ ఫ్రంట్ వేదికగా కేసీఆర్, జగన్ కలిసి ఇక్కడ రాజకీయం చేయబోతున్నారని విమర్శించారు. తాను యూటర్న్ తీసుకున్నానని విపక్షాలు ఆరోపిస్తున్నాయనీ, తనది ఎన్నటికీ రైట్ టర్నేనని వ్యాఖ్యానించారు. టీడీపీ చేస్తున్నది ధర్మపోరాటమనీ, అందులో అంతిమం విజయం తమదేనని స్పష్టం చేశారు. ఏపీ అసెంబ్లీలో ఈరోజు మాట్లాడిన చంద్రబాబు.. కేంద్రంతో పాటు వైసీసీ, టీఆర్ఎస్ నేతలపై విరుచుకుపడ్డారు. జగన్ పై నమోదయిన కేసులను బీజేపీ నీరుగార్చబోతున్నారని సంచలన ఆరోపణలు చేశారు. ఒక్క జగన్ మాత్రమే కాకుండా ఆర్థిక నేరగాళ్లందరినీ కాపాడేందుకు యత్నిస్తున్నారని దుయ్యబట్టారు. మహారాష్ట్రలో బాబ్లీ ప్రాజెక్టుకు వ్యతిరేకంగా పోరాడినందుకు ఇప్పుడు నోటీసులు పంపించి వేధిస్తున్నారని విమర్శించారు. కోడి కత్తి కేసులో ఎన్ఐఏకు జోక్యం చేసుకునే అధికారం లేదన్నారు. మోదీ గుజరాత్ ముఖ్యమంత్రిగా ఉన్నప్పుడు ఇదే ఎన్ఐఏ చట్టాన్ని వ్యతిరేకించారని గుర్తుచేశారు.

కేంద్రం తీరుకు నిరసనగా ప్రత్యేకహోదా, విభజన హామీల సాధన సమితి చేపట్టిన రాష్ట్ర బంద్‌కు సంఘీభావంగా ఏపీ సీఎం చంద్రబాబు నల్ల చొక్కా ధరించి అసెంబ్లీకి వచ్చారు. ఏపీ హక్కుల సాధనకు కేంద్రానికి వ్యతిరేకంగా నిరసన కార్యక్రమాలు చేపట్టాలంటూ సీఎం కార్యాచరణ ప్రకటించారు. విభజన చట్టం అమలులో కేంద్రం మొండిచేయి చూపిస్తున్నందున, కేంద్రం పార్లమెంట్లో బడ్జెట్‌ ప్రవేశపెడుతున్నందున ఈరోజు నిరసన దినంగా పాటించాలని చంద్రబాబు పిలుపునిచ్చారు. మరో పక్క, ఏపీకి కేంద్రం అన్యాయం చేసిందంటూ శుక్రవారం పార్లమెంట్‌ ఆవరణలో గాంధీ విగ్రహం వద్ద టీడీపీ ఎంపీలు ఆందోళనకు దిగారు. నల్ల దుస్తులతో టీడీపీ ఎంపీలు తమ నిరసనను వ్యక్తం చేశారు. విభజన హామీలు నెరవేర్చాలని ఎంపీలు డిమాండ్ చేశారు.

ఇలా కేంద్రం పై రాష్ట్రమంతా నిరసన తెలుపుతూ ఉండగానే, చంద్రబాబు ఈ రోజు ఢిల్లీ వెళ్తున్నారు. బీజేపీయేతర ఐక్యఫ్రంట్ నేతలతో ముఖ్యమంత్రి చంద్రబాబు నాయుడు శుక్రవారం ఢిల్లీలో భేటీ కానున్నారు. పార్లమెంట్ సమావేశాల్లో అనుసరించాల్సిన వ్యూహంపై ఏఐసీసీ అధ్యక్షుడు రాహూల్ గాంధీ, ఇతర ప్రతిపక్ష నేతలతో చర్చించాలని నిర్ణయించారు. ప్రధానంగా ఏపీకి ప్రత్యేక హోదా, విభజన అంశాల అమలు, నిధుల కేటాయింపులో కేంద్రం ప్రదర్శిస్తున్న నిరంకుశ వైఖరితో పాటు తమిళనాడు, పశ్చిమ బెంగాల్, కర్ణాటక తదితర రాష్ట్రాల్లో జరుగుతున్న ఐటీ, ఈడీ దాడులను నిరసిస్తూ ఐక్యఫ్రంట్‌తో కలసి కార్యాచరణ రూపొందించాలని భావిస్తున్నారు. గత నెలలో కోల్‌కతాలో జరిగిన భారీ ర్యాలీ అనంతరం జరుగుతున్న పరిణాలు భేటీలో ప్రస్తావనకు రానున్నాయి.

రాష్ట్రానికి ప్రత్యేక హోదా డిమాండ్‌చేస్తూ హోదా సాధన సమితి శుక్రవారం రాష్ట్ర బంద్‌కు పిలుపునిచ్చిన నేపథ్యంలో పార్లమెంట్‌లో టీడీపీ చేస్తున్న ఆందోళనను తీవ్రతరం చేయటం ద్వారా రాష్ట్రానికి జరుగుతున్న అన్యాయాన్ని మరోసారి ప్రజల్లోకి తీసుకువెళ్లాలనేది చంద్రబాబు వ్యూహం. ఇప్పటివరకు నాలుగు బడ్జెట్‌ల్లో రాష్ట్రానికి అరకొర కేటాయింపులు జరిగాయని శుక్రవారం జరిగే బడ్జెట్ కూడా ఇదే తరహాలో ఉంటుందని, ఇందుకు నిరసనగా పార్లమెంట్‌లో వాదనలు వినిపించేలా ఎంపీలకు దిశానిర్దేశం చేయనున్నారు. పార్లమెంట్ సమావేశాల చివరి రోజు వరకు రాష్ట్రంలో నిరసన కార్యక్రమాలు నిర్వహించేందుకు పిలుపునిచ్చారు.

ఏమి చేస్తారయ్య మముల్ని జైళ్లలో పెడతారా.... మీ అబ్బ సొమ్ము ఇస్తున్నారా.. సిగ్గు కూడా లేదా మీకు... ఏమి చేస్తారయ్యా మీరు.. తెలుగు వారితో పెట్టుకుంటే అడ్రస్ ఉండరు... రక్తం పొంగుతోంది.. ఊడిగం చేసేవాళ్లమా మేము.. పిచ్చోళ్ళ లా కనపడుతున్నామా,వెర్రోళ్ల లా కనబడుతున్నామా.. ఎవరి కోసం ఇస్తారు ఎవడబ్బ సొమ్మని ఇస్తారు ... కొత్త రాష్ట్రం ఇవ్వాల్సిందే... తెలంగాణ లో ఎన్ని ఉన్నాయి ఢిల్లీ లో ఎన్ని ఉన్నాయి తమిళనాడు లో ఎన్ని ఉన్నాయి కర్ణాటక లో ఎన్ని ఉన్నాయి గుజరాత్ లో ఎన్ని ఉన్నాయి ... ఎవడి కోసం ఇస్తారు ."ఇవి అన్నది చంద్రబాబు అంటే నమ్మగలరా... ఇది ఆయన ఆక్రోశం.. అసెంబ్లీ వేదికగా చంద్రబాబు, మోడీ పై గర్జించిన తీరు ఇది... ఆ కళ్ళ లో బాధ ముఖం లో ఆవేశం.. బిగిసిన నరాలు, ఎగసిన ఉద్వేగం, కోపం తో జేవురించిన ముఖం... మాటల్లో ఆవేశం కోపం బాధ.... ప్రతి ఆంధ్రుడి ప్రతిస్పందన ఇలానే ఉంటది ...

బీజేపీ ఎమ్మెల్యే విష్ణుకుమార్ రాజుపై సీఎం చంద్రబాబు తీవ్రస్థాయిలో మండిపడ్డారు. అసెంబ్లీలో విష్ణుకుమార్ రాజు మాట్లాడుతూ.. కేంద్రం చాలానే ఇచ్చిందని లెక్కలు చెబుతుంటే చంద్రబాబు మధ్యలో అడ్డుకున్నారు. సిగ్గు లేకుండా మాట్లాడుతున్నారని విష్ణుపై చంద్రబాబు ఫైర్ అయ్యారు. కేంద్ర సంస్థలు ఎవరి కోసం ఇస్తారని.. ఎవడబ్బ సొమ్మని ప్రశ్నించారు. ప్రజాప్రతినిధిగా ఉండటానికి విష్ణుకుమార్ రాజుకు అర్హత లేదన్నారు. రక్తం ఉడికిపోతుందన్నారు. ‘‘ఎవరికి ఊడిగం చేస్తారు? ఏం చేస్తారయ్యా మీరు? జైల్లో పెడతారా... ఆవేదన ఉండదా మాకు? తమిళులకి ఎన్ని ఇచ్చారు? గుజరాత్‌కి ఎన్ని ఇచ్చారు.? రోషం లేదా? తమాషాగా ఉందా.. న్యాయం జరిగేంత వరకు వదిలి పెట్టాం. వినేవాళ్లు ఉంటే చెవుల్లో పువ్వులు పెడతారండి. మహిళలు వచ్చి.. పోరాడతామంటున్నారని.. పెన్షన్ డబ్బులు విరాళంగా ఇస్తున్నారని .. ఆంధ్ర ప్రజలకు పౌరుషం లేదా అని అడుగుతున్నారని.. సాధారణ మహిళలకు ఉండే పరిజ్ఞానం మీకు లేదా’’ అని ప్రశ్నించారు.

ప్రత్యేక హోదాపై తాను మాట మార్చలేదని.. కేంద్రమే తప్పుడు సమచారమిచ్చి.. అన్యాయం చేసిందని సీఎం చంద్రబాబు విమర్శించారు. 14వ ఆర్థిక సంఘం పేరుతో మోసం చేశారని.. ఆ సంఘం చైర్మన్ హోదాపై తమకు ఎలాంటి అభ్యంతరం లేదని స్వయంగా చెప్పారన్నారు. కానీ ప్రభుత్వం మాత్రం ప్యాకేజీ పేరు చెప్పిందన్నారు. డబ్బులు ఇవ్వండని అడిగితే అప్పు ఇస్తానంటున్నారని.. అప్పు ఇస్తే.. తాను సంపాదించుకోలేనా అని తీవ్రస్థాయిలో ప్రశ్నించారు. ‘‘మీరు ఇచ్చింది ఏంటి? మేము పన్నులు కట్టడం లేదా..? నాకు హక్కు లేదా? నాకు అన్యాయం జరిగినప్పుడు.. నాకు ఎందుకు ఇవ్వరు? దేశంలో భాగంగా లేమా? తమిళనాడులో, ఈశాన్య రాష్ట్రాల్లో ఎందుకు వ్యతిరేకత వస్తుందో ఆలోచించుకోవాలి. వ్యతిరేకంగా మాట్లాడితే ఫినిష్ చేయాలని చూస్తారు. ఏపీ నాలుగన్నర సంవత్సరాల పాపలాంటిది. చిన్నపిల్లలకు పౌష్టికాహారం ఇస్తే కానీ బలంగా ఎదగలేరు. అలాంటి ఏపీకి సాయంగా ఉంటారని.. ఆదుకుంటారని.. మద్దతుగా ఉన్నాను. ఎవరో ఒకరు సాయం చేస్తారనుకున్నాను. హోదా ఇవ్వకపోయినా.. ఏ పేరుతో ఇచ్చినా.. రాష్ట్రాన్ని ఆదుకుంటే సరిపోతుందనుకున్నాను. అన్నీ దిగమింగుకుని .. ఈగోని సంతృప్తి పరుస్తుంటే.. మట్టి, నీళ్లు ముఖాన కొట్టి వెళ్లారు’’ అంటూ తీవ్రస్థాయిలో మండిపడ్డారు.