news

వైద్య రంగంలో ప్రైవేటు ఆసుపత్రులకు ప్రాధాన్యం ఇవ్వడంతో ప్రభుత్వ ఆసుపత్రులు నిర్వీర్యం అయ్యాయని, విద్యారంగంలో ఆ పరిస్థితి రానీయొద్దని తెలుగు రాష్ట్రాల గవర్నర్‌, ఏయూ కులపతి నరసింహన్‌ ప్రభుత్వానికి సూచించారు. ప్రభుత్వ విశ్వవిద్యాలయాలు ప్రైవేటు వర్సిటీలతో పోటీ పడాలంటూ మంత్రి గంటా శ్రీనివాసరావు చేసిన వ్యాఖ్యలను ఖండించారు. అలా అనడం నేరమని వ్యాఖ్యానించారు. ఆంధ్ర విశ్వవిద్యాలయం స్నాతకోత్సవం వేదికపై బుధవారం చోటుచేసుకున్న ఈ పరిణామం చర్చనీయాంశంగా మారింది. ఆంధ్ర విశ్వవిద్యాలయం 85, 86వ ఉమ్మడి స్నాతకోత్సవాన్ని బుధవారం విశాఖపట్నంలోని సర్‌ సీఆర్‌రెడ్డి మందిరంలో నిర్వహించారు.

ఈ కార్యక్రమంలో గవర్నర్‌ నరసింహన్‌, రాష్ట్ర మానవ వనరుల అభివృద్ధిశాఖ మంత్రి గంటా శ్రీనివాసరావు, ముఖ్య అతిథిగా ఐఐటీ- దిల్లీ సంచాలకులు వి.రామ్‌గోపాల్‌రావు పాల్గొన్నారు. స్నాతకోత్సవంలో మంత్రి మాట్లాడుతూ.. విద్యారంగానికి ఏటా రూ.25 వేల కోట్లు వెచ్చిస్తూ రాష్ట్రంలో విజ్ఞాన సమాజాన్ని నిర్మించడానికి ప్రభుత్వం కృషి చేస్తోందని చెప్పారు. రాష్ట్రానికి ప్రముఖ ప్రైవేటు విశ్వవిద్యాలయాలు వస్తున్నాయని, వాటితో పోటీ పడి ప్రభుత్వ వర్సిటీలు ఎదగాలని సూచించారు. అనంతరం గవర్నర్‌ మాట్లాడుతూ మంత్రి వ్యాఖ్యలను ఖండించారు. ప్రైవేటు విశ్వవిద్యాలయాలతో ప్రభుత్వ వర్సిటీలు పోటీ పడలేవని పేర్కొన్నారు.

వర్సిటీల్లో పలు నియామకాలకు, పదోన్నతులకు పీహెచ్‌డీ చేసి ఉండాలన్న నిబంధన విధిస్తుండడంతో చాలా మంది వ్యక్తిగత ఆసక్తితో సంబంధం లేకుండా పీహెచ్‌డీ చేస్తున్నారని వాపోయారు. ‘‘ఎంతమంది పరిశోధనలు నాణ్యంగా ఉంటున్నాయి? ఎన్ని పరిశోధనలు సమాజానికి ఉపయుక్తంగా ఉంటున్నాయి? ఒక ఆచార్యుడు ఎంతోమందితో పీహెచ్‌డీలు చేయిస్తున్నారు. అది ఎలా సాధ్యమవుతుంది? బీఏ, బీకాంల మాదిరిగానే పీహెచ్‌డీలను కూడా ఒక డిగ్రీ తరహాలో చేస్తున్నారు. కట్‌, కాపీ, పేస్ట్‌’ సంస్కృతి ఎక్కువగా ఉంటోంది. దీనిపై దేశవ్యాప్తంగా సమీక్ష జరగాలి’’ అని గవర్నర్‌ వ్యాఖ్యానించారు. ఏయూ ఉపకులపతి ఆచార్య జి.నాగేశ్వరరావు, ఇతర అధికారులు పాల్గొన్నారు.

సంక్రాంతి పండుగకు ముందు నవ్యాంధ్రకు అతి పెద్ద ‘పెట్టుబడి పండుగ’ వచ్చింది. భారత పారిశ్రామిక దిగ్గజం ‘అదానీ’ ఏపీలో దేశంలోనే అతిపెద్దదైన ‘డేటా సెంటర్‌’ ఏర్పాటు చేయనుంది. విశాఖ సమీపంలో 500ల ఎకరాల్లో... ఏకంగా 70వేల కోట్ల రూపాయల పెట్టుబడి పెట్టనుంది. బుధవారం సీఎం చంద్రబాబు సమక్షంలో అదానీ సంస్థ చైర్మన్‌ గౌతమ్‌ అదానీతో ఐటీ శాఖ లోకేశ్‌ ఒప్పంద పత్రాలపై సంతకాలు చేశారు. నవ్యాంధ్రప్రదేశ్‌ ఏర్పాటైన తర్వాత కుదిరిన అత్యధిక పెట్టుబడి ఒప్పందం ఇదే. దీని ప్రకారం... అదానీ సంస్థ దేశంలోనే ఎక్కడా లేనంతస్థాయిలో 5జీడబ్ల్యూ సామర్థ్యంతో విశాఖలో డేటా సెంటర్‌ పార్కులను ఏర్పాటు చేస్తుంది.

ఈ పార్కుల్లో 20 ఏళ్ల కాలంలో రూ.70వేల కోట్లను పెట్టుబడిగా పెడుతుంది. డేటా సెంటర్‌ ద్వారా రూ.40వేల కోట్లు, సోలార్‌ పార్కుల ద్వారా రూ.30వేల కోట్ల పెట్టుబడులు రానున్నాయి. ఫలితంగా 1.10లక్షల మందికి ఉపాధి అవకాశాలు లభిస్తాయని తెలిపింది. ఈ సందర్భంగా సీఎం మాట్లాడుతూ...ఈ ప్రాజెక్టు తొలిదశ 18నెలల్లో పూర్తవుతుందన్నారు. భవిష్యత్తులో డేటా ద్వారానే సంపద సృష్టి జరుగుతుందన్నారు. వినూత్న ఆవిష్కరణలు, భావి ఫలితాలు ప్రతిదీ సమాచారంపైనే ఆధారపడి ఉంటాయని, ఐటీకి డేటా సెంటర్‌ అత్యంత కీలకమని పేర్కొన్నారు. గతంలో హైదరాబాద్‌లో ఐటీ అభివృద్ధి చేశామని, ఇప్పుడు ఏపీని డేటా హబ్‌గా మారుస్తున్నామన్నారు.

ప్రపంచంలోనే తొలిసారిగా... వందశాతం పునరుత్పాదక ఇంధనంతో నడిచే డేటా సెంటర్‌ పార్కులు ప్రపంచంలోనే తొలిసారిగా విశాఖలో ఏర్పడబోతున్నట్లు చంద్రబాబు పేర్కొన్నారు. వీటిద్వారా ఉద్యోగాల కల్పన, టెక్నాలజీ స్టార్ట్‌పలు రాష్ట్రానికి తరలొస్తాయన్నారు. రాబోయే ఐదేళ్లలో డేటా వినియోగం వందశాతం పెరుగుతుందని, సమాచార నిల్వ కీలకంగా మారుతుందన్నారు. సమాచార వినియోగం జపాన్‌లో 8.3జీబీ ఉంటే ఇండియాలో 8.8జీబీ ఉందన్నారు. భారత్‌లో ఉన్నంతమంది 4జీ వినియోగదారులు మరెక్కడా లేరని, జపాన్‌లో వీరు 6.5శాతం మంది కాగా, ఏపీలో 18శాతం అని వివరించారు. భవిష్యత్తులో వర్జీనియాకు దీటుగా విశాఖ రూపొందుతుందన్నారు. ఈ ఒప్పందం ద్వారా డేటా అనలిటిక్స్‌, మిషన్‌ లెర్నింగ్‌, ఏఐకు బాటలు పడతాయన్నారు. ఎంత త్వరితగతిన డేటా సెంటర్లను అభివృద్థి చేస్తారోనన్న ఆసక్తి తనకు కూడా ఉందన్నారు. ఏపీని ఎంపిక చేసుకున్న గౌతమ్‌ అదానీకి ఆయన ధన్యవాదాలు తెలిపారు. భావనపాడు ఓడరేవు ద్వారా శ్రీకాకుళం అభివృద్ధి చెందుతుందని, ఇకపై ఉత్తరాంధ్ర వలసలకు ఈ పోర్టు అడ్డుకట్టగా ఉంటుందన్నారు.

అదాని కంపెనీ ఊరికే ఆంధ్రప్రదేశ్ కి రాలేదు. దీని వెనుక ఆంధ్రప్రదేశ్ ఐటీ శాఖ మంత్రి నారా లోకేష్ కష్టం ఎంతో ఉంది. లక్ష ఐటీ ఉద్యోగాలు కల్పిస్తా అన్నప్పుడు తలా తోక లేని రాష్ట్రంలో లక్ష ఐటీ ఉద్యోగాల అని ఎద్దేవా చేసిన వారు ఎందరో. కానీ ఇచ్చిన హామీ ని నిలబెట్టుకోవడానికి పక్కా వ్యూహంతో ముందుకు వెళ్లారు లోకేష్. కొడితే కుంభస్థలాన్నే కొట్టాలి అనే విధంగా లోకేష్ పనిచేసారు. గత సంవత్సరం దావోస్ పర్యటన లో అదాని గ్రూప్ ముఖ్యులను కలిసి రాష్ట్రంలో పెట్టుబడులు పెట్టడానికి ఉన్న అనువైన పరిస్థితులుని వివరించిన మంత్రి నారా లోకేష్. ఆ తరువాత ఫిన్ టెక్ ఫెస్టివల్ సందర్భంగా మరో సారి అదాని బృందంతో భేటీ అయ్యి అదాని గ్రూప్ తో చర్చలు జరిపారు.

అదాని గ్రూప్ డేటా సెంటర్ల బిజినెస్ లోకి అడుగుపెడుతుంది అని తెలుసుకున్న వెంటనే మంత్రి నారా లోకేష్ రంగంలోకి దిగారు. స్వయంగా ఆయనే ఆంధ్రప్రదేశ్ లో ఉన్న క్లౌడ్ హబ్ పాలసీ గురించి వివరించి అదాని గ్రూప్ ని ఒప్పించారు. అనుమతులు,అనువైన భూమి ,మౌలిక వసతుల కల్పన,వివిధ శాఖలతో అనుసందానం ఇలా అన్ని తానై అదాని గ్రూప్ ఆంధ్రా కి వచ్చే విధంగా మంత్రాంగం నడిపించారు. ఇతర రాష్ట్రాల నుండి ఉన్న పోటీ నేపధ్యంలో ఎక్కడా సమాచారం బయటకి రాకుండా జాగ్రత్త పడుతూనే పని చక్కబెట్టారు లోకేష్. కేవలం మూడు నెలల్లో వారికి కావాల్సిన అనుమతులు, రాయితీలు,భూమి ఇలా అన్నింటి పై స్పష్టత వచ్చే లా చేసి స్వయంగా గౌతమ్ అదాని అమరావతిలో అడుగు పెట్టే విధంగా చేసారు.

ఆంధ్రప్రదేశ్‌లో డేటా పార్క్‌, సోలార్‌ పార్క్‌ల ఏర్పాటుకు రూ.70 వేల కోట్ల పెట్టుబడి పెట్టేందుకు అదానీ గ్రూప్‌ ముందుకొచ్చింది. ఈ మేరకు ఆంధ్రప్రదేశ్‌ ఐటీ శాఖ, అదానీ గ్రూప్‌ మధ్య బుధవారం ఒప్పందం కుదిరింది. రాబోయే 20 ఏళ్లలో లక్ష ఉద్యోగాల కల్పనకు వీలుగా రూ.70వేల కోట్ల పెట్టుబడులు పెడుతుంది. విశాఖపట్నంలోని 500 ఎకరాల్లో ఒక గిగా వాట్‌ డేటా సెంటర్‌ (మూడు కేంద్రాలు) ఏర్పాటు చేస్తుంది. 5 గిగా వాట్స్‌ సోలార్‌ పార్క్‌ను కూడా నెలకొల్పుతుంది. ఈ డేటా కేంద్రాన్ని ఇంటర్నెట్‌ కేబుల్‌ ల్యాండింగ్‌ స్టేషన్‌తో అనుసంధానించడం ద్వారా మెరుగైన ఇంటర్నెట్‌ సేవలు అందించే కీలక కేంద్రంగా ఆంధ్రప్రదేశ్‌ అవతరిస్తుందని రాష్ట్ర ప్రభుత్వం ప్రకటించింది.