news

ఒంగోలులో టిడిపి నేతలను తమ వైపు లాగే కార్యక్రమాన్ని వైసీపీ ప్రారంభించింది. తెలంగాణ ఎన్నికల ముగిసిన అనంతరం దూకుడు పెంచింది. రాజ్యసభ సభ్యుడు, పార్టీ జాతీయ ప్రధాన కార్యదర్శి విజయసాయిరెడ్డి ద్వారా ఇతర పార్టీలకు చెందిన పలువురు నేతలను రాబట్టుకునే ప్రయత్నాలు ప్రారంభించింది. ఆయన ప్రమేయంతో ఇప్పటికే ఒకరిద్దరు నాయకులు వైసీపీలో చేరగా, మరో ఇద్దరు, ముగ్గురు నేతలతో ప్రస్తుతం ఆయన సంప్రదింపులు జరుపుతున్నట్లు తెలుస్తోంది. దీంతో విజయసాయిరెడ్డి కదలికలపై టీడీపీ అధిష్ఠానం కూడా ప్రత్యేక దృష్టి సారించింది. జిల్లాలో నెలకొన్న రాజకీయ పరిణామాల నేపథ్యంలో పలువురు నాయకుల పార్టీ ఫిరాయింపులకు అవకాశం ఏర్పడింది. వైసీపీ నుంచి నలుగురు ఎమ్మెల్యేలు టీడీపీలో చేరడంతో స్థానికంగా ఆ పార్టీ నాయకత్వ సమస్యను ఎదుర్కొంటోంది. తదనుగుణంగా పార్టీలోకి దీటైన అభ్యర్థులను చేర్చుకునే చర్యలు చేపట్టింది.

అందులో భాగంగా టీడీపీతో పాటు, ఇతర ఏపార్టీలో కానీ, స్వతంత్రంగా కానీ ఉన్న బలమైన నేతల కోసం అన్వేషిస్తోంది. తొలుత ఆ బాధ్యతను జిల్లాతో సంబంధం ఉండి, వైసీపీలో కీలక నేతలుగా ఉన్న బాలినేని శ్రీనివాసరెడ్డి, వై.వి. సుబ్బారెడ్డిలతోపాటు, పార్టీ పరిశీలకుడు సజ్జల రామకృష్ణారెడ్డిలకు అప్పగించింది. అదే తరహాలో రాష్ట్ర స్థాయిలో ఇలాంటి వ్యవహారాలను రాజ్యసభ సభ్యుడు, జగన్‌కు అత్యంత నమ్మకస్తుడిగా ఉన్న విజయసాయిరెడ్డి చూస్తున్నారు. ప్రముఖ ఆడిటర్‌ కూడా అయిన ఆయనకు రాష్ట్రంలోని ఇతర జిల్లాలతోపాటు, మన జిల్లాలోని కొందరి నాయకులతో వ్యక్తిగత పరిచయాలు ఉన్నాయి. దీనికితోడు జిల్లాతో సంబంధం ఉన్న పార్టీ నాయకులకు వ్యక్తిగత రాగధ్వేషాలు ఉండొచ్చన భావనతో ఇక్కడ ఆపరేషన్‌ ఆకర్ష్‌ కార్యక్రమ బాధ్యతను అధిష్ఠానం విజయసాయిరెడ్డికి అప్పగించినట్లు తెలిసింది.

ఇప్పటి వరకూ జిల్లాలో ఒకరిద్దరు ప్రాధాన్యత కలిగిన నాయకుల వైసీలో చేరికలో విజయసాయిరెడ్డి కీలక పాత్ర పోషించారు. మాజీ మంత్రి మానుగుంట మహీధర్‌రెడ్డి వైసీపీలోకి చేరికకు ముగింపు ఇచ్చింది ఆయనే. విజయసాయిరెడ్డి రంగంలోకి దిగిన తర్వాతనే మహీధర్‌రెడ్డి వైసీపీలోకి చేరికకు మార్గం సుగమమైందన్న భావన జగన్‌లో ఉన్నట్లు తెలుస్తోంది. నిశితంగా పరిశీలిస్తున్న టీడీపీ.. వైసీపీ చేస్తున్న ఈ వ్యవహారాన్ని టీడీపీ అధిష్ఠానం సీరియస్‌గా పరిశీలిస్తోంది. ఈ విషయంపై టీడీపీ అధినేత, ముఖ్యమంత్రి చంద్రబాబు నాయుడే స్వయంగా దృష్టి సారించి ఎక్కడ ఏం జరుగుతుందో తెలియజేయాలని కొందరికి ప్రత్యేక బాధ్యతలు అప్పగించినట్లు తెలిసింది. ఈ ఆపరేషన్‌ వ్యవహారాలకు అనుగుణంగా టీడీపీ కూడా ఓ వ్యూహాన్ని రూపొందించుకొంటున్నట్లు తెలుస్తోంది.

తెలుగుదేశం ఎంపీ సుజనా చౌదరి పై గత నెలలో ఈడీ రైడ్లు చేసి, హడావిడి చేసిన విషయం తెలిసిందే. 6 వేల కోట్లు అని, ఫారెన్ కార్లు అంటూ, మీడియాకు లీకులు ఇచ్చి, హడావిడి చేసారు. దీని పై, అన్ని పత్రాలతో మీడియా ముందుకు వచ్చి, సుజనా వివరణ ఇచ్చారు. అయితే, ఈ ఈడీ దాడులు తరువాత, డిసెంబర్ 3 నుంచి 5 వరకు, ఢిల్లీలోని ఈడీ ఆఫీస్ లో సుజనాని విచారణ జరిపారు. అయితే ఈ మూడు రోజులు సుజనాని 8 గంటల పాటు విచారించిన ఎన్‌ఫోర్స్‌మెంట్‌ డైరెక్టరేట్‌ (ఈడీ) అధికారులు కనీసం ఆహారం కూడా అందించలేదని ఆయన తరఫు న్యాయవాదులు దిల్లీ హైకోర్టుకు బుధవారం నివేదించారు.

ఎంపీని తన భోజనం తెచ్చుకోవడానికి కూడా అనుమతించలేదని, ఆయనకున్న మానవ హక్కులను ఉల్లంఘించారని జస్టిస్‌ నజ్మీ వజీరీ ఎదుట వాదనలు వినిపించారు. సుజనా చౌదరిపై నిర్బంధంగా ఎలాంటి చర్యలు చేపట్టరాదంటూ గతంలో న్యాయస్థానం ఇచ్చిన ఆదేశాలను కూడా అధికారులు అతిక్రమించారని, ఆయన పట్ల అమర్యాదకరంగా వ్యవహరించారని కోర్టుకు నివేదించారు. ఈడీ విచారణ సాయంత్రం 6 గంటలకు ముగిసినప్పటికీ 8 వరకూ ఆయనను వెళ్లనీయలేదని తెలిపారు. తొలిరోజు ఇద్దరు ఈడీ అధికారులతో కలిపి మధ్యాహ్న భోజనానికి వెళ్లగా, మిగిలిన రెండు రోజులు భోజనానికి అనుమతించలేదని చెప్పారు.

అలా జరిగి ఉంటే అది మానవహక్కులు, హుందాతనం, రాజ్యాంగ హక్కులను అతిక్రమించడమే అవుతుందని; ఈ విషయాన్ని పరిశీలిస్తామని న్యాయమూర్తి తెలిపారు. కాగా ఈ ఆరోపణలను ఈడీ తరఫున హాజరైన కేంద్ర ప్రభుత్వ న్యాయవాది తోసిపుచ్చారు. ఆయన అరటి పళ్లు తిన్నారని తెలిపారు. ఈ విషయమై ప్రమాణపత్రం దాఖలు చేస్తామని ఎంపీ తరఫు న్యాయవాదులు తెలపగా దీనికి సమాధానమివ్వాల్సిందిగా న్యాయస్థానం ఈడీని ఆదేశించింది. ఈడీ విచారణ కోసం తనకు ఇచ్చిన సమన్లను రద్దు చేయాలని కోరుతూ సుజనా దిల్లీ హైకోర్టును ఆశ్రయించిన సంగతి తెలిసిందే. ఆయన పట్ల ఈడీ ఎలాంటి నిర్బంధ చర్యలు చేపట్టరాదంటూ గతంలో న్యాయస్థానం ఆదేశించింది. దీంతో డిసెంబరు 3, 4, 5 తేదీల్లో ఈడీ విచారణకు సుజనా హాజరయ్యారు.

నవ్యాంధ్రకు జల జీవ నాడి పోలవరం ప్రాజెక్టు నిర్మాణంలో మరో దశ మొదలైంది. అతి కీలకమైన ‘కాఫర్‌ డ్యామ్‌’ నిర్మాణం మహా యజ్ఞంలా సాగుతోంది. అనుకున్న సమయంలో పోలవరం ప్రాజెక్టు పూర్తి చేయాలంటే... గ్రావిటీ ద్వారా కుడి, ఎడమ కాలువల ద్వారా గోదావరి జలాలు పారాలంటే... స్పిల్‌వే పనులకు సమాంతరంగా ఎగువ కాఫర్‌ డ్యాం నిర్మాణం కూడా జరగాలి. ప్రాజెక్టు పనులు చేపట్టేందుకు వీలుగా నదీ ప్రవాహాన్ని మళ్లించేందుకు కాఫర్‌ డ్యామ్‌ను నిర్మించాల్సి ఉంటుంది. స్పిల్‌వే నిర్మాణానికి వీలుగా... నదీ ప్రవాహాన్ని మళ్లించేందుకు తాత్కాలికంగా ఓ భారీ మట్టికట్టను వేస్తారు. దీనినే కాఫర్‌ డ్యామ్‌ అంటారు. ఏ ప్రాజెక్టు నిర్మాణంలోనైనా కాఫర్‌డ్యామ్‌ నిర్మాణం తప్పనిసరి.

అయితే... పోలవరంలో నిర్మిస్తున్న కాఫర్‌డ్యామ్‌ మిగిలిన వాటిలా కాదు! ఎగువ కాఫర్‌ డ్యామ్‌ ద్వారానే నీటిని స్పిల్‌వే వైపు మళ్లించి... వచ్చే ఏడాది జూన్‌ నాటికి గ్రావిటీ ద్వారా గోదావరి జలాలను అందించాలన్నది ప్రభుత్వ లక్ష్యం.
అంటే... దీనిని తాత్కాలిక నిర్మాణంలా కాకుండా, బలంగా నిర్మించాలి. అందుకే... కెల్లర్‌-ఎల్‌అండ్‌టీ సంస్థలు 2480 మీటర్ల పొడవునా జెట్‌గ్రౌటింగ్‌ ద్వారా నదీ గర్భంలో మీటరు లోపలి నుంచి ఒక కాంక్రీట్‌ గోడను నిర్మించాయి. ఇది... కాఫర్‌డ్యామ్‌కు పునాదిలాంటిదన్న మాట! దీనిపై 238 మీటర్ల వెడల్పుతో... 2480 మీటర్ల పొడవు, 42.50 మీటర్ల ఎత్తుతో కాఫర్‌ డ్యామ్‌ను నిర్మించాలి. ఈ పనులను నవయుగ సంస్థ పరుగులు తీయిస్తోంది. ఇప్పటికే దీని నిర్మాణానికి అనుమతులు రావడంతో పోలవరం ఇంజనీర్లు పూర్తిస్థాయిలో దీనిపై దృష్టి పెట్టారు.

ఎగువ కాఫర్‌ డ్యాం నిర్మాణంలో ఉపయోగించే మట్టి, కంకర నమూనాలను ఎప్పటికప్పుడు పరీక్షించేలా పోలవరం సైట్‌లోనే ప్రత్యేక ప్రయోగశాలలు ఏర్పాటు చేశారు. కేంద్ర జలవనరుల సంఘం (సీడబ్ల్యూసీ), పోలవరం ప్రాజెక్ట్‌ అథారిటీ, ఇంజనీరులు, వ్యాప్కోస్‌ బృందం, క్వాలిటీ కంట్రోల్‌ నిపుణులు... ఇలా అందరికీ ఈ ప్రయోగశాలలు అందుబాటులో ఉంటాయి. నిర్మాణ క్రమంలో ఎక్కడా చిన్న పొరపాటు కూడా రాకుండా ఈ ఏర్పాటు చేశారు. 2019 జూన్‌ నాటికి గ్రావిటీ ద్వారా గోదావరి జలాలను అందిస్తామన్నది ముఖ్యమంత్రి చంద్రబాబు లక్ష్యం! దీనికి ఆరు మాసాలే మిగిలి ఉంది. ఈ వ్యవధిలో కాఫర్‌ డ్యాంను పూర్తి చేసే విధంగా నవయుగ సంస్థ అన్ని ఏర్పాట్లు చేసింది. ప్రస్తుతం కాఫర్‌ డ్యామ్‌ నిర్మాణంలో 40 ఎక్స్‌కవేటర్లు, 230 డంపర్‌లు, 12 రోలర్‌లు, 12 డ్రోజర్‌లను ఉపయోగిస్తున్నారు. కాంట్రాక్టు సంస్థ తరఫున 80 మంది ఇంజనీర్లు పని చేస్తుండగా... రాష్ట్ర జలవనరుల శాఖకు చెందిన 20 మంది ఇంజనీర్లు, నాలుగు డివిజన్‌ల ఈఈలు పనులను పర్యవేక్షిస్తున్నారు.