news

ఆంధ్రప్రదేశ్‌కు ఇచ్చిన హామీల అమలుపై కేంద్ర ప్రభుత్వం దాగుడుమూతలు ఆడుతోంది. ఆ హామీల అమలు స్థితిగతులపై అధ్యయనం చేస్తున్న హోం శాఖ పార్లమెంటరీ స్థాయీ సంఘానికి అవసరమైన సమాచారం ఇవ్వకుండా కేంద్ర అధికారులు ఉద్దేశపూర్వకంగా కాలయాపన చేస్తున్నారు. కాంగ్రెస్‌ సీనియర్‌ నేత, కేంద్ర మాజీ మంత్రి పి.చిదంబరం చైర్మన్‌గా వ్యవహరిస్తున్న ఈ కమిటీ ఇప్పటికే నాలుగు సార్లు సమావేశమై ఆంధ్రకు ఇచ్చిన హామీల అమలుపై సమీక్షించింది. సమావేశాల్లో కేంద్ర ప్రభుత్వ అధికారులతో పాటు ఆంధ్రప్రదేశ్‌, తెలంగాణ రాష్ట్రాల అధికారులు వేర్వేరుగా పాల్గొన్నారు. రెండు రాష్ట్రాలకు ఇచ్చిన హామీల అమలు ఎక్కడి వరకు వచ్చిందని సమావేశాల్లో చిదంబరం ప్రశ్నించగా.. అధికారులు సరిగా సమాధానాలు ఇవ్వలేకపోయారు.

ఈ నేపథ్యంలో కొన్ని ప్రశ్నలతో కూడిన నివేదికను పలు శాఖలకు పంపిన కమిటీ.. లిఖితపూర్వకంగా జవాబులివ్వాలని ఆదేశించింది. కానీ కొన్ని శాఖలే సమాధానాలు ఇచ్చాయి. దాంతో కమిటీ సమావేశమవుతున్నా ఆంధ్ర అంశాలు కాకుండా ఇతర అంశాలపై చర్చ జరుగుతోంది. కాగా.. గత సమావేశాల్లో ఆంధ్రకు ఏ ప్రాతిపదికన నిధులు ఇస్తున్నారని అధికారులను కమిటీ అడుగగా.. 2015లో ఆంధ్ర అభివృద్ధిపై నీతి ఆయోగ్‌ రూపొందించిన నివేదిక ఆధారంగా నిధులు ఇస్తున్నామని వారు బదులిచ్చారు. కానీ ఆ నివేదికను బహిర్గతం చేయలేదు. దాంతో ఆ నివేదికను తమకివ్వాలని కేంద్ర హోం, ఆర్థిక శాఖల అధికారులను కమిటీ చైర్మన్‌, సభ్యులు అడిగినట్లు సమాచారం.

ఇప్పటివరకు ఆ నివేదికను కమిటీకి అందించకపోగా.. ‘ఆ నివేదిక మా వద్ద లేదు. మీ రాష్ట్ర ప్రభుత్వం వద్ద ఉంటే కాస్త పంపిస్తారా’ అని కమిటీలో సభ్యుడిగా ఉన్న మన రాష్ట్ర ఎంపీకి అధికారులు ఫోన్‌ చేసి అడిగినట్లు తెలిసింది. ‘మా వద్ద లేదనే కదా.. మిమ్మల్ని నివేదిక అడిగింది. అయినా మీ వద్ద నీతి ఆయోగ్‌ నివేదిక లేకపోతే ఏ ప్రాతిపదికన నిధులు ఇస్తున్నారు? ఆ నివేదిక ప్రకారమే నిధులు ఇస్తున్నామని కమిటీకి ఎలా చెప్పారు’ అని ఆ ఎంపీ ఘాటుగా నిలదీసినట్లు సమాచారం. బడ్జెట్‌ సమావేశాల వరకూ సమాచారమివ్వకుండా సాగదీస్తే.. ఆ తర్వాత కొద్దిరోజుల్లో ప్రస్తుత లోక్‌సభ గడువు ముగుస్తుందని, ఇక ఈ అంశం తెరమరుగవుతుందన్నది ప్రభుత్వ కుయుక్తిగా చెబుతున్నారు.

బంగాళాఖాతంలో పెథాయ్‌ తుఫాన్‌ తీవ్రరూపం దాల్చింది. శ్రీహరికోటకు 450 కిలోమీటర్ల దూరంలో, కాకినాడకు సుమారు 600 కిలోమీటర్ల దూరంలో పెథాయ్‌ తుఫాను కేంద్రీకృతమైందని వాతావరణ శాఖ పేర్కొంది. రేపు సాయంత్రానికి విశాఖ-తుని మధ్య తీరం దాటే అవకాశం ఉందని తెలిపింది. గంటకు 20 కిలోమీటర్ల వేగంతో తుఫాను ఉత్తర వాయవ్య దిశగా కదులుతోందని పేర్కొంది. మరో పక్క, తుపాను రైతుల గుండెల్లో రైళ్లు పరిగెత్తిస్తోంది. పంట చేతికొచ్చే దశలో ఎలాంటి నష్టాన్ని సృష్టిస్తుందో అనే ఆందోళన వారిని కలవరపరుస్తోంది. శుక్ర, శనివారాల్లో కొన్ని ప్రాంతాల్లో మబ్బులు పట్టడంతో అన్నదాతలు పొలాలకు పరుగులు తీశారు. కోసి ఓదెలు వేసిన వరిని.. ఆగమేఘాల మీద కుప్పలు వేయించే పనుల్లో నిమగ్నమయ్యారు. మిరప, ఇతర పంటలు కాపాడుకునే పనిలో కొందరు.. టార్పాలిన్లు తెచ్చుకునే పనిలో మరికొందరు మునిగారు.

అయితే రైతుల నుంచి రియల్ టైం గవర్నెన్స్ సెంటర్ కు ఫోన్ లు వెళ్తున్నాయి. ఆధునిక యంత్రాలు కావలని, తొందరగా వరి కోతల యంత్రాలు, కల్లాల్లోనే ధాన్యం తడిసిపోకుండా పట్టాలు కావాలని కోరటంతో, సాధ్యమైనంత మేర, ఆ యంత్రాలను కావలసిన చోటుకి పంపిస్తున్నారు. మరో పక్క పట్టాలు కావలసిన వారు, దగ్గరలోనే వ్యవసాయ శాఖ ఆఫీస్ కి వెళ్తే, అక్కడే పట్టాలు ఇస్తారని, రైతులు తెచ్చుకోవచ్చిని చెప్పారు. చంద్రబాబు తీసుకుంటున్న ఈ చర్యలు, సోషల్ మీడియాలో చుసిన, ఇతర రాష్ట్రాల వారు చంద్రబాబుని అభినందిస్తూ, ట్వీట్లు పెట్టారు. మరో పక్క పునరావాస కేంద్రాలు, ఆహరం, తాగునీటి సౌకర్యార్థం వాటర్ పాకెట్స్ బస్తాలు సిద్ధం చేసారు. రెవిన్యూ, పంచాయతీ రాజ్ ,పోలీస్ ,మెరైన్ పోలీస్, మత్య శాఖ అధికారులు అప్రమత్తంగా ఉన్నారు. ప్రస్తుత సార్వా సీజన్‌లో ఎక్కువ మంది పంట నూర్పిడికి వరికోత యంత్రాలను ఉపయోగిస్తున్నారు. అయితే, కొంత మంది రైతులు పశుగ్రాసం కోసం వరిగడ్డిని నిల్వ చేసుకోవడానికి కూలీలతో కోత కోయించి పనలపై ఆరబెట్టిన తరువాత కుప్పనూర్పిళ్లు చేయిస్తున్నారు.

ఈ విధంగా డెల్టా ప్రాంతంలో సుమారు 50 వేల ఎకరాల్లో పంట పనలపైనే ఉంది. ఈ తుఫాన్‌కు పంట తడిసిపోయే ప్రమాదం ఉండటంతో రైతులు కూలీలను ఉపయోగించి నూర్పిళ్లు చేయించడానికి పరుగులు పెడుతున్నారు. కనీసం వరి పననలకు గట్టుకు చేర్చుకుని కుప్పగా వేసి వాతావరణం అనుకూలించాక నూర్పిడి చేయించుకోవచ్చనే ఆలోచనతో కుప్పలు, నెట్టు కట్టడం వంటి పనుల్లో మనిగిపోయారు. కర్నూలు, గుంటూరు, కృష్ణా, ప్రకాశం, అనంతపురం, విజయనగరం, తూర్పు గోదావరి తదితర జిల్లాల్లో పత్తి గణనీయంగా సాగైంది. అయితే ప్రస్తుతం తుఫాన్‌ ప్రభావం ఉన్న కృష్ణా, గుంటూరు జిల్లాల్లో పత్తి తీతలు ఊపందుకున్నాయి. ప్రస్తుతం పత్తి కాయలు పగిలి తీతకు సిద్ధంగా ఉన్నాయి,. ఈ నేపద్యంలో తుఫాన్‌ వార్త పత్తి రైతుకు కాలాడకుండా చేస్తుంది. త్వరగా పత్తి తీయాలని కూలీలకోసం అధిక రేట్టు ఇస్తామన్నా దొరికే పరిస్థితి లేకుండా పోయింది . ఇప్పటి వరకూ 70 శాతం మేర పత్తి తీతలు పూర్తయ్యాయి. మిగిలిన 30 శాతం తీత సమయంలో ఈ తుఫాన్‌ పత్తి రైతు పాలిట శాపంగా మారింది. దేవుడు దయ వల్ల, తక్కువ నష్టంతో ప్రజలు బయట పడాలని కోరుకుంటున్నారు.

బంగాళాఖాతంలో ఏర్పడిన పెథాయ్ తుపాను ఆదివారం మధ్యాహ్నం తీవ్ర తుపానుగా మారింది. నెల్లూరు జిల్లా శ్రీహరికోటకు 450 కిలోమీటర్ల దూరంలో, కాకినాడకు సుమారు 600 కిలోమీటర్ల దూరంలో ఇది కేంద్రీకృతమై ఉంది. సోమవారం సాయంత్రం విశాఖ-తుని మధ్య తీరం దాటే అవకాశం ఉంది. గంటకు 20కి.మీ. వేగంతో ఉత్తర వాయవ్య దిశగా తుపాను కదులుతోంది. తుపాను ప్రభావంతో కోస్తాంధ్ర తీరం అంతటా ఆకాశం మేఘావృతం అయ్యింది. నెల్లూరు నుంచి కృష్ణా జిల్లాల వరకు మోస్తరు నుంచి చిరుజల్లులు, పశ్చిమగోదావరి నుంచి శ్రీకాకుళం జిల్లా వరకు చాలాచోట్ల మోస్తరు నుంచి భారీ వర్షం కురిసే అవకాశం ఉంది. తీరం దాటే సమయంలో చాలా చోట్ల భారీ వర్షాలు కురిసే సూచనలు ఉన్నాయని వాతావరణ అధికారులు పేర్కొన్నారు.

తుపాను ప్రభావంతో తీరం వెంబడి 50 కిలోమీటర్ల వేగంతో గాలులు వీస్తున్నాయి. తుపాను సమీపించే కొద్దీ 90 నుంచి 100 కిలోమీటర్ల వేగంతో గాలులు వీస్తాయని అధికారులు వెల్లడించారు. నెల్లూరు నుంచి శ్రీకాకుళం వరకు సముద్రంలో అలల ఉద్ధృతి పెరిగింది. మూడు నుంచి 6 మీటర్ల ఎత్తు వరకు అలలు ఎగసిపడుతున్నాయి. సచివాలయంలోని ఆర్టీజీఎస్‌ తుపాను గమనాన్ని ఎప్పటికప్పుడు గమనిస్తోంది. ఐవీఆర్‌ఎస్‌ ద్వారా తుపాను హెచ్చరికల సందేశాలను జారీ చేస్తోంది. మరోవైపు లోతట్టు ప్రాంతాల ప్రజలను తరలించేందుకు అధికార యంత్రాంగం ఏర్పాట్లు చేస్తోంది. ఆర్టీజీఎస్‌, ఎస్‌డీఎంఏ ద్వారా సమీక్షిస్తున్న చంద్రబాబు ఎప్పటికప్పుడు అధికారులకు ఆదేశాలు జారీ చేస్తున్నారు. ఇప్పటికే తుపాను ప్రభావిత జిల్లాల్లో అధికారులను అప్రమత్తం చేశారు.

మరో పక్క కృష్ణా జిల్లా కలెక్టర్, జిల్లాలో ఉన్న అన్ని పాఠశాలలకు రేపు సెలవులు ప్రకటించారు. ఇప్పటికే తూర్పు గోదావరి, పశ్చిమ గోదావరి జిల్లాల యంత్రాంగం కూడా రెండు రోజుల పాటు పాఠశాలలకు సెలవలు ప్రకటించింది. తూర్పుగోదావరి జిల్లాలో ప్రభుత్వ యంత్రాంగం అప్రమత్తంగా ఉందని, జిల్లాలో 14 మండలాలపై తుపాను ప్రభావం చూపే అవకాశం ఉందని హోంమంత్రి చినరాజప్ప పేర్కొన్నారు. అధికారులతో కలెక్టరేట్‌లో సమీక్ష నిర్వహించిన అనంతరం ఆయన మీడియాతో మాట్లాడారు. నిత్యావసర సరకులు, ఇతర అవసరాలు అన్నీ అందుబాటులో ఉంచామని చెప్పారు. హెలికాఫ్టర్లు, ఎన్డీఆర్‌ఎఫ్‌, ఎస్‌డీఆర్‌ఎఫ్‌ బృందాలు సిద్ధంగా ఉన్నాయన్నారు. తుపాను తీవ్రతను బట్టి 72 నివాసిత ప్రాంతాల నుంచి జనాన్ని తరలించేందుకు ఏర్పాట్లు చేశామన్నారు. జిల్లాలో 17 తుపాను ప్రభావిత మండలాలు ఉన్నాయని, అన్ని ప్రాంతాల్లో సహాయక బృందాలు రంగంలో ఉన్నాయని తూర్పుగోదావరి జిల్లా కలెక్టర్‌ కార్తికేయ మిశ్రా తెలిపారు.