news

మిష్టర్ ప్రైమ్ మినిస్టర్ అంటూ, ఆంధ్రా వాడి గర్జన ఇంకా ఢిల్లీ పాలకులకు వినపడుతూనే ఉంది.. ఒక పక్క ఐటి, ఈడీ దాడులు చేసి ఎంపీలని బెదిరిస్తున్నారు.. మరో పక్క వైసీపీ ఎంపీలు రాజీనామా డ్రామాలు ఆడి ఇంట్లో కూర్చున్నారు.. పార్లమెంట్ లో మోడీని నిలదియ్యకుండా తెలుగుదేశం ఎంపీలను అన్ని విధాలుగా బెదిరించారు, మోడీ, షా.. ఇన్ని ఇబ్బందులు పెడుతున్నా, తెలుగుదేశం ఎంపీలు మాత్రం, వెనక్కు తగ్గలేదు. ఏపికి న్యాయం చెయ్యండంటూ పార్లమెంట్ లో టిడిపి ఎంపీల ఆందోళన కొనసాగించారు. పార్లమెంట్‌ శీతకాల సమావేశాలు ప్రారంభమైన నేపథ్యంలో ముద్నుగా, తెలుగుదేశం ఎంపీలు పార్లమెంట్‌ ఆవరణలోని గాంధీ విగ్రహం వద్ద ఆందోళనకు చేసారు.

విభజన చట్టంలో పేర్కొన్న అంశాలను అమలు చేయాలని, రాష్ట్రానికి ప్రత్యేక హోదా ఇవ్వాలని డిమాండ్‌ చేస్తూ ఆందోళన చేపట్టారు. ఎంపీలు అశోక్‌ గజపతి రాజు, టీజీ వెంకటేశ్‌, మురళీ మోహన్‌, శివప్రసాద్‌, కనకమేడల రవీంద్ర కుమార్‌, కొనకళ్ల నారాయణ, గల్లా జయదేవ్‌ ఈ ఆందోళనలో పాల్గొన్నారు. మరోవైపు శ్రీకాకుళంపై విరుచుకుపడిన తిత్లీ తుపాను విషయంలో కేంద్ర సాయంపై చర్చించాలంటూ రూల్ 377 కింద శ్రీకాకుళం ఎంపీ రామ్మోహన్‌ నాయుడు నోటీసు ఇచ్చారు. తుపాను వల్ల రూ. 3,435 కోట్ల మేర నష్టం వాటిల్లితే కేవలం రూ.539.52 కోట్ల సాయం కేంద్రం విడుదల చేయడంపై ఏపీ ప్రభుత్వం అసంతృప్తితో ఉన్న సంగతి తెలిసిందే.

ఇది ఇలా ఉంటే సభ ప్రారంభం కాగానే, తెలుగుదేశం ఎంపీలు, ఆందోళనలకు దిగారు. తమ డిమాండ్లు నెరవేర్చాలంటూ ప్లకార్డులు ప్రదర్శిస్తూ నిరసన వ్యక్తం చేశారు. దీంతో సభను మధ్యాహ్నానికి వాయిదా వేశారు. అనంతరం 12 గంటలకు సభ మళ్లీ ప్రారంభమైంది. అయితే సభ ప్రారంభం అయినా మరోసారి ఆందోళన చేపట్టడంతో స్పీకర్‌ సుమిత్రా మహజన్‌ సభను రేపటికి వాయిదా వేశారు. తెలుగుదేశం ఎంపీలతో పాటు కాంగ్రెస్ ఎంపీలు కూడా ఫేల్‌ ఒప్పందంపై జాయింట్‌ పార్లమెంటరీ కమిటీ విచారణ జరపాలంటూ కాంగ్రెస్‌ ఎంపీలు డిమాండ్‌ చేశారు. మొత్తానికి వైసీపీ ఎంపీలు మోడీ, అమిత్ షా లకు భయపడి సభ నుంచి పారిపోవటంతో, ఇప్పుడు ఏపి ప్రజల వాయిస్ వినిపించే బాధ్యత తెలుగుదేశం ఎంపీల పై పడింది.

ఐదు రాష్ట్రాల ఎన్నికల్లో భాజపాకు కోలుకోలేని దెబ్బ తగిలిందని ముఖ్యమంత్రి, తెదేపా అధినేత చంద్రబాబు అన్నారు. మూడు రాష్ట్రాల్లో అధికారం కోల్పోగా.. మరో రెండు రాష్ట్రాల్లో ప్రాంతీయ పార్టీలే విజయం సాధించాయని పేర్కొన్నారు. పార్టీ నేతలతో బుధవారం నిర్వహించిన టెలీకాన్ఫరెన్స్‌లో ఎన్నికల ఫలితాలపై ఆయన మాట్లాడారు. దేశంలో అనేక పార్టీల నేతల్లో భాజపాపై తీవ్ర వ్యతిరేకత ఏర్పడిందన్నారు. ‘దేశంలో భాజపా పాలన పోవాలి.. ప్రత్యామ్నాయం కావాలి’ అనేదే అందరి ఆకాంక్ష అని చెప్పారు. ఏపీకి అన్యాయం చేసిన భాజపాను దేశవ్యాప్తంగా తిరస్కరిస్తున్నారని, భాజపాయేతర పార్టీల కలయికకు తేదేపా చేస్తున్న ప్రయత్నాలకు దేశవ్యాప్తంగా ఆమోదం లభిస్తోందని అన్నారు.

రాష్ట్ర విభజన చేసిన కాంగ్రెస్‌ ఏపీకి కొన్ని హామీలిస్తే.. వాటిని అమలు చేయకుండా భాజపా నమ్మకద్రోహం చేసిందని చంద్రబాబు అన్నారు. రాష్ట్రానికి ప్రత్యేక హోదా ఇస్తామని కాంగ్రెస్‌ చెప్తే.. హోదా ఇచ్చేది లేదని భాజపా పేర్కొందని, అందుకే భాజపా పై పోరాటం చేస్తున్నాం అని చంద్రబాబు వ్యాఖ్యానించారు. ఈడీ, ఐటీ దాడులతో కేంద్రం బెదిరించాలని చూస్తోందని ఆరోపించారు. తెదేపాను ఇబ్బందులు పెట్టాలని మోదీ చాలా ప్రయత్నాలు చేస్తున్నారని దుయ్యబట్టారు. మనం అప్రమత్తంగా ఉండాలి, ప్రత్యర్ధుల కుట్రలను తిప్పికొట్టాలి, ఏమాత్రం ఏమరుపాటుగా ఉండకూడదు అని చంద్రబాబు అన్నారు.

"బిజెపిపై పోరాటానికి కెసిఆర్ కలిసిరాలేదు.కలిసి పోటీచేద్దామంటే తిరస్కరించారు.ఇద్దరుముగ్గురితో కలిసి ధర్డ్ ఫ్రంట్ విఫల ప్రయోగమే.బిజెపికి మేలు చేసే ప్రయత్నమే.అందుకే కాంగ్రెస్ తో సహా బిజేపియేతర పార్టీలన్నీ ఏకం చేస్తున్నాం. అవన్నీ సఫలీకృతం అయ్యాయి. దేశ వ్యాప్తంగా 22 పార్టీలను ఏకం చేసాం. ఇప్పుడు కేసీఆర్ వచ్చి, వీళ్ళను చీలిస్తే, అది మోడీకే లాభం. మీ రెండు కళ్లు పోయినా పర్లేదు. మీ కన్ను మాత్రం పోవాలి అన్నపెడ ధోరణితో బిజెపి వ్యవహరిస్తోంది. ఏపికి జరిగిన అన్యాయాన్ని సరిదిద్దాలి. నమ్మకద్రోహం చేసిన బిజెపికి బుద్దిచెప్పాలి. దేశ భవిష్యత్తు కోసమే జాతీయ స్థాయిలో కీలక భూమిక. తెలంగాణలో ప్రధాని 2సార్లు,అమిత్ షా 7సార్లు పర్యటించారు, ముగ్గురు ముఖ్యమంత్రులు,13మంది మంత్రులు తిరిగారు. 118సీట్లలో పోటిచేసిన బిజెపి ఒక్కసీటే గెలిచింది. తెలంగాణ ఫలితాలు వేరు, మిగిలిన రాష్ట్రాల ఫలితాలు వేరు. ముందస్తు ఎన్నికల వ్యూహం ఫలించింది. రెండు రాష్ట్రాలలో తెలుగుదేశం సంస్థాగతంగా బలపడాలి. ప్రతి కార్యకర్త సైనికుడిగా పనిచేయాలి. ప్రతి ఒక్కరిలో పట్టుదల పెరగాలి. ఇక పై అధిక సమయం పార్టీకే కేటాయిస్తాను. ఎవరికీ ఎటువంటి మినహాయింపులు లేవు. ప్రతి నాయకుడు,కార్యకర్త ఇంటింటికీ వెళ్లాలి, ప్రతి లబ్దిదారుడిని పలకరించాలి, అందరినీ పార్టీకి చేరువ చేయాలి. ఈనెల 30న రాజమండ్రిలో బిసి జయహో సదస్సు విజయవంతం చేయాలి. ప్రతి నాయకుడు ప్రజల్లో తిరగాలి. నిరంతరం ప్రజల్లో ఉన్నారు కాబట్టే సండ్ర వీరయ్య,మచ్చా నాగేశ్వర రావు ప్రజాదరణ పొందారు." అని చంద్రబాబు అన్నారు.

ముఖ్యమంత్రి చంద్రబాబునాయుడికి జాతీయ రాజకీయాల్లో తొలి విజయం. ప్రథమంగా దేశంలో మూడు రాష్ట్రాల్లో బీజేపీ ఓటమి ఒకటైతే, బీజేపీయేతర జాతీయ రాజకీయ పార్టీలను ఏక తాటిపై, ఒకే వేదికపైకి తేవాలన్న ప్రయత్నాలకు శుభారంభం పడింది. మధ్యప్రదేశ్, రాజస్థాన్ లలో కాంగ్రెస్ కు మద్దతు ఇవ్వడానికి సిద్ధపడిన బీఎస్పీ అధినేత్రి మాయావతి, ఎస్పీ నేత, యూపీ మాజీ ముఖ్యమంత్రి అఖిలేష్ యాదవ్ లు. ఎడమొఖం పెడముఖంగా ఉన్న మాయావతి, అఖిలేష్ యాదవ్ , కాంగ్రెస్ లను కలిపి, మోడీని దెబ్బ కొట్టాలన్న చంద్రబాబు ప్రయత్నం ఫలించింది. ఢిల్లీ పర్యటనలో మాయవతితో భేటీ అయిన ముఖ్యమంత్రి చంద్రబాబు ప్రాణాళికకు మాయావతి ఆమోదం తెలిపారు.

మొన్న జరిగిన ఎన్నికల్లో, మధ్య ప్రదేశ్, రాజస్థాన్‌లలో కాంగ్రెస్ ప్రభుత్వాల ఏర్పాటుకు తాము మద్దతు ఇస్తున్నట్టు బీఎస్పీ చీఫ్ మాయావతి ప్రకటించారు. మధ్య ప్రదేశ్‌లో మెజారిటీ మార్కుకు కాంగ్రెస్ కేవలం రెండు స్థానాల దూరంలో నిలిచిపోయిన నేపథ్యంలో, ఆ పార్టీ ఎస్పీ, బీఎస్పీ పార్టీలతో పాటు స్వతంత్ర అభ్యర్థుల మద్దతు కోరింది. దీంతో అక్కడ విజయం సాధించిన ఇద్దరు బీఎస్పీ ఎమ్మెల్యేలను ప్రభుత్వంలో భాగస్వాములను చేస్తున్నట్టు మాయావతి పేర్కొన్నారు. ఇవాళ ఉదయం ఆమె మీడియాతో మాట్లాడుతూ.. ‘‘కాంగ్రెస్ అనుసరిస్తున్న చాలా విధానాలకు మేము వ్యతిరేకమైనప్పటికీ, మధ్య ప్రదేశ్‌లో ఆపార్టీకి మద్దతు ఇవ్వాలని నిర్ణయించాం. రాజస్థాన్‌లో కూడా అవసరమైతే మద్దతు ఇచ్చేందుకు సిద్ధం...’’ అని ఆమె ప్రకటించారు.

మధ్యప్రదేశ్, రాజస్థాన్, ఛత్తీస్‌గఢ్ అసెంబ్లీ ఎన్నికల్లో బీజేపీ ప్రభుత్వాలు గద్దె దిగడంపై ఆమె స్పందిస్తూ..‘‘ ప్రజా వ్యతిరేక విధానాల కారణంగా బీజేపీకి ఈ మూడు రాష్ట్రాల్లోనూ ప్రజలు వ్యతిరేకంగా ఉన్నట్టు తేలిపోయింది. ఫలితంగా అక్కడి ప్రజలు కాంగ్రెస్ పార్టీని ఎన్నుకున్నారు...’’ అని ఆమె పేర్కొన్నారు. మరోవైపు మధ్య ప్రదేశ్‌లో తాము కూడా కాంగ్రెస్ పార్టీకి మద్దతు ఇస్తున్నట్టు సమాజ్‌వాదీ పార్టీ చీఫ్ అఖిలేశ్ యాదవ్ ప్రకటించారు. మాయావతి ప్రకటన వెలువడిన కొద్ది సేపటికే, ఈమేరకు ఆయన ట్విటర్లో వెల్లడించారు. ఇక్కడ సమాజ్‌వాదీ పార్టీ ఒక స్థానంలో విజయం సాధించింది. దీంతో ప్రభుత్వ ఏర్పాటుకు మార్గం సుగమమైంది. మొత్తానికి ఉత్తర్ ప్రదేశ్ లో, ఎస్పీ, బీస్పీని కలపాలని చంద్రబాబు చేసిన ప్రయత్నాలు ఇలా ఫలించాయి.