news

ఈ ఎడ్లబండిని చూశారా! నిండుగా ధాన్యం బస్తాలు.. దానిపై ఓ రైతు కుటుంబం.. బండికి ముందు వెళుతున్న రైతు. ఏపీ సచివాలయానికి వెళ్లిన వారంతా ఈ ఎడ్ల బండిని దూరం నుంచి చూసి.. రైతు బండితోసహా ఇక్కడికి వచ్చేశాడేమిటి? అని ఆశ్చర్యపో తున్నారు. కాస్త దగ్గరకు వెళ్లాక ఆది బొమ్మ అని తెలిసి తదేకంగా చూస్తున్నారు. కొంతమంది సందర్శకులు సెల్ఫీలు తీసుకుంటున్నారు. సోమవారం సచివాలయానికి వచ్చిన వారికి పార్కులో ఏర్పాటు చేసిన ఈ ఎడ్ల బండి ప్రత్యేక ఆకర్షణగా నిలిచింది. పార్కు ప్రాంతం సందర్శకులతో కిటకిటలాడింది. ఈ ఎడ్లబండిని హైదరాబాద్ కు చెందిన ఆర్ట్ డైరెక్టర్ పీవీ అంబాజీ చెక్క ఫైర్ తో తయారు చేశారు. దీని తయారీకి రెండు నెలలు సమయం పట్టగా.. 9 లక్షల వరకు ఖర్చయి ఉండొచ్చని చెబుతున్నారు..

మరో పక్క, అమరావతి రాజధాని ప్రాజెక్టుకు అంతర్జాతీయ సంస్థల నుంచి విశేష స్పందన లభిస్తోందని, ఈ నేపథ్యంలో ఢిల్లీలో జాతీయ స్థాయి వర్క్‌షాపులు ఏర్పాటుచేసి రాష్ట్ర ప్రణాళికలను వివరించాలని ముఖ్యమంత్రి చంద్రబాబు సీఆర్‌డీఏ అధికారులను ఆదేశించారు. రాజధాని ప్రాంతంలో 9 ప్రతిపాదిత నగరాలతో అమరావతిని ప్రపంచంలోని ఉత్తమ సంతోష నగరంగా, నవకల్పనల కేంద్రంగా తీర్చిదిద్దేందుకు ప్రభుత్వం చేపట్టిన కార్యాచరణను వివరించాలని సీఎం సూచించారు. అమరావతి మీడియా సిటీపై ఢిల్లీలో ఇప్పటికే వర్క్‌షాప్‌ నిర్వహించామని, అలాగే క్రీడలు, ప్రభుత్వ, న్యాయ, ఆర్థిక, నాలెడ్జి, పర్యాటక, ఎలకా్ట్రనిక్స్‌, ఆరోగ్య నగరాల అభివృద్ధి ప్రాజెక్టులపైనా వర్క్‌షాపులు నిర్వహించి జాతీయ, అంతర్జాతీయ పెట్టుబడిదారులను ఆకర్షించాలని చెప్పారు.

ఆయా నగరాలను విశిష్ఠ పాలన, ఉపాధి అవకాశాలు, ఆర్థిక అభివృద్ధి కార్యకలాపాలకు కేంద్రాలుగా మార్చాలని అన్నారు. ఈ తొమ్మిది నగరాల నిర్మాణంలో సూచనలు, సలహాలు ఇవ్వాలంటూ అంతర్జాతీయ నిపుణులను ఆహ్వానించాలని సూచించారు. ప్రపంచంలోని ఐదు అత్యుత్తమ నగరాల్లో అమరావతి ఒకటిగా నిలుస్తుందన్న నమ్మకం తనకుందని, దేశ అభివృద్ధిలోనూ కీలకంగా మారుతుందని అన్నారు. రాజధాని ప్రాంతంలో 9 నగరాల ఏర్పాటు మరే దేశంలోనూ లేదన్నారు. ఈ నగరాలు ప్రజలకు ప్రపంచశ్రేణి జీవన ప్రమాణలను కల్పించడమే గాక జనం ఎప్పుడూ సంతోషంగా ఉండేందుకు దోహదపడతాయన్నారు. అమరావతి అభివృద్ధి ఫలాలు రాష్ట్రమంతటికీ చేరతాయని, అదే ప్రభుత్వ విధానమని చెప్పారు. గడచిన నాలుగేళ్లలో అన్ని హామీలు నెరవేర్చామని చెప్పిన చంద్రబాబు... రాజధాని నిర్మాణాన్ని వేగవంతం చేయడంపైనా ప్రత్యేకంగా దృష్టి సారించామన్నారు. డిసెంబర్‌లోగా అమరావతికి ఒక రూపు తీసుకొస్తే అనేక అంతర్జాతీయ సంస్థలు పెట్టుబడులు పెట్టేందుకు కచ్చితంగా ముందుకొస్తాయని స్పష్టం చేశారు.

సీఎం పిలుపు మేరకు రాష్ట్రానికి చెందిన చుక్కపల్లి ఆకాశ్‌ నేతృత్వంలోని యువ వాణిజ్యవేత్తల బృందం అమరావతి నిర్మాణ కార్యక్రమాల్లో అనుసరించాల్సిన అంతర్జాతీయ విధానాలపై అధ్యయనం చేసేందుకు స్వచ్ఛందంగా ముందుకొచ్చిందని తెలిపారు. అజయ్‌జైన్‌ 9 నగరాల కాన్సె్‌ప్టను వివరిస్తూ... ఆర్థిక నగరాన్ని 2,091 హెక్టార్లలో ఏర్పాటు చేస్తామన్నారు. క్రీడల నగరంలో భారీ స్టేడియాలు, వేదికలు, అంతర్జాతీయ క్రీడలు నిర్వహణకు ఏర్పాట్లు ఉంటాయని తెలిపారు. మీడియా సిటీని 2067 హెక్టార్లలో ఏర్పాటు చేస్తామన్నారు. కృష్ణానది తీరం వెంట పర్యాటక నగరం ఏర్పాటు చేస్తామని వివరించారు.

నోరు తెరిస్తే ప్రజాస్వామ్యం, స్వేఛ్చ అంటూ మాట్లాడే బీజేపీ నేతలు, ముఖ్యంగా అద్భుతమైన ప్రసంగాలు ఇచ్చే మన ప్రధాని గారు, ఇప్పుడు మీడియా అంటే భయపడి పోతున్నారు. ఎన్నికలు సమీపిస్తున్న వేళ, తమకు వ్యతిరేకంగా వార్తా వస్తే తట్టుకోలేక పోతున్నారు. తమకు వ్యతిరేకంగా, పేపర్ లో కాని, ఛానల్ లో కాని వార్తా వచ్చింది అంటే, చిందులు వేస్తున్నారు. తాజాగా, ఇలాగే బీజేపీకి, అదీ మోడీకి వ్యతిరేకంగా వార్తా రావటంతో, బీజేపీ పెద్దలు తీవ్ర ఆగ్రహానికి గురయ్యారు. చివరకు, వీరి ఆగ్రహానికి ఆ ఛానల్ ఎడిటర్‌-ఇన్‌-చీఫ్‌, యాంకర్‌ ఉద్యోగాలు ఊడిపోయాయి. వాళ్ళు ఏమి, మోడీని బూతులు తిట్టలేదు, బీజేపీ పార్టీ గురించి, అనకూడని మాటలు ఏమి అనలేదు.

మోడీ ప్రభుత్వం, అధికారులు చేస్తున్న ఫేక్ ప్రచారం బయట పెట్టారు అంతే. దీని కోసమే ఉద్యోగం పోగొట్టుకుంది, ప్రముఖ హిందీ వార్తా చానెల్‌ ఏబీపీ న్యూస్‌ ఎడిటర్‌ ఇన్‌చీఫ్‌ మిళింద్‌ ఖండేకర్‌, మాస్టర్‌ స్ట్రోక్‌ షో యాంకర్‌ పుణ్య ప్రసూన్‌ బాజ్‌పాయ్‌. వీరిద్దరూ రాజీనామా చేసినట్లు యాజమాన్యం ప్రకటన చేసినా, నిజానికి ఆ ఛానల్ యాజమాన్యం బలవంతంగా వెళ్లగొట్టినట్లు భావిస్తున్నారు. జూన్‌ 20న ప్రధాని మోదీ వీడియో లింక్‌ ద్వారా వివిధ ప్రాంతాల రైతులతో మాట్లాడారు. ప్రధానితో మాట్లాడిన రైతుల్లో ఛత్తీ్‌సగఢ్‌ రాష్ట్రానికి చెందిన మహిళా రైతు కూడా ఉన్నారు. కేంద్ర ప్రభుత్వ పథకాలతో తన ఆదాయం రెట్టింపు అయిందని ఆమె ప్రధానికి తెలియజేసింది. ఇది నిజమేనా అని ఆశ్చర్యపోయిన ఏబీపీ న్యూస్‌ ప్రతినిధులు ఆరా తీశారు.

అసలు విషయం కనుక్కొని జూలై 6న మాస్టర్‌ స్ట్రోక్‌ లో ఒక కథనం ప్రసారం చేశారు. తమ గ్రామానికి వచ్చిన అధికారి ఒకరు రెట్టింపు ఆదాయం అంటూ అబద్ధం చెప్పడానికి శిక్షణ ఇచ్చారని ఆమె అంగీకరించింది. దీంతో బీజేపీ నాయకులు గగ్గోలు పెట్టారు. మహిళా రైతు వ్యాఖ్యలను ఏబీపీ చానెల్‌ వక్రీకరించిందని బీజేపీ మంత్రులు ఆరోపించారు. దాంతో ఏబీపీ చానెల్‌ మహిళ ఉండే గ్రామానికి విలేకరిని పంపి ఆమె ఆర్థిక పరిస్థితిపై స్థానికులతో మాట్లాడించింది. దీని పైనా బీజేపీ పెద్దలు అగ్రహోదగ్రులయ్యారు. ఈ నేపథ్యంలో ‘మాస్టర్‌ స్ట్రోక్‌’ యాంకర్‌ మారిపోయారు. మర్నాటి నుంచి పుణ్య ప్రసూన్‌ బాజ్‌పాయ్‌ బదులు చిత్ర త్రిపాఠీ యాంకరింగ్‌ చేస్తారని యాజమాన్యం ప్రకటించింది.

తాజాగా బాజ్‌పాయ్‌ ఉద్యోగమే పోయింది. మరో యాంకర్‌ అభిసార్‌ శర్మను కూడా ఇక నుంచి మేకప్‌ వేసుకోవద్దని చెప్పారట. వార్తల్లో ఎక్కడా మోదీ సర్కారుపై విమర్శలు రాకుండా చూడాలని యాజమాన్యం ఆదేశాలు ఇవ్వగా, అభిసార్‌ వాటిని ప్రశ్నించాడు. ఉత్తరప్రదేశ్‌లో నేరాలు తగ్గాయని ఇటీవల మోదీ ప్రకటించిన మర్నాడే రెండు దారుణ హత్యలు జరిగాయి. అభిసార్‌, మోదీ ప్రకటనను ప్రస్తావిస్తూ యూపీలో శాంతి భద్రతలపై కథనాన్ని ప్రసారం చేశారు. మధ్యలోనే చానల్‌ సీఈవో వచ్చి ప్రసారాలు నిలిపివేయాలని మిళింద్‌ను ఆదేశించారు. అప్పటికే బులెటిన్‌ మొదలై 5 నిమిషాలు కావడంతో నిలిపివేసే పరిస్థితి లేదని మిళింద్‌ చెప్పారు. దీంతో అప్పటికప్పుడు మోదీకి వ్యతిరేకంగా ఎలాంటి కథనాలు రాయొద్దని అందరికీ లిఖితపూర్వక ఆదేశాలు వెళ్లాయి. అభిసార్‌కు 15 రోజుల్లో రాజీనామా చేయాలని చెప్పారు. తర్వాత మిళింద్‌పై వేటు పడింది.

తమిళనాడు మాజీ ముఖ్యమంత్రి, డీఎంకే అధినేత ఎం కరుణానిధి కొద్ది సేపటి క్రిందట తుది శ్వాస విడిచారు. గత కొన్ని రోజులుగా, ఆయన ఆరోగ్య పరిస్థితి బాగా క్షీణించిటంతో హాస్పిటల్ లో చికిత్స పొందారు. జ్వరంతో పాటు మూత్రనాళాల ఇన్ఫెక్షన్ కారణంగా కొన్ని రోజులు, చెన్నైలోని గోపాలపురం నివాసంలో ఆయనకు కావేరీ సూపర్ స్పెషాలిటీ ఆస్పత్రికి చెందిన ప్రత్యేక వైద్య బృదం చికిత్సలు చేసింది. తరువాత పరిస్థితి విషమించటంతో హాస్పిటల్ లో చికిత్స అందించారు. ఈ రోజు ఆరోగ్యం మరింత క్షీణింటంతో, ఆయాన తుది శ్వాస విడిచారు.

డీఎంకే పార్టీ అధ్యక్షునిగా కరుణానిధి నాలుగు రోజుల క్రితం 50వ వసంతంలోకి అడుగుపెట్టారు. అన్నాదురై ఏర్పాటు చేసిన డీఎంకే పార్టీ తొలుత 1967లో అధికారంలోకి వచ్చింది. అన్నాదురై మరణించాక 1969 జులై 27న డీఎంకే అధ్యక్షునిగా కరుణానిధి బాధ్యతలు చేపట్టారు. అప్పటినుంచి ఇప్పటివరకూ ఆ పదవిలోనే కొనసాగుతున్నారు. ఆ తర్వాత డీఎంకే నుంచి ఎంజీఆర్‌ విడిపోయి అన్నాడీఎంకే.. వైగో విడిపోయి ఎండీఎంకే.. ఇలా పలు పార్టీలు వచ్చాయి. 1971 శాసనసభ ఎన్నికల్లో డీఎంకే సాధించిన విజయాన్ని ఇప్పటివరకు ఎవరూ అధిగమించలేదు.

ఎన్నికల్లో ఓటమి ఎరుగని నేతగా కరుణానిధి పేరుగడించారు. 13 ఎన్నికల్లో పోటీ చేసిన ఆయన పలు నియోజక వర్గాల నుంచి గెలుపొంది ఖ్యాతి పొందారు. తమిళనాడు ప్రజలు ఆప్యాయంగా కలైజ్ఞర్ అని పిలుచుకునే కరుణానిధి 1924 జూన్ నెల 3వ తేదీన అప్పటి అవిభక్త తంజావూర్ జిల్లాలోని తిరుకువళైలోని ఓ నాదస్వర విద్వాంసుల కుటుంబంలో జన్మించారు. ఆయన తండ్రి పేరు ముత్తు వేలన్, తల్లిపేరు అంజుగమ్మ. విజయ నగర సామ్రాజ్యధీసుల కాలంలో వీరి కుటుంబం ఆంధ్ర ప్రాంతం నుంచి తమిళనాడుకు వలస వచ్చినట్లు చెబుతారు. ద్రావిడ భావజాలం, హేతువాద సిద్ధాంతాల పట్ల కరుణానిధికి ఉన్న నిబద్ధత, ఆయనకున్న వాక్పటిమ, రచనా పాటవం కారణంగా అనతికాలంలోనే డీఎంకేలోని అగ్రశ్రేణి నాయకులలో ఒకరుగా ఆయన ఎదిగారు.

1967 డీఎంకే తొలిసారి తమిళనాట అధికారం చేపట్టినప్పుడు ముఖ్యమంత్రి అన్నాదురై కేబినెట్లో ప్రజాపనుల శాఖ మంత్రిగా కరుణానిధి బాధ్యతలు చేపట్టారు. 1969లో అన్నాదురై మరణానంతరం కరుణానిధి తమిళనాడు ముఖ్యమంత్రిగాను, ద్రవిడ మున్నేట్ర కజగం అధ్యక్షునిగాను బాధ్యతలు చేపట్టారు. కరుణానిధి తొలిసారి తమిళనాడు ముఖ్యమంత్రిగా బాధ్యతలు చేపట్టినప్పుడు ఆయన వయసు 45 సంవత్సరాలు. ఐదుసార్లు తమిళనాడు ముఖ్యమంత్రిగా బాధ్యతలు చేపట్టి అత్యధిక కాలం ఆ రాష్ట్ర ముఖ్యమంత్రిగా పనిచేసిన వ్యక్తిగా ఖ్యాతికెక్కారు.