news

కమ్యూనిస్టు పార్టీలకు అనుబంధంగా పనిచేస్తున్న రెండు టీవీ ఛానళ్లు ఇప్పుడు ప్రైవేటు వ్యక్తుల పరమయ్యాయి. సీపీఐ పార్టీ టీవీ-99 పేరుతో ఒక ఛానల్ ను ప్రారంభించగా సీపీఎం 10 టీవీ పేరుతో మరో ఛానల్ ను తీసుకుని వచ్చింది. టీవీ-99 ఆదినుండి కష్టాలను ఎదుర్కొంది. సిబ్బందికి జీతాలు కూడా చెల్లించలేని స్థితిలోకి వెళ్లిపోయింది. ఆరంభం నుండే టీవీ-99 కు ఎక్కడా పెద్దగా ఆదరణ కనిపించలేదు. వ్యవస్థీకృత లోపాలు ఆ ఛానల్ ను తీవ్ర ఇబ్బందుల్లోకి నెట్టాయి. దీనితో ఛానల్ నిర్వహణ బాధ్యతల నుండి సీపీఐ తప్పుకుంది. ఇప్పుడదని ప్రైవేటు వ్యక్తుల చేతుల్లోకి వెళ్లిపోయింది.

జనసేన పార్టీకి చెందిన వారు ఇప్పుడు టీవీ-99 నిర్వహణ బాధ్యతలను చూస్తున్నారు. నగరంలో పేరుగాంచిన బిల్డర్, మాజీ ఐఏఎస్ అధికారి తోట చంద్రశేఖర్ ప్రస్తుతం టీవీ-99 ను కొనుగోలు చేశారు. చిరంజీవి కుటుంబానికి దగ్గరి వ్యక్తిగా పేరుగాంచిన ఆయన ప్రజారాజ్యం తరపున ఎంపీగా పోటీచేసి ఓడిపోయారు. ఆటు తర్వాత ఆయన వైఎస్ కాంగ్రెస్ పార్టీలో చేరి ఎంపీగా పోటీచేసినా ఫలితం లేకుండా పోయింది. ప్రస్తుతం పవన్ కళ్యాణ్ కు సన్నిహితంగా ఉంటున్న తోట చంద్రశేఖర్ టీవీ-99 ను కొనుగోలును పూర్తిచేశారు. ఇక పవన్ కళ్యాణ్ కు అనుకూలంగా ఆ ఛానల్ వ్యవహరిస్తుంది. ఇప్పటికే ఆ ఛానల్ చూస్తే విషయం అర్ధమవుతుంది.

10 టీవీ పేరుతో ప్రజల నుండి సేకరించిన విరాళాలు, వాటల ద్వారా ప్రారంభమైన ఛానల్ తెలుగు రాష్ట్రాల్లో మంచిపేరే సంపాదించుకుంది. రెండు రాష్ట్రల్లోనూ దాదాపు అన్ని నెట్ వర్క్ లలో ఈ ఛానల్ ప్రసారం అవుతోంది. దీనితో పాటుగా ఛానల్ రేటింగ్ కూడా చెప్పుకోదగ్గ స్థాయిలోనే ఉంది. వార్తలు ప్రసారాల్లో కమ్యూనిష్టు పార్టీ ముద్ర కనపించినప్పటికీ పోటీ ఛానళ్లకు ధీటుగా 10టీవీ ఎదిగింది. చానెల్ ప్రారంభ సమయంలో ఉన్న ఉద్యోగులు లేరు. ఆ తర్వాత చానెల్ నిర్వహణ ఆర్ధికంగా కష్టంగా మారింది. దీంతో పార్టీ నాయకత్వం అతి కష్టమ్మీద చానెల్ నిర్వహిస్తోంది. ప్రతి నెలా ఉద్యోగులకు వేతనాలు సర్ధుతున్నారు.

దీంతో ఈ ఛానల్ ను పారిశ్రామికవేత్త నిమ్మగడ్డ ప్రసాద్ కొనుగోలు చేసారు. అన్ని లావాదేవీలు, రాతకోతలు పూర్తయి ఈరోజు ఉదయం నుంచి 10 టీవీ కొత్త యాజమాన్యం చేతుల్లోకి వెళ్ళిపోయింది. ముంబాయికి చెందిన కొంతమందిని ముందుంచి తెరవెనుక తతంగాన్ని నిమ్మగడ్డ నడిపిస్తున్నట్టు సమాచారం. ఈ వ్యవహారంలో చిరంజీవి కీలక పాత్రను పోషించినట్టు తెలుస్తోంది. నిమ్మగడ్డ ప్రసాద్ ప్రస్తుతం జగన్ వెనకాల ఉన్నప్పటికీ రానున్న రోజుల్లో పరిస్థితులు మారతాయనే ప్రచారం జరుగుతోంది. గతంలో మా టీవీని నిర్వహించిన అనుభవం పుష్కలంగా ఉన్న నిమ్మగడ్డ ప్రసాద్ తాను తెరవెనుక ఉండి 10టీవీ కొనుగోలు చేస్తున్నట్టు తెలుస్తోంది. మొత్తానికి, జగన్, పవన్, ఇద్దరికీ సన్నిహితుడైన, నిమ్మగడ్డ చేతిలో కొత్త ఛానల్ వచ్చింది. ఇక, ఇద్దరికీ సమ న్యాయం చేసుకుంటూ, ముందుకు పోతారనమాట...

రైల్వే జోన్‌ విషయంలో టీడీపీ కేంద్రం పై పోరాటం ఉదృతం చేసింది. కేంద్రం స్పందించక పోవడంతో పార్లమెంట్‌ సభ్యులతో కలిసి పోరాటం చేయాలని నిన్న ఢిల్లి వెళ్లారు. ప్రజలందరూ పోరాటానికి సిద్ధమయ్యారని, రైల్వే జోన్ ఇవ్వాల్సిందే అంటూ, రైల్వే మంత్రికి వివరించడానికి ఢిల్లీ వెళ్లారు. రైల్వే మంత్రి పీయూష్‌ గోయల్‌ 6 గంటలకు అపాయింట్‌ మెంట్‌ ఇవ్వడంతో పార్లమెంట్‌ సమావేశాలు పూర్తయ్యాక టీడీపీ ఎంపీలు, ఉత్తరాంధ్ర నాయకులతో కలిసి రైల్వే భవన్‌కు చేరుకున్నారు. 8 గంటల వరకూ వేచి చూసినా రైల్వే మంత్రి రైల్‌ భవన్‌కు చేరుకోలేదు. ఇచ్చిన అపాయింట్‌మెంట్‌కు రెండు గంటల తర్వాత పీయూష్‌ గోయల్‌ అక్కడికి చేరుకున్నారు.

అప్పటికే తీవ్ర నిరుత్సాహం, అసంతృప్తితో ఉన్న ఎంపీలు, నాయకులు మంత్రికి తమ గోడు వెళ్లబోసుకున్నారు. పీయూష్‌ గోయల్‌తో పాటు అక్కడే ఉన్న బీజేపీ రాజ్యసభ సభ్యులు జీవీఎల్‌ నరసింహారావు ఈ వ్యవహారంలో కలుగజేసుకున్నారు. జోన్‌ వరకూ తాను సమర్థిస్తున్నానని, కానీ వెనుకబడిన జిల్లాల నిధుల విడుదల, వెనక్కి తీసుకవడంపై చేస్తున్న ఆరోపణలు మాత్రం తప్పు అంటూ జీవీఎల్‌ చెప్పుకొచ్చారు. అప్పటికే జీవీఎల్‌ వ్యవహారంపై ఆగ్రహంతో ఉన్న టీడీపీ ఎంపీలు, ఉత్తరాంధ్ర నాయకులు ఒక్కసారిగా ఆయనపై విరుచుకు పడ్డారు.

రైల్వే మంత్రిని తమ సమస్యల గురించి అడుగుతుంటే, మధ్యలో మీకేం సంబంధమంటూ జీవీఎల్‌ఎన్‌ ఆగ్రహం వ్యక్తం చేయడంతో పరిస్థితి గందరగోళంగా మారింది. ఏం జరుగుతోందో తెలియని అయోమయ స్థితిలో ఉన్న మంత్రి పీయూష్‌ గోయల్‌ తన సీటులో నుంచి లేచి నిలబడ్డారు. విశాఖ ఎంపీ కంభంపాటి హరిబాబు, కేంద్ర మాజీ మంత్రి సుజనా చౌదరి కలుగజేసుకుని వారిని శాంతిపజేశారు. ‘‘ఆంధ్రకు ద్రోహం చేయాలని చూస్తే మిమ్మల్ని రాష్ట్రంలో తిరగనివ్వరు’’ అని కళా వెంకట్రావు పేర్కొనగా... ‘ను వ్వేం చేస్తావ్‌’ అని జీవీఎల్‌ ప్రశ్నించారు. తాను మాట్లాడి తీరతానని తేల్చిచెప్పారు. దీంతో టీడీపీ నేతలు మరింత మండిపడ్డారు. ‘యూపీ నుంచి ప్రాతినిధ్యం వహిస్తున్న మీకు... ఏపీతో ఏం సంబంధం?’ అని ప్రశ్నించారు. రాష్ట్రానికి ద్రోహం చేస్తున్నారని విమర్శించారు.

మాటామాటా పెరగడంతో విశాఖ ఈస్ట్ ఎమ్మల్యే వెలగపూడి రామకృష్ణకు, జీవీఎల్ కు తీవ్ర వాగ్వివాదం జరిగింది. ఒకానొక దశలో, వెలగపూడి రామకృష్ణ, జీవీఎల్ మీదకు దూసుకొచ్చారు. అక్కడ ఉన్న అశోక్ గజపతి రాజు, ఆపకపోయి ఉంటే, జీవీఎల్ పై దెబ్బలు కూడా పడేవని అంటున్నారు. చివరికి జీవీఎల్‌, హరిబాబును పీయూష్‌ అక్క డి నుంచి తన కార్యాలయంలోకి తీసుకెళ్లారు. దీంతో సమావేశం అర్ధాంతరంగా ముగిసింది. గోయల్‌, జీవీఎల్‌ వైఖరికి నిరసనగా టీడీపీ ఎంపీలు, ఎమ్మెల్యేలు, ఎమ్మెల్సీలు రైల్‌ భవన్‌ కార్యాలయం ముందు ధర్నా చేశారు. టీడీపీ నేతలకు సమయం కేటాయించేందుకు పీయూష్‌ రోజంతా మొరాయించారు. చివరికి సమయం కేటాయించినా... రెండుగంటలు నిరీక్షించేలా చేశారు.

రాజ్యసభ డిప్యూటీ చైర్మన్‌ ఎన్నిక ఈనెల 9వ తేదీన జరుగనుంది. ఇందుకోసం ఏర్పాట్లు చురుగ్గా జరుగుతున్నాయి. ఈ ఎన్నికల్లో అధికార బీజేపీ, విపక్ష అభ్యర్థులు బరిలోకి దిగుతున్నారు. మాములుగా అయితే, ఇలాంటి ఎన్నికలు అధికార పార్టీకి వన్ సైడ్ అయిపోతాయి. కాని, రెండు రోజుల క్రితం జరిగిన పార్లమెంట్‌ ప్రజా పద్దుల సంఘం (పీఏసీ) సభ్యుల ఎన్నికలో, విపక్ష సభ్యులు అందరూ కలిసి బీజేపీ అభ్యర్ధిని ఓడించారు. అనూహ్యంగా అన్నాడీఎంకే కూడా బీజేపీకి వ్యతిరేకంగా ఓటు వేసింది. ఈ ఎన్నికల్లో పోటీ చేసిన తెలుగుదేశం పార్టీ సభ్యుడు సీఎం రమేష్‌కు ఓటు వేశారు. దీంతో సీఎం రమేష్‌ రికార్డు స్థాయి ఓట్లతో గెలుపొందారు. ఇప్పుడు ఇదే, కమలనాథులకు ఏమాత్రం మింగుడుపడలేదు.

ఈ నేపథ్యంలో ఈనెల 9వ తేదీన జరుగనున్న రాజ్యసభ డిప్యూటీ చైర్మన్‌ ఎన్నికల్లో అన్నాడీఎంకే సభ్యులు ఎవరికి ఓటు వేస్తారన్న అంశంపై సర్వత్రా చర్చ సాగుతోంది. రాజ్యసభలో మొత్తం సభ్యుల సంఖ్య 245. పెద్దల సభలో ఏ ఒక్క పార్టీకి సంపూర్ణ మెజార్టీ లేదు. బీజేపీకి 75, కాంగ్రెస్‌కు 50, అన్నాడీఎంకే, తృణమూల్‌ కాంగ్రెస్‌, సమాజ్‌వాదీ పార్టీలకు 13 మంది చొప్పున, బిజూ జనతాదళ్‌కు 9 మంది, యునైటెడ్‌ జనతాదళ్‌, తెలుగుదేశం, టీఆర్‌ఎస్‌కు 6 ఎంపీలు, జనతాదళ్‌, సీపీఎంకు 5 చొప్పున, ఎన్‌సీపీ, బీఎస్పీ, డీఎంకేలకు నలుగురు చొప్పున, శివసేన, అకాళీదళ్‌, ఆమ్‌ ఆద్మీ పార్టీలకు ముగ్గురు చొప్పున సభ్యులు ఉన్నారు. ఒక స్థానం ఖాళీగా ఉంది. మరికొన్ని చిన్నాచితక పార్టీలకు చెందిన సభ్యులతో పాటు నామినేటెడ్‌ సభ్యులు ఉన్నారు.

ప్రస్తుతానికి బీజేపీకి 93 మంది సభ్యుల మద్దతు ఉంది. విపక్ష పార్టీల బలం 116గా ఉంది. మరో 35 మంది సభ్యులు ఎలాంటి నిర్ణయం తీసుకోలేదు. వీరిలో అన్నాడీఎంకే (13), బిజూ జనతాదళ్‌ (9), టీఆర్‌ఎస్‌ (6), శివసేన (3), పీపుల్స్‌ డెమొక్రటిక్‌ ఫ్రంట్‌ (2), వైసీపీ (2)ల పార్టీలకు చెందిన సభ్యులు ఉన్నారు. వీటిలో టీఆర్‌ఎస్‌, వైసీపీల సభ్యులు బీజేపీ అభ్యర్థికి మద్దతు తెలుపనున్నారు. అలాగే, శివసేన, పీడీఎ్‌ఫలు కూడా బీజేపీకి అనుకూలంగా నిర్ణయం తీసుకునే అవకాశం ఉంది. ఈ నేపథ్యంలో 13 మంది సభ్యులు కలిగిన అన్నాడీఎంకే, 9 మంది సభ్యులు కలిగిన బీజేడీల నిర్ణయం ఇపుడు అత్యంత కీలకంగా మారింది.

బీజేపీ తరపున జేడీయూకు చెందిన హరివంశ్‌ నారాయణ్‌ సింగ్‌, విపక్షాల తరుపున కాంగ్రెస్ అభ్యర్థి బీకే హరిప్రసాద్‌ బరిలోకి దిగనున్నారు. అనూహ్యంగా ఎన్డీఏ మిత్రపక్షమైన శివసేన సైతం విపక్షాల అభ్యర్ధికే మద్దతు ఇచ్చింది. 13 మంది సభ్యులు కలిగిన అన్నాడీఎంకే సభ్యులు బీజేపీ అభ్యర్థికి మద్దతు, ఇప్పుడు బీజేపీకి కీలకం కానుంది. వీళ్ళు మద్దతు ఇస్తేనే, మిగతా పార్టీల వారిని లాగే అవకాసం ఉంటుంది. అయితే, తాజాగా ఉప ముఖ్యమంత్రి ఓ పన్నీర్‌సెల్వం బంధువుకు కేంద్ర రక్షణ మంత్రి నిర్మలా సీతారామన్‌ ఎయిర్‌ అంబులెన్స్‌ సమకూర్చిన విషయం బహరింగం అవ్వటం, పన్నీర్‌సెల్వం పై బీజేపీ ఆగ్రహం వ్యక్తం చెయ్యటంతో, ఈ చర్యను అన్నాడీఎంకే నేతలు జీర్ణించుకోలేకపోయారు. అందుకే మొన్న పీఏసీ ఎన్నికలో, బీజేపీకి వ్యతిరేకంగా ఓటు వేసారు. ఓపీఎస్‌కు జరిగిన అవమానానికి అమిత్‌ షా లేదా నిర్మలా సీతామాన్‌లలో ఎవరో ఒకరు బహిరంగంగా స్పందిస్తేనే రాజ్యసభ ఎన్నికల్లో బీజేపీ అభ్యర్థికి అన్నాడీఎంకే మద్దతు ఇస్తాం అంటుంది. మరి, చివరకు, ఇది ఏ మలుపు తీసుకుంటుందో చూడాలి.