news

పవిత్ర సంగమంలో పోలీసు భద్రత కట్టుదిట్టం చేశారు. వరుసగా జరుగుతున్న ప్రమాదాలను దృష్టిలో పెట్టుకుని అధికారులు నష్టనివారణ చర్యలు ప్రారంభించారు. పర్యాటకులు కొందరు సరదా పేరుతో సంగమం ఘాట్‌లలోకి దిగి ఈత కొడుతున్నారు. ఇటీవల కంచికచర్ల మిక్‌ ఇంజనీరింగ్‌ కళాశాలకు చెందిన నలుగురు విద్యార్థులు గోదావరి ఘాట్‌లోకి దిగి గల్లంతై మృత్యువాత పడిన సంగతి తెలిసిందే. దీంతో సంగమంలో భద్రత చర్యలు లోపభూయిష్టంగా ఉన్నాయనే విమర్శలు వెల్లువెత్తాయి. ప్రమాద సంఘటన తెలుసుకుని 6 గంటలకు పైగా ఘాట్‌లలో ఉండి పరిశీలించిన మంత్రి దేవినేని ఉమామహేశ్వరరావు దృష్టికి స్థానికులు పలు సమస్యలు తీసుకువచ్చారు.

పవిత్ర సంగమంలో ఎటువంటి భద్రతా చర్యలు లేకపోవడం వల్ల పర్యాటకులు, విద్యార్థులు ఘాట్‌లలోకి దిగి ఇష్టానుసారంగా వ్యవహరిస్తున్నట్లు తెలిపారు. ఐదేళ్ల బాలుర దగ్గర నుంచి ఇంజనీరింగ్‌ విద్యార్థుల వరకూ ఘాట్‌లలోకి సరదా కోసం దిగుతున్నట్లు ఫిర్యాదులు అందాయి. ఈ నేపథ్యంలో జలవనరుల శాఖ కార్యాలయంలో జరిగిన ఎన్‌డీఆర్‌ఎఫ్‌, అగ్నిమాపక, పోలీస్‌, రెవెన్యూ శాఖల అధికారుల సమీక్షలో మంత్రి దేవినేని ఉమామహేశ్వరరావు పోలీస్‌ భద్రతపై ప్రధానంగా చర్చించారు.

పవిత్ర సంగమం ఘాట్‌ పొడవునా ఇకపై ఐదుగురు పోలీస్‌ కానిస్టేబుళ్లతో నిఘా ఉంచనున్నారు. ఘాట్‌లలోకి వెళ్లకుండా వీరు అప్రమత్తంగా ఉంటారు. 24 గంటల పాటు మూడు షిఫ్టుల్లో 15 మంది కానిస్టేబుల్స్‌ విధులు నిర్వహిస్తారు. ఎట్టి పరిస్థితుల్లోనూ ఘాట్‌లలోకి దిగి ఈతకొట్టేందుకు అనుమతులు ఇచ్చే ప్రసక్తి లేకుండా ఆదేశాలు జారీ చేశారు. పిండ ప్రదానాలకు సైతం ముందస్తు అనుమతులు తీసుకోవాలనే నిబంధన పెట్టారు.

ఏపీకి కేంద్రం మరోసారి మొండిచేయి చూపించింది. అటల్ భూజల్‌లో రాష్ట్రానికి చోటు దక్కలేదు. కేవలం బీజేపీ పాలిత రాష్ట్రాలకే స్థానం కల్పించింది. దీంతో ఏపీ ప్రభుత్వం కేంద్రంపై పోరు తీవ్రతరం చేయనుంది. రాష్ట్ర విభజనతో ఆర్థిక నష్టాల్లో ఉన్న రాష్ట్రానికి నిధులు, సాయం విషయంలో ఉదారంగా వ్యవహరించాల్సిన కేంద్రం... అందుకు విరుద్ధంగా మళ్లీ మొండిచేయి చూపింది. భూగర్భజలాలు పెంచడానికి ప్రపంచ బ్యాంక్ ఆర్థిక సహాయంతో రూ. 6వేల కోట్లతో కేంద జలవనరుల మంత్రిత్వ శాఖ అటల్ భూజల్ యోజనలో ఆంధ్రప్రదేశ్‌కు చోటు దక్కలేదు. ఎప్పటి మాదిరిగానే దక్షిణాది రాష్ట్రాలు కర్ణాటక మినహా మరో రాష్ట్రానికి స్థానం దక్కలేదు. ఉత్తరాదిలో బీజేపీ పాలిత రాష్ట్రాలకు ప్రాధాన్యం ఇచ్చింది.

పథకం కింద రాష్ట్రం 25 శాతం భరిస్తే... కేంద్రం మిగిలిన 75 శాతం నిధులు ఇస్తుంది. ఎంపిక చేసిన రాష్ట్రాల్లోని 78 జిల్లాల్లో 8,350 గ్రామ పంచాయతీల్లో అటల్‌ భూజల్‌ పథకాన్ని నిర్వహిస్తామని కేంద్ర జల వనరుల మంత్రిత్వ శాఖ ప్రకటించింది. రాష్ట్రం ప్రతిష్ఠాత్మకంగా చేపడుతోన్న నీరు-ప్రగతి, నీరు -చెట్టు స్ఫూర్తితో ఈ పథకాన్ని కేంద్రం ప్రారంభించినా... ఏపీని మాత్రం ఇందులో చేర్చలేదు. ఇందులోనే కాదు సమగ్ర శిక్షా అభియాన్‌ నిధుల్లోనూ ఏపీకి మొండి చేయి చూపించింది. ఇటీవలే కేంద్రం ప్రాథమిక (సర్వశిక్షా అభియాన్‌), మాధ్యమిక(రాష్ట్రీయ శిక్షా అభియాన్‌) విద్యారంగాలతో పాటు ఉపాధ్యాయ విద్యావ్యవస్థలను కలిపేసి ‘సమగ్ర శిక్షా అభియాన్‌’ పేరుతో ఒక కొత్త సొసైటీని ఏర్పాటు చేసింది. ఆయా రాష్ట్రాలు కూడా పూర్వ సొసైటీలను రద్దు చేసి సమగ్ర శిక్షా అభియాన్‌ పేరుతో కొత్త సొసైటీలను ఏర్పాటు చేసుకున్నాయి.

ఏపీ కూడా ఈ ఏడాది మే 9న ఢిల్లీలో జరిగిన ప్రాజెక్టు అప్రూవల్‌ బోర్డు(పీఏబీ) సమావేశానికి హాజరై సమగ్ర శిక్షా అభియాన్‌ కింద 2018-19 విద్యా సంవత్సరానికి కావాల్సిన నిధులకోసం ప్రతిపాదనలు పంపింది.దాదాపు రూ.4వేల కోట్లకు ప్రతిపాదనలు ఇస్తే కేంద్రం కేవలం రూ.1875కోట్లకు ఆమోదం తెలిపింది. ఈ నిధులు ప్రాథమిక, మాధ్యమిక విద్యారంగాలకు ఏమాత్రమూ సరిపోవని విద్యాశాఖ అధికారులే వాపోతున్నారు. ఎప్పుడు ఫోన్‌ చేసినా అదిగో... ఇదిగో అని చెప్పిన కేంద్ర ప్రభుత్వ అధికారులు గురువారం విడుదల చేసిన నిధుల్లో రాష్ట్రానికి మొండిచేయి చూపడం చూసి అధికారులు షాక్‌ అయ్యారు. కేంద్ర పాలిత ప్రాంతాలతో కలుపుకొని మొత్తం 36 రాష్ట్రాలకుగానూ సమగ్ర శిక్షా అభియాన్‌ కింద రూ.8229.33 కోట్లు మంజూరు చేయాల్సి ఉండగా రూ.8109.59 కోట్లను అడ్‌హాక్‌ కింద విడుదల చేసింది.

విజయవాడ నగర పోలీసు కమీషనర్‌ గౌతం సవాంగ్‌ రాష్ట్ర పోలీసు బాస్‌గా నియమితులు కానున్నారని ప్రచారం జరిగింది. డీజీపీగా తనను నియమిస్తారని ఆయన విశ్వాసంతో ఉన్నారు. డీజీపీ పదవికి గౌతం సవాంగ్‌తో పాటు ఆర్‌పిఠాకూర్‌ పోటీపడ్డారు. ఈ ఇద్దరిలో ఒకరిని ఎంపిక చేస్తారని పోలీసు ఉన్నతాధికారుల్లో ప్రచారం జరిగింది. అయితే రాష్ట్ర ముఖ్యమంత్రి చంద్రబాబునాయుడు నిర్ణయం కీలకం కానుంది. ప్యానెల్‌ కమిటీ మొగ్గుతో పాటు సీఎం నిర్ణయంతో డీజీపీ ఎంపిక కావాల్సి ఉంది. శనివారం నాడు డీజీపీగా ఆర్‌పి ఠాకూర్‌ను నియమిస్తూ ప్రభుత్వం ఉత్తర్వులు జారీ చేసింది. దీంతో విజయవాడ నగరపోలీసుల్లో కొంత నిరాశ అలుముకుంది. శనివారం నాడు గౌతం సవాంగ్‌ కూడా కొంత అన్యమనస్కంగా ఉన్నారు. కొత్త డీజీపీగా ఎంపికైన ఠాకూర్‌ సీపీ గౌతం సవాంగ్‌ను కలిసి వెళ్లినట్లు తెలిసింది. ఉదయం పరేడ్‌కు వెళ్లిన సీపీ మళ్లీ హెడ్‌ క్వార్టర్‌కు వెళ్లలేదని తెలిసింది. 1986 బ్యాచ్‌కు చెందిన సీపీ సవాంగ్‌కు ఇంకా అయిదేళ్ల సర్వీసు ఉంది. ప్రస్తుతం నియిమితులైన ఠాకూర్‌కు కేవలం రెండేళ్ల సర్వీసు మాత్రమే ఉంది. ఇదే కారణమని పోలీసు అధికారులు విశ్లేషిస్తున్నారు.

అయితే, ఇప్పుడు గౌతం సవాంగ్ కు కొత్త బాధ్యతలు ఇవ్వాలని చంద్రబాబు నిర్ణయం తీసుకున్నారు. ప్రస్తుతం పోలీసు కమిషనర్‌గా చేస్తున్న గౌతం సవాంగ్‌ను ఏసీబీ డీజీగా నియమించే అవకాశం ఉన్నట్లు సమాచారం. సవాంగ్‌ స్థానంలో విజయవాడ పోలీసు కమిషనరేట్‌కు కొత్త బాస్‌ గా, సీహెచ్‌ ద్వారకాతిరుమల రావు కొత్త సీపీగా వచ్చే అవకాశం ఉంది. ఈయన ప్రస్తుతం సీఐడీ అదనపు డీజీపీగా విధులు నిర్వహిస్తున్నారు. సమర్థుడైన అధికారిగా ద్వారకా తిరుమలరావుకు పేరు ఉంది. 1989 బ్యాచ్‌ ఐపీఎస్‌ అధికారి అయిన ఈయన ఉమ్మడి ఆంధ్రప్రదేశ్‌లో చంద్రబాబు సీఎంగా ఉన్న సమయంలో సైబరాబాద్‌ కమిషనర్‌గా పనిచేశారు. అంతకు ముందు అనంతపురం, మెదక్‌, కడప ఎస్పీగా, అనంతపురం రేంజి డీఐజీగా అక్టోపస్‌, కౌంటర్‌ ఇంటెలిజెన్స్‌ సెల్‌ ఐజీగా కూడా బాధ్యతలు నిర్వహించారు.

సీఐడీ అదనపు డీజీగా క్లిష్టమైన కేసులను కొలిక్కి తేవడంలో ఈయన సమర్థంగా పనిచేశారన్న పేరు ఉంది. ఈ నేపథ్యంలో ద్వారకా తిరుమలరావును విజయవాడ పోలీసు కమిషనర్‌గా నియమించేందుకు ఇంటెలిజెన్స్‌ చీఫ్‌తోపాటు కొత్త డీజీపీ కూడా సుముఖంగా ఉన్నట్లు సమాచారం. వీరి ప్రతిపాదనకు సీఎం చంద్రబాబు కూడా సానుకూలంగా స్పందించినట్లు పోలీసు వర్గాల్లో ప్రచారం జరుగుతోంది. దీంతో ఒకటి రెండు రోజుల్లో విజయవాడకు కొత్త పోలీసు బాస్‌ వచ్చే అవకాశాలు ఉన్నాయి. రాజధాని ప్రాంతమైన విజయవాడ శాంతిభద్రతల పరంగా చాలా సున్నితమైన స్థానం. అంతే కాదు, ఇంకా అనేక అంశాలు ముడిపడి ఉన్నాయి. వీటన్నింటినీ గాడిలో పెట్టాలంటే సమర్థుడైన అధికారిని కమిషనర్‌గా నియమించాలని ప్రభుత్వం భావిస్తోంది. ఈ నేపథ్యంలో ద్వారకా తిరుమలరావు పేరు తెరపైకి వచ్చింది.