news

నర్సాపురం ఎంపీ రఘురామకృష్ణం రాజు, తనదైన శైలిలో ముందుకు పోతూనే ఉన్నారు. సొంత పార్టీ నేత అయినా, రాష్ట్రం కోసం, అలాగే తన పార్టీ కోసం అంటూనే, ప్రభుత్వంలో జరుగుతున్న అవినీతిని, అలాగే పార్టీలో కొంత మంది చేసిన నష్టాన్ని, ప్రజలకు వివరిస్తూ, కొన్ని సమస్యల పై న్యాయ పోరాటం కూడా చేస్తూ ముందుకు వెళ్తున్నారు. ఈ నేపధ్యంలోనే రెండు నెలల క్రిందట, సిబిఐ కేసుల్లో జగన్ మోహన్ రెడ్డి కండీషనల్ బెయిల్ రద్దు చేయాలి అంటూ, ఆయన సిబిఐ కోర్టులో పిటీషన్ వేసిన సంగతి తెలిసిందే. ఈ కేసు పై అనేక నాటకీయ పరిణామాలు మధ్య సిబిఐ కోర్టులో విచారణ పూర్తయ్యింది. విచారణ అనంతరం, జగన్ మోహన్ రెడ్డి బెయిల్ రద్దు చేయాలా వద్దా అనే అంశం పై, కోర్టు ఈ నెల 25 వ తేదీన తమ అభిప్రాయం చెప్పనుంది. కోర్టు తీర్పు పై అందరికీ ఆసక్తి నేలకుంది. అయితే ఇందులో ఇప్పటికిప్పుడు జగన్ మోహన్ రెడ్డికి వచ్చే నష్టం ఏమి లేకపోయినా, ముఖ్యమంత్రిగా ఉన్న ఆయనకు, ఈ పరిణామాలు అన్నీ చిరాకు తెప్పిస్తాయి, అలాగే ఆయన ఇమేజ్ ను కూడా డ్యామేజ్ చేస్తూ ఉంటాయి. ప్రజలు మరచిపోతున్న అంశాలు, మళ్ళీ మళ్ళీ గుర్తు చేస్తూ ఉండటంతో, ఆయనకు ఇబ్బంది అనే చెప్పాలి. దీంతోనే రఘురామరాజు వైసీపీని డ్యామేజ్ చేస్తున్నారు అనుకుంటే, ఇప్పుడు ఆయన మరో బాంబు పేల్చారు.

ఈ సారి రఘురామరాజు , విజయసాయి రెడ్డిని టార్గెట్ చేసారు. విజయసాయి రెడ్డి కండీషనల్ బెయిల్ కూడా రద్దు చేయాలి అంటూ, రఘురామరాజు సిబిఐ కోర్టులో పిటీషన్ దాఖలు చేసారు. విజయసాయి రెడ్డి ఎంపీగా ఉంటూ, కేంద్రం హోం శాఖలో, అలాగే ఆర్ధిక శాఖ కార్యాలయాల్లో అధికారులను తరుచూ కలుస్తూ, తనకు అందరితో సన్నిహిత సంబంధాలు ఉన్నాయి అనే విధంగా చిత్రీకరణ చేసి, కేసులో సాక్ష్యులను బెదిరిస్తున్నారని, ప్రత్యక్ష్యంగా, పరోక్షంగా వారిని ప్రభావితం చేస్తున్నారని పిటీషన్ లో తెలిపారు. విజయసాయి రెడ్డి ఎంపీ అవ్వగానే, తన పదవిని అడ్డం పెట్టుకుని, తన కేసులు విచారణ చేస్తున్న సిబిఐ జేడీని పదవి నుంచి తప్పించాలని కేంద్రానికి లేఖలు రాసారని, ఇది విచారణకు విఘాతం కలిగించిందని అన్నారు. అలాగే అతనికి న్యాయస్థానాల పట్ల గౌరవం లేదని, మాన్సాస్ విషయంలో కోర్టు జడ్జిమెంట్ ఇస్తే, దొడ్డి దారిన ఉత్తర్వులు తెచ్చుకున్నారు అంటూ కోర్టులను అగౌరవ పరిచారు అంటూ తన పిటీషన్ లో పేర్కొన్నారు. మరి కోర్టు ఈ పిటీషన్ పై ఏమంటుందో చూడాలి.

ఎంపీ రఘురామరాజుకి, వైసీపీ నుంచి కష్టాలు ఎదురు అవుతూనే ఉన్నాయి. సొంత పార్టీని కొన్ని విషయాల్లో కరెక్ట్ చేసుకోమని చెప్పినందుకు, ఆయన్ను టార్గెట్ చేస్తూనే ఉన్నారు. ఈ రోజు పార్లమెంట్ ఆవరణలో ఎంపీ రఘురామరాజుని టార్గెట్ చేసారు, మరో వైసీపీ ఎంపీ గోరంట్ల మాధవ్. తనను అసభ్య పదజాలంతో గోరంట్ల మాధవ్ దూషించారు అంటూ రఘురామకృష్ణం రాజు ఆరోపించారు. పార్లమెంట్ ఆవరణలోనే అసభ్య పదజాలంతో దూషించటంతో, ఎంపీ రఘురామకృష్ణం రాజు, స్పీకర్ ఓం బిర్లాకు ఫిర్యాదు చేసారు. ఎంపీ రఘురామకృష్ణం రాజు తెలిపిన వివరాలు మేరకు, పార్లమెంట్ వాయిదా పడిన అనంతరం, పార్లమెంట్ సెంట్రల్ హాల్ లో, మరి కొంత మంది ఇతర రాష్ట్రాల ఎంపీలతో కూర్చుని ఉండగా, తన వద్దకు ఎంపీ గోరంట్ల మాధవ్ వచ్చి, ఎందుకు జగన్ కు వ్యతిరేకంగా ప్రెస్ మీట్లు పెడుతున్నావ్, ఇంకోసారి జగన్ కు వ్యతిరేకంగా ప్రెస్ మీట్లు పెడితే మీ అంతు చూస్తాం, వెంటనే ఇలాంటి ప్రెస్ మీట్లు ఆపేయాలి అంటూ, వేలు పెట్టి గోరంట్ల మాధవ్ హెచ్చరించారని తెలిపారు. రాయటానికి, చెప్పటానికి వీలు లేని పదాలు గోరంట్ల మాధవ్ ఉపయోగించారని, పార్లమెంట్ లాంటి పవిత్రమైన చోట, ఒక ప్రజాప్రతినిధి అయ్యి ఉంది, మరో ఎంపీని ఇష్టం వచ్చినట్టు, బూతులతో దూషించటంపై, ఇతర పార్టీ నేతలు కూడా షాక్ అయ్యారు.

అయితే ఆ సమయంలో రఘురామకృష్ణం రాజు ఎక్కడా రెచ్చిపోకుండా ఎంతో సమన్వయంతో వ్యవహరించి, ఆయనతో ఏమి మాట్లాడకుండా అక్కడ నుంచి వెళ్ళిపోవటంతో, పెద్ద గొడవ తప్పినట్టు అయ్యిందని తెలుస్తుంది. అయితే ఆ సమయంలో, గోరంట్ల మాధవ్, రఘురామకృష్ణం రాజుని హెచ్చరించే సమయంలో, ఆయన పక్కనే ఉన్న, ఇతర రాష్ట్రాల, పార్టీల ఎంపీలు అందరినీ కూడా తీసుకుని వెళ్లి, వెంటనే అక్కడికక్కడే, లోకసభ స్పీకర్ ఓం బిర్లాకు రఘురామకృష్ణం రాజు ఫిర్యాదు చేసారు. గోరంట్ల మాధవ్ తనని పార్లమెంట్ ఆవరణలో బెదిరించారని, అంతం చూస్తానని బెదిరించారని, దీనికి సహచర ఎంపీలే సాక్ష్యం అని కూడా ఆయన స్పీకర్ కు ఫిర్యాదు చేసారు. అంతే కాకుండా, అక్కడ సిసి కెమెరాలు కూడా ఉంటాయి కాబట్టి, అక్కడ వీడియో ఫుటేజ్ కూడా చూస్తే, మాటలు వినిపించకపోయినా వీడియోలో గోరంట్ల మాధవ్ హావభావాలు స్పష్టంగా తనని బెదిరించినట్టు కనిపిస్తాయని ఫిర్యాదు చేసారు. మరి దీని పై స్పీకర్ ఏమి నిర్ణయం తీసుకుంటారో చూడాలి.

మాజీ మంత్రి, సీనియర్ నేత అయిన వివేక కేసుకి సంబంధించి, సిబిఐ మొదటి అరెస్ట్ చూపించింది. వివేక కేసులో కీలకమైన వ్యక్తి అంటూ సిబిఐ చెప్తున్న సునీల్ యాదవ్ ని, నిన్న సిబిఐ గోవాలో అరెస్ట్ చేసింది. సునీల్ యాదవ్ ప్రధాన నిందితుడు అంటూ సిబిఐ అనుమానిస్తున్న తరుణంలో ఆయన గత కొంత కాలంగా తప్పించుకుని తిరుగుతున్నాడు. అంతే కాకుండా, సిబిఐ తన వెంట పడుతుంది, తన పై థర్డ్ డిగ్రీ ప్రయోగిస్తుంది అంటూ, తనను కాపాడాలి అంటూ, ఆయన ఏపి హైకోర్టులో కూడా పిటీషన్ దాఖలు చేసారు. అయితే ఈ పిటీషన్ వేసిన సందర్భంలోనే, సునీల్ యాదవ్ తన ఇంటికి తాళం వేసి, పారిపోవటం జరిగింది. ఈ నేపధ్యంలోనే సిబిఐ అధికారులు సునీల్ యాదవ్ కోసం, ప్రత్యెక బృందాలను పంపి మరీ గాలింపులు చేసారు. ప్రత్యేక నిఘా పెట్టటంతో, సునీల్ యాదవ్ గోవాలో తలదాచుకున్నట్టు సిబిఐకి సమాచారం రావటంతో, సిబిఐ అధికారులు గోవాకు వెళ్లి వారిని అక్కడ అరెస్ట్ చేసారు. అయితే అరెస్ట్ చేసిన తరువాత, కోర్టులో అరెస్ట్ చూపించాల్సిన అవసరం ఉంటుంది. ఈ నేపధ్యంలోనే సునీల్ యాదవ్ ని గోవా కోర్టులో హాజరు పరిచారు. ఈ రోజు సిబిఐ అధికారులు ఈ విషయాన్నీ ధృవీకరించారు. ఈ రోజు ఆయన్ను కోర్టులో హాజరు పరిచిన తరువాత, రిమాండ్ తీసుకుని, కడపకు తరలిస్తున్నారు.

రేపు ఉదయం ఆయన్ను కడపలో, ఆయన్ను కోర్టులో హాజరుపరిచి, మళ్ళీ రిమాండ్ కు పంపించి, సిబిఐ కస్టడీకి ఇవ్వమని కోర్టును అడిగే అవకాసం ఉంది. వివేక కేసులో సిబిఐ దర్యాప్తు వేగవంతం చేసింది. ఇప్పటికే అక్కడ ఉన్న వాచ్మెన్ రంగయ్య నుంచి వాంగ్మూలం తీసుకుని, ఆయన స్టేట్మెంట్ ను జడ్జి ముందు కూడా వినిపించారు. రంగయ్య ఇచ్చిన వాంగ్మూలం తరువాతే, ఈ ప్రక్రియ వేగవంతం అయ్యింది. ఈ దొంక అంతా కదిలింది. ఇంతకు సుపారీ మాట్లాడుకున్నారు, ఎంత మంది ఉన్నారు, ఇలా పూర్తి వివరాలు చెప్పాడు. అయితే ఇద్దరు ప్రముఖులు ఉన్నారని రంగయ్య చెప్పటం, ఆ ప్రముఖులు ఎవరు అనే విషయం మాత్రం ఇప్పటి వరకు తెలియలేదు. ఈ విచారణ ఇలా ఉంటే, అసలు విచారణ పై మాత్రం, అనుమానాలు వ్యక్తం చేస్తున్న వారు కూడా ఉన్నారు. వివేక కుమార్తె సునీత ఇచ్చిన అనుమాతిల్లోని ప్రముఖులను ఇప్పటి వరకు సిబిఐ విచారణ చేయక పోవటం పై, అందరినీ ఆశ్చర్యాన్ని కలిగిస్తుంది. ప్రముఖులను కూడా విచారణ చేయాలని, అప్పుడే అసలైన నిజాలు బయటకు వస్తాయని అంటున్నారు.