news

అమరావతి భూముల్లో ఇన్సైడర్ ట్రేడింగ్ జరిగింది అంటూ, ప్రభుత్వం వేసిన పిటీషన్ ని, నిన్న సుప్రీం కోర్టు కొట్టేసిన సంగతి తెలిసిందే. అయితే దీని పై ఈ రోజు సుప్రీం కోర్టు పూర్తి తీర్పు అందుబాటులోకి వచ్చింది. ఈ తీర్పు కాపిలో కొన్ని ఆసక్తికర వ్యాఖ్యలు చేసింది సుప్రీం కోర్టు. అమరావతిలో ఇన్సైడర్ ట్రేడింగ్ జరగలేదు అంటూ హైకోర్టు ఇచ్చిన తీర్పుని, సుప్రీం కోర్టు సమర్ధించింది. న్యాయమూర్తులు వినీత్ శరన్, దినేష్ మహేశ్వరిలతో కూడిన ధర్మాసనం నిన్న ఈ తీర్పు ఇచ్చింది. హైకోర్టు అన్ని వాస్తవాలను పరిశీలించిన తరువాతే, ఎఫ్ఐఆర్ ను కొట్టేసిందని, ఈ తీర్పులో చట్ట విరుద్ధమైన అంశాలు ఏమి లేవని, అన్ని కోణాలను హైకోర్ట్ పరిగణలోకి తీసుకుందని సుప్రీం కోర్టు తీర్పులో తెలిపింది. అన్నిటికంటే ముఖ్యమైన విషయం, రాజధాని ఎక్కడ అన్నది రహస్యం ఏమి కాదని, అది అందరికీ తెలిసిన విషయమే అని, పబ్లిక్ డొమైన్ లో ఎప్పటి నుంచో ఉందని, భూములు అమ్మిన వారికి నష్టం జరిగినట్టు ఎలాంటి ఆధారాలు లేవని చెప్పింది. కొనుగోలు దారులు మోసం చేసారు అనే వాదనలకు కూడా ఎక్కడా ఆధారాలు లేవని చెప్పింది. ప్రైవేటు వ్యక్తుల మధ్య ఈ వ్యవహారం మొత్తం జరిగిందని, ప్రభుత్వ అధికారుల మీద కేసు పెట్టాలి అనే వాదనలో పస లేదని తెలిపింది. అంతే కాకుండా దర్యాప్తును ప్రాధమిక స్థాయిలో హైకోర్టు అడ్డుకుందని, ఆ అధికారం హైకోర్టుకు లేదనే వాదనను కూడా సుప్రీం కోర్టు తోసిపుచ్చింది.

హైకోర్టు ఇచ్చిన తీర్పులో ఎలాంటి తప్పు లేదని సుప్రీం కోర్టు తేల్చి చెప్పింది. అంతే కాకుండా, ట్రాన్స్ఫర్ అఫ్ ప్రాపర్టీ ఆక్ట్ అనేది కూడా ఇక్కడ రాదని సుప్రీం కోర్టు తేల్చి చెప్పింది. ఎఫ్ఐఆర్ లు ఏవైతే దాఖలు అయ్యయో, ఆ ఎఫ్ఐఆర్ లు అన్నిటినీ కూడా పరిశీలించిన తరువాతే, హైకోర్టు అన్ని లావాదేవీలు పరిశీలించి, ప్రభుత్వం ఉద్దేశాలు, దురుద్దేశాలు పరిశీలించిన తరువాతే, ఈ కేసుని కొట్టివేయటం జరిగిందని, ఇన్సైడర్ ట్రేడింగ్ అనే పదమే ఇక్కడ వర్తించదు అనే హైకోర్ట్ వ్యాఖ్యలతో సుప్రీం ఏకీభవించింది. ఇక మరో అంశం సుప్రీం కోర్టు లేవనెత్తింది, టైం అంశం. ఇది అంతా 2014లో జరిగితే, ఇప్పటి దాకా ఏమి చేసారు అని సుప్రీం కోర్టు ప్రశ్నించింది. ఆరేళ్ళ వరకు ఎందుకు సమయం వృధా చేసారు అని సుప్రీం కోర్టు ప్రశ్నించింది. అయితే ప్రభుత్వం మారిన తరువాత మాకు ఈ అవినీతి విషయం తెలిసింది అని ప్రభుత్వ తరపు లాయర్ చెప్పటంతో, కోర్టు ఇందులోని దురుద్దేశాన్ని గుర్తించిందనే చెప్పాలి. మొత్తానికి హైకోర్టు ఇచ్చిన తీర్పుని సమర్ధిస్తూ, సుప్రీం కేసుని కొట్టేసింది.

నర్సాపురం ఎంపీ రఘురామరాజు మరోసారి తనదైన శైలిలో పంచ్ లు వేసారు. ఇలా చెప్పాలి అంటే కూడా భయం వేస్తుంది. ఎందుకుంటే రఘురామరాజు ప్రెస్ మీట్ అయిన తరువాత, విలేఖరులు మీ పంచ్ బాగుంది అంటూ కామెంట్లు చేసారని, ఇది కూడా రాజద్రోహం కిందకు వస్తుంది అంటూ ప్రభుత్వం సుప్రీం కోర్టులో అఫిడవిట్ ఇచ్చిన తరువాత, ఇలా కూడా చెప్పటం తప్పు ఏమో అనే విధంగా మీడియా ఆలోచన చేసే పరిస్థితి వచ్చింది. ఇక విషయానికి వస్తే, ఈ రోజు సాక్షి పేపర్ లో, రఘురామరాజు, లోకేష్, చంద్రబాబు మధ్య వాట్స్ అప్ సంభాషణ జరిగిందని, అందులో రఘురామరాజు , చంద్రబాబుకి జగన్ బెయిల్ రద్దు పిటీషన్ పంపించారని, చంద్రబాబు దాన్ని చూసారని, అలాగే లోకేష్ తో కూడా అనేక విషయాల పై రఘురామరాజు మాట్లాడారని, ఇదంతా జగన్ మోహన్ రెడ్డి ప్రభుత్వం పై, అందరూ కలిసి కుట్ర పన్నుతున్నారని, అందుకే రాజద్రోహం కేసు పెట్టారు అంటూ సాక్షిలో రాసుకొచ్చారు. రఘురామ రాజు ఫోన్ సీజ్ చేసి, తరువాత సిఐడి ఆ ఫోన్ లో ఉన్న మెసేజ్ లు అన్నీ చూడగా, ఇవి బయట పడినట్టు సాక్షిలో రాసుకొచ్చారు. అయితే అది చదివిన ఎవరికైనా ఇందులో రాజద్రోహం ఏమి ఉందో అర్ధం కావటం లేదు. జగన్ మీద కేసులు ఉన్నది నిజం, ఆయన బెయిల్ మీద బయట ఉన్నది నిజం, ఆ బెయిల్ రద్దు చేయమని, వివిధ కారణాలతో రఘురామరాజు పిటీషన్ వేసారు.

అది చంద్రబాబుతో మాట్లాడి వేసరా, లోకేష్ చెప్తే వేసారా అనేది కోర్టుకు అనవసరం, అందులో ఎంత వరకు వాస్తవం ఉంది అనేది కోర్టు చుస్తుంది. అయితే బెయిల్ రద్దు పిటీషన్ వేయటమే రాజద్రోహం అనే విధంగా సాక్షి వండి వార్చింది. ఈ కధనం పై రఘురామరాజు స్పందించారు. అవును నేను చంద్రబాబుతో వాట్స్ అప్ చాట్ చేసింది నిజమే అనుకుందాం, అందులో తప్పు ఏముంది అని ప్రశ్నించారు ?తన ఫోన్ కోడ్ ను బ్రేక్ చేసి మరీ, వాట్స్ అప్ మెసేజ్ లు కల్పించి మరీ తాయారు చేస్తున్నారని అన్నారు.జగన్ బెయిల్ రద్దు చేయమని పిటీషన్ వేసి, దానికి సంబంధించిన సమాచారం వేల మందితో పంచుకున్నా అని, అందులో చంద్రబాబు కూడా ఉన్నది నిజమే అనుకున్నా, అది రాజద్రోహం ఎందుకు అవుతుందని ప్రశ్నించారు. సిఐడి విచారణ చేసే అంశాలు సాక్షిలో ఎలా వస్తున్నాయని ప్రశ్నించారు. నా ఫోన్ లో నేను ఎవరికో మెసేజ్ లు పెట్టుకుంటే, మీకు వచ్చిన నొప్పి ఏంటి, నువ్వు ఎవరు అడగటానికి అని ప్రశ్నించారు. ఈ వాట్స్ అప్ చాటింగ్ ఆరోపణలతో నన్ను మీరు ఏమి చేయలేరని, అయితే పెగాసెస్ తో ప్రతిపక్ష నాయకుల ఫోన్లు పై నిఘా పెట్టారని తనకు తెలిసింది అంటూ బాంబు పేల్చారు. మరి ఇది నిజమో కాదో ప్రభుత్వమా ఎలా స్పందిస్తుందో చూడాలి.

కేంద్ర హోం శాఖా మంత్రి అమిత్ షా తో, ఎంపీ రఘురామకృష్ణం రాజు ఈ రోజు భేటీ అవ్వటం ఢిల్లీలోనే కాక, రాష్ట్రంలో కూడా చర్చనీయంసం అయ్యింది. అమిత్ షా కార్యాలయానికి వెళ్ళిన రఘురామరాజు, సుమారుగా 20 నిమిషాల పాటు, ఆయనతో చర్చించారు. ఈ భేటీ సందర్భంగా, రఘురామకృష్ణం రాజు ఆరోగ్య పరిస్థితిని అమిత్ షా అడిగి తెలుసుకున్నారు. అలాగే రఘురామకృష్ణం రాజు అరెస్ట్ సమయంలో జరిగిన విషయాలను కూడా రఘురామకృష్ణం రాజు, అమిత్ షా కు వివరించారు. గతంలోనే రఘురామకృష్ణం రాజు కుటుంబ సభ్యులు, రఘురామ ఆరెస్ట్ సమయంలో, ఢిల్లీ వెళ్లి అమిత్ షాని కలిసిన విషయం తెలిసిందే. తదనంతర పరిణామాలు, సుప్రీం కోర్టులో కేసు తరువాత, రఘురామరాజు బెయిల్ పై బయటకు వచ్చారు. బెయిల్ పై బయటకు వచ్చిన తరువాత, రఘురామకృష్ణం రాజు , కేంద్రం హోం మంత్రిని కలవటానికి ప్రయత్నం చేసినా, అమిత్ షా బిజీ షడ్యుల్ లో కుదరలేదని తెలుస్తుంది. అయితే ఈ రోజు రఘురామకృష్ణం రాజు, అమిత్ షాని కలిసారు. ఆరోగ్య పరిస్థితి, అరెస్ట్ చేసిన తీరుతో పాటుగా, ఏపిలో రాజకీయ పరిస్థితులు పై కూడా, రఘురామరాజుని, అమిత్ షా అడిగి తెలుసుకున్నట్టు తెలుస్తుంది. ఏపిలో రాజకీయ పరిస్థితితులు పై ఎక్కువ సేపు చర్చించినట్టు తెలుస్తుంది.

దీంతో పాటుగా, ప్రస్తుతం పార్లమెంట్ జరుగుతున్న తీరు పై కూడా ఇరువురి మధ్య వచ్చినట్టు తెలుస్తుంది. అయితే ఈ సందర్భంగా అమిత్ షా దృష్టికి రఘురామరాజు మరో విషయం కూడా తీసుకుని వెళ్లారు. వైసీపీ నేతలు తనను అనర్హుడిగా ప్రకటించాలని, స్పీకర్ కు ఫిర్యాదు చేయటం, అసలు ఎందుకు వాళ్ళు ఆ అనర్హత పిటీషన్ వేసారు, దాని వెనుక ఉన్న ఉద్దేశాలు కూడా, అమిత్ షాతో చర్చించినట్టు వార్తలు వచ్చాయి. అలాగే రాష్ట్రంలో సిఐడి పోలీసులు వ్యవహరిస్తున్నారు తీరు, ఏపి పోలీసులు వ్యవహారం పై కూడా రఘురామరాజు, అమిత్ షా దృష్టికి తెచ్చినట్టు తెలుస్తుంది. మొత్తానికి తన అరెస్ట్ నుంచి విడుదల వరకు, అలాగే తన ఫోన్ సంభాషణలు బహిర్గతం అవ్వటం పై కూడా, అమిత్ షా దృష్టికి తెచ్చారు. ఇవన్నీ విన్న అమిత్ షా, పార్లమెంట్ సమావేశాల తరువాత, అన్ని అంశాల పై, మళ్ళీ కలుద్దాం అంటూ, రఘురామకృష్ణం రాజుకు చెప్పినట్టు తెలుస్తుంది.