news

ప్రముఖ జర్నలిస్ట్ వెంకటకృష్ణ ప్రస్తుతం ఒక ప్రముఖ తెలుగు ఛానల్ లో పని చేస్తున్న విషయం తెలిసిందే. ముఖ్యంగా సాయంత్రం ఆయన చేసే డిబేట్ లు, ప్రజలను ఎంతగానే ఆకర్షిస్తూ ఉంటాయి. ముఖ్యంగా ఆంధ్రప్రదేశ్ రాష్ట్ర సమస్యలపై, ఆయన చేసే చర్చలు అర్ధవంతంగా ఉంటాయి. ఎక్కడా అరుపులు, కేకలు లేకుండా అర్ధవంతంగా చర్చలు జరుగుతూ ఉంటాయి. అయితే నిన్నటి నుంచి వెంకటకృష్ణ పై విష ప్రచారం జరుగుతుంది. ముఖ్యంగా ఒక రాజకీయ పార్టీకి సంబందించిన కార్యకర్తలు, ఈ ప్రచారం మొదలు పెట్టారు. ఆయనను ప్రస్తుతం పని చేస్తున్న ఛానల్ తప్పించిందని, వెంకటకృష్ణ బ్లాక్ మెయిల్ చేసారు, డబ్బులు తీసుకున్నారు అంటూ విష ప్రచారం మొదలు పెట్టారు. నిన్న ఆయన కూడా డిబేట్ కి రాకపోవటంతో, ఈ ప్రచారానికి ఊతమిచ్చినట్టు అయ్యింది. అయితే దీని పై వెంటనే వెంకటకృష్ణ తన ట్విట్టర్ లో స్పందించారు. ప్రయాణంలో ఎన్నో మజిలీలు, సవాళ్లు ఉంటాయని, ఇప్పటికి అయితే కేవలం సెలవు మాత్రమే తీసుకున్నానని, ఏమైనా ఉంటే త్వరలో చెప్తానని, నా పైన కొంత మంది సునకానందం గాళ్ళు ట్రోల్ చేస్తున్నారు అంటూ, అవి పట్టించుకోకండి అని ట్వీట్ చేసారు. అయితే ఈ రోజు ఉదయానికి ఈ ప్రచారం తారా స్థాయికి చేరింది. వెంకట కృష్ణకు, ఆ టీవీ యాజమానికి గొడవ అయినట్టు ప్రచారం చేసారు.

అంతే కాదు, మొన్న డిబేట్ లో జరిగిన చెప్పు దెబ్బ ఎపిసోడ్ లో వాస్తవాలు ఉన్నాయి అంటూ, వెంకట కృష్ణ బెదిరిస్తున్నారు అంటూ, హడావిడి చేస్తున్నారు. దీని పై కూడా వెంకట కృష్ణ ఈ రోజు ఘాటుగా స్పందించారు. నా పేరుతొ ఫేక్ ఎకౌంటు రెడీ చేసి, తప్పుడు ప్రచారం చేస్తున్నారని, తన యజమాని అంటే తనకు అమితమైన గౌరవం ఉందని అన్నారు. నేను ప్రస్తుతానికి అక్కడ కేవలం సెలవు మాత్రమే పెట్టానని, సెలవులో ఉన్నానని అన్నారు. ఇలా తప్పుడు ప్రచారం చేస్తున్న వారి పై లీగాల్ గా ప్రొసీడ్ అవుతాను అంటూ, హెచ్చరిస్తూ, ఇలా ప్రచారం చేస్తున్న వారి వివరాలు తెలిస్తే ఇవ్వాల్సిందిగా కోరారు. మొత్తానికి, ఒక సామాన్య జర్నలిస్ట్ విషయంలోకూడా, ఒక పార్టీకి చెందిన మొత్తం సోషల్ మీడియా వింగ్ మొత్తం ఆయనను ఎందుకు టార్గెట్ చేస్తుందో అర్ధం కావటం లేదు. తమకు నచ్చకపోతే, రాజకీయ నాయకులనే కాదు, ఎవరినీ వదలం అని ఆ పార్టీ సోషల్ మీడియా చెప్పకనే చెప్తుంది. ఏది ఏమైనా, సమాజంలో రోజు రోజుకీ పెరిగిపోతున్న ఈ ధోరణి ఎక్కడ దాకా వెళ్తుందో.

గతంలో తెలుగుదేశం పార్టీపై ఒక అపవాదు ఉండేది. ముఖ్యంగా ప్రభుత్వంలో ఉండగా, తెలుగుదేశం పార్టీ పూర్తిగా రాజకీయాలు మర్చిపోయిందని, కేవలం ఆంధ్రప్రదేశ్ అభివృద్ధి పై మాత్రమే వారు ఫోకస్ చేసారని, ఇది ఆసరాగా తీసుకుని, ప్రత్యర్ధి పార్టీలు, పైడ్ టీమ్స్ పెట్టి మరీ, తెలుగుదేశం పార్టీ పై, అధినాయకత్వం పై తప్పుడు ప్రచారాలు చేసే వారని, తెలుగుదేశం ఓటమికి ఇది ప్రధాన కారణంగా చెప్తూ ఉంటారు. సింగపూర్ హోటల్ దగ్గర నుంచి, అమరావతి మొత్తం ఒకే సామాజికవర్గం దాకా తెలుగుదేశం పార్టీ పై ప్రతి అంశంలో బురద చల్లుతూ ఉంటారు. టిడిపి గట్టిగా రియాక్ట్ అవ్వక పోవటంతో, ప్రజలు కూడా ఇదే నిజం అని నమ్మే వారు. అయితే ఇప్పుడు అధికారం కోల్పోయిన తరువాత, తమ తప్పులు సమీక్షించుకున్న టిడిపి, ఇలా తప్పుడు ప్రచారాలు చేసే వారి పని పట్టింది. ఓడిపోయిన మొదట్లోనే, లోకేష్ 25 లక్షల చిరు తిండి తిన్నాడు అంటూ, సాక్షి ఒక కధనం వేసింది. అసలు సాక్షి వేసిన తేదీల్లో లోకేష్ వివిధ పర్యటనల్లో ఉన్నారు, దీంతో ఆధారాలు అన్నీ చూపించి, లోకేష్ కోర్టులో పరువు నష్టం దావా వేసారు. ఇదే ఒరవడి టిడిపి కొనసాగిస్తుంది. తాజాగా, లోకేష్ స్టాన్ఫోర్డ్ లో చదువుకుంటానికి, చంద్రబాబు దగ్గర డబ్బులు లేక, రామలింగరాజు చేత డబ్బులు ఖర్చు పెట్టించారు అంటూ, కొడాలి నాని ప్రెస్ మీట్ పెట్టిన సంగతి తెలిసిందే.

దీంతో వైసీపీ అనుకూల మీడియా, సోషల్ మీడియా మొత్తం, నిజాలతో పని లేకుండా, ఇవే కధనాలు వండి వార్చారు. గ్రేట్ ఆంధ్రా అనే వెబ్ సైట్ కూడా, లోకేష్ చదువు గురించి తప్పుడు కధనం ప్రచురించింది. దీంతో తెలుగుదేశం పార్టీ సీరియస్ అయ్యింది. ఆ తప్పుడు కధనం పై డీజీపీకి ఫిర్యాదు చేసింది. ఆ యూనివర్సిటీ ఇచ్చిన లేఖలు, లోకేష్ తల్లి భువనేశ్వరి ఎకౌంటు నుంచి, కట్టిన ఫీజ్ వివరాలు, ఇలా మొత్తం ఆధారాలు డీజీపీకి ఇచ్చి, తప్పుడు కధనాలు రాసిన గ్రేట్ ఆంధ్రా పై చర్యలు తీసుకోవాలని, తెలుగుదేశం పార్టీ ఈ రోజు ఫిర్యాదు చేసింది. వైసీపీకి అనుకూలంగా, తప్పుడు కధనాలు ప్రచారం చేస్తున్న వివిధ మాధ్యమాలను ఈ సందర్భంగా టిడిపి హెచ్చరించింది. ఇక నుంచి తప్పుడు కధనాలు రాస్తే ఎవరినీ ఉపేక్షించం అని హెచ్చరించారు. స్టాన్ఫోర్డ్ లాంటి యూనివర్సిటీలో ఎలా సీట్ వస్తుందో కూడా తెలియకుండా చదవు లేని కొడాలి నాని లాంటి వాళ్ళు మాట్లాడితే, దాన్ని మరింత ముందుకు తీసుకుని వెళ్లి, కధనాలు వండి వార్చిన వారి పై, న్యాయ పోరాటం కూడా చేస్తాం అని హెచ్చరించారు.

తిరుపతి ఎంపీ బల్లి దుర్గాప్రసాద్ అకాల మరణంతో తిరుపతి ఉప ఎన్నిక అనివార్యమైంది. దీనికి సంబంధించి మంగళవారం నోటిఫికేషన్ వచ్చింది. నామినేషన్ల ప్రక్రియ ఈ నెల 30వ తేదీవరకు జరగనుంది. తెలుగుదేశం పార్టీ ఎంపీ అభ్యర్థి పనబాక లక్ష్మి 24వ తేదీన నామినేషన్ దాఖలు చేయనున్నట్లు ఆ పార్టీ నాయకులు తెలిపారు. 3 నెలలకు ముందునుంచే బీజేపీ నాయకులు సభలు, సమావేశాలు నిర్వహిస్తూ ప్రచారంలో ముందు న్నారు. తెలుగుదేశం పార్టీ అభ్యర్థి పనబాక లక్ష్మిని టిడిపి అన్ని పార్టీ లకన్నా ముందే చంద్రబాబు ప్రకటించారు. బీజేపీ, జనసేన ఉమ్మడి అభ్యర్థిని ఇప్పటి వరకు ప్రకటించకపోవడంతో ఆ పార్టీ నేతల్లో ఆందోళన నెలకొంది. నోటిఫికేషన్ వచ్చిన తరువాత కూడా అభ్యర్ధి లేకుండా, ప్రజలను ఏ విధంగా కన్విన్స్ చేయగలం, ఇది మన బలహీనతను సూచిస్తుందని, అటు బీజేపీ, ఇటు జనసేన క్యాడర్ వాపోతున్నారు. ఇక వైఎస్సార్ సీపీ ఎంపీ అభ్యర్థి డాక్టర్ గురుమూర్తిని ఇటీవల ప్రకటించారు. సీపీఎం అభ్యర్థిగా నెల్లూరు జిల్లాకు చెందిన యాదగిరిని ప్రకటించారు. తిరుపతి ఉప ఎన్నికలో మొదట జనసేన పార్టీ పోటీ చేస్తుందని ఆ పార్టీ వర్గాలు భావించాయి. అయితే బీజేపీ పెద్దలు జనసేన అధినేత పవన్ కళ్యాణ్ తో చర్చలు జరిపి ఉమ్మడి అభ్యర్థి పోటీ చేస్తాడని ప్రకటించారు. అయితే తిరుపతిలో నెల రోజులుగా బీజేపీ జాతీయ, రాష్ట్ర నేతలు నిర్వహిస్తున్న పలు సమావేశాలకు స్థానికంగా ఉన్న జనసేన నాయకులను ఆహ్వానించక పోవడంపట్ల ఆ పార్టీ నాయకులు తీవ్ర అసంతృప్తికి గురయ్యారు. అయితే జనసేన పార్టీ అభ్యర్థి బరిలో ఉంటారని సోషల్ మీడియాలో ప్రచారం జరగడాన్ని ఆ పార్టీ నియోజకవర్గ ఇన్‌చార్జ్ కిరణ్ రాయల్ తీవ్రంగా ఖండించారు.

తిరుపతి ఉప ఎన్నికను ప్రతిష్టాత్మకంగా తీసుకున్న అధికార పార్టీ వైఎస్సార్‌ సీపీ పార్లమెంటు పరిధిలోని 7 అసెంబ్లీ నియోజకవర్గాలకు ఏడుగురు మంత్రులను, ఏడుగురు ఎమ్మెల్యేలతో పర్యవేక్షణ కమిటీని ముఖ్యమంత్రి వైఎస్.జగన్మోహన్ రెడ్డి నియమించారు. తెలుగుదేశం పార్టీ అధినేత చంద్రబాబు మాజీ మంత్రులు, సీనియర్ నేతలు, ఎమ్మెల్యేలు, ఎమ్మెల్సీలతో ఎన్నికల నిర్వహణ కమిటీని నియమించారు. ఇప్పటికే పార్టీ అభ్యర్థి పనబాక లక్ష్మి, పార్టీ సీనియర్ నాయకులు యనమల రామకృష్ణుడు నెల్లూరు జిల్లాలోని నాలుగు నియోజకవర్గాల్లో పార్టీ నాయకులు, కార్యకర్తలతో సమావేశాలు నిర్వహించారు. బీజేపీ మాత్రం జాతీయ నాయకులతో పాటు 20 మందికి పైగా రాజ్యసభ సభ్యులు, రాష్ట్ర పార్టీ నేతలతో కలిసి ఎన్నికల పర్యవేక్షణకు కమిటీని ఏర్పాటు చేసింది. ప్రతి మండలానికి రాజ్యసభ సభ్యుడితో పాటు రాష్ట్ర నాయకులను ఇన్చార్జిలుగా నియమించారు. ఎప్పటికప్పుడు పార్టీ స్థితిగతులను పార్టీ ముఖ్యులకు తెలియజేయాల్సివుంది. తిరుపతి ఉప ఎన్నికలో గురుమూర్తిని గెలిపించుకుంటామని ఇప్పటికే జిల్లాకు చెందిన మంత్రి పెద్దిరెడ్డి రామచంద్రారెడ్డి పేర్కొన్నారు. గురుమూర్తి ఇప్పటికే జిల్లాలోని ఎమ్మెల్యేలను మర్యాదపూర్వకంగా కలుస్తూ వస్తున్నారు. పార్టీ నాయకులను కలసి తన గెలుపునకు సహకరించాలని కోరుతున్నారు. ఏది ఏమైనా అధికార పార్టీ, ప్రతిపక్ష పార్టీ, బీజేపీ తిరుపతి ఉప ఎన్నికను ప్రతిష్టాత్మకంగా తీసుకున్నాయి. ఇప్పటికే ప్రతిపక్ష టిడిపి, బిజెపి పార్టీల అధినాయకత్వం తిరుపతిలో మకాం వేసి పార్టీ నాయకులకు, కార్యకర్తలకు దిశానిర్దేశం చేస్తున్నారు. బిజెపి బూతాల వారీగా ఇన్చార్జిలను నియమించింది. ఏది ఏమైనా తిరుపతి ఉప ఎన్నికలో విజయం ఎవరిని వరిస్తుందో అని పార్టీల నేతలు, నియోజకవర్గ ప్రజలు ఉత్కంఠగా ఎదురు చూస్తున్నారు.