రాష్ట్రంలో ఒక మతాన్ని కించపరిచే చర్యలు సరికావని, హిందూ ఆచారాలపై కుట్రపూరితంగా దాడి జరుగుతోంది అని, తిరుమల వైకుంఠ ద్వార దర్శనం విషయంలో ప్రభుత్వం వ్యవహరించిన తీరే ఇందుకు నిదర్శనం అంటూ, టిడిపి నేత, టీడీపీ స్టేట్ ఆర్గనైజింగ్ సెక్రటరీ బుచ్చి రాంప్రసాద్ ఫైర్ అయ్యారు. ఆయన మాటల్లో "జగన్ రెడ్డి 18 నెలల పాలనలో హిందూ దేవాలయాలపై దాడులు పెరిగాయి. తిరుపతి దగ్గర నుంచి శ్రీశైలం వరకు పెద్ద పెద్ద దేవాలయాల్లో అన్యమత ప్రచారం జరుగుతోంది. టీటీడీ నిబంధనలు ఉల్లంఘించి తిరుమల కొండపై, ద్వారకా తిరుమలలోనూ వైకాపా నేతలు, మంత్రులు క్రిస్మస్ శుభాకాంక్షలు తెలియజేయడం జగన్ రెడ్డి విధానాలకు నిదర్శనం. తిరుమలకు వెళ్లే బస్ టిక్కెట్లపై అన్యమత ప్రచారం, టీటీడీ వెబ్ సైట్ లో అన్యమత కీర్తనలు పెట్టారు. నేడు తిరుమల వైకుంఠ దర్శనం విషయంలో మూడు రోజులు కొనసాగించే దర్శనాన్ని 10 రోజులు పాటు పెట్టారు. హిందూ గౌరవాలపై పద్ధతి ప్రకారం ఈ ప్రభుత్వం దాడి చేస్తోందని దీనిని బట్టి అర్థమవుతోంది. ప్రతి రోజూ హిందూ దేవాలయాలపై ఏదో ఒక దాడి జరుగుతూనే ఉంది. విగ్రహాలను ధ్వంసం చేస్తున్నారు. దోషులను పట్టుకోవడంలో ప్రభుత్వ యంత్రాంగం విఫలమైంది. తిరుమలలో వైసీపీ నేతలు శ్రీకాంత్ రెడ్డి 5,6 వందల మందితో దర్శనానికి వెళ్లారు. డ్రోన్ లు ఎగురవేసి తిరుమల నిబంధనలు ఉల్లంఘించారు. ఇది శాంతిభద్రతలకు విఘాతం కాదా? దీనికి ఎవరు బాధ్యత వహిస్తారు? కనీసం మాస్క్ లు కూడా వేసుకోకుండా ర్యాలీగా వెళ్లారు. ప్రకాశం జిల్లా దర్శిలో కృష్ణుడి ఆలయంలో రక్తం, మాంసపు ముక్కలు పడేసి వెళ్లారు."
"ద్వారకా తిరుమలలో పందిమాంసం అమ్మే వ్యక్తిని పోలీసులు అదుపులోకి తీసుకున్నారు. ఇవన్నీ దేనికి సంకేతం? ప్రభుత్వ వైఫల్యం కాదా? ప్రశ్నించిన వారిపై అక్రమ కేసులు పెడుతున్నారు. అంతర్వేది రథం దగ్ధం చేసినా చర్యలు లేవు. చర్చిలో దాడి జరిగిందని చెప్పి 24 గంటల్లో అరెస్ట్ చేశారు. సంఘటనలు చూసేందుకు వెళ్లే వారిని కూడా అనుమతించడం లేదు. కనకదుర్గ గుడిలో వెండి సింహాలు మాయం అయ్యాయి. హిందూ దేవాలయాలపై దాడుల విషయంలో ప్రజలు అన్నీ గమనిస్తూనే ఉన్నారు. రోడ్లపైకి రాకపోయినా సరైన సమయంలో బుద్ధి చెబుతారు. ఓ మతంపై పథకం ప్రకారం దాడి చేసుకుంటూ వెళ్తూనే ఉన్నారు. మత మార్పిడులు, దాడుల విషయంలో ప్రభుత్వ వైఫల్యాలపై టీడీపీ పోరాటం చేస్తుంది. త్వరలోనే కార్యాచరణ వెల్లడిస్తాం. ఆంజనేయ స్వామి విగ్రహం ధ్వంసం, అంతర్వేది రథం దగ్ధంపై మంత్రి కొడాలి నాని వ్యాఖ్యలు, దేవాదాయ శాఖ మంత్రి వ్యాఖ్యలు మనం చూశాం. జగన్ రెడ్డి ఏనాడూ స్పందించలేదు. బ్రాహ్మణులపై దాడులు జరుగుతున్నాయి. అన్ని వర్గాలను, మతాలను గౌరవించే సంప్రదాయం నెలకొల్పాల్సిన బాధ్యత ప్రభుత్వంపై ఉంది. ఒక మతాన్ని కించపరిచే చర్యలు సరికావు. ఇది అంతర్యుద్ధానికి దారి తీస్తుంది. ఇప్పటికైనా ముఖ్యమంత్రి కళ్లు తెరిచి సమస్యలు పరిష్కరించాలి. లేనిపక్షంలో ప్రజా ఉద్యమాలు తప్పవు." అంటూ ప్రభుత్వాన్ని హెచ్చరించారు.
