news

తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబు నాయుడు, వారం రోజుల క్రిందట ప్రధానికి ఫోన్ ట్యాపింగ్ పై లేఖ రాస్తే, ఏపి డీజీపీ స్పందిస్తూ ఆధారాలు ఉంటే ఇవ్వండి, మేము ఆక్షన్ తీసుకుంటాం అని చెప్పిన సంగతి తెలిసిందే. అయితే దీని పై స్పందించిన చంద్రబాబు, ఆరోపణలే మీ మీద అయితే, మీకు ఎలా ఆధారాలు ఇస్తాం అంటూ రిప్లై ఇచ్చిన సంగతి తెలిసిందే. అయితే నిన్న చంద్రబాబు మరో లేఖ రాసారు. ఈ సారి ఆంధ్రప్రదేశ్ చీఫ్ సెక్రటరీకి లేఖ రాసారు. అయితే ఈ సారి లేఖ ఒక్కటే కాదు, ఆధారాలు ఫోటోలు రూపంలో కూడా జత చేసారు. మరి ప్రభుత్వం, ఈ ఆధారాలతో తన నిర్ణయం మార్చుకుంటుందా ? చంద్రబాబుని ఆధారాలు అడిగారు కాబట్టి, ఈ సారి ఆధారాలు ఇచ్చారు, మరి జరిగిన అవినీతి పై ప్రభుత్వం ఎంక్వయిరీ చేస్తుందా ? అని తెలుగుదేశం నేతలు ప్రశ్నిస్తున్నారు. ఇక విషయానికి వస్తే, ఆంధ్రప్రదేశ్ రాష్ట్ర ప్రభుత్వం, పేదలకు ఇళ్ళ పట్టాలు అనే కార్యక్రమం చేస్తున్న సంగతి తెలిసిందే. గత ప్రభుత్వం కట్టిన 8 లక్షల ఇల్లు ఇవ్వకుండా, ఈ ఇళ్ళ స్థలాలు ఇవ్వటం పై విమర్శలు వచ్చినా, ప్రభుత్వం వెనక్కు తగ్గలేదు. అయితే ఈ ఇళ్ళ స్థలాలు ఎక్కువగా ఉపయోగం లేని చోట్ల ఇస్తున్నారనే ఆరోపణలు వచ్చాయి. ముఖ్యంగా బాధితులు ముందుకు రావటంతో, వారికి ప్రతిపక్షాలు అండగా ఉండి ఆందోళన చేసాయి.

ఈ నేపధ్యంలోనే తూర్పు గోదావరి జిల్లాలో, ఆవ భూముల్లో ఇళ్ళ స్థలాలు ప్రభుత్వం కేటాయించింది. అవి వరద వస్తే మునిగిపోయే భూములు అని తెలుగుదేశం ఆరోపించింది. అలాగే అక్కడ 5 లక్షలు పలికే చోట, ఎకరం 45 లక్షలు కొన్నారని, తెలుగుదేశం ఆరోపించినా, ప్రభుత్వం పట్టించుకోలేదు. మొత్తం 600 ఎకరాల ఆవ భూములు ఇళ్ళ స్థలాలుగా ఇచ్చారు. అయితే ఇక్కడ జరిగిన అవినీతి పై కోర్టులో కేసు నడుస్తుంది. ఇది ఇలా ఉండగానే, గోదావరికి వరదలు రావటంతో, తెలుగుదేశం పార్టీ ఆరోపించినట్టే ఆ భూములు వరదల్లో మునిగిపోయాయి. దాదాపుగా నడుము లోటు వరద వచ్చింది. దీంతో ఇవి పత్రికల్లో, చానల్స్ లో రావటం, తెలుగుదేశం నేతలు అక్కడకు వెళ్లి పరిశీలించి, జరిగిన విషయం మొత్తం చంద్రబాబుకు చెప్పటంతో, చంద్రబాబు నిన్న చీఫ్ సెక్రటరీకి ఉత్తరం రాసారు. మొత్తం విషయం చెప్తూ, అక్కడ భూములు ఇస్తే పేదలకు జరిగే ముప్పు, అధికార పార్టీ, అధికారులు కలిసి చేసిన అవినీతి చెప్తూ, రాష్ట్రంలో వివిధ చోట్ల ఇలాగే జరిగిన విషయాన్నీ ప్రస్తావిస్తూ, ఈ మొత్తం వ్యవహారం పై విచారణ జరపాలని చీఫ్ సెక్రటరీని కోరారు. అలాగే ఈ భూములు వరదల్లో మునిగిపోయిన ఆధారాలు కూడా జత పరిచారు. మరి చీఫ్ సెక్రటరీ గారు చర్యలు తీసుకుంటారో లేదో చూడాలి.

రాష్ట్రంలో ఫోన్ ట్యాపింగ్ వివాదం తారా స్థాయిలో ఉంది. జాతీయ స్థాయిలో ఈ విషయం ప్రకంపనలు సృష్టిస్తుంది. ఈ నేపధ్యంలో ఒకే రోజు, కొద్ది సమయాల వ్యవధిలో విజయసాయి రెడ్డి, ఇంటెలిజెన్స్ చీఫ్, ఆంధ్రప్రదేశ్ గవర్నర్ ని కలవటం కొత్త చర్చకు దారి తీసింది. ముందుగా వార్తా ప్రసారాల్లో విజయసాయి రెడ్డి తో పాటుగా, ఇంటెలిజెన్స్ చీఫ్ రాజేంద్రనాథ్ రెడ్డి కలిసి, గవర్నర్ ను కలిసారని ప్రసారాలు చేసాయి. అయితే ఇద్దరూ కొద్ది సమయం గ్యాప్ లో గవర్నర్ ను విడివిడిగా కలిసినట్టు చెప్తున్నారు. గవర్నర్ కార్యాలయం ట్విట్టర్ లో పోస్ట్ చేసు, విజయసాయి రెడ్డి గవర్నర్ ని కలిసారని ఒక ఫోటో, ఇంటెలిజెన్స్ చీఫ్ తో కలిసింది ఒక ఫోటో పెట్టారు. పది రోజుల క్రితమే కరోనా నయం అయి విజయసాయి రెడ్డి వచ్చారు. ఇంత తక్కువ సమయంలో బయటకు రావటమే కాక, గవర్నర్ ని కలిసారు అంటే ఎదో ముఖ్యమైన విషయం పైనే అనే చర్చ జరుగుతుంది. దీనికి తోడు ఇంటలిజెన్స్ చీఫ్ కూడా కలవటం ఆసక్తిని రేపింది.

ప్రభుత్వ పరంగా అధికారికంగా ఏమైనా చెప్పాలంటే ప్రభుత్వం తరుపున మంత్రులు వెళ్ళాలని, కానీ విజయసాయి రెడ్డి, అధికారులతో కలిసి ఎందుకు కలిసారు అంటూ తెలుగుదేశం పార్టీ ప్రశ్నిస్తుంది. దీనికి సంబంధించి వర్ల రామయ్య ట్వీట్ చేసారు. పలు కేసుల్లో బెయిల్ పై ఉన్న విజయసాయి రెడ్డి, ఇంటెలిజెన్స్ చీఫ్ తో కలిసి గవర్నర్ వద్దకు వెళ్ళటం, ఏమిటి అని ? ఎందుకు కలిసారో చెప్పాలని డిమాండ్ చేస్తున్నారు. అటు విజయసాయి రెడ్డి కానీ, ఇటు గవర్నర్ కార్యాలయం కానీ చెప్తే కానీ, ఎందుకు కలిసారో తెలిసే పరిస్థితి లేదు. ఒక పక్క ఫోన్ ట్యాపింగ్ వ్యవహారం నడుస్తూ ఉండటంతో, వీరి కలియిక ఆసక్తి రేపుతుంది. ఫోన్ ట్యాపింగ్ పై వస్తున్న ఆరోపణలకు బ్రీఫింగ్ ఇచ్చేందుకు ఇంటలిజెన్స్ చీఫ్ గవర్నర్ ని కలిసి ఉంటారని, అదే సందర్భంలో వచ్చిన విజయసాయి రెడ్డి, ఎందుకు కలిసారో తెలియాల్సి ఉందని, కొంత మంది వైసీపీ వర్గాలు చెప్తున్నాయి. మరో పక్క ఫోన్ ట్యాపింగ్ పై, హైకోర్టు, ఈ రోజు సర్వీస్ ప్రొవైడర్లకు నోటీసులు ఇచ్చిన సంగతి తెలిసిందే.

అందప్రదేశ్ లో ప్రకంపనలు సృష్టించిన ఫోన్ ట్యాపింగ్ వ్యవహారంలో ఈ రోజు మరో ట్విస్ట్ చోటు చేసుకుంది. ఆంధ్రజ్యోతి పత్రికలో వచ్చిన కధనంతో, రాష్ట్ర వ్యాప్తంగా సంచలనం రేకెత్తించటంతో, ఈ వ్యవహారాన్ని మాజీ జడ్జి శ్రవణ్ కుమార్, హైకోర్టులో పిల్ రూపంలో వేసారు. దీని పై ఇప్పటికే రెండు సార్లు , హైకోర్టులో వాదనలు జరిగాయి. విచారణ సందర్భంగా హైకోర్టు పలు కీలక వ్యాఖ్యలు కూడా చేసిన విషయం తెలిసిందే. ఈ వ్యాఖ్యల్లో కూడా హైకోర్టు వేసిన ప్రశ్నలు ప్రాధాన్యత సంతరించుకున్నాయి. దీని పై విచారణ జరిపితే మీకు వచ్చిన అభ్యంతరం ఏమిటి అంటూ, హైకోర్టు ప్రభుత్వాన్ని ప్రశ్నించింది. అలాగే ఫోన్ ట్యాపింగ్ అనేది అంత తేలికైన విషయం కాదని, సీరియస్ గా తీసుకోవాల్సిన అంశం అని వ్యాఖ్యానించారు. ఆంధ్రప్రదేశ్ హైకోర్టు న్యాయమూర్తుల ఫోన్ ట్యాపింగ్ కు సంబంధించి, ఒక న్యాయమూర్తులదే కాదు,, సామాన్య వ్యక్తీ ఫోన్ ట్యాపింగ్ జరిగినా కూడా అది సీరియస్ గా తీసుకునే అంశం అని హైకోర్టు రెండు రోజుల క్రిందట వ్యాఖ్యానించింది. ఇది ప్రైవసీ ఆక్ట్ కు, భావప్రకటనా స్వేచ్చ, ఫండమెంటల్ రైట్స్ కు కూడా ఇది వ్యతిరేకం అని హైకోర్టు పేర్కొంది. అయితే నిన్న జరిగిన విచారణలో, మెయిన్ పిటీషన్ కు అడిషనల్ అఫిడవిట్ దాఖలు చేసి, ఈ నెల 27 లోపు ఇవ్వమని కోర్టు వాయిదా వేసింది.

ఈ నేపధ్యంలోనే, ఈ రోజు ఈ కేసులో మరో కీలక మలుపు చోటు చేసుకుంది. ఈ రోజు హైకోర్టు మొత్తం 16 మందికి నోటీసులు జరీ చేసింది. ఇందులో పిటీషన్ లో శ్రవణ్ పేర్కొన్న ప్రతివాదులతో పాటుగా, ఇంటర్నెట్ సర్వీస్ ప్రొవైడర్లకు కూడా నోటీసులు ఇచ్చింది హైకోర్టు. అలాగే మొబైల్ ఆపరేటర్లకు కూడా నోటీసులు వెళ్ళాయి. నోటీసులు వెళ్ళిన వారిలో రిలయన్స్ జియో, ఎయిర్ టెల్, వోడాఫోన్, బీఎస్ఎన్ఎల్, అలాగే టెలికాం రెగ్యులేటరీ అఫ్ ఇండియా చైర్మెన్ కు కూడా ఈ నోటీసులు జరీ చేసింది. దీంతో పాటు సిబిఐ విశాఖపట్నం ఎస్పీకి కూడా ఈ నోటీసులు వెళ్ళాయి. అలాగే కేంద్రంలో ఉన్న టెలికాం శాఖ ప్రినిసిపల్ సెక్రటరీకి, ఆంధ్రప్రదేశ్ డీజీపీకి, ఆంధ్రప్రదేశ్ చీఫ్ సెక్రటరీకి, ఆంధ్రప్రదేశ్ ప్రినిసిపల్ సెక్రటరీకి, ఇలా మొత్తం ఎవరినైతే ప్రతివాదులగా చేర్చారో వారికి నోటీసులు వెళ్ళాయి. నాలుగు వారాల్లో వీరు అంతా కూడా, వ్యక్తిగతంగా కానీ, న్యాయవాది ద్వారా కానీ హాజరు అయ్యి, తాము అడిగిన ప్రశ్నలకు సమాధానం ఇవ్వాలని హైకోర్టు తెలిపింది. దీంతో పాటు న్యాయవాది శ్రవణ్ పేర్కొన్న అంశాలు, ఆ నోటీసుల్లో తెలిపింది. అలాగే ఫోన్ ట్యాపింగ్ కు సంబందించిన కొన్ని సుప్రీం కోర్టు తీర్పులను కూడా ఆ నోటీసుల్లో ఉదహరించింది.