news

ఆంధ్రప్రదేశ్ రాజకీయాల్లో మరో కీలక పరిణామం చోటు చేసుకోనుందా ? జగన్ మోహన్ రెడ్డి వచ్చిన తరువాత, ఇప్పటి వరకు రాష్ట్ర రాజకీయాల్లో, జరుగుతున్న పరిస్థితుల పై, ఆర్ఎస్ఎస్ స్పందించలేదు. మొదటి సారిగా వారు, ఏపి రాజకీయాల పై బహిరంగంగా మాట్లాడటం పై ఆసక్తికర చర్చ జరుగుతుంది. ఒక పక్క వైసీపీకి మాత్రమే కాదు, బీజేపీకి కూడా వారు వార్నింగ్ ఇచ్చినట్టు అయ్యింది. రాష్ట్రంలో బీజేపీలోని ఒక వర్గం, పార్టీ ఆదేశాలకు కాకుండా, అధికార వైసీపీకి సపోర్ట్ చెయ్యటం చూస్తూనే ఉన్నాం. అయితే ఒక అంశం పై, ఆర్ఎస్ఎస్ ఇలా బయటకు వచ్చి క్లారిటీ ఇవ్వటంతో, ఇది బీజేపీకి కూడా వర్తిస్తుంది అనే సంకేతాలు ఇచ్చింది. ఆంధ్రప్రదేశ్ రాష్ట్రంలో, మూడు రాజధానుల అంశం హాట్ టాపిక్ గా ఉన్న సంగతి తెలిసిందే. ప్రస్తుతం ఈ అంశం గవర్నర్ పరిధిలో ఉంది. శాసనమండలి సెలెక్ట్ కమిటీకి బిల్లులు పంపించినా, ఈ అంశం కోర్టులో ఉన్నా సరే, ప్రభుత్వం, మూడు రాజధానులకు సంబందించిన రెండు బిల్లులను, గవర్నర్ ఆమోదానికి పంపించింది.

అయితే గవర్నర్ ఏ నిర్ణయం తీసుకుంటారా అని అందరూ ఆసక్తిగా గమనిస్తున్న సమయంలో, ఆర్ఎస్ఎస్ సిద్ధాంతకర్త రతన్ శార్ధ చేసిన ట్వీట్ ఇప్పుడు సంచలనంగా మారింది. రాష్ట్ర ప్రభుత్వం తీసుకున్న మూడు ముక్కల రాజధాని నిర్ణయాన్ని వ్యతిరేకిస్తూ ఆయన ట్వీట్ చేసారు. మూడు రాజధానుల బిల్లును గవర్నర్ వ్యతిరేకించాలని, ఆయన ట్విట్టర్ వేదికగా డిమాండ్ చేసారు. శాసనమండలిలో బిల్లుని రిజెక్ట్ చేసిన తరువాత కూడా, జగన్ పై చేయి సాధించాలని అనుకోవటం కరెక్ట్ కాదని ఆయన అన్నారు. ప్రజాభిప్రాయానికి వ్యతిరేకంగా వెళ్తున్న ప్రభుత్వాన్ని, గవర్నర్ అడ్డుకోవాలని అన్నారు. మూడు రాజధానుల నిర్ణయం పై, ఆర్ఎస్ఎస్ సిద్ధాంతకర్త ట్వీట్ చెయ్యటం చూస్తుంటే, రాష్ట్రంలో త్వరలోనే కీలక రాజకీయ మార్పులు వచ్చినా ఆశ్చర్యం లేదు అనిపిస్తుంది.

ఆంధ్రప్రదేశ్ రాష్ట్ర ప్రభుత్వం, రాష్ట్రంలో కొన్ని భూములు అమ్మి సొమ్ము చేసుకోవాలని నిర్ణయం తీసుకున్న సంగతి తెలిసిందే. దీనికి బిల్డ్ ఏపి అని పేరు పెట్టారు. అయితే ప్రతిపక్షాలు, ఇతర ప్రజా సంఘాలు, ఈ తీరుని తప్పు బట్టినా, ప్రభుత్వం మాత్రం వెనక్కు తగ్గలేదు. ఈ విషయం పై, ప్రభుత్వ నిర్ణయాన్ని సవాల్ చేస్తూ, హైకోర్టులో మూడు ప్రజా ప్రయోజన వ్యాజ్యాలు దాఖలు అయ్యాయి. ఈ పిటీషన్ పై, ఈ రోజు హైకోర్టులో విచారణ జరిగింది. ఈ సందర్భంగా, ప్రభుత్వం కూడా, కౌంటర్ అఫిడవిట్ దాఖలు చేసింది. అయితే ఈ సందర్భంలో హైకోర్టు చేసిన వ్యాఖ్యలు సంచలనంగా మారాయి. హైకోర్టు కీలక వ్యాఖ్యలు చేస్తూ, ప్రభుత్వానికి ఆస్తులు అమ్మే, హక్కు ఉందా అనే విషయం విచారణ చెయ్యాల్సి ఉందని చెప్తూ, ఇరు వర్గాల వాదన విన్న హైకోర్టు, విచారణను రేపటికి వాయిదా వేసింది.

మరో వైపు, హైకోర్టు ఈ సందర్భంగా వ్యాఖ్యలు చేస్తూ, రాజ్యం వేరు, ప్రభుత్వం వేరు అనే విషయం, ఈ ప్రభుత్వం గుర్తు పెట్టుకోవాలి అంటూ, కీలక వ్యాఖ్యలు చేసింది. రాజ్యం అనేది శాస్వతం ఉంటుందని, ప్రభుత్వం శాస్వతం కాదు అనే విషయం గుర్తు పెట్టుకోవాలని, హైకోర్టు వ్యాఖ్యానించటం సంచలనంగా మారింది. హైకోర్టు ఈ విషయంలో చేసిన చేసిన వ్యాఖ్యలు చర్చనీయాంశం అయ్యాయి. ప్రభుత్వానికి ఉన్న ఆస్తులు భవిష్యత్తు తరానికి ఇవ్వటానికి కానీ, అవి అమ్మి సొమ్ము చేసుకోవటానికి కదానే వాదన ప్రతిపక్షాలు చేస్తున్నాయి. ఇప్పటికే అనేక ప్రాజెక్ట్ ల కోసం, ప్రభుత్వం కోట్లు ఖర్చు పెట్టి, భూములు కొంటున్న సంగతి తెలిసిందే. అయితే, ఇప్పుడు ప్రభుత్వం ఆధీనంలో ఉన్న భూములు అమ్మి, ఉన్న భూములు అమ్మించటం దారుణం అని అంటున్నారు.

రాష్ట్రంలో జగన్ పాలన ప్రారంభమై 14నెలలైనా, దళితులకు ఒక్క మేలు కూడా చేయలేదని, గత ప్రభుత్వం ఆయా వర్గాలకు అమలుచేసిన అనేక పథకాలను ఈ ప్రభుత్వం నిలిపివేసిందని, టీడీపీనేత, మాజీ మంత్రి నక్కా ఆనందబాబు ఆరోపించారు. బుధవారం ఆయన విలేకరులతో మాట్లాడుతూ, రాజ్యాంగం ద్వారా దళితులకు చేకూరిన లబ్ధిని కూడా ఈ ప్రభుత్వం తానే చేస్తున్నట్లుగా చెప్పుకుంటోందన్నారు. రిజర్వేషన్లు ఎప్పటినుంచో దళితులు అనుభవిస్తున్నారన్నారు. ఎస్సీ, ఎస్టీ సబ్ ప్లాన్ నిధులను గత ప్రభుత్వం దళితులకే వినియోగించిందని, ఈప్రభుత్వం సబ్ ప్లాన్ నే మరిచిపోయిం దన్నారు. రూ.40వేల కోట్ల పైచిలుకు నిధులను చంద్రబాబు ప్రభుత్వం ఎస్సీ, ఎస్టీ సబ్ ప్లాన్ కింద దళితులకు ఖర్చు పెట్టిందన్నారు. గత ప్రభుత్వం అమలుచేసిన అంబేద్కర్ ఓవర్సీస్ విద్యానిధి పథకాన్ని నిలిపేయడంద్వారా ఈ ప్రభుత్వం దళిత యువకులను దారుణంగా మోసగించిందన్నారు. ఆ పథకం కింద గత ప్రభుత్వం విదేశాలకు వెళ్లి చదువుకునే దళిత విద్యార్థులకు ఒక్కొక్కరికి రూ.15లక్షలు అందించిదన్నారు. ఎస్సీ, ఎస్టీ కార్పొరేషన్లకు నిధులు లేకుండా నిర్వీర్యం చేసిన ఘనత కూడా జగన్ ప్రభుత్వానిదేనన్నారు. దౌర్జన్యాలు, దుర్మార్గాలకు పాల్పడటం, అక్రమ కేసులు పెట్టడం, అన్యాయంగా చంపడం వంటి వాటినే ఈ ప్రభుత్వం దళితులకు అదనంగా ఇచ్చిందన్నారు.

దళితుల ఆత్మగౌరవం, ఆత్మాభిమానంతో ఈ ప్రభుత్వం చెలగాటమాడుతోందని మాజీ మంత్రి ఆగ్రహం వ్యక్తంచేశారు. తూర్పుగోదావరి జిల్లాలో వరప్రసాద్ అనేదళిత యువకుడికి జరిగిన శిరోముండనం జగన్ పాలనకే ఒక బ్లాక్ మార్క్ అని, అంతటి దురాగతానికి పాల్పడిన వారి వివరాలన్నీ బయటపెట్టి, వారిని దారుణంగా శిక్షించాలని ఆనందబాబు డిమాండ్ చేశారు. కవన కృష్ణమూర్తి, అతని అనుచరులు, బంధువులు, ఇంకా ఎవరెవరి ప్రమేయం ఉందో, విచారించాలని, ఎవరి ప్రోద్భలంతో శిరోముండనం జరిగిందో వారిపై కూడా చర్యలు తీసుకోవాలన్నారు. కేవలం ఒక ఎస్సైని, కిందిస్థాయి సిబ్బందిని సస్పెండ్ చేసి చేతులు దులుపుకుంటే సరిపోదన్నారు. ఏ ఎమ్మెల్యే చెబితే పోలీసులు ఆ పనిచేశారో చెప్పాలన్నారు. కేవలం పైపైన విచారణ జరిపి, శిరోముండనం వ్యవహారాన్నిమసిపూసి మారేడు కాయ చేస్తామంటే చూస్తూ ఊరుకునేది లేదన్నారు. ఏంచేసినా దళితులు ఏమీ చేయలేరనే భావనలో ప్రభుత్వం ఉందని, అందులో భాగంగానే డాక్టర్ సుధాకర్, డాక్టర్ అనితారాణిలపై వేధింపులకు పాల్పడ్డారని, జడ్జి శ్రావణ్ కుమార్ పై అక్రమకేసులు పెట్టడం, అడిషనల్ జడ్జి రామకృష్ణను 8ఏళ్లుగా వేధిస్తున్నారన్నారు. నేడు చీరాలలో జరిగిన ఘటనపై ప్రభుత్వం ఏం సమాధానం చెబుతుందో చెప్పాలన్నారు.

కిరణ్ కుమార్ అనే దళితయువకుడు మాస్కు పెట్టుకోలేదని చెప్పి అకారణంగా స్టేషన్ కు తీసుకెళ్లి దారుణంగా చావగొట్టడంతో ప్రభుత్వ ఆసుపత్రిలో చికిత్స పొందుతూ అతను చనిపోయాడని దీనిపై ప్రభుత్వం ఏం చెబుతుందని నక్కా నిలదీశారు.
బాపట్లలో రైల్వేస్టేషన్ ఎదురుగా ఉన్న అంబేద్కర్ విగ్రహాన్ని రాత్రికి రాత్రి పెకలించి పక్కన పడేసిన అధికార పార్టీ ఎమ్మెల్యేపై చర్యలు తీసుకునే ధైర్యం ప్రభుత్వానికి ఉందా అన్నారు. దళిత బాలికపై దారుణంగా అత్యాచారం చేసి, తీసుకెళ్లి పోలీస్ స్టేషన్ ముందు పడేసినా, ఇంతవరకు ఆ దురాగతానికి పాల్పడిన వారెవరో జగన్ ప్రభుత్వం గుర్తించలేకపోయిందన్నారు. బాలికను పరామర్శించడానికి ఎవరినీ వెళ్లనీయకుండా అడ్డుకుంటున్నారని, ఆ అమ్మాయికి కరోనా వచ్చిందని చెప్పి, వాస్తవాలు ప్రజలకు తెలియనీయకుండా చేస్తున్నారన్నారు. ప్రభుత్వ అసమర్థతను ప్రశ్నించాడన్న అక్కసుతో 10ఏళ్లు ఎంపీగా పనిచేసిన హర్షకుమార్ ని జైల్లో పెట్టింది ఈ ప్రభుత్వం కాదా అని ఆనందబాబు ప్రశ్నించారు. రాష్ట్రంలో దళితులకు మాట్లాడే హక్కు లేకుండా పోయిందని, శిరోముండనం కేసులో ప్రతిఒక్కరూ బాధ్యులేనని, వరప్రసాద్ తో నడిరోడ్డుపై ఛాలెంజ్ చేసిన కవల కృష్ణమూర్తి, జిల్లా ఎస్పీలపై కఠిన చర్యలు తీసుకోవాలన్నారు. సోకాల్డ్ దళిత మేథావులంతా అలోచించాల్సిన సమయం వచ్చిందని, దళితులపై జరుగుతున్న దుర్మార్గాలకువ్యతిరేకంగా పోరాడాల న్నారు. జగన్ ని నమ్మి గంపెడాశతో ఓట్లేసిన దళితులంతా, ఇప్పుడు ఛీ అని ఛీదరించుకొనే పరిస్థితులు ఏర్పడ్డాయన్నారు. కరోనా కారణంగా వారంతా ప్రభుత్వవ్యతిరేక పోరాటంపై సంకోచిస్తున్నారని, త్వరలోనే రోడ్లపైకి వచ్చి ఉద్యమం చేస్తారన్నారు. ఈ ప్రభుత్వం దళితులపై జరుగతున్న దుర్మార్గాలపై స్పందించకపోతే భవిష్యత్ లో తగిన మూల్యం చెల్లించుకొని తీరుతుందని ఆనందబాబు తీవ్రస్వరంతో హెచ్చరించారు.