news

ఆంధ్రప్రదేశ్ రాష్ట్రానికి అన్యాయం జరుగుతూనే ఉంది. మెడలు వంచేస్తాను అని ప్రజలను నమ్మించి, అధికారంలోకి వచ్చిన జగన్ మోహన్ రెడ్డి, రెండేళ్ళు అయినా మెడలు వంచటం కాదు కాదా, కనీసం నోరు కూడా ఎత్తటం లేదు. ఇదే అలుసుగా తీసుకున్న కేంద్రం, ఏపి ప్రభుత్వం నుంచి ఎలాంటి ప్రతిఘటన రాదు అనుకున్నారో ఏమో, ఏకంగా విశాఖ ఉక్కు పరిశ్రమను అమ్మేసే ప్రయత్నం చేస్తున్నారు. 32 మంది ప్రాణాలు త్యాగం చేస్తే వచ్చిన విశాఖ ఉక్కు పరిశ్రమను, ఇప్పుడు కేంద్రం అమ్మేస్తున్నా, జగన్ రెడ్డి మౌనంగా ఉన్నారు. ఏదో ఒక లేఖ రాసి నా పని అయిపొయింది అన్నట్టు కూర్చున్నారు. అంతే కాకుండా, పోస్కో - జగన్ కు సంబంధించి కూడా, జగన్ మోహన్ రెడ్డి పై తీవ్రమైన ఆరోపణలు వస్తున్నాయి. మరో పక్క విజయసాయి రెడ్డి ఆడుతున్న డ్రామాలు కూడా ప్రజలు గమనిస్తున్నారు. విశాఖ స్టీల్ ప్లాంట్ ఉద్యోగులు అందరూ కలిసి ఉద్యమాలు చేస్తున్నా, జగన్ మోహన్ రెడ్డి, కేంద్రాన్ని నిలదీయలేక పోతున్నారు. చేతిలో 28 మంది ఎంపీలు ఉన్నా కేంద్రం పై ఒత్తిడి తేవటం లేదు. రాజ్యసభలో, బీజేపీపై ఒత్తిడి తెచ్చే బలం ఉన్నా, వారికి భేషరతుగా మద్దతు పలుకుతున్నారు. వీటి అన్నిటి నేపధ్యంలో, ఈ రోజు ఉండవల్లి ప్రెస్ మీట్ పెట్టారు. విశాఖ ఉక్కు పై మాట్లాడారు. ఈ సందర్భంగా జగన్ మోహన్ రెడ్డి పై అసంతృప్తి వ్యక్తం చేసారు.

జగన్ మోహన్ రెడ్డికి, అతి పెద్ద మెజారిటీతో ప్రజలు గెలిపించారని, ఆ మెజారిటీ ఉంచుకుని కూడా, కేంద్రాన్ని నిలదీయటం లేదని అన్నారు. అసలు జగన్ మోహన్ రెడ్డిని చూసి, ఎందుకు భయపడుతున్నారని ప్రశ్నించారు. ప్రజా మద్దతుతో గెలిచిన జగన్, మోడీ అంటే ఎందుకు భయపడుతున్నారని అన్నారు. వాళ్ళు నిన్ను జైల్లో వేస్తారని భయం ఉంటే, దానికి ఎందుకు భయపడటం, నీకు జైలు ఏమైనా కొత్తా అని, మళ్ళీ జైలుకు వెళ్ళు, అక్కడే కూర్చో, అక్కడ నుంచే పరిపాలించు, ఆంధ్రప్రదేశ్ రాష్ట్రం కోసం, ఎదిరించి జైలుకు వెళ్ళాడని, ప్రజలు నీ వైపే ఉంటారు. ప్రజల కోసం నేను జైలుకు వెళ్ళాలని గర్వంగా చెప్పుకో. భయపడి పోయి, నోరు మెదపటం లేదని, నీ మీద ఇన్ని ఆరోపణలు వస్తుంటే, నీ వైఖరి కూడా వారి విమర్శలకు బలం ఇచ్చేలా ఉందని అన్నారు. లీడ్ తీసుకుని, ముందుకు వెళ్ళాలని అన్నారు. రాజశేఖర్ రెడ్డి కొడుకు, భయపడి ఇంట్లో కూర్చున్నాడు అనేది కరెక్ట్ కాదు అంటూ ఉండవల్లి, జగన్ పై ఘాటు విమర్శలు చేసారు.

ఆంధ్రప్రదేశ్ రాష్ట్ర ఉద్యోగులు ఇంకా ఇంకా జీతాలు కోసం ఎదురు చూస్తూనే ఉన్నారు. అదేంటి నాలుగో తారీఖు వచ్చినా, ప్రైవేటు వాళ్ళే జీతాలు ఇస్తే, ప్రభుత్వం ఇంకా ఇవ్వటం లేదు అని ఆశ్చర్యపోతున్నారా ? ఆశ్చర్యం ఏమి లేదు, దిగజారిపోతున్న రాష్ట్ర ఆర్ధిక పరిస్థితికి, నిదర్శనం ఈ ఘటన. ఆంధ్రప్రదేశ్ రాష్ట్రంలోని 4.5 లక్షల మంది ప్రభుత్వ ఉద్యోగులు, 3.5 లక్షల మంది పెన్షనర్లకు ఇంకా జీతాలు అందలేదు. దీంతో వారిలో అసంతృప్తి నెలకొంది. ఆర్ధిక ఏడాది మొదటి నెలలోనే, ఇలా ఉంటే, అసలు రాష్ట్ర ఆర్ధిక పరిస్థితి రాను రాను ఎలా ఉంటుందో అని భయపడుతున్నారు. ఓట్ ఆన్ ఎకౌంటు బడ్జెట్ కు రాష్ట్ర గవర్నర్ ఆమోద ముద్ర వేసినప్పటికీ, రాష్ట్ర ప్రభుత్వం నుంచి జీతాల బిల్లులు , ఇంకా రిజర్వ్ బ్యాంక్ వద్దకు వెళ్ళలేదు. నిధులు సౌలభ్యం లేకపోవటంతోనే, ఈ బిల్లులు ఆర్బిఐకి వెళ్లలేదని చెప్తున్నారు. సీఎఫ్‌ఎంఎస్‌ అనే సిస్టం ఆంధ్రప్రదేశ్ లో అమలవుతుంది. దీంతో నిధులు సౌలభ్యం లేకుండా, బిల్లులు పంపటం సాధ్యం కాదు. ఓట్ ఆన్ ఎకౌంటు బడ్జెట్ కు ఆమోద ముద్ర వేసినప్పటికీ, ఆయా పద్దుల కింద నిధులు కేటాయింపులు జరగలేదు. నిధులు అందుబాటులోకి లేకపోవటంతో, ఆ పద్దులకు నిధులు విడుదల చేయలేదు. కొన్ని పద్దులకు, 31వ తేదీ రాత్రి నిధులు విడుదల చేసినప్పటికీ, వాటి వరుకు సరిపోయాయి.

జీతాలు, పెన్షన్లకు నిధులు లేకపోవటంతో, ఈ బిల్లుని ఆర్బిఐకి పంపలేదని తెలుస్తుంది. అయితే ముందుగా ఏప్రిల్ 1, తరువాత గుడ్ ఫ్రైడే అని, శనివారం డబ్బులు పడతాయని అందరూ భావించారు. శనివారం రాత్రి వరకు ఎదురు చూసారు. చివరకు పడకపోవటంతో, ఈ రోజు ఆదివారం, సోమవారం మళ్ళీ సెలవు కావటంతో, మళ్ళీ మంగళవారం దాకా ఎదురు చూసే పరిస్థితి. అయితే మంగళవారం నిధులు సమకూర్చుకుని, బిల్లులు పంపితే, బుధవారం నుంచి జీతాలు పడే అవకాసం ఉన్నట్టు తెలుస్తుంది. మరి నిధులు మంగళవారానికి సమకూరుతాయా లేదా అనేది చూడాలి. అయితే ముందుగా జీతాలకు డబ్బులు సమకూరి, వారికి ముందు జీతాలు చెల్లించిన తరువాత, అప్పుడు పెన్షన్ లకు చెల్లిస్తారని తెలుస్తుంది. పెన్షన్లకు కూడా డబ్బులు సమకూరి, వారికి వేయాలి అంటే, వచ్చే వారం ఎప్పటిలోగా అవుతుందో అని ఎదురు చూస్తున్నారు. అయితే జీతాలు, పెన్షన్లు లేట్ కావటంతో, చిన్న చిన్న ఉద్యోగులు, తీవ్ర ఇబ్బందులు పడుతున్నారు. కట్టుకోవాల్సిన ఖర్చులు ఉండటంతో, జీతాలు తొందరగా రావాలని కోరుకుంటున్నారు.

తిరుపతి ఉప ఎన్నికల్లో, బీజేపీ, జనసేన కలిసి పోటీ చేస్తున్న సంగతి తెలిసిందే. మొన్నటి వరకు లోలోపల బీజేపీ, వైఎస్ఆర్ కాంగ్రెస్ పార్టీకి పని చేస్తుందనే అనుమానం ఉన్నా, అవన్నీ దూరం చేసి, చివరకు జనసేన, బీజేపీకి సంపూర్ణ మద్దతు ప్రకటించింది. పవన్ కళ్యాణ్ కూడా నిన్న తిరుపతి వచ్చి, ఒక పది నిముషాలు నడిచి, కార్ లో ర్యాలి చేసి, మీటింగ్ లో కూడా పాల్గున్నారు. బీజేపీ అభ్యర్ధి రత్నప్రభకు ఓటు వేయాలని కోరారు. అయితే పవన్ కళ్యాణ్ వచ్చి, 24 గంటలు కూడా కాక ముందే, అటు జనసేన పార్టీకి, ఇటు బీజేపీ పార్టీకి షాక్ ఇచ్చే నిర్ణయం తీసుకుని ఎలక్షన్ కమిషన్. తిరుపతిలో నవతరం పార్టీ కూడా పోటీ చేస్తుంది. అయితే అనూహ్యంగా వారికి గాజు గ్లాసు గుర్తును ఎలక్షన్ కమిషన్ కేటాయించింది. జనసేన పార్టీ ఎన్నికల గుర్తు కూడా గాజు గ్లాసు అనే విషయం ఇప్పటికే అందరికీ తెలుసు. దీంతో ఇప్పుడు తిరుపతి ఉప ఎన్నికల్లో, నవతరం పార్టీకి గాజు గ్లాసు గుర్తు కేటాయించటంతో, జనసేన, బీజేపీ షాక్ తిన్నాయి. నవతరం పార్టీ తరుపున డాక్టర్ గోదా రమేష్ కుమార్ అనే వ్యక్తి, తిరుపతి ఉప ఎన్నికల్లో పోటీ చేస్తున్నారు. ఆయనకు గాజు గ్లాసు గుర్తు కేటాయించారు. దీంతో ఆయన గాజు గ్లాసు గుర్తు పెట్టుకుని, ఎన్నికల ప్రచారానికి సిద్దం అవుతున్నారు. ఎలక్షన్ కమిషన్, ఈ నిర్ణయం ప్రకటించింది.

దీంతో నవతరం పార్టీ ఎన్నికల కమిషన్ కి ధన్యవాదాలు చెప్పారు. తమ గుర్తుతో ఎన్నికల ప్రచారం మరింతగా చేస్తామని, తమకు ఓటు వేసి గెలిపించాలని పత్రికా ప్రకటన విడుదల చేసారు. మరో పక్క తిరుపతి ఉప ఎన్నికలో, జనసేన పార్టీ పోటీ చేయకుండా, బీజేపీ పార్టీకి మద్దతు పలికింది. బీజేపీ పార్టీ ఎన్నికల గుర్తు కమలం గుర్తు. రేపు ఎన్నికల్లో ఓటు వేయటానికి వెళ్ళిన జనసేన క్యాడర్, అక్కడ కమలం గుర్తు, గాజు గ్లాసు గుర్తు చూస్తే, పుసుక్కున్న గాజు గ్లాజు గుర్తుకు గుద్దారు అంటే, సోము వీర్రాజుకి దిమ్మ తిరగట ఖాయం. అసలకే నోటాతో పోటీ పడే సోము వీర్రాజు సారధ్యంలోని బీజేపీ, జనసేనతో కలిసి లక్ష ఓట్లు తెచ్చుకోవాలని ప్లాన్లో ఉంది. అయితే, ఈ దెబ్బతో బీజేపీకి కూడా టెన్షన్ పట్టుకుంది. తమకు పడాల్సిన ఓట్లు క్రాస్ అవుతాయని, సోము వీర్రాజు కంగారు పడుతున్నారు. జనసేన పార్టీ రికగ్నైజ్‌డ్ పార్టీ, కకాపోవటంతోనే, నవతరం పార్టీకి గాజు గ్లాసు కేటాయించినట్లు తెలుస్తుంది. అయితే, దీని పై కేంద్ర ఎన్నికల సంఘానికి ఫిర్యాదు చేసి, గుర్తు మార్పించే వీలు ఏమైనా ఉంటుందా అనే పనిలో పడ్డారు.