news

హిందీ మాట్లాడే వలస కార్మికులపై గుజరాత్‌లో దాడులు కొనసాగుతూనే ఉన్నాయి. మంగళవారం కూడా రాష్ట్రంలోని అనేక ప్రాంతాల్లో ఉత్తరాది కార్మికులపై దాడులు జరిగాయి. దీంతో బాధితులు వేలాదిగా వలస వెళ్తున్నారు. రైళ్లు, బస్సులు కిక్కిరిసిపోతున్నాయి. సబర్‌కాంతా జిల్లాలో గత నెల 28న 14 నెలల చిన్నారిపై అత్యాచారం చేసిన కేసులో బిహార్‌కు చెందిన కార్మికుడ్ని అరెస్టు చేసిన సంగతి తెలిసిందే. నాటి నుంచి గుజరాత్‌లోని అనేక ప్రాంతాల్లో స్థానికులు హిందీ మాట్లాడేవారిపై దాడులకు తెగబడుతున్నారు. ఈ క్రమంలో పారిశ్రామిక ప్రాంతాలు, వలస కార్మికులు ఎక్కువగా నివసించే ప్రాంతాల్లో పోలీసులు గస్తీని ముమ్మరం చేశారు.

వలస కార్మికుల్లో భరోసా కల్పించేందుకు వడోదరలో మంగళవారం వందల మంది పోలీసులు కవాతు చేశారు. హింసాత్మక ఘటనలపై 61 కేసులు నమోదయ్యాయని, 533 మందిని అదుపులోకి తీసుకున్నామని రాష్ట్ర మంత్రి ప్రదీ్‌పసిన్హ్‌ జడేజా తెలిపారు. సోషల్‌ మీడియాలో ద్వేషపూరిత సందేశాలు పంపుతున్న 20 మందిని అరెస్టు చేసినట్లు చెప్పారు. మరోవైపు ఈ అంశంపై అధికార బీజేపీ, ప్రతిపక్ష కాంగ్రెస్‌ పరస్పరం తీవ్రస్థాయిలో ఆరోపణలు చేసుకుంటున్నాయి. కాంగ్రెస్‌ పార్టీ నేతలే హింసను ప్రేరేపిస్తున్నారని ముఖ్యమంత్రి విజయ్‌ రూపానీ ఆరోపించారు. వరస ట్వీట్లలో ఆయన కాంగ్రెస్‌ అధ్యక్షుడు రాహుల్‌ గాంధీపై విరుచుకుపడ్డారు.

‘కాంగ్రెస్‌ నేతలే తొలుత హింసను ప్రేరేపిస్తారు. ఆ హింసను ఖండిస్తూ ఆ పార్టీ అధ్యక్షుడు ట్వీట్‌ చేస్తారు’ అని మండిపడ్డారు. సమస్యకు పరిష్కారం ట్వీట్‌ చేయడం కాదని.. బాధ్యులైన కాంగ్రెస్‌ నేతలపై చర్యలు తీసుకోవడమని హితవు పలికారు. వలస కార్మికులపై దాడులకు కాంగ్రెస్‌ ఎమ్మెల్యే అల్పేష్‌ ఠాకూరే కారణమని బీజేపీ ఆరోపిస్తుండగా.. ఆయన మాత్రం యూపీ, బిహార్‌కు చెందిన కార్మికులు ఛాఠ్‌ పూజ కోసమే సొంత ప్రాంతాలకు వెళుతున్నారని చెప్పడం గమనార్హం. కాగా.. గుజరాత్‌లోని బీజేపీ సర్కారు వైఫల్యం వల్లే ఉత్తరాదికి చెందిన కార్మికులపై దాడులు జరుగుతున్నాయని మజ్లిస్‌ అధినేత, ఎంపీ అసదుద్దీన్‌ ఒవైసీ ఆరోపించారు.

బహ్రెయిన్‌లో బుధవారం ఉదయం ఘోర ప్రమాదం జరిగింది. గ్యాస్ సిలిండర్ పేలడంతో నలుగురు మృతి చెందారు. మరో 20 మంది తీవ్రంగా గాయపడ్డారు. గాయపడిన వారిని ఆస్పత్రికి తరలించారు. బహ్రెయిన్‌లోని ఓ భవనం రెండో అంతస్తులో ఈ ఘటన జరిగింది. పేలుడు ధాటికి భవనం పూర్తిగా నేలమట్టమైందని పోలీసులు తెలిపారు. భవన శిథిలాల కింద ఎవరైనా ఉన్నారేమోనని సహాయక బృందాలు గాలిస్తున్నాయి. బహ్రెయిన్ దేశంలో సంభవించిన అగ్నిప్రమాద ఘటనలో నలుగురు మృతి చెందగా, సుమారు ఇరవై మందికి పైగా గాయపడ్డారు.

ఓ బిల్డింగ్ లోని రెండో అంతస్తులో గ్యాస్ సిలిండ్ పేలి ఈ దుర్ఘటన జరిగింది. పేలుడు ధాటికి భవనం నేలమట్టమైంది. ఈ సమాచారం మేరకు సహాయక బృందాలు సంఘటనా స్థలానికి చేరుకున్నాయి. క్షతగాత్రులను సమీప ఆసుపత్రికి తరలించాయి. భవన శిథిలాల కింద ఎవరైనా చిక్కుకుపోయారేమోననే అనుమానంతో తక్షణ చర్యలు ప్రారంభించాయి.

ఇదిలా ఉండగా, ఈ ఘటనపై ఏపీ సీఎం చంద్రబాబునాయుడు ఆరా తీశారు. మృతుల్లో తెలుగువారు ఉన్నారంటూ వెలువడుతున్న మీడియా కథనాల నేపథ్యంలో ఏపీ భవన్ అధికారులతో చంద్రబాబు సమీక్షించారు. ఈ విషయమై బహ్రెయిన్ లోని భారత రాయబార కార్యాలయాన్ని సంప్రదించానని, మృతులందరూ బంగ్లాదేశ్ కు చెందిన వారేనని రెసిడెంట్ కమిషనర్ అర్జా శ్రీకాంత్ తెలిపారు. ఒకవేళ తెలుగువారు బాధితులుగా ఉంటే వెంటనే వారిని ఆదుకోవాలని చంద్రబాబు ఆదేశించారు.

డ్వాక్రా సభ్యులకు పసుపు-కుంకుమ చివరి విడత సాయాన్ని దసరా కానుకగా ఇచ్చేందుకు అధికారులు చర్యలు తీసుకుంటున్నారు. 2014 మార్చి 31 నాటికి డ్వాక్రా సంఘంలో ఉన్న ప్రతి సభ్యురాలికీ ప్రభుత్వం డ్వాక్రా రుణమాఫీకి బదులుగా పసుపు-కుంకుమ/పెట్టుబడి నిధి పేరుతో రూ.10వేలు ఆర్థిక సాయం చేస్తోంది. ఇందుకోసం అప్పటివరకు ఉన్న 86లక్షల మంది సభ్యులకు రూ.8,604 కోట్లు మంజూరు చేసింది. ఇప్పటికే ఒక్కో సభ్యురాలికి మూడు విడతల్లో రూ.8వేల చొప్పున రూ.6,883 కోట్లు అందించగా చివరి విడతగా రూ.2వేలు ఇవ్వాల్సి ఉంది. ఇందుకు రూ.1,931 కోట్లు అవసరమంటూ అధికారులు దస్త్రాన్ని ఆర్థిక శాఖకు నివేదించారు. మూడు, నాలుగు రోజుల్లో అక్కడి నుంచి ఆమోదం లభించే అవకాశాలు ఉన్నట్లు వారు చెబుతున్నారు.

డ్వాక్రా సభ్యుల్లో కొందరికి ఆర్థిక సాయం చేరలేదని ప్రభుత్వానికి ఫిర్యాదులు అందిన నేపథ్యంలో అధికారులు క్షేత్రస్థాయి సర్వే చేపట్టారు. గ్రామీణ పేదరిక నిర్మూలన సంస్థ(సెర్ప్‌) ఆధ్వర్యంలో వెలుగు సీసీ ప్రతి సంఘాన్ని సంప్రదిస్తూ సాయం అందిందో లేదో తెలుసుకుంటున్నారు. సెర్ప్‌ పరిధిలో 70లక్షల మంది డ్వాక్రా సభ్యులుండగా ఇప్పటికే 30లక్షల మంది చెంతకు వెళ్లి వివరాలు సేకరించారు. ఇప్పటివరకు 22,205 మందికి అందలేదని గుర్తించారు. వీరందరికీ ఏకమొత్తంలో రూ.10వేల వంతున అందించనున్నారు.

డ్వాక్రా సభ్యులకు వడ్డీ మొత్తాన్ని చెల్లించేందుకు ప్రభుత్వం రూ.316 కోట్లు మంజూరుచేసింది. దీన్ని కూడా దసరా నాటికి సభ్యుల రుణఖాతాల్లో జమచేసేలా అధికారులు చర్యలు తీసుకుంటున్నారు. డ్వాక్రా సభ్యులు బ్యాంకుల నుంచి రుణాలు పొంది వాటి వడ్డీ రేటు మేరకు ప్రతి నెలా కడుతున్నారు. సభ్యులు చెల్లించే వడ్డీ మొత్తాన్ని ప్రభుత్వం విడతల వారీగా సభ్యుల ఖాతాల్లో జమ(రీయింబర్స్‌) చేస్తోంది. ఇలా 2016 ఆగస్టు వరకు వడ్డీ మొత్తాన్ని చెల్లించింది. ప్రస్తుతం మంజూరు చేసిన రూ.316కోట్ల మొత్తంతో 2017 జనవరి వరకు అన్ని సంఘాలకు వడ్డీ చెల్లించనున్నారు.