news

ఎన్నికల ఫలితాలు వెలువడే మే 23వ తేదీన పెట్రో ధరలు అమాంతం ప్రజలపై రుద్దడం ఖాయమని, అప్పటి వరకూ పెట్రోల్, డీజిల్ ధరలు పెంచొద్దని ఆయిల్ కంపెనీలను ప్రధాని మోదీ ఆదేశించారని కాంగ్రెస్ పార్టీ ఆరోపించింది. మే 23న దేశవ్యాప్తంగా లోక్‌సభ, కొన్ని రాష్ట్రల్లో అసెంబ్లీ, ఉపఎన్నికల ఫలితాలు వెలువడనున్నాయి. ఇరాన్ నుంచి చమురు దిగుమతులు నిలిపేయకుంటే ఆంక్షలు విధిస్తామంటూ భారత్‌ సహా పలు దేశాలను అమెరికా హెచ్చరించిన నేపథ్యంలో క్రూడాయిల్ ధరలు అమాంతం పెరిగిపోయాయి. అయితే ఎన్నికల ఫలితాలు వెలువడే మే 23వరకూ ఓపిక పట్టాలని ఆయిల్ కంపెనీలను మోదీ కోరినట్టు కాంగ్రెస్ పేర్కొంది.

'తన సాహసాలను ప్రతిరోజూ కథలు కథలుగా చెప్పుకునే మోదీజీ ఎందుకు మౌనంగా ఉండిపోయారు? ప్రజలను మభ్యపెట్టి ఓట్లు సొంతం చేసుకునేందుకే ఆయన పెట్రో ఆంక్షలు, ధరలపై నోరు మెదపడం లేదు. మే 23 వరకూ ధరలు పెంచొద్దంటూ ఆయన ఆయిల్ కంపెనీలను ఆదేశించారు' అని కాంగ్రెస్ పార్టీ ప్రతినిధి రణ్‌దీప్ సింగ్ సూర్జేవాలా ఓ ట్వీట్‌లో పేర్కొన్నారు. 'మే 23వ తేదీ సాయంత్రంకల్లా పెట్రోల్, డీజిల్ ధరలను రూ.5 నుంచి రూ.10 వరకూ పెంచడానికి సన్నాహకాలు జరుగుతున్నాయి. అయితే ఈ విషయం మాత్రం దేశ ప్రజలకు చెప్పకుండా దాచిపెడుతున్నారు' అని సూర్జేవాలా హిందీ ట్వీట్‌లో తెలిపారు. దేశ చమురు అవసరాలు, భద్రతపై ప్రధాని మోదీ మౌన ప్రేక్షకుడిలా ఎందుకు ఉండిపోతున్నారని ఆయన ప్రశ్నించారు.

అయితే ఇది కాంగ్రెస్ పార్టీ చేస్తున్న ఆరోపణగా కొట్టి పారేయటానికి వీలు లేదు. అమెరికా ఇరాన్‌పై విధించిన ఆంక్షలు ముందు ముందు భారత దేశ ఆర్ధిక వ్యవస్థపై పెను ప్రభావం చూపొచ్చు. ఇప్పటిదాకా అమెరికా భారత్‌ విషయంలో ఇరాన్‌ నుండి చమురు కొనుగోళ్ళపై రాయితీలను ఇచ్చింది. 6 నెలల పాటు ఇచ్చిన రాయితీలు ఈ మే నెల మొదటి వారంలో ముగుస్తాయి. తాజాగా ట్రంప్ ఇరాన్‌ నుండి చమురు కొనుగోళ్ల విషయంలో మరింత కఠినంగా ఉంటామని , భారత్‌, చైనాలకు ఇచ్చే సబ్సీడీలను ఇక ముందు ఇవ్వబోమని తేల్చి చెప్పడంతో భారత్ ఇరుకున పడినట్టైంది. ఒక వేళ భారత్ మే నెల నుండి ఇరాన్‌ నుండి చమురు దిగుమతి చేసుకుంటే ..అమెరికా ఆగ్రహానికి గురికావాల్సి రావొచ్చు. ఇప్పటిదాకా అమెరికా నుండి ఎగుమతులు, దిగుమతుల విషయంలో ప్రత్యేక రాయితీలను పొందిన భారత్ వాటిని కోల్పోవాల్సి రావొచ్చు. ఇది భారతీయ మార్కెట్లపై, ఆర్ధిక వ్యవస్థపై ప్రభావం చూపే అవకాశం ఉంది. ఇరాన్‌పై విధించిన ఆంక్షల మూలంగా ఇప్పటికే అంతర్జాతీయంగా చమురు బ్యారెళ్ళ ధరలు పెరిగిపోయాయి.

ఆంధ్రప్రదేశ్ ఏసీబీ డీజీగా ఐపీఎస్ అధికారి ఏబీ వెంకటేశ్వరరావు ఈరోజు బాధ్యతలు స్వీకరించారు. అనంతరం మీడియాతో మాట్లాడుతూ.. అవినీతిని నిర్మూలించడం కేవలం ఏసీబీ వల్లే కాదనీ, దానికి ప్రజల నుంచి సహకారం కూడా అవసరమని తెలిపారు. ప్రస్తుతం ఏపీలో ఏసీబీ బలంగా ఉందని అభిప్రాయపడ్డారు. అవినీతిపై ప్రజలు నేరుగానే కాకుండా సోషల్ మీడియా ద్వారా కూడా ఫిర్యాదు చేయొచ్చని పేర్కొన్నారు. కేంద్రం, రాష్ట్ర ప్రభుత్వ ఉద్యోగులే కాకుండా ఎమ్మెల్యేలు, పార్లమెంటు సభ్యులు కూడా ఏసీబీ పరిధిలోకి వస్తారని వెంకటేశ్వరరావు చెప్పారు. ఎమ్మెల్యేలు, పార్లమెంటు సభ్యులు తప్పు చేసినా, మేము వదిలిపెట్టం అంటూ, వార్నింగ్ ఇచ్చారు. అవినీతి నిర్మూలనకు ప్రజల సహకారం అవసరమని అన్నారు.

ఆంధ్రప్రదేశ్ ఎన్నికల సమయంలో ఇంటెలిజెన్స్‌ డీజీగా ఉన్న ఏబీ వెంకటేశ్వరరావును పదవి నుంచి కేంద్ర ఎన్నికల సంఘం తప్పించిన విషయం విదితమే. అయితే తాజాగా ఏసీబీ డీజీగా నియమిస్తూ ఆంధ్రప్రదేశ్‌ ప్రభుత్వ ప్రధాన కార్యదర్శి ఎల్వీ సుబ్రహ్మణ్యం సోమవారం మధ్యాహ్నం ఉత్తర్వులు జారీ చేశారు. గవర్నర్ ఉత్తర్వుల మేరకు జీవో నెంబర్‌ 882ను ఈ సందర్భంగా సీఎస్ విడుదల చేశారు. ఎన్నికలు పూర్తవ్వడంతో ప్రభుత్వం ఈ నిర్ణయం తీసుకుంది. కాగా గతంలో ఇంటెలిజెన్స్ డీజీగా ఉన్న ఏబీని హెడ్ క్వార్టర్స్‌కు ఎన్నికల కమిషన్ అటాచ్ చేసింది. 1989 సంవత్సరానికి చెందిన ఐపీఎస్ అధికారి ఏబీ వెంకటేశ్వరరావు. ఎన్నికలకు మందు వరకు ఇంటెలిజెన్స్ డీజీగా ఆయన విధులు నిర్వహించారు.

భారత ప్రధాన న్యాయమూర్తి జస్టిస్ రంజన్ గొగోయ్‌ని కుట్రపూరితంగా లైంగిక వేధింపుల కేసులో ఇరికిస్తున్నారంటూ వచ్చిన ఆరోపణలు, న్యాయవ్యవస్థలో అక్రమాలపై సుప్రీంకోర్టు ముమ్మర విచారణకు ఉపక్రమించింది. ఈ వ్యవహారాన్ని పరిశీలించాలంటూ సీబీఐ డైరెక్టర్, ఢిల్లీ పోలీస్ కమిషనర్‌తో పాటు ఇంటిలిజెన్స్ బ్యూరో చీఫ్‌కి సమన్లు జారీ చేసింది. దీనిపై చర్చించేందుకు ఈ మూడు సంస్థలకు చెందిన చీఫ్‌లు ఇవాళ మధ్యాహ్నం న్యాయమూర్తుల చాంబర్‌‌కు రావాలని జస్టిస్ అరుణ్ మిశ్రా నేతృత్వంలోని త్రిసభ్య ధర్మాసనం ఆదేశించింది. చర్చల అనంతరం మళ్లీ తిరిగి మధ్యాహ్నం 3 గంటలకు ధర్మాసనం తదుపరి ఆదేశాలను జారీ చేయనుంది. సుప్రీం సీజే జస్టిస్ రంజన్ గొగోయ్‌పై లైంగిక వేధింపుల ఆరోపణలు వెలుగులోకి వచ్చిన నేపథ్యంలో సుప్రీంకోర్టు ఈ వ్యవహారంపై సుమోటోగా తీసుకుని విచారణ జరుపుతున్న సంగతి తెలిసిందే.

‘దళారి’ రోమేశ్ శర్మ నిర్వహిస్తున్న ‘క్యాష్ ఫర్ జడ్జిమెంట్’ (డబ్బులు తీసుకుని తీర్పు చెప్పడం) దందాకు చెక్ పెట్టినందుకే జస్టిస్ గొగోయ్‌ని తప్పుడు కేసులో ఇరికించేందుకు కుట్ర జరుగుతోందంటూ ఉత్సవ్ బైంసా అనే లాయర్ ఆరోపించారు. దీనికి సంబంధించిన ఆధారాలు కూడా తన వద్ద ఉన్నాయంటూ ఆయన పేర్కొనడంతో.. బుధవారం వాటిని సీల్డ్ కవర్‌లో తమ ముందు ఉంచాలని సుప్రీం ఆయనకు సమన్లు పంపింది. సీజేని ఇరికించేందుకు సాయం చేయాలంటూ లంచం ఇవ్వజూపినట్టు తన వద్ద సీసీటీవీ ఫూటేజిలు కూడా ఉన్నాయని బైంసా నివేదించారు. ఈ మేరకు లాయర్ బైంసా సుప్రీంకోర్టు సమర్పించిన అఫిడవిట్‌లో జెట్ ఎయిర్‌వేస్ నరేశ్ గోయల్ పేరుకూడా ఉంది. లంచం తీసుకుని తనకు అనుకూలంగా తీర్పు చెప్పించుకునేందుకు ప్రయత్నించి ఆయన విఫలమైనట్టు ఆయన ఆరోపించారు.

ఈ ఆరోపణలు చాలా ‘‘కలవరపాటుకు’’ గురిచేస్తున్నాయనీ... మూలాలతో సహా ఈ వ్యవహారాన్ని నిగ్గుతేల్చాలని జస్టిస్ మిశ్రా పేర్కొన్నారు. ‘‘న్యాయవ్యవస్థను రిమోట్‌తో నియంత్రించగలిగేలా.. దాని స్వతంత్ర విషయంలో పెను సమస్యలు తలెత్తుతున్నాయి. ఇదే నిజమైతే... ఇంతకు మించిన దారుణం మరోటి ఉండదు..’’ అని ఆయన వ్యాఖ్యానించారు. కాగా తనపై వచ్చిన ఆరోపణలపై అంతర్గత విచారణకు సైతం జస్టిస్ గొగోయ్ మార్గం సుగమం చేయడంపై జస్టిస్ మిశ్రా ప్రశంసలు కురిపించారు. ‘‘ఒక భారత ప్రధాన న్యాయమూర్తి ఇలాంటి నిర్ణయం తీసుకోవడం ఇదే తొలిసారి. ఈ నిర్ణయం తీసుకునే సాహసం ఏ సీజేఐ చేయలేదు. ఒకవేళ ఏదైనా కుట్ర జరిగితే మాత్రం... అత్యంత సీరియస్‌గా తీసుకోవాల్సి ఉంటుంది. న్యాయవ్యవస్థను సమూలంగా ప్రక్షాళన చేయాలని సీజేఐ భావిస్తున్నారు...’’ అని ఆయన పేర్కొన్నారు.