news

జగన్ మోహన్ రెడ్డి ప్రభుత్వం వచ్చిన తరువాత, చంద్రబాబు హయంలో ఆక్టివ్ గా, పని చేస్తూ, చంద్రబాబుకి సహకరించిన సీనియర్ ఐఏఎస్ ల పై ప్రభుత్వం కక్ష తీర్చుకుంది అనే విమర్శలు వస్తున్న సంగతి తెలిసిందే. ఇంటలిజెన్స్ డీజీ ఏబి వెంకటేశ్వరరావుకి ఇప్పటి వరకు పోస్టింగ్ ఇవ్వలేదు. అలాగే 48 మంది డీఎస్పీల పరిస్థితి కూడా అలాగే ఉంది. ఈ పరిస్థితిలో, ఐఏఎస్ లు కూడా టార్గెట్ అయ్యారు. ఆంధ్రప్రదేశ్‌ ఆర్థికాభివృద్ధి బోర్డు సిఈఓగా పని చేస్తున్న జాస్తి కృష్ణ కిషోర్ వ్యవహారం పై కూడా ఇలాగే విమర్శలు వచ్చాయి. కృష్ణ కిషోర్ తాను, తన మాతృ సంస్థకు వెళ్ళిపోతాను అని, కేంద్రానికి వెళ్లిపోవటానికి తనను రిలీవ్ చెయ్యాలని కోరగా, అతనిని రిలీవ్ చెయ్యకుండా, చివరకు అతను అవినీతి చేసారు అంటూ కేసులు పెట్టారు. రాత్రికి రాత్రి ఎంక్వయిరీ వేసారు. ఎంక్వయిరీ అయ్యే వరకు రిలీవ్ చెయ్యం అని చెప్పారు. అయితే ఈ విషయం పై కృష్ణ కిశోరే క్యాట్ ట్రిబ్యునల్ లో ఫిర్యాదు చేసారు. ఈ విషయం ఇంకా విచారణలో ఉంది.

విచారణ జరుగుతున్న సందర్భంలో, క్యాట్ తీవ్ర వ్యాఖ్యలు చేసిన సంగతి తెలిసిందే. రాష్ట్ర ప్రభుత్వం, ఇలా ఒక అధికారి పై ఎందుకు కక్ష గట్టింది అంటూ మొదటి సారి జరిగిన విచారణలో తీవ్ర వ్యాఖ్యలు చేసారు. ఇక అలాగే, రెండో సారి విచారణలో, తాము జాస్తి కృష్ణ కిషోర్ కి, జీతం ఇవ్వమని చెప్పినా ఎందుకు ఇవ్వలేదు అంటూ ఫైర్ అయ్యారు. చీఫ్ సెక్రటరీ వచ్చి మాకు సమాధానం చెప్పాలి అంటూ, తీవ్ర వ్యాఖ్యలు చేసింది ట్రిబ్యునల్. దీంతో వెంటనే గంటలోనే జీతం ఇచ్చిన ఏపి అధికారులు, ఈ విషయం పై ట్రిబ్యునల్ కు చెప్పటంతో, అయినా ట్రిబ్యునల్ శాంతించలేదు. జీతం ఎందుకు లేట్ అయ్యిందో చెప్పాలని, చీఫ్ సెక్రటరీకి ఆదేశాలు జారీ చేసింది. ఇంత ఇదిగా ఈ కేసు నడుస్తున్న టైంలో, ఇప్పుడు ఒక నివేదిక వచ్చింది.

ఆంధ్రప్రదేశ్‌ ఆర్థికాభివృద్ధి బోర్డు, గత మూడేళ్లలో ఖర్చు పెట్టిన ఖర్చు వివరాలు, అలాగే చేసిన నియమకాలు అన్ని నిబంధనలు ప్రకారమే ఉన్నాయని, ఆడిట్‌ నివేదిక స్పష్టం చేసినట్లు తెలిసింది. దీనికి సంబంధించి, ఒక పత్రికలో వచ్చిన వార్త, ఇప్పుడు హాట్ టాపిక్ అయ్యింది. ప్రయాణ, ప్రకటన, వసతి, స్టేషనరీ ఖర్చులు, జీతభత్యాల చెల్లింపు తదితరాల్లో నిబంధనల మేరకే నిధులు ఖర్చు చేశారని ఆ నివేదికలో ఇచ్చారు. అయితే ఇప్పుడు ఈ నివేదిక రావటంతో, ఈ కేసు మొత్తంలోనే ట్విస్ట్ వచ్చిందని చెప్పొచ్చు. ఈ నివేదిక ప్రకారం, ప్రభుత్వ ఆరోపిస్తున్నట్టు, కృష్ణ కిషోర్ ఎలాంటి అవకతవకలకు పాల్పడలేదు అనే విషయం అర్ధమవుతుంది. మరి ఈ విషయం పై, ప్రభుత్వం ఎలా స్పందిస్తుందో చూడాలి.

విజిలెన్స్ కమిషన్ కార్యాల యాన్ని కర్నూలుకు తరలించడంపై అభ్యంతరం వ్యక్తం చేస్తూ చీఫ్ సెక్రటరి నీలం సాహ్నిని కలిసి విజ్ఞప్తి చేశామని సెక్రెటరియేట్ ఎంప్లాయిస్ అసోసియేషన్ ప్రెసిడెంట్ వెంకట్రామిరెడ్డి తెలిపారు. బుధవారం సచివాలయంలో వెంకట్రామిరెడ్డి మీడియాతో మాట్లాడుతూ విలిలెన్స్ కమీషన్ 'క్వాజీ జుడీషయరీ' అయినా అందులో పనిచేసే సిబ్బంది సెక్రెటరియేట్ ఉద్యోగులు కాబట్టి ఎక్కడ సెక్రెటరియేట్ ఉంటే అందులోనే విజిలెన్స్ కమీషనర్, ఆఫ్ ఎక్వెరీస్ కార్యాలయాలు ఉంచాలని సీఎస్ నీలం సాహ్నిని కోరామని తెలిపారు. ఇందులో పనిచేసే సిబ్బంది అందరూ సెక్రెటరియేట్ ఉద్యోగులేనని, డిపార్ట్మెంట్ ట్రాన్స్ ఫర్స్ అయినా, ప్రమోషన్లు వచ్చినా సెక్రటరియేట్ శాఖల్లోనే వస్తాయన్న విషయాన్ని కూడా సీఎస్ దృష్టికి తీసుకవెళామని తెలిపారు. కర్నూలులో న్యాయ రాజధాని ఏర్పాటులో భాగంగా విజిలెన్స్ కమీషనర్, కమీషనర్ ఆఫ్ ఎక్వరీస్ కార్యాలయాలు కర్నూలుకు మారుస్తూ జీవో ఇచ్చామని, మీ విజ్ఞప్తిని పరిశీలిస్తామని సిఎస్ హామీ ఇచ్చారని తెలిపారు.

కర్నూలుకు విజిలెన్స్ కమీసనర్, కమీషనర్ ఆఫ్ ఎక్వెరీస్ కార్యాలయాలు తరలించడంపై కోర్టులో ఉన్న వాజ్యంతో తమకు సంబంధం లేదని స్పష్టం చేశారు. సెక్రెటరియేట్ లోనే ఈ కార్యాలయాలు ఉంచాలని తాము కోరుతున్నామని తెలిపారు. సెక్రెటరియేట్ ఎక్కడికి మార్చినా అభ్యంతరం లేదని.. ప్రభుత్వం ఎక్కడ నిర్ణయిస్తే అక్కడికి వెళ్లి పనిచేస్తామని స్పష్టం చేశారు. విశాఖపట్నంకు మార్చితే అక్కడికి వెళ్లి పనిచేస్తామని తెలిపారు. సెక్రెటరియేట్ విశాఖకు మార్చడం వల్ల కొన్ని ఇబ్బందులు ఉద్యోగులకు అలాంటి ఇబ్బందులు మామూలే అన్నారు. హైదరాబాద్ నుండి మార్చినప్పుడు కూడా కొన్ని ఇబ్బందులు ఉద్యోగులు ఎదుర్కొన్నారని గుర్తు చేశారు. ఇప్పుడు కూడా వైజాగ్ వెళ్ళటానికి, మేము సిద్ధం అని అన్నారు.

అయితే ఈ ప్రకటన పై, విమర్శలు వస్తున్నాయి. ఒక పక్క వైజాగ్ కు వెళ్ళటానికి మాకు ఏమి ఇబ్బంది లేదని, ఎక్కడికైనా ప్రభుత్వం వెళ్ళమంటే వెళ్తాం అని, హైదరాబాద్ నుంచి అమరావతి వచ్చినప్పుడు ఎన్నో ఇబ్బందులు ఎదుర్కున్నాం అని చెప్తున్న వెంకట్రామిరెడ్డి, కర్నూల్ వెళ్ళటానికి వచ్చిన ఇబ్బంది ఏమిటి అనే ప్రశ్నలు వస్తున్నాయి ? ప్రభుత్వం చెప్తే ఎక్కడికైనా వెళ్తాం అని చెప్తూ, సచివాయలం ఎక్కడ ఉంటే, మేము అక్కడే ఉంటాం అని ఎందుకు చెప్తున్నారు ? ప్రభుత్వం ఎక్కడికి వెళ్ళమంటే, అక్కడికి వెళ్తాం అంటారు, కాని కర్నూల్ కి వెళ్ళమంటే మాత్రం, అమ్మో అంటున్నారు. వారి దాక వస్తే కాని నొప్పి తెలియదా అని కొంత మంది సచివాలయ ఉద్యోగులు గుసగుసలాడుతున్నారు.

మాజీ ఎంపీ ఉండవల్లి అరుణ్ కుమార్, వైఎస్ఆర్ తో ఎంతో సన్నిహితంగా ఉండే వారు. ఆ తరువాత, జగన్ మోహన్ రెడ్డిని ప్రతి విషయంలో వెనకేసుకుని వచ్చే వారు. జగన్ మోహన్ రెడ్డిని సియం కుర్చీ ఎక్కించటంలో ఆయన కూడా, ఆయనకు తోచిన సహయం చేసారనే చెప్పాలి. ప్రతి విషయంలో చంద్రబాబుని విమర్శిస్తూ, జగన్ ని వెనకేసుని వచ్చేవారు. ఇప్పుడు కూడా, జగన్ సియం అయిన తరువాత, అనేక విషయాల్లో అన్ని వైపుల నుంచి విమర్శలు వస్తున్నా, ఉండవల్లి మాత్రం స్పందించలేదు అనే విమర్శలు వచ్చాయి. చివరకు రాష్ట్రానికి ఎంతో ముఖ్యమైన రాజధాని విషయంలో కూడా, మూడు ముక్కలు చెయ్యటం పై స్పందించలేదు. అయితే, ఉండవల్లి ఎట్టకేలకు ఈ విషయం పై స్పందించారు. ప్రతి విషయంలో జగన్ ను వెనకేసుకుని వచ్చే ఉండవల్లి, ఈ విషయంలో మాత్రం భిన్నంగా స్పందించింది, వైసీపీకి షాక్ ఇచ్చారు. ఆంధ్రప్రదేశ్ రాజధాని విషయమై ఎంతో కన్ఫ్యూజన్ ఏర్పడిందని, ఉండవల్లి అన్నారు.

ఒక ప్రభుత్వం చేసుకున్న ఒప్పందం, ప్రభుత్వం మారి తర్వాత అధికారంలోకి వచ్చిన ఇంకో ప్రభుత్వం రద్దు చేస్తే, ఇక ఆ రాష్ట్రం మీద ఎవరికైనా నమ్మకం ఉంటుందా అని ప్రశ్నించారు. ఇక ఈ రాష్ట్రంలో ఎవరైనా ఏ పని చెయ్యటానికి అయినా ఎందుకు వస్తారు అని ఉండవల్లి ప్రశ్నించారు. మూడు రాజధానుల విషయం పై, ఏమి చెప్పలేక పోతున్నాని అన్నారు. అసెంబ్లీ ఒక చోట, సచివాలయం మరోచోట అనే కాన్సెప్ట్ మన దేశంలో ఎక్కడా లేవని, ఎప్పుడూ చూడలేదని ఉండవల్లి అన్నారు. జగన్ మోహన్ రెడ్డి, రాజధాని మీద ఫోకస్ పెట్టి, ముందుకు వెళ్తాం కంటే, పోలవరం, ప్రత్యేక హోదాకు ప్రాధాన్యం ఇవ్వాలని, వాటి వల్ల రాష్ట్రానికి మేలని ఉండవల్లి వ్యాఖ్యానించారు. జగన్ ఆ విధంగా ముందుకు వెళ్లాలని అన్నారు.

రాజధాని అనేది రాష్ట్ర పరిధిలో ఉండే విషయం అని కేంద్రం చెప్పింది అని, మళ్ళీ అదే కేంద్రం 2015లోనే అప్పటి ఏపీ ప్రభుత్వం అమరావతిని రాజధానిగా నోటిఫై చేసిందని కూడా కేంద్రమే చెప్పిందని, ఇలాంటి గందరగోళ పరిణామం గతంలో ఎప్పుడూ చూడలేదని ఉండవల్లి అన్నారు. జగన్ మోహన్ రెడ్డి కూడా విశాఖపట్నం ను హైదరాబద్ లా చేస్తాను అంటున్నారని, మళ్ళీ అవే తప్పులు ఎందుకని, మనకు మరో హైదరాబాద్ వద్దు అని, అభివృద్ధి వికేంద్రీకరణ కావాలని ఉండవల్లి అన్నారు. ఇక పోలవరం పై మాట్లాడుతూ, పోలవరం పనులు నత్తనడకన సాగుతున్నాయని ఉండవల్లి అన్నారు. ఇక పవన్ కళ్యాణ్ పై మాట్లాడుతూ, ఆయన సినిమాల్లో నటించడంలో తప్పు లేదని, గతంలో తాను కూడా ఆయన్ను సినిమాలు చేసుకోమని సలహా ఇచ్చానని అన్నారు.