news

ఒకరికి నష్టం, మరొకరి లాభం అంటారు పెద్దలు. ఆంధ్రప్రదేశ్, తెలంగాణా విషయంలో అదే జరుగుతుంది. జగన్ మోహన్ రెడ్డి గారి ప్రభుత్వం వచ్చిన తరువాత, ఈ ఆరు నెలల్లో ఒక్క పరిశ్రమ కూడా రాలేదు. కాని, ఈ ఆరు నెలల్లో, గతంలో చంద్రబాబు హయంలో పెట్టుబడులు పెట్టటానికి వచ్చిన వాళ్ళు మాత్రం, వెళ్ళిపోతున్నారు. ఆ వెళ్ళిపోయిన వారు, మనల్ని వెక్కిరుస్తూ, ఈ పక్కనే, పక్క రాష్ట్రాల్లో పెట్టుబడులు పెడుతూ, ఉద్యోగాలు, ఆదాయం పెంచుకుంటున్నారు. ఇప్పటికే కియా అనుబంధ సంస్థలు చెన్నై వెళ్ళిపోయాయి. ఇక అదానీ డేటా సెంటర్, ఉంటుందో ఉండదో తెలియని పరిస్థితి, దీంతో వాళ్ళు తెలంగాణా వెళ్ళిపోయారు. ఇక సింగపూర్ కు చెందిన కంపెనీలు కూడా తెలంగాణా వెళ్ళిపోయాయి. రిలయన్స్ జియో కూడా, వేల్లిపోటానికి సిద్ధంగా ఉంది. ఇక ప్రకాశంలో పెట్టే పేపర్ మిల్ కూడా అడ్రెస్ లేదు. ఇప్పుడు ఈ జాబితాలో ‘లూలూ’ గ్రూప్ కూడా చేరింది. వీళ్ళు కూడా ఇప్పుడు తెలంగాణా వెళ్ళిపోయి, అక్కడ పెట్టుబడి పెడుతున్నారు.

దుబాయ్‌కు చెందిన ప్రముఖ వాణిజ్య సంస్థ ‘లూలూ’ గ్రూప్ ఆంధ్రప్రదేశ్‌లోని వైజాగ్ లో పెట్టుబడుల పెట్టేందుకు, గత ప్రభుత్వ హయాంలో, చంద్రబాబు సమక్షంలో ఒప్పందం చేసుకున్నారు. విశాఖపట్నంలో అంతర్జాతీయ కన్వెన్షన్ సెంటర్, షాపింగ్ మాల్, ఫైవ్‌స్టార్ హోటల్ నిర్మాణం కోసం ఆ సంస్థ ముందుకు వచ్చింది. మొత్తంగా, రూ.2,200 కోట్ల పెట్టుబడులతో, 7 వేల మందికి ఉద్యోగాలు ఇచ్చే లక్ష్యంలో, ఒప్పందం జరిగింది. అయితే ప్రభుత్వం మారిన వెంటనే, జగన్ మోహన్ రెడ్డి అధికారంలోకి రాగానే, అప్పట్లో చంద్రబాబు కంపెనీలతో కుదుర్చుకున్న ఒప్పందాలు, ఇచ్చిన భూములు సమీక్షించి, కొన్ని కంపెనీల ఒప్పందాలు రద్దు చేసారు. అందులో ఒకటి దుబాయ్‌కు చెందిన కంపెనీ ‘లూలూ’ గ్రూప్

వారికి వైజాగ్ లో కేటాయించిన భూమి రద్దు చేసారు. దీంతో ‘లూలూ’ గ్రూప్ ఒక ఘాటు లేఖ రాసిన సంగతి తెలిసిందే. మేము ఇండియాలో ఎక్కడైనా పెట్టుబడులు పెడతాం కాని, ఆంధ్రప్రదేశ్ లో మాత్రం పెట్టం అంటూ, ఒక బహిరంగ లేఖ కూడా రిలీజ్ చేసారు అంటే, వాళ్ళు ఎంత ఆందోళన చెందారో అర్ధం అవుతుంది. అయితే, ఇప్పుడు ‘లూలూ’ గ్రూప్ కంపెనీ, అనూహ్యంగా తెలంగాణాలో పెట్టుబడులు పెడుతుంది. నిన్న తెలంగాణ ముఖ్యమంత్రి కేసీఆర్ అధ్యక్షతన జరిగిన కేబినెట్ సమావేశంలో లూలూ గ్రూప్ కు హైదరాబాద్ శివార్లలో 290 ఎకరాలు కేటాయించాలని నిర్ణయించారు. ఈ సంస్థ తెలంగాణాలో 2500 కోట్ల పెట్టుబడి పెడుతుండడం విశేషం. అయితే ఆంధ్రప్రదేశ్ కు రావలసిన కంపెనీ, తెలంగాణాకు వెళ్ళిపోవటంతో, ఆంధ్రప్రదేశ్ ప్రజలు బాధ పడుతున్నారు. మనల్ని హేళన చేసిన తెలంగాణా పెద్దలు, మన పతనాన్ని ఎంజాయ్ చేస్తున్నారని, ప్రజలు అనుకుంటున్నారు.

వైసీపీ నరసాపురం ఎంపీ రఘురామ కృష్ణంరాజు నిన్న ఢిల్లీలో ఇచ్చిన విందు హాట్ టాపిక్ అయ్యింది. వైసీపీ ఎంపీ హోదాలో కాకుండా, సబార్డినేట్‌ లెజిస్లేచర్‌ కమిటీ అధ్యక్షుడి హోదాలో ఆయన నిన్న ఢిల్లీలో ఎంపీలకు విందు ఇచ్చారు. జనపథ్‌, లాన్స్‌ ఆఫ్‌ వెస్టర్న్‌ కోర్టులోని కాంగ్రెస్ ఎంపీ, తన వియ్యకుండు అయిన కేవీపీ ఇంట్లో ఈ విందు ఇచ్చారు. ఈ విందుకు 300 పైగా ఎంపీలు హాజరు అయ్యారు. అయితే ఈ విందుకు కొంత మంది వైసీపీ ఎంపీలు హాజరు అయినా, ఢిల్లీలోనే ఉన్న విజయసాయి రెడ్డి మాత్రం హాజరు కాకపోవటం గమనార్హం. ఈ విందుకు రక్షణ మంత్రి రాజ్‌నాథ్ సింగ్, కాంగ్రెస్ లోక్ సభా పక్ష నేత అధిర్ రంజన్ చౌదరి సహా మరి కొంత మంది హాజరు అయ్యారు. అయితే ఈ విందుకు తెలుగుదేశం పార్టీ ఎమ్మెల్యే గంటా శ్రీనివాస్ రావు హాజరు కావటం గమనార్హం. విందుకు హాజరైన ఎంపీలనురఘురామ కృష్ణంరాజు ఆత్మీయంగా ఆహ్వానించారు. తెలుగు వంటలు రుచి చూపించి, గోదావరి జిల్లాల ఆతిధ్యం రుచి చూపించారు.

పార్లమెంట్ శీతాకాల సమావేశాల సందర్భంగా గతంలో చాలా మంది ఎంపీలు ఇలా పార్టీ ఇచ్చేవారని, ఈ శీతాకాల సమావేశాల ముగింపు సందర్భంగా తాను పార్టీ ఇవ్వాలని నిర్ణయించుకున్నానని, అందుకే సబార్డినేట్ కమిటీ చైర్మన్‌గా ఎన్నిక కావడం తో ఈ విందు ఇచ్చానని చెప్పుకొచ్చారు. అయితే ఢిల్లీలో ఎంపీలు, కేంద్ర మంత్రులకు ఇచ్చిన విందు పై తాను ఎవరికీ వివరణ ఇచ్చుకోవాల్సిన అవసరం లేదు అంటూ సంచలన వ్యాఖ్యలు చేశారు. తాను ముందు ఎంపీని అని, తాను ఎన్నో పార్టీలకు హాజరవుతుంటానని, దానికి ఎవరి పర్మిషనూ తీసుకుని వెళ్లలేదని, ఇప్పుడు నేను ఇచ్చిన పార్టీ గురించి ఎవరి అనుమతి తీసుకోవాల్సిన అవసరం లేదు అంటూ సంచలన వ్యాఖ్యలు చెయ్యటం హాట్ టాపిక్ గా మారింది.

పెద్ద ఆపేద్ద నేతలతో సఖ్యత పెంచుకోవాలంటే వారిని సీక్రెట్‌గా పిలిపించి పార్టీ ఇచ్చే వాడిని అని, ఇలా అందరికీ తెలిసేలా ఎందుకు చేస్తానని ప్రశ్నించారు. అంతే కాదు, తనకు, జగన్ కు మధ్య గ్యాప్ పెంచే విషయంలో, తమ పార్టీకి చెందిన ఒకరిద్దరు ఎంపీలు ప్రయత్నిస్తున్నారని, దాని గురించి తనకు పూర్తీ సమాచారం ఉంది అంటూ మరో బాంబు పేల్చారు. తన పై, తమ పార్టీ అధినేతకు ఉన్నవీ లేనివీ కల్పించి, వాళ్ళు చెబుతున్నారని ఆరోపించారు. అయితే ఈ వ్యాఖ్యలు విజయసాయి రెడ్డిని ఉద్దేశించి చేసినవా అనే అనుమానాలు కలుగుతున్నాయి. రఘురామ కృష్ణంరాజుకి, విజయసాయి రెడ్డికి చాలా గ్యాప్ పెరిగింది అని, అందుకే ఒకరి పై ఒకరి ఆధిపత్యం చూపించుకుంటున్నారు అనే వాదనలు కూడా వినిపిస్తున్నాయి.

ఆంధ్రప్రదేశ్ అసెంబ్లీలో ఈ రోజు, ఇంగ్లీష్ మీడియం పై, చర్చ జరిగింది. ఈ సందర్భంగా, జగన్ మోహన్ రెడ్డి, చంద్రబాబు నాయుడు మధ్య మాటల యుద్ధం నడించింది. చంద్రబాబు మాట్లాడుతూ, మేము ఇంగ్లీష్ మీడియంకు వ్యతిరేకం అని ప్రచారం చేస్తున్నారని, మేము ఇంగ్లీష్ మీడియంతో పాటుగా, తెలుగు మీడియం కూడా ఉండాలని చెప్పామని, రెండు ఆప్షన్స్ ఇస్తే, ఎవరికి కావాల్సింది వాళ్ళు, తీసుకుంటారని చెప్పమని అన్నారు. గతంలో మేము కూడా ఇంగ్లీష్ మీడియం ప్రవేశ పెట్టిన విషయన్ని గుర్తు పెట్టుకోవాలని, అన్నారు. కాని మేము తెలుగు మీడియం ఆప్షన్ గా ఇచ్చి, ఎవరికి కావల్సింది వారికి ఎంచుకునే స్వెఛ్ ఇచ్చామని అన్నారు. అయితే ఆ సమయంలో తమ పై ఒంటి కాలుతో, అప్పటి ప్రతిపక్ష నేత జగన్ లెగిసిన విషయాన్ని వారు గుర్తు చేసారు. వైసీపీ నేతలు కాని, యార్లగడ్డ లాంటి వారు కాను, తమ పై ఎగబడ్డారని చెప్పారు. అలాగే జగన్ మోహన్ రెడ్డికి చెందిన సాక్షి పేపర్ లో ఇష్టం వచ్చినట్టు రాసారని చెప్పారు.

ఈ సందర్భంగా, చంద్రబాబు సాక్షిలో కధనాలు చదివి వినిపించే ప్రయత్నం చేసారు. మాతృ భాషకు మంగళం అంటూ కధనాలు రాసారని, ఇప్పుడు ఇలా మాట మారుస్తున్నారని అన్నారు. ఇప్పుడు మీ పిల్లలు ఎక్కడ చదువుతున్నారు అని అడుగుతున్నారు, మరి 2017లో మీ పిల్లలు ఎక్కడ చదివారని చంద్రబాబు ప్రశ్నించారు. తెలుగు భాషను కూడా పెట్టండి అని మేము అడుగుతుంటే, మీకు ఎంత మంది భార్యలు అంటూ ఎదురు దాడి చేస్తున్నారాని అన్నారు. సాక్షిలో అప్పుడు నారయణ కోసం ఇంగ్లీష్ మీడియం స్కూల్స్ అంటూ చెప్పుకోచ్చారని, మరి ఇప్పుడు ఎందుకు మాట మారుస్తున్నారని అన్నారు. ద్వంద్వ ప్రమాణాలు పాటిస్తుంది, మీరు, అప్పుడు ఒక రకంగా, ఇప్పుడు ఒక రకంగా మాట్లాడింది మీరు అంటూ, విరుచుకు పడ్డారు.

అయితే ఈ సమయంలో పదే పదే సాక్షి ప్రస్తావన తీసుకురావటంతో జగన్ అసహనానికి లోనయ్యారు. సాక్షి రాస్తే దానికి నాకు ఏంటి, నేను ఎక్కడైనా చెప్పానా చెప్పండి అంటూ ఛాలెంజ్ చేసారు. చంద్రబాబుకి సిగ్గు లేదు అంటూ, ఏమి ఏమి ఏమి, కళ్ళు పెద్దవి చేస్తే భయపడటం అనుకున్నావా, కూర్చో కూర్చో అంటూ, ఊగిపోయారు. సాక్షి ఏదో రాస్తే నాకెందుకు, మీ ఈనాడు రాస్తే మీరు బాధ్యత వహిస్తారా అంటూ ప్రశ్నించారు. దీనికి చంద్రబాబు సమాధానం ఇస్తూ, సాక్షి మీ అవినీతి పత్రిక, మీరు అవినీతి డబ్బులతో పెట్టారు, కాని ఈనాడు, మేము రాజకీయల్లోకి రాక ముందే ఉంది, టిడిపి పెట్టక ముందే ఉంది, మీ అవినీతి పత్రిక గురించి అడుగుతుంటే ఎందుకు అంట కోపం ? అంటే ఇందులో రాసేది అంతా చెత్త, ఇది ఒక చెత్త పేపర్ అని ఒప్పుకుంటారా ? అంటూ చంద్రబాబు ప్రశ్నించారు.