news

షార్‌పై ఉగ్రవాదులు గురి పెట్టారని కేంద్ర నిఘా వర్గాల హెచ్చరికలు జారీ చేస్తున్నాయి. బంగ్లాదేశ్ ఉగ్రవాదుల దాడులకు సిద్ధమవుతున్నారని నిఘా వర్గాల సమాచారం. షార్‌పై దాడులకు బంగ్లాదేశ్‌ ఉగ్రవాదుల వ్యూహ రచన చేస్తున్నట్టు తెలుస్తోంది. ఈ నేపథ్యంలో ఐబీ ఐజీ అమితాబ్‌ రంజన్‌ హుటాహుటిన షార్‌ను సందర్శించారు. షార్‌ పరిసరాల్లో పటిష్టమైన భద్రత ఏర్పాట్లు చేయాలని సూచించారు. కేంద్ర ఇంటెలిజెన్స్‌ అడిషనల్‌ డీజీ అమితాబ్‌ రంజన్‌ ఆధ్వర్యాన ఉదయం నుంచి సాయంత్రం వరకు జరిగిందీ సమావేశం. శ్రీహరికోట రాకెట్‌ కేంద్రం అత్యంత సున్నితమైన ప్రాంతమని, దీనికి భద్రత పరంగా మరిన్ని చర్యలు తీసుకోవాల్సి ఉందని అధికారులు నిర్ణయించారు. ఉగ్రవాదుల నుంచి ముప్పు అవకాశం ఉందని.. దీనిని దృష్టిలో ఉంచుకుని భద్రతను అప్రమత్తం చేయాల్సి ఉందని అవగాహనకు వచ్చినట్లు సమాచారం. సమావేశంలో కేంద్ర ఇంటెలిజెన్స్‌ అధికారులతోపాటు, జిల్లా ఎస్పీ ఐశ్వర్య రస్తోగి, షార్‌ సంచాలకులు పాండ్యన్‌, నియంత్రణాధికారి జేవీ రాజారెడ్డి తదితరులు పాల్గొన్నారు.

శ్రీలంకలో నెలరోజుల క్రితం జరిగిన ఆత్మాహుతి దాడులు మరువక ముందే, కొద్ది రోజుల క్రితం నెల్లూరు తీరప్రాంతానికి శ్రీలంక బోటు కొట్టుకువచ్చిన ఘటన కలకలం రేపుతోంది. నెల్లూరు జిల్లా విడవలూరు మండలం పొన్నపూడి పాతూరు గ్రామంలోని సముద్రంలో ఈ పడవ మే18న కొట్టుకువచ్చింది.శ్రీలంక నుంచి ఈ బోటు కొట్టుకు రావడం పలు అనుమానాలు తావిస్తోంది. ఇందులో ఉగ్రవాదులు ఏమైనా వచ్చారా అనే కోణంలో కూడా పోలీసులు విచారణ చేస్తున్నారు. శ్రీలంక నుంచి నెల్లూరు వరకు రావాలంటే తమిళనాడు దాటుకుని రావాలని అలాంటప్పుడు తమిళనాడు తీరప్రాంతంలో భద్రతా సిబ్బంది ఎందుకు గుర్తించలేకపోయారనే అనుమానాలు వ్యక్తమవుతున్నాయి. నెల్లూరు తీరంలో ఈ బోటును మత్స్యకారులు గుర్తించి స్థానిక పోలీసులకు ఫిర్యాదు చేశారు. అయితే ఖాళీగా ఉన్న బోటును వారే ఒడ్డుకు చేర్చారు. బోటుపై రాసి ఉన్న అక్షరాల ఆధారంగా ఇది శ్రీలంకకు చెందిన బోటు అని తేల్చేశారు అధికారులు. అయితే ఇందులో ఉగ్రవాదులు వచ్చారా అనే కోణంలో దర్యాప్తు చేస్తున్నారు. ఇప్పటికే నెల్లూరు తీరప్రాంతం, అటవీ ప్రాంతంలో ఆక్టోపస్ దళాలు జల్లెడ పడుతున్నాయి. ఇక మెరైన్ పోలీసులు కూడా గస్తీని ముమ్మరం చేశారు. ఇప్పటికే షార్, కృష్ణపట్నం పోర్టు ఇతర తీరప్రాంతాల్లో హైఅలర్ట్ ప్రకటించారు పోలీసులు.

జగన్ సర్కారుపై తెలుగుదేశం పార్టీ వ్యూహం మార్చుకుంది. తొలుత కొత్త ప్రభుత్వానికి 6 నెలలు గడువు ఇవ్వాలని ఆ పార్టీ భావించింది. అయితే టీడీపీ కార్యకర్తలపై వైసీపీ దాడులు చేస్తుండడంతో సర్కారుపై తక్షణమే పోరాటం చేయాలని నిర్ణయించింది. ఇవ్వాల్టి నుంచి ప్రారంభమయ్యే అసెంబ్లీ సమావేశాల్లో దాడులను ప్రస్తావించి వైసీపీ తీరును ఎండగట్టాలని డిసైడయింది. సంఖ్యాబలం తక్కువగా ఉన్నా.. ప్రజల సమస్యలపై సభలో పోరాటం చేయాలని టీడీపీ నేతలకు సూచించారు అధినేత చంద్రబాబు. నేటి నుంచి అసెంబ్లీ సమావేశాలు ప్రారంభమవుతుండడంతో ఎలా ముందుకు వెళ్లాలి అన్నదానిపై ఎమ్మెల్యేలు, ఎమ్మెల్సీలతో ఆయన భేటీ అయ్యారు. శాసనసభలో తమకు 23మంది సభ్యులు ఉన్నా ప్రభుత్వాన్ని నిలదీయడంలో అందరూ ముందు ఉండాలని పిలుపు ఇచ్చారు. మండలిలో 35మంది సభ్యుల బలం ఉన్నందున అక్కడ మరింత క్రీయాశీలకంగా వ్యవహరించాలని దిశానిర్దేశం చేశారు.

ఉభయసభల్లోనూ పార్టీ సభ్యులకు పదవులను ఖరారు చేశారు చంద్రబాబు. శాసనసభలో టీడీపీ పక్షనేతగా చంద్రబాబే వ్యవహరించనుండగా.. ఉపనేతలుగా అచ్చెన్నాయుడు, గోరంట్ల బుచ్చయ్య చౌదరి, నిమ్మల రామానాయుడును నియమించారు. విప్‌గా వీరాంజనేయ స్వామి ఉంటారు. శాసన మండలిలో పార్టీ పక్ష నేతగా యనమల రామకృష్ణుడు, ఉప నేతలుగా డొక్కా మాణిక్యవర ప్రసాద్, సంధ్యారాణి, గౌరువాని శ్రీనివాసును నియమించారు. మండలి విప్ గా బుద్దా వెంకన్నను ఎంపిక చేశారు. టీడీపీ శాసనసభాపక్ష కోశాధికారిగా మద్దాలి గిరి కొనసాగుతారు. ప్రస్తుత శాసనసభా సమావేశాల్లో వివిధ అంశాలు చర్చకు రానప్పటికీ గవర్నర్ ప్రసంగంపై ధన్యవాదాలు తెలిపే తీర్మానంపై మాట్లాడే అవకాశం వస్తుంది. అప్పుడు ప్రస్తావించాల్సిన అంశాలను చంద్రబాబు నేతలతో చర్చించారు. తమ ప్రభుత్వం ప్రవేశపెట్టిన అన్నదాత సుఖీభవ పథకం కింద రైతులకు ఇవ్వాల్సిన 15 వేల రూపాయల పెట్టుబడి సాయాన్ని రద్దు చేసి 12,250 మాత్రమే ఇవ్వడంపై అభ్యంతరాలు లేవలెత్తనున్నారు.

గత 15 రోజులుగా టీడీపీ నేతలపై వైసీపీ చేస్తున్న దాడుల అంశాన్ని సభలో ప్రస్తావించి శాంతి భద్రతల పరిరక్షణ బాధ్యతను కొత్త ప్రభుత్వానికి గుర్తు చేయాలని తెలుగుదేశం భావిస్తోంది. అలాగే తమ పార్టీ నాయకులపై అవినీతి బురద జల్లితే సమర్ధంగా తిప్పి కొట్టాలని డిసైడయింది. తప్పుడు కేసులు బనాయించినా, అవమానాలకు గురిచేసినా, వాటన్నింటిని ఎదుర్కోవాలని చంద్రబాబు నేతలకు దిశానిర్దేశం చేశారు. ఏ తప్పు చేయనప్పుడు భయపడాల్సిన పనిలేదని ఆయన స్పష్టం చేశారు. సహేతుకంగా నిర్మాణత్మక విమర్శలతో ప్రభుత్వాన్ని ఇరుకున పెట్టాటలన్నారు. . ఎమ్మెల్యేలు, ఎమ్మెల్సీలు సమన్వంతో పనిచేయాలని హితబోధ చేశారు. అసెంబ్లీ సమావేశాలు ఇవ్వాలే ప్రారంభం కానుండడంతో టీడీపీ ఎమ్మెల్యేలు పసుపు చొక్కాలతో హాజరు కానున్నారు. ఉదయం అధినేత చంద్రబాబు నివాసానికి చేరుకొని, అక్కడి నుంచి వెంకటపాలెం వెళ్లి ఎన్టీఆర్ విగ్రహానికి నివాళులు అర్పించి అసెంబ్లీకి వెళ్తారు.

ప్రభుత్వ విప్ పదవిని పార్థసారథి తిరస్కరించారు. దీంతో మరొకరికి అవకాశం ఇచ్చారు. అయితే పదవి ఎందుకు తిరస్కరించారో తెలియాల్సి ఉంది. డిప్యూటీ సియం పదవి ఇస్తున్నారు అంటూ, హడావిడి చేసి, చివరికు ఏ మంత్రి పదవి ఇవ్వకుండా, విప్ పదవి ఇచ్చినందుకు అసంతృప్తి చెందారా అనేది తెలియాల్సి ఉంది. పార్ధసారధి విప్ పదవి తిరస్కరించటంతో, కొత్తగా మరో ముగ్గురికి విప్‌ పదవులు వరించాయి. ప్రభుత్వ చీఫ్‌ విప్‌గా శ్రీకాంత్‌రెడ్డి నియమితులయ్యారు. విప్‌లుగా బుడి ముత్యాలనాయుడు, దాడిశెట్టి రాజా, చెవిరెడ్డి భాస్కర్‌రెడ్డి, సామినేని ఉదయభాను, కాపు రామచంద్రారెడ్డి, కోరుముట్ల శ్రీనివాసులు, పిన్నెళ్లి రామకృష్ణారెడ్డిని నియమించారు. మరికాసేపట్లో ఏపీ అసెంబ్లీ సమావేశాలు ప్రారంభంకానున్నాయి. ఐదురోజుల పాటు జరగనున్న ఈ సమావేశాల కోసం ప్రభుత్వం పూర్తి ఏర్పాట్లు చేసింది. 11 గంటలకు సమావేశాలు ప్రారంభం కానుండగా... మొదటిసారిగా సీఎం హోదాలో జగన్ అసెంబ్లీలోకి అడుగుపెడుతున్నారు. సభలో సీఎం జగన్, ఆ తర్వాత ప్రధాన ప్రతిపక్ష నేత చంద్రబాబు, అనంతరం శాసన సభ్యులతో ప్రొటెం స్పీకర్ శంబంగి చినవెంకట అప్పలనాయుడు ప్రమాణ స్వీకారం చేయిస్తారు.

అసెంబ్లీ సమావేశాల నేపథ్యంలో ప్రభుత్వం మంత్రులు, ప్రతిపక్ష నేత చంద్రబాబుకు కార్యాలయాలు కేటాయించింది. గతంలో డిప్యూటీ స్పీకర్‌ మండలి బుద్ధప్రసాద్‌కు ఇచ్చిన చాంబర్‌ను చంద్రబాబుకి కేటాయించగా, లోకేష్‌ కార్యాలయాన్ని టీడీపీ శాసనసభాపక్ష కార్యాలయానికి కేటాయించారు. గత సభలో వైసీపీ శాసనసభాపక్ష కార్యాలయం, తెలుగుదేశం శాసనసభ పక్ష కార్యాలయం, ప్రతిపక్ష నేత హోదాలో జగన్‌కు కేటాయించిన చాంబర్లను వైసీపీ తీసుకుంది. గురువారం స్పీకర్‌గా తమ్మినేని సీతారాంను అధికారికంగా ఎన్నుకొనున్నారు శాసన సభ సభ్యులు. ఈ నెల 14న ఉభయ సభలనుద్దేశించి గవర్నర్ నరసింహన్ ప్రసంగించనున్నారు.ఈ నెల 15,16 తేదీల్లో సభకు సెలవు ప్రకటిస్తారు. 17,18 న అసెంబ్లీ. సెషన్స్ నిర్వహించి ఈ నెల 18 తో ముగించనున్నారు.