news

ఆంధ్రప్రదేశ్ ఎన్నికల్లో టీడీపీ పరాజయం పాలైన సంగతి తెలిసిందే. టీడీపీ తరఫున కేవలం 23 మంది ఎమ్మెల్యేలు, ముగ్గురు ఎంపీలు మాత్రమే గెలిచారు. అయితే టీడీపీ తరఫున గెలిచిన, ఓడిన కొందరు కీలకనేతలు బీజేపీ తీర్థం పుచ్చుకుంటారని పెద్ద ఎత్తున వార్తలు వస్తున్న సంగతి తెలిసిందే. ముఖ్యంగా టీడీపీ రాజ్యసభ సభ్యుడు సీఎం రమేష్ బీజేపీ కండువా కప్పుకుంటారని పుకార్లు వస్తున్న విషయం విదితమే. అయితే తాజాగా.. ఈ వ్యవహారంపై సీఎం రమేష్ రియాక్టయి క్లారిటీ ఇచ్చేశారు. బీజేపీ నేతలెవరూ మమ్మల్ని సంప్రదించలేదని ఆయన స్పష్టం చేశారు. అంతేకాదు బీజేపీలో చేరే ఉద్దేశం తనకు లేదని రమేష్ క్లారిటీ ఇచ్చారు. మీడియాలో వస్తున్న వార్తలన్నీ కేవలం కల్పితాలేనని సీఎం రమేష్‌ పుకార్లకు ఫుల్‌స్టాప్ పెట్టేశారు. మరో పక్క, మాజీ మంత్రి ఆదినారాయణరెడ్డి పై కూడా గత కొద్ది రోజులుగా పార్టీ మారుతున్నట్లు వస్తున్న పుకార్లపై ఆయన మొదటిసారి స్పందించారు. తాను బీజేపీలో చేరుతున్నట్లు వస్తున్న వార్తలు అవాస్తవమని కొట్టిపారేశారు.

టీడీపీలోనే కొనసాగుతానని, మాజీ మంత్రి రామసుబ్బారెడ్డి, తాను కలిసినా... ఓడిపోవడం వెనుక బలమైన కారణాలు ఏవో ఉన్నాయని అనుమానం వ్యక్తం చేశారు. ఇద్దరూ కలిస్తే మనకు ఇబ్బందని కొందరు భావించినట్టున్నారన్నారు. ఈవీఎంలలో సమస్య ఉందని అనుమానిస్తున్నానని, తన నియోజకవర్గంలో ఇందుకు కొన్ని ఆధారాలు లభించాయని తెలిపారు. వైసీపీ మైండ్‌గేమ్‌ ఆడుతోందని, పార్టీని పునఃనిర్మిస్తామని, కార్యకర్తలకు అండగా ఉంటామని ఆదినారాయణరెడ్డి భరోసా ఇచ్చారు. ఇదిలా ఉంటే.. పలువురు టీడీపీ ఎమ్మెల్యేలు, ఎమ్మెల్సీలు, ఎంపీలు మాతో టచ్‌లో ఉన్నారని ముఖ్యమంత్రి వైఎస్ జగన్ మోహన్‌రెడ్డి, వైసీపీ ఎమ్మెల్యేలు గత రెండ్రోజులుగా అసెంబ్లీ సాక్షిగా, మీడియా ముఖంగా చెబుతున్న విషయం విదితమే.

ఆంధ్రప్రదేశ్‌ ప్రధాన ఎన్నికల అధికారి (సీఈవో)గా 1992 బ్యాచ్‌ ఐఏఎస్‌ కె.విజయానంద్‌ నియమితులయ్యారు. ఈ మేరకు భారత ఎన్నికల సంఘం (ఈసీఐ) గురువారం నోటిఫికేషన్‌ జారీ చేసింది. ప్రస్తుత రాష్ట్ర ప్రధాన ఎన్నికల అధికారి గోపాలకృష్ణ ద్వివేదిని బదిలీ చేసింది. రాష్ట్ర ప్రభుత్వంతో సంప్రదించి విజయానంద్‌ నియామకం చేపడుతున్నట్లు ఈసీఐ పేర్కొంది. ఇప్పటివరకూ ఆయన చూస్తున్న శాఖల బాధ్యతలన్నింటినీ తక్షణమే ఇతర అధికారులకు అప్పగించాలని పేర్కొంది. సచివాలయంలోని ఎన్నికల విభాగానికి కార్యదర్శిగా మినహా, విజయానంద్‌కు ఎలాంటి అదనపు బాధ్యతలు అప్పగించరాదని సూచించింది. ఈసీఐ నోటిఫికేషన్‌ను ప్రస్తావిస్తూ ప్రభుత్వ ప్రధాన కార్యదర్శి ఎల్‌వీ సుబ్రమణ్యం గురువారం ఉత్తర్వులు జారీ చేశారు. ఏపీ క్యాడర్‌కు చెందిన విజయానంద్ 1992లో అదిలాబాద్ జిల్లా ఉట్నూరు సబ్ కలెక్టర్‌గా తన ఉద్యోగ జీవితాన్ని ప్రారంభించారు. అయితే ప్రస్తుత సీఈఓ ద్వివేదికి తదుపరి పోస్టింగ్‌ ఎక్కడిస్తున్నారు..? ఏ హోదా కల్పిస్తారన్న విషయంపై ఇంకా స్పష్టత రాలేదు. కాగా ఆంధ్రప్రదేశ్‌ ఎన్నికల ప్రధానాధికారిగా గోపాలకృష్ణ ద్వివేదిని ఈ ఏడాది జనవరిలో ఎన్నికల కమిషన్‌ నియమించింది.

విజయవాడలోని ఏ1 కన్వెన్షన్ సెంటర్ లో ఈరోజు తెలుగుదేశం పార్టీ విస్తృతస్థాయి సమావేశం ప్రారంభమయింది. ఈ కార్యక్రమానికి టీడీపీ అధినేత చంద్రబాబుతో పాటు ఎమ్మెల్యేలు, లోక్ సభ, రాజ్యసభ సభ్యులు, ముఖ్యనేతలు, పార్టీ శ్రేణులు హాజరయ్యాయి. టీడీపీ ప్రభుత్వం చేసిన వైఫల్యాలపై ఆ పార్టీ అధిష్టానం దృష్టి పెట్టింది. తప్పులను గుర్తించిన నేతలు దిద్దుబాటు చర్యలకు ఉపక్రమిస్తున్నారు. చంద్రబాబు అధ్యక్షతన టీడీపీ వర్క్‌షాప్ నిర్వహించింది. ఐదేళ్ల పాలనలో తప్పులపై టీడీపీ వర్క్‌షాప్‌లో నేతలు గళమెత్తారు. పార్టీ పెద్దల తప్పులను నేతలు, ప్రజాప్రతినిధులు ఎత్తి చూపారు. ప్రతి నేత తన మనోగథాన్ని వివరించారు. అంతేకాదు కేంద్రస్థాయి నుంచి గ్రామీణ స్థాయి వరకు జరిగిన పోరపాట్లను కుండబద్దలు కొట్టీ మరీ చెప్పారు. వేల మందితో టీడీపీ అధినేత చంద్రబాబు నిర్వహించిన టెలీకాన్ఫరెన్స్‌లను ఆ పార్టీ నేత అశోక్ గజపతిరాజు తప్పు పట్టారు.

వేల మందితో టెలీకాన్ఫరెన్స్‌ల వల్ల వాస్తవాలు చెప్పే అవకాశం లేకుండా పోయిందని ఆయన ఆందోళన వ్యక్తం చేశారు. పార్టీలో హ్యూమన్ టచ్ పోయిందని మరో నేత జూపూడి ప్రభాకర్ వ్యాఖ్యానించారు. కార్యకర్తలు, నేతలకు చంద్రబాబు బాగా దూరమయ్యారని జూపూడి అన్నారు. రియల్ టైం గవర్నెన్స్ నివేదికలు కొంప ముంచాయని ఎమ్మెల్సీ శ్రీనివాసులు చెప్పుకొచ్చారు. కోడెల కుటుంబం అక్రమాలపై జనం ఎన్నికల సమయంలోనే ప్రస్తావించారని టీడీపీ అధికార ప్రతినిధి దివ్యవాణి తెలిపారు. గ్రామ స్థాయిలో నేతల అవినీతిపై బాబుకు చెప్పే అవకాశమే లేకుండా చేశారని, చంద్రబాబు చుట్టూ చేరిన బృందం వాస్తవాలు తెలియకుండా చేశారని దివ్యవాణీ వాపోయింది. విభేదాలు వీడి కలిసి ముందుకు సాగుదామని అనంతపురం జిల్లా నేతలు అభిప్రాయపడ్డారు. ఇప్పుడు కలిసి ఉండకపోతే మరింత నష్టం జరుగుతుందని అనంత నేతలు ఆందోళన వ్యక్తం చేశారు.

ఈ సందర్భంగా పార్టీ అధినేత చంద్రబాబు పలు కీలక వ్యాఖ్యలు చేశారు. ఏపీ అసెంబ్లీ, సార్వత్రిక ఎన్నికల్లో టీడీపీకి సీట్లు తగ్గినా, ఓట్ల శాతం పెరిగిందని చంద్రబాబు తెలిపారు. ‘37 ఏళ్ల టీడీపీ చరిత్రలో ఐదుసార్లు గెలిచాం.. నాలుగుసార్లు ఓడాం. గెలిచినప్పుడు ఆనందం ఉంటుంది, అలాగే ఓడిపోయినప్పుడు ఆవేదన ఉండటం సహజం’ అని వ్యాఖ్యానించారు. ఏపీ విభజన అనంతరం తీవ్రమైన ఆర్థికలోటు ఉన్నప్పటికీ రాష్ట్రాన్ని అభివృద్ధి పథంలో నడిపామనీ, సంక్షేమానికి అధిక ప్రాధాన్యత ఇచ్చామని చంద్రబాబు గుర్తుచేశారు. ఏపీ అసెంబ్లీ ఎన్నికల్లో, అలాగే లోక్ సభ ఎన్నికల్లో పార్టీ ఓటమికి గల కారణాలపై దృష్టి సారించాలని నేతలకు చంద్రబాబు సూచించారు. అలాగే పార్టీకోసం అహోరాత్రులు కష్టపడిన కార్యకర్తలకు టీడీపీ నేతలు అండగా నిలవాలనీ.. పార్టీ శ్రేణులపై దాడులు జరిగితే వెంటనే ప్రతిస్పందించాలని ఆదేశించారు.