news

ఎన్నికల ఫలితాలు వెలువడడానికి ఒక్క రోజు ముందు కలకలం చెలరేగింది. కర్నూలు జిల్లాలో టీడీపీ నేత శేఖర్ రెడ్డిని బుధవారం ఉదయం దారుణంగా హత్య చేశారు. శేఖర్ రెడ్డి టీడీపీ సీనియర్ నేత, కోట్ల ప్రధాన అనుచరుడు అయిన శేఖర్ రెడ్డి మృతి టీడీపీ శ్రేణులను తీవ్ర దిగ్భ్రాంతికి గురి చేసింది. ఇక టీడీపీ నేత శేఖర్ రెడ్డి మృతిపై ఏపీ మంత్రి నారా లోకేష్ తీవ్రంగా స్పందించారు. ఆంధ్రప్రదేశ్ లో కర్నూలు జిల్లాలో దారుణం చోటుచేసుకుంది. కోట్ల సుజాతమ్మ అనుచరుడు శేఖర్ రెడ్డిని గుర్తుతెలియని దుండగులు దారుణంగా హత్య చేశారు. డోన్ మండలం, చాపలకొత్తూరులో శేఖర్ రెడ్డి బైక్ ను అడ్డగించిన దుండగులు ఆయనపై దాడి చేశారు.

రాడ్లు, కర్రలతో దాడి చేసిన దుండగులు అనంతరం బండరాయితో తలపై మోదారు. దీంతో తీవ్రరక్తస్రావం అయిన శేఖర్ రెడ్డి అక్కడికక్కడే ప్రాణాలు కోల్పోయారు.అనంతరం దుండగులు ఘటనాస్థలం నుంచి పరారయ్యారు. చాపలకొత్తూరు వద్ద శేఖరరెడ్డి మృతదేహాన్ని గుర్తించిన స్థానికులు పోలీసులకు సమాచారం అందించారు. ఘటనాస్థలికి చేరుకున్న పోలీస్ అధికారులు శేఖర్ రెడ్డి భౌతికకాయాన్ని పోస్ట్ మార్టంకు తరలించారు. ఈ హత్యతో కర్నూలు జిల్లాలో ఉద్రిక్త వాతావరణం నెలకొంది. టీడీపీ నాయకులు ఆగ్రహంతో రగిలిపోతున్నారు.

ఇక ఈ ఘటనపై ఏపీ ఐటీ మంత్రి, టీడీపీ నేత నారా లోకేశ్ దిగ్భ్రాంతి వ్యక్తం చేశారు. ఆధునిక సమాజంలో ఇలాంటి ఆటవిక చర్య అమానుషమని మంత్రి నారా లోకేష్ ఆగ్రహం వ్యక్తం చేశారు . ఈ దారుణానికి తెగబడ్డ దోషులను కఠినంగా శిక్షించాలని పోలీసులను కోరారు. శేఖర్ రెడ్డి కుటుంబానికి టీడీపీ అన్నవిధాలుగా అండగా ఉంటుందని లోకేశ్ హామీ ఇచ్చారు. శేఖర్ రెడ్డి కుటుంబానికి తమ ప్రగాఢ సానుభూతిని తెలియజేశారు. ఈ మేరకు లోకేశ్ ట్విట్టర్ లో స్పందించారు. కోట్ల సుజాతమ్మ అనుచరుడైన శేఖర్ రెడ్డి చనిపోవడంపై పలువురు టీడీపీ నేతలు సంతాపం తెలిపారు.

ఈ నెల 23న ఏపీ ఎన్నికల ఫలితాలు వెలువడనున్నాయి. ఈ నేపథ్యంలో ఆయా పార్టీల తరపున బరిలో నిలిచిన నేతలల్లో ఎవరు గెలుస్తారో, ఎవరు ఓటమి పాలవుతారోనన్న దానిపై నరాలు తెగే ఉత్కంఠ నెలకొంది. ఎన్నికల ఫలితాల కోసం ఎదురుచూస్తున్న అభ్యర్థుల బీపీ లెవెల్స్ అమాంతం పెరిగిపోతాయేమోనని భావించే పరిస్థితులు నెలకొన్నాయి. ఇలాంటి తరుణంలో విజయవాడ టీడీపీ ఎంపీ అభ్యర్థి కేశినేని నానిని మీడియా కలిసింది. గెలుపుపై ధీమాతో ఉన్న కేశినేని నాని బీపీ లెవెల్స్ ఎలా ఉన్నాయో ఆరా తీసింది. బీపీ మిషన్ తో చెక్ చేసింది. ఎలాంటి ఒత్తిడికి గురి కాకుండా ఉన్న నాని బీపీ నార్మల్ గానే ఉంది. అదే విధంగా, తన గెలుపుపై ధీమాతో ఉన్న మైలవరం టీడీపీ అభ్యర్థి దేవినేని ఉమా బీపీ లెవెల్స్ చెక్ చేయగా నార్మల్ గానే ఉన్నాయి.

ఈ సందర్భంగా కేశినేని నాని మాట్లాడుతూ, విజయవాడ చరిత్రలో ఎప్పుడూ రానటువంటి, కనీవినీ ఎరుగని మెజార్టీతో, తాను విజయం సాధించబోతున్నానని ధీమా వ్యక్తం చేశారు. ఈ ఐదేళ్ల కాలాన్ని ఒక్క నిమిషం కూడా వృథా కానీయకుండా ప్రజల కోసం, ఈ ప్రాంతం అభివృద్ధి కోసం కష్టపడ్డానని చెప్పారు. తన జీవిత చరిత్ర తెరిచిన పుస్తకమని అందులో ప్రజాసేవ తప్ప ఎలాంటి మోసాలు గానీ నేరాలు గానీ ఉండవన్నారు. 2014 ఎన్నికల్లో ఎలా అయితే ఓటమి పాలయ్యారు రాబోయే ఎన్నికల్లో కూడా తన చేతిలో వైసీపీ అభ్యర్థి పీవీపీ చిత్తుగా ఓడిపోవడం ఖాయమన్నారు.

గత ఎన్నికల్లో తనపై ఎమ్మార్ కేసులో కోర్టులో జైలుకెళ్లిన వ్యక్తిని తనపై నిలబెట్టారని అతనిని విజయవాడ ప్రజలు తరిమితరిమికొట్టారని స్పష్టం చేశారు. రాబోయే ఎన్నికల్లో కూడా పీవీపీని అలాగే తరిమికొడతారని చెప్పారు. పార్లమెంట్ ఎన్నికల్లో 3లక్షల ఓట్లతో గెలవబోతున్నానని గెలిచి చరిత్ర సృష్టించబోతున్నట్లు స్పష్టం చేశారు కేశినేని నాని. పీవీపీ అంతర్జాతీయ స్థాయిలో స్కాములు చేసిన వ్యక్తి అని ఆరోపించారు. సెబీ కేసుల్లో ఇరుక్కుని దాక్కుంటున్న వ్యక్తి అంటూ ఆరోపించారు. జగన్ డబ్బును హవాలా చేసింది కూడా ఆయనేనంటూ ఆరోపించారు. వైఎస్ జగన్ నైజం, పీవీపీ నైజం ఒక్కటేనని ఆరోపించారు.

అక్రమాస్తుల కేసులో ఎస్పీ చీఫ్ ములాయం సింగ్ యాదవ్, ఆయన కుమారుడు, మాజీ సీఎం అఖిలేష్ యాదవ్ కు ఊరట లభించింది. అక్రమాస్తుల కేసులో వారిద్దరికి సీబీఐ క్లీన్ చిట్ ఇచ్చింది. ములాయం, అఖిలేష్ యాదవ్ అక్రమాస్తుల కేసులో సీబీఐ సుప్రీంకోర్టులో అఫిడవిట్ దాఖలు చేసింది. వారిపై సాధారణ కేసు నమోదు చేయడానికి ఎలాంటి ఆధారాలు లేవని సీబీఐ తన అఫిడవిట్ లో తెలిపింది. తమ విచారణలో వారికి వ్యతిరేకంగా ఎలాంటి ఆధారాలు లభించలేదంది. 2013లో సెంట్రల్ విజిలెన్స్ కమిషన్ కు నివేదిక ఇచ్చామని సీబీఐ అధికారులు తెలిపారు. దాంతో కేసు క్లోజ్ అయిందన్నారు.

తమ విచారణలో ఎలాంటి ఎవిడెన్స్ దొరకని కారణంగా ఎఫ్ఐఆర్ నమోదు చెయ్యలేదని సీబీఐ అధికారులు చెప్పారు. 2013 ఆగస్టు తర్వాత అక్రమాస్తుల కేసులో ఎలాంటి విచారణ జరపలేదన్నారు. 2007లో ములాయం, అఖిలేష్ పై అక్రమాస్తుల కేసు నమోదైంది. 2005లో విశ్వనాథ్ ఛటర్జీ అనే రాజకీయవేత్త.. ములాయం, అఖిలేష్.. అక్రమాస్తులు సంపాదించారని ఆరోపిస్తూ సుప్రీంకోర్టుని ఆశ్రయించారు. సీబీఐతో దర్యాఫ్తు చేయించాలని కోరారు. ములాయం, అఖిలేష్ వారి కుటుంబసభ్యులు అక్రమాస్తులు సంపాదించారని ఆరోపించారు. 2005లో ఆయన పిటిషన్ వేశారు.

007లో.. అక్రమాస్తుల ఆరోపణలపై సీబీఐ విచారణకు కోర్టు ఆదేశించింది. అక్రమాస్తుల కేసులో అప్పటి నుంచి ఇప్పటివరకు సీబీఐ ఎలాంటి పురోగతి సాధించలేకపోయింది. ఆస్తుల కేసులో పురోగతిపై అఫిడవిట్ దాఖలు చేయాలని 2019 ఏప్రిల్ 11న సీబీఐని సుప్రీంకోర్టు ఆదేశించింది. దీనిపై వివరణ ఇచ్చిన సీబీఐ.. 2013లోనే కేసుని క్లోజ్ చేశామని సుప్రీంకోర్టుకి చెప్పింది. అక్రమాస్తులకు సంబంధించి వారిద్దరిపై కేసులు నమోదు చేయడానికి ఎలాంటి ఆధారాలు లేవని సీబీఐ చెప్పడం ద్వారా.. వారిద్దరికి క్లీన్ చిట్ ఇచ్చినట్టు అయ్యింది.