news

ఆంధ్రప్రదేశ్‌ ముఖ్యమంత్రి చంద్రబాబు నాయుడు దిల్లీ పర్యటన కొనసాగుతోంది. ఇవాళ ఉదయం మరోసారి కాంగ్రెస్‌ అధ్యక్షుడు రాహుల్‌గాంధీతో చంద్రబాబు సమావేశమయ్యారు. నిన్న బీఎస్పీ అధినేత్రి మాయావతి, ఎస్పీ అధ్యక్షుడు అఖిలేష్‌ యాదవ్‌తో జరిగిన భేటీ అంశాలను చంద్రబాబు రాహుల్‌గాంధీకి వివరించినట్లు తెలుస్తోంది. ఇవాళ్టితో తుదిదశ పోలింగ్‌ ముగియనుండటంతో తదుపరి కార్యాచరణపై ఇరువురు నేతలు చర్చించినట్లు సమాచారం. ఎగ్జిట్‌ పోల్స్‌ వచ్చాక ఎలా ముందుకెళ్లాలనే అంశంపై కూడా చర్చ జరిగింది. ఎన్నికల ఫలితాల ముందు ఎలా వ్యవహరించాలి, ఎన్నికల ఫలితాల తర్వాత ఎలా వ్యవహరించాలనే దానిపై వ్యూహరచన చేసినట్లు సమాచారం. ఎన్నికల ఫలితాల కంటే ముందే ఎన్డీయేతర కూటమి నేతలంతా ఒకసారి సమావేశమైతే బాగుంటుందని అభిప్రాయపడినట్లు తెలుస్తోంది.

దాదాపు 20 నిమిషాల పాటు రాహుల్‌తో చంద్రబాబు సమావేశం కొనసాగింది. అనంతరం ఎన్సీపీ అధినేత శరద్‌పవార్‌తో చంద్రబాబు అరగంటపాటు చర్చించారు. నిన్న మాయావతితో భేటీ సందర్భంగా అభ్యంతరం తెలిపిన పలు అంశాలపై ఆమెతో ఈరోజు మరోసారి చర్చించేందుకు దిల్లీలో అందుబాటులో ఉండాలని చంద్రబాబు చెప్పినట్లు సమాచారం. ఇవాళ వీలైతే మాయావతితో రాహుల్‌, చంద్రబాబు ప్రత్యేకంగా సమావేశమయ్యే అవకాశం ఉన్నట్లు తెలుస్తోంది. ఆదివారం సాయంత్రం వెలువడే ఎగ్జిట్‌పోల్స్‌ అంచనాలతో భవిష్యత్తు ఫలితాలపై ఒక స్పష్టమైన సరళి వెలువడే అవకాశం ఉన్నందున దాని ఆధారంగా కూటమికి ఎవరు నేతృత్వం వహించాలి, ఎవరి మద్దతు తీసుకోవాలి అన్న దానిపై స్పష్టత వస్తుందని చెబుతున్నారు. కాంగ్రెస్‌కు 2004లో మాదిరి 145 సీట్ల దాకా వస్తే దాని నేతృత్వంలో కూటమి ముందుకెళ్లడానికి అవకాశం ఉంటుందని విశ్లేషిస్తున్నారు. మిగతా ఏ ప్రాంతీయపార్టీకీ అన్ని సీట్లు వచ్చే అవకాశం లేనందున తప్పనిసరిగా కాంగ్రెస్‌ నాయకత్వాన్ని అంగీకరించక తప్పని పరిస్థితి వస్తుందని, దానివల్ల మిత్రపక్షాలు త్వరగా కాంగ్రెస్‌తో కలిసి నడవానికి మానసికంగా సిద్ధమవుతాయని పేర్కొంటున్నారు.

అలాకాకుండా కాంగ్రెస్‌ 100 సీట్ల దగ్గర ఆగిపోయి, యూపీలో ఎస్పీ, బీఎస్పీలకు 50కిపైగా సీట్లు వస్తే కర్ణాటక తరహా పరిస్థితులు వస్తాయని, అప్పుడు కాంగ్రెస్‌ పెద్దపార్టీగా ఉన్నప్పటికీ భాజపాను దూరంగా పెట్టడానికి విధిలేని పరిస్థితుల్లో ప్రాంతీయపార్టీలకు మద్దతిచ్చి అండగా నిలబడాల్సి వస్తుందని చెబుతున్నారు. అందువల్ల ఇందులో ఏ పరిస్థితి ఎదురైనా పక్కకు మళ్లకుండా అందరూ కలిసికట్టుగా నడిచేలా ప్రతిపక్షాలను మానసికంగా సిద్ధం చేసే పనిని చంద్రబాబు చేస్తున్నట్లు తెదేపా వర్గాలు అభిప్రాయపడుతున్నాయి. ఫలితాల తర్వాత సంఖ్యాబలాన్ని బట్టి ఎవరు ఏపాత్రనైనా పోషించవచ్చని, అయితే పాత్రలు మారాయన్న కారణంతో కూటమి నుంచి దూరం కాకుండా కలిసికట్టుగా ఉండటానికే సిద్ధమైతే బాగుంటుందన్న భావనను చంద్రబాబు ఇప్పుడు అఖిలేష్‌, మాయావతి ముందు వ్యక్తంచేసినట్లు సమాచారం. అందుకు వారిద్దరూ సుముఖత వ్యక్తంచేసినట్లు తెలిసింది. మాయావతి ఏది చెబితే తాను దాంతో ఏకీభవిస్తానని అఖిలేష్‌యాదవ్‌ చంద్రబాబుకు హామీ ఇచ్చినట్లు సమాచారం.

‘‘సార్వత్రిక ఎన్నికల పోలింగ్‌ ఈరోజు ముగుస్తోంది. రెండోసారి అధికారం దిశగా నరేంద్ర మోదీ రంగం సిద్ధం చేసుకున్నారు. ఎన్‌డీయేకు మెజారిటీ రాకున్నా మైనారిటీలో ఉన్నా ఆయన ఆగరు. ప్రభుత్వ ఏర్పాటుకు కుయుక్తులు పన్నుతారు. మనం ఆపాలి. మన శక్తియుక్తులన్నింటినీ ఉపయోగించి నిరోధించాలి. దీనికి ఒకే ఒక మార్గం మనం యునైటెడ్‌గా కనిపించడం! మనం ఒక్క మాట మీద ఉన్నామని గ్రహిస్తే ఆయన పాచికలేవీ పారవు. ఇందుకు కలిసి రండి... ఆలస్యం వద్దు. ఏమాత్రం జాగు చేసినా మోదీ వచ్చేస్తారు...’’ ఇదీ ఆంధ్రప్రదేశ్‌ ముఖ్యమంత్రి, తెలుగుదేశం పార్టీ అధినేత చంద్రబాబునాయుడు జాతీయ విపక్ష నేతలకు చెప్పిన మాట. ఆయన మాటను విన్న ఆ నేతలంతా దానితో ఏకీభవించారు.

ఒక మాటపై ఉండేందుకు అంగీకరించినట్లు సమాచారం. జాతీయస్థాయిలో ఎన్డీయేకు బలమైన ప్రత్యామ్నాయ ఏర్పాటు దిశగా ఏర్పాట్లు శనివారంనాడు ఊపందుకున్నాయి. వీటికి చంద్రబాబే సంధానకర్త. ఢిల్లీలో ఆయన విపక్ష నేతలందరినీ కలిపే ప్రయత్నం చేస్తున్నారు. ఒక పరిశీలన ప్రకారం ప్రస్తుతం విపక్ష శిబిరం నాలుగు రకాలుగా చీలి ఉంది. (1)యూపీఏ (2)యూపీఏకు అనుకూలంగా ఉన్న టీడీపీ తదితర పార్టీలు. (3)తృణమూల్‌, బీజేడీ, టీఆర్‌ఎస్‌, వైసీపీలాంటి పార్టీల తటస్థ, ఫెడరల్‌-ఫ్రంట్‌ అనుకూల కూటమి (4)ఉత్తరప్రదేశ్‌కు చెందిన మహాకూటమి(ఎస్పీ, బీఎస్పీ, ఆర్‌ఎల్‌డీ). ఈ పార్టీలన్నింటినీ ఒకచోట చేర్చే పనిని చంద్రబాబు భుజానికెత్తుకున్నారు. ఆయా నాయకులందరి దగ్గరికీ తానే స్వయంగా వెళ్లి- ‘ఏకం కాకపోతే ముప్పే’ అనే హెచ్చరికలు చేసి, వారిని ఒప్పించి వస్తున్నారు.

శనివారంనాడు ఆయన కాంగ్రెస్‌ అధ్యక్షుడు రాహుల్‌, ఎన్‌సీపీ నేత శరద్‌ పవార్‌, లోక్‌ తాంత్రిక్‌ జనతాదళ్‌ నేత శరద్‌ యాదవ్‌, సీపీఐ నేతలు సురవరం సుధాకర్‌ రెడ్డి, డి.రాజాలతో సమాలోచనలు జరిపారు. మధ్యాహ్నం లఖ్‌నవూలో సమాజ్‌వాదీ పార్టీ నేత అఖిలేష్‌ యాదవ్‌, బహుజన్‌ సమాజ్‌ పార్టీ అధినేత్రి మాయావతిలతో చర్చలు జరిపారు. అనంతరం ఢిల్లీ తిరిగి వచ్చారు. ఒకట్రెండు రోజులు ఆయన ఢిల్లీలోనే ఉండి మిగిలిన ఎన్డీఏతర పక్షాలనేతలతో కూడా చర్చలు జరపాలని నిర్ణయించినట్లు తెలిసింది. ఈ నెల 23న ఎన్డీఏ పక్షాల నేతలందరూ ఢిల్లీలో ఉండి వేగంగా స్పందించి భవిష్యత్‌ కార్యాచరణకు పూనుకోవాలని నిర్ణయించినట్లు తెలుస్తోంది. చంద్రబాబు ఇప్పటికే సీతారాం ఏచూరి, అరవింద్‌ కేజ్రీవాల్‌ మొదలైన నాయకులను కలిశారు.

మోదీ మళ్లీ అధికారంలోకి రాకుండా ఎన్డీయేతర పక్షాలను ఏకతాటిపైకి తేవడానికి చంద్రబాబు చేస్తున్న ప్రయత్నాలు సానుకూల దిశలో సాగుతున్నాయి. ఎన్నికల ఫలితాల తర్వాత అందరూ ఒక్కతాటిపై నడవాలన్న ఆయన ప్రతిపాదనను రాహుల్‌గాంధీ, మాయావతి, అఖిలేష్‌యాదవ్‌, శరద్‌పవార్‌లు అంగీకరించినట్లు తెలిసింది. రాహుల్‌గాంధీ ‘ఉయ్‌ ఆర్‌ వన్‌’ అని చెప్పగా, మాయావతి మీరు పెద్దన్నయ్య పాత్ర పోషించి అందర్నీ కలిపే బాధ్యతను భుజానకెత్తుకోవాలని సూచించినట్లు సమాచారం. శుక్రవారం దిల్లీకొచ్చిన ముఖ్యమంత్రి చంద్రబాబునాయుడు శనివారం తీరిక లేకుండా చర్చల్లో మునిగారు. ఉదయం దిల్లీలో రాహుల్‌గాంధీతో, సాయంత్రం ఉత్తర్‌ప్రదేశ్‌ రాజధాని లఖ్‌నవూలో బీఎస్పీ అధ్యక్షురాలు మాయావతి, ఎస్పీ అధ్యక్షుడు అఖిలేష్‌ యాదవ్‌లతో కీలక సమాలోచనలు చేశారు.

అంతకు ముందు దిల్లీలో సీపీఐ ప్రధాన కార్యదర్శి సురవరం సుధాకర్‌రెడ్డి, ఎంపీ డి.రాజా, ఎన్‌సీపీ అధ్యక్షుడు శరద్‌పవార్‌, ఎల్‌జేడీ అధ్యక్షుడు శరద్‌యాదవ్‌లతో విడివిడిగా భేటీ అయ్యారు. ఈ నెల 23వ తేదీన సార్వత్రిక ఎన్నికల ఫలితాలు వెలువడే నాటికి ఎన్డీయేతర కూటమి, దాని నాయకత్వానికి ఒక స్పష్టమైన రూపు తీసుకురావాలన్న కృతనిశ్చయంతో ఉన్న చంద్రబాబునాయుడు దానిపై అందరి అభిప్రాయాలు తీసుకుంటున్నారు. కూటమిలో కీలక భూమిక నిర్వహించబోయేందుకు అవకాశం ఉన్న పార్టీ అధినేతల అభిప్రాయాల ఆధారంగా వేగంగా నిర్ణయాలు తీసుకోవాలన్న భావనతో ఆయన కార్యాచరణ మొదలుపెట్టారు. ఉదయం రాహుల్‌గాంధీతో సమావేశమైనప్పుడు ఆయన ‘ఉయ్‌ ఆర్‌ వన్‌ (మనం అంతా ఒక్కటే)’ అన్న అభిప్రాయం వ్యక్తం చేసినట్లు తెలిసింది. దాన్నిబట్టి చంద్రబాబు జరిపే సమావేశాలు, వాటి ఆధారంగా తీసుకొనే నిర్ణయాలకు తన సంపూర్ణ మద్దతు ఉంటుందనే భావనను రాహుల్‌ వ్యక్తం చేసినట్టయ్యిందన్న అభిప్రాయం తెదేపాలో వ్యక్తమవుతోంది.

మధ్యాహ్నం 2.30 గంటలకు లఖ్‌నవూ బయలుదేరి వెళ్లి తొలుత ఎస్పీ అధ్యక్షుడు అఖిలేష్‌ యాదవ్‌, తర్వాత బీఎస్పీ అధ్యక్షురాలు మాయావతిని కలిశారు. 23వ తేదీ ఫలితాల తర్వాత వారు ఏం చేయాలనుకుంటున్నారు? జాతీయ రాజకీయాల్లో ఏ పాత్ర పోషించాలనుకుంటున్నారు? అన్న అభిప్రాయాలను చంద్రబాబువారి నుంచి రాబట్టే ప్రయత్నం చేసినట్లు తెలిసింది. ప్రస్తుత పరిణామాలను బట్టిచూస్తే అఖిలేష్‌యాదవ్‌ యూపీ రాజకీయాలపైనే ప్రధానంగా దృష్టిసారించే అవకాశం ఉన్నట్లు సమాచారం. మాయావతి మాత్రం జాతీయ రాజకీయాల్లో కీలక భూమిక పోషించడానికి సిద్ధమయ్యారు. అందువల్ల ఆమె మనోభావాలను కూలంకషంగా తెలుసుకొని వాటిని రాహుల్‌గాంధీ, శరద్‌పవార్‌లాంటి వారితో పంచుకుని తదనుగుణంగా కార్యాచరణ చేపట్టాలని చంద్రబాబు యోచిస్తున్నట్లు తెదేపా వర్గాలు పేర్కొన్నాయి. దీనితో చంద్రబాబు శనివారం రాత్రికి విజయవాడ వెళ్లాల్సి ఉన్నా దాన్ని మానుకొని తిరిగి దిల్లీకి చేరుకున్నారు. ఆదివారం ఆయన మరోసారి రాహుల్‌గాంధీ, శరద్‌పవార్‌లతో సమావేశం అయ్యే అవకాశం కనిపిస్తోంది. అఖిలేష్‌, మాయావతిలతో జరిపిన చర్చల సారాంశాన్ని వారికి చెప్పి స్పష్టమైన వైఖరికి వచ్చిన తర్వాత మిగతా అన్ని మిత్రపక్షాలతో త్వరలో సమావేశం ఏర్పాటు చేయొచ్చని తెదేపా వర్గాలు అభిప్రాయపడ్డాయి.