news

రాష్ట్ర బీజేపీలో అభ్యర్థుల కసరత్తు ముమ్మరంగా సాగుతోంది. మొత్తం 25 లోక్‌సభ, 175 అసెంబ్లీ స్థానాలకు అభ్యర్థులను ఎంపిక చేయడంలో పార్టీ రాష్ట్ర నాయకత్వం తలమునకలైంది. ఆశావహుల దరఖాస్తులు స్వీకరించి వాటిని అన్ని కోణాల్లోనూ పరిశీలిస్తోంది. ఆర్థిక బలంతోపాటు జిల్లా నాయకత్వం అభిప్రాయాన్ని తీసుకొంటోంది. సగం పార్లమెంటు స్థానాల అభ్యర్థుల ఎంపిక కొలిక్కి వచ్చినట్లు తెలిసింది. ఇప్పటికే జాబి తా ప్రకటించాలనుకున్నా.. వైసీపీ అభ్యర్థుల జాబితా వాయిదా పడటం ఒక కారణంగా తెలుస్తోంది. గురువారం ఉండవల్లిలోని గోకరాజు గంగరాజు గెస్ట్‌హౌ్‌సలో జరిగిన రాష్ట్ర కోర్‌ కమిటీ సమావేశంలో జాబితాపై చర్చ జరిగింది. పార్టీ రాష్ట్ర అధ్యక్షుడు కన్నా లక్ష్మీనారాయణ నరసరావుపేట నుంచి లోక్‌సభ బరిలో దిగుతుండగా.. మాజీ అధ్యక్షుడు, విశాఖపట్నం ఎంపీ కంభంపాటి హరిబాబు పార్టీలోనే పోటీ ఎదుర్కొంటున్నారు.

ఆ స్థానాన్ని తనకు కేటాయించాలని పురందేశ్వరి పట్టుబడుతుండటం పార్టీలో చర్చనీయాంశమైంది. గతంలో విశాఖ ఎంపీ గా కాంగ్రెస్‌ పార్టీ తరఫున గెలిచిన పురందేశ్వరి యూపీఏ ప్రభుత్వంలో కేంద్రమంత్రిగా పని చేశారు. రాష్ట్ర విభజన తర్వాత బీజేపీలో చేరిన ఆమె 2014 ఎన్నికల్లో రాజంపేట నుంచి కమలం గుర్తుపై పోటీచేసి ఓడిపోయారు. ఈ ఎన్నికల్లో ఆమె విశాఖ నుంచి బరిలో దిగుతాననడంతో రాష్ట్ర నాయకత్వం ఆ స్థానాన్ని పెండింగ్‌లో పెట్టింది. విజయనగరం నుంచి సన్యాసిరాజు, అరకు నుంచి మాజీ ఎమ్మెల్యే డి.సత్యనారాయణ రెడ్డి, రాజమండ్రి నుంచి గోపీనాథ్‌ దాస్‌(ఇస్కాన్‌) అభ్యర్థిత్వాలను దాదాపు ఖరారు చేసినట్లు తెలిసింది. నరసాపురం సిట్టింగ్‌ స్థానం నుంచి గోకరాజు గంగరాజు బరిలో ఉంటారని ఓవైపు ప్రచారం జరుగుతుండగా మరోవైపు సినీనటుడు కృష్ణంరాజు భార్య శ్యామలాదేవి పేరు బలంగా వినిపిస్తోంది. ఏలూరులో కావూరి సాంబశివరావు పోటీపై ఇంకా స్పష్టత రాలేదని పార్టీ వర్గాలు చెబుతున్నాయి.

విజయవాడ నుంచి కిలారు దిలీప్‌, మచిలీపట్నం నుంచి గుడివాక అంజిబాబు, గుంటూరు నుంచి పారిశ్రామికవేత్త వల్లూరి జయప్రకాశ్‌, ఒంగోలు నుంచి ఓ ప్రవాసాంధ్రుడు, కర్నూలులో పార్థ డెంటల్‌ అధినేత పార్థసారథిరెడ్డి, హిందూపురం నుంచి కదిరి మాజీ ఎమ్మెల్యే పార్థసారథి అభ్యర్థిత్వాలు దాదాపు ఖరారైనట్లు తెలుస్తోంది. కడప నుంచి కందుల రాజమోహన్‌రెడ్డి, రాజంపేట నుంచి వై.సత్యకుమార్‌ (వెంకయ్య నాయుడు మాజీ ఓఎస్ డీ) పేర్లు ఫైనల్‌ కాగా తిరుపతిలో ప్రవాసాంధ్రుడు సునీల్‌ ఇస్కా పోటీకి పచ్చజెండా ఊపినట్లు సమాచారం. చిత్తూరు, నెల్లూరు, బాపట్ల, నంద్యాల, అమలాపురం, అనకాపల్లి, శ్రీకాకుళం స్థానాలపై కసరత్తు జరుగుతున్నట్లు పార్టీ వర్గాలు తెలిపాయి. అసెంబ్లీ స్థానాల్లో పోటీ చేసేందుకు దరఖాస్తు చేసుకున్న ఔత్సాహికుల్లో 50మంది పేర్లు ఫైనల్‌ అయినట్లు తెలిసింది. మరో 125 స్థానాల్లో అభ్యర్థులను ఎంపిక చేయాల్సి ఉంది. కాగా అభ్యర్థుల జాబితా తీసుకుని బీజేపీ రాష్ట్ర అధ్యక్షుడు కన్నా లక్ష్మీనారాయణ శుక్రవారం ఉదయం ఢిల్లీ వెళ్లవచ్చునని పార్టీ వర్గాలు చెబుతున్నాయి. శుక్రవారం రాత్రి లేదా శనివారం అభ్యర్థుల పేర్లు వెల్లడించే అవకాశం ఉందని తెలిసింది.

మాజీ ఎంపీ వివేకానందరెడ్డి మృతిపై నమ్మలేని నిజాలు వెలుగులోకి వస్తున్నాయి. పోర్టుమార్టం రిపోర్టులో వైద్యులు వివేకాది హత్యేనని ప్రాధమిక నిర్ధారణకు వచ్చారు. అయితే వివేకా మృతిపై కడప ఎస్పీ రాహుల్‌దేవ్‌శర్మ పలు కీలక విషయాలు మీడియాకు వివరించారు. వివేకానందరెడ్డిది హత్యేనని ఆయన వెల్లడించారు. తలపై మూడు, ఒంటిపై రెండు గాయాలున్నాయని తెలిపారు. వివేకా గదిలో ఫింగర్‌, ఫుట్‌ ప్రింట్స్‌ సేకరించామని, ఇంటి వెనుక తలుపు తెరిచే ఉందని ఎస్పీ చెబుతున్నారు. వెనుక తలుపు నుంచి ఎవరైనా వచ్చారా అనే కోణంలో దర్యాప్తు చేస్తున్నామని, ఘటన రాత్రి 11:30కి జరిగినట్లు తెలుస్తోందన్నారు. రాత్రి 11:30 గంటల నుంచి ఉదయం 6:30 గంటల మధ్యలో.. ఇంటికి ఎవరెవరు వచ్చారు అనే విషయంపై ఆరా తీస్తున్నామన్నారు.

పోస్టుమార్టం, ఫోరెన్సిక్‌ నివేదికలు ఇంకా రాలేదని రాహుల్‌దేవ్‌శర్మ తెలిపారు. కొద్దిసేపటి క్రితం వివేకానందరెడ్డి మృతదేహానికి పోస్టుమార్టం పూర్తైంది. మృతదేహాన్ని అధికారులు కుటుంబసభ్యులకు అప్పగించారు. తలకు బలమైన గాయం, ఒంటిపై గాయాలు ఉండటంతో.. పోలీసులు హత్యగా అనుమానిస్తున్నారు. వివేకానందరెడ్డి ఇంట్లో డాగ్‌ స్క్వాడ్ తనిఖీలు నిర్వహించింది. వివేకా ఇంటి ఆవరణలో తిరిగి పోలీస్‌ డాగ్‌ లోపలికి వెళ్లింది. వివేకా మృతి హత్య కేసుగా పోలీసులు నమోదు చేశారు. ఐపీసీ 302 సెక్షన్‌ కింద కేసు నమోదు చేశారు. ఘటనాస్థలాన్ని సిట్‌ ఇన్‌చార్జ్‌ అమిత్ గార్గ్ పరిశీలించారు.

ఇవీ అనుమానాలు.. ముందుగా వివేకా మృతదేహాన్ని చూసిందెవరు? ఎన్ని గంటలకు మృతదేహన్ని గుర్తించడం జరిగింది? పోలీసులకు ఎన్ని గంటలకు సమాచారం ఇచ్చారు..? పోలీసులు వచ్చేలోపుగా వివేకా ఇంటికి ఎవరెవరు వచ్చారు? వచ్చిన వారు ఏం చేశారు? బాత్ రూంలోని మృతదేహన్ని బెడ్ రూంలోకి మార్చిందెవరు? బెడ్ రూంలో రక్తం మరకలను తుడిచింది ఏవరు? ఆ రక్తం మరకలను తుడవమని చెప్పిందెవరు? వివేకా మృతి చిన్న విషయమే.. కేసు వద్దు అని ఎందుకన్నారు? కేసు అవసరం లేదని అవినాష్‌ అన్నారన్న మాట నిజమేనా? వివేకా కూతురు, అల్లుడు హైదరాబాద్‌ నుంచి పోలీసులతో మాట్లాడిన తర్వాతే కేసు నమోదు చేశారా? నుదుటిపై గాయాలు ఎందుకున్నాయని వివేకా కూతురు నిగ్గదీశారా? ఒంటిమీద అంత పెద్ద పెద్ద గాయాలు ఉంటే గుండెపోటు, సహజ మరణం అన్న మాటలు ఎందుకొచ్చాయి? హత్యగా స్పష్టంగా కన్పిస్తున్న గుండెపోటు అని ఎందుకు ముందు ప్రకటించారు?అనే కోణంలో పోలీసులు దర్యాప్తు చేస్తున్నారు.

‘తప్పైంది సార్‌.. సరి చేసుకుంటాను.. అందర్నీ కలుపుకెళ్తా.. అని సీఎం చంద్రబాబు వద్ద టీడీపీ నూజివీడు ఇన్‌చార్జ్‌ ముద్దరబోయిన వెంకటేశ్వరరావు అన్నారని తెలిసింది. గురువారం తెల్లవారుజామున 3 గంటలకు సీఎం చంద్రబాబు, నూజివీడు అసెంబ్లీ సీటు పంచాయితీ చేశారు. ముద్దరబోయినకు, ఆయనపై అసంతృప్తితో ఉన్న గ్రూప్‌నకు అక్షింతలు వేశారు. రెండుగ్రూపులు లోపలికి వెళ్లగానే ముద్దరబోయిన పై అసంతృప్తితో ఉన్న కాపా శ్రీనివాసరావు, నూతక్కివేణుగోపాలరావు, నక్కబోయిన వేణుయాదవ్‌, వంటి నాయకులు నాలుగేళ్లుగా ముద్దరబోయిన ఎలాంటి ఇబ్బందులకు గురిచేసింది? సీఎంకు చెప్పారు. దీంతో సీఎం చంద్రబాబు ముద్దరబోయినతో నీకు గతంలోనే చెప్పా అందరినీ కలుపుకెళ్లాలని సూచించినా పట్టించుకోలేదంటూ అసహనం వ్యక్తం చేసినట్లు సమాచారం.

2014లో నేను చేసిన తప్పు ఏమిటంటే పార్టీ ఓడిన చోట ఇన్‌చార్జ్‌లను నియమించడం. కొత్త రాష్ట్రం కావడంతో ఓడిన నియోజకవర్గాల పై దృష్టి పెట్టలేకపోయా, నాడే ఇన్‌చార్జ్‌లకు బదులు 5 మెన్‌ కమిటీ వేయవలసింది. ఇక నుంచి అదే చేస్తానని చంద్రబాబు వారికి స్పష్టం చేశారు. ‘ఓడినా నీకు ఇన్‌చార్జ్‌ ఇవ్వడంతో కొమ్ములొచ్చాయి. ఒకరి నొకరు ఓడించుకుంటే నష్టపోయేది మీరే. మళ్లీ ఇదే ఫలితం నూజివీడులో వస్తే కొత్త నాయకత్వాన్ని తయారు చేసుకుంటా..’నని ఇరువర్గాలకు సీఎం స్పష్టం చేసినట్లు సమాచారం. దీంతో ముద్దరబోయిన సీఎంకు పైవిధంగా సారీ చెప్పి, అందర్ని కలుపుకుని వెళతానని హామీ ఇచ్చినట్లు తెలిసింది.ఉభయవర్గాలు బయటకు వచ్చిన తరువాత తనపై అసంతృప్తితో ఉన్న నాయకుల వద్దకు ముద్దరబోయిన వెళ్ళి సారీ! తప్పులు ఉంటే క్షమించండి, కొన్ని పొరపాట్లు జరిగాయి. అందరం కలిసి పని చేసుకుందామని చెప్పినట్లు సమాచారం. ఆ నేతలు మిగతా విషయాలు తరువాత మాట్లాడుకుందాం అని ముద్దరబోయినకు చెప్పినట్లు తెలిసింది

సీఎం వద్దకు తీసుకెళ్లే నాయకుల విషయంలో ముద్దరబోయినపై ముసునూరు మండల నాయకులు చిలుకూరి వెంకటేశ్వరరావు, మండలపార్టీ అధ్యక్షుడు దేవినేని బలరామ్‌ తదితరులు అలిగి సీఎం చర్చల్లోకి వెళ్లకుండానే వెనుదిరిగారు. స్థానిక నాయకులు ఎవరైనా తప్పుచేసినా, నియోజకవర్గ నాయకుడు ఆ తప్పు చేయకూడదంటున్నారు. సీఎం వద్దకు సాధారణ స్థాయి నాయకులను ముద్దరబోయిన తీసుకెళ్లడంతో వీరు కినుక వహించి వెనుతిరిగినట్లు సమాచారం. సీఎం చంద్రబాబు కలిసి పనిచేయండి అని నూజివీడు నాయకులకు చెప్పి పంపారు. కాని వీరిమధ్య ఏర్పడిన విభేదాలను సరిదిద్దే ఏర్పాటు మాత్రం జరగలేదు. జిల్లా నాయకులు దీనిపై దృష్టిపెట్టి, రెండు గ్రూపులను కూర్చోబెట్టి, ఎన్నికల కమిటీని ఏర్పాటుచేయకపోతే నియోజకవర్గంలో ఎవరికి వారే యమునా తీరే చందాన పరిస్థితి మారే అవకాశముంది.