news

‘మనం ఓడిపోతామని ప్రధాని మోదీ మాట్లాడుతున్నారు. నేను ప్రజలకు న్యాయం చేశాను. సంక్షేమం, అభివృద్ధి అందించాను. అన్నిట్లో నెంబర్‌ 1గా ఉన్నాం. మేమే ఓడిపోతే మీకేమైనా చిరునామా ఉంటుందా..? డిపాజిట్లు వస్తాయా..? అసలు మీ విషయం ఏమిటి..? మీరు దేశానికి ఏమి చేశారని నిలదీస్తున్నా.. మీ వల్ల ఒక్క పనైందా..? లాభం వచ్చిందా... కష్టాలే వచ్చాయి...’ అని ముఖ్యమంత్రి చంద్రబాబునాయుడు ఆగ్రహం వ్యక్తం చేశారు. ‘రఫేల్‌ యుద్ధ విమానాల విషయంలో పెద్దఎత్తున అవినీతికి పాల్పడి మా గురించి మాట్లాడతారా? తక్కువ అవినీతి ఉండే వాటిల్లో మూడోరాష్ట్రంగా ఆంధ్రప్రదేశ్‌ ఉంది. వెనుకబడిన ప్రాంతాలకు నిధులు ఎందుకు ఇవ్వలేదని హైకోర్టు ప్రశ్నిస్తే మీ సమాధానం ఏమిటి. మమ్మల్ని బెదిరించలేరు. అణగదొక్కలేరు. మా పని మేము చేస్తాం.. మాకా తెలివితేటలు ఉన్నాయి...’ అని సీఎం వ్యాఖ్యానించారు.

‘ మీరు ఇవ్వకపోయినా మేమే స్టీల్‌ప్లాంటు, పెట్రోకెమికల్‌ కారిడార్‌ ఏర్పాటుకు ముందుకొచ్చాం. కేంద్రం ముందుకొచ్చి ఉంటే రూ.32వేల కోట్లే పెట్టేవారు. ఇప్పుడు రూ.63వేల కోట్లతో హల్దియా పెట్రోకెమికల్‌ కాంప్లెక్స్‌ వస్తోంది. 5వేల మందికి ప్రత్యక్షంగా, లక్ష మందికి పరోక్షంగా ఉద్యోగావకాశాలొస్తాయి...’ అని వివరించారు. తూర్పుగోదావరి జిల్లా కాకినాడ జేఎన్‌టీయూ మైదానంలో శుక్రవారం జరిగిన జన్మభూమి-మావూరులో, తొలుత అధికారులతో జరిగిన టెలికాన్ఫరెన్స్‌లో సీఎం మాట్లాడారు. నరేంద్రమోదీ సీబీఐ కత్తిని మెడపై పెట్టడంతో జగన్‌ వణికిపోతున్నారని..ఊడిగం చేయమన్నా చేయడానికి సిద్ధంగా ఉన్నారని ఎద్దేవా చేశారు. అభివృద్ధిలో ఏపీతో పోటీపడలేక కేసీఆర్‌, జగన్‌... మోదీ జపం చేస్తున్నారని విమర్శించారు. కోడికత్తి పార్టీని పెట్టుకుంటే మనం మునిగిపోతామని ప్రజలనుద్దేశించి వ్యాఖ్యానించారు.

రూ.75వేల కోట్లు రావాలని చెప్పిన పవన్‌కల్యాణ్‌ ఆ నిధుల కోసం పోరాడి రాష్ట్రానికి న్యాయం చేయాలని సూచించారు. రాష్ట్రానికి అన్యాయం జరిగిందని.. ఈ గడ్డపై పుట్టిన, ఇక్కడి నీళ్లు తాగిన ప్రతిఒక్కరూ జన్మభూమి సాక్షిగా పనిచేయాలని ముఖ్యమంత్రి పిలుపునిచ్చారు. ‘నా జీవితం అయిదు కోట్ల రాష్ట్ర ప్రజలకు అంకితం. రాత్రి పగలు పని చేస్తా. ఎంత సంక్షేమాన్ని అందిస్తే అంత ఆనందానికి గురవుతా. ఎప్పుడూ వ్యక్తిగత విలాసాలకు పోలేదు. ఇన్నాళ్లు 24 గంటలూ మీ గురించే ఆలోచించా. మీ జీవితం ఆనందంగా ఉండాలని కోరుకుంటున్నా. ఇప్పటి నుంచి నా కోసం.. పార్టీ కోసం మీరంతా ఆలోచించాలి. నిండు మనసుతో ఆశీర్వదించండి. సంక్షేమానికి తొలిసారిగా నాంది పలికింది ఎన్టీ రామారావు. పేదల సంక్షేమానికి అంకితభావంతో పనిచేసిన మహానుభావుడు ఆయన. ఆ స్ఫూర్తిని తెదేపా భవిష్యత్తులోనూ కొనసాగిస్తుంది. నిత్యం పేదల కోసమే పనిచేస్తోంది...’ అని చంద్రబాబు పేర్కొన్నారు.

ఆంధ్రప్రదేశ్ ముఖ్యమంత్రి చంద్రబాబు దావోస్‌ పర్యటన పై కేంద్రం స్పందించింది. కేంద్ర విదేశాంగశాఖ అధికారులతో ఏపీ సీఎంవో చర్చలు జరిపింది. దీంతో మళ్లీ దరఖాస్తు చేసుకోవాలని కేంద్ర విదేశాంగశాఖ కోరింది. దీంతో చంద్రబాబు పర్యటనకు లైన్ క్లియర్ అయింది. చంద్రబాబుతో పాటు 17 మంది బృందం 7 రోజుల పాటు దావోస్‌ వెళ్లడానికి కేంద్రం అనుమతి ఇచ్చింది. నిన్న చంద్రబాబు దావోస్ పర్యటన పై కేంద్రం ఆంక్షలు విధించింది. ప్రతి ఏడాది 14, 15 మంది ప్రతినిధులతో దావోస్‌లో జరిగే ప్రపంచ ఆర్థిక వేదిక సదస్సుకు చంద్రబాబు వెళుతున్నారు. ఈ ఏడాది ఏడు రోజుల పర్యటనను నాలుగు రోజులకు కుదించుకోవాలని కేంద్రం సూచించింది.

15 మందికి బదులు ఐదుగురే వెళ్లాలని ఆంక్షలు విధించింది. దీంతో ఈ నెల 20 నుంచి 26వ తేదీ వరకు దావోస్ వెళ్లేందుకు సీఎం కార్యాలయం కేంద్రం అనుమతి కోరింది. కేంద్రం ఆంక్షలు విధించడం పై చంద్రబాబు ఆగ్రహం వ్యక్తం చేశారు. మళ్లీ అనుమతి కోరాలని సీఎంవో అధికారులను ఆయన ఆదేశించిన విషయం తెలిసిందే. చంద్రబాబు కేంద్ర ప్రభుత్వాన్ని ధిక్కరించే స్వరంతో హెచ్చరించటంతో, ఇలాంటి విషయాలలో ఎక్కువ లాగితే, ఉన్నది కూడా ఊడుతుందని భావించి, కేంద్రం వెనక్కు తగ్గింది. అనవసర గొడవను నెత్తిన పెట్టుకోవటం ఎందుకని, చంద్రబాబు టూర్ కి పర్మిషన్ ఇచ్చింది.

ప్రతి సారీ చంద్రబాబుతో పాటు, ఆయన వెంట మంత్రులు, అధికారులతో కూడిన భారీ ప్రతినిధి బృందం దావోస్‌కి వెళ్లడం ఆనవాయితీ. ఈసారి కూడా ఈ నెల 20 నుంచి 26వ తేదీ వరకు దావోస్‌లో ప్రపంచ ఆర్థిక వేదిక సదస్సులో పాల్గొనాలని ముఖ్యమంత్రి చంద్రబాబు భావించారు. ఆయనతోపాటు, మంత్రులు యనమల రామకృష్ణుడు, నారా లోకేష్‌ సహా 14 మంది సభ్యుల బృందం వెళ్లాలన్నది ఆలోచన. ఈ మేరకు రాజకీయ అనుమతుల కోసం కేంద్ర విదేశాంగ శాఖకు దరఖాస్తు చేయగా.. ముఖ్యమంత్రి చంద్రబాబు నాయుడు దావోస్‌ పర్యటనకు అనుమతి ఇస్తూనే ఆంక్షలు విధించింది. అయితే ఈ విషయం పై కేంద్రం అతిగా జోక్యం చేసుకోవటంతో, చంద్రబాబు తీవ్ర ఆగ్రహం వ్యక్తం చేసారు. దీంతో కేంద్రం దిగొచ్చి, ఆంక్షలు లేకుండా పర్మిషన్ ఇచ్చింది.

చుక్కల భూముల పేరుతో రాష్ట్రంలో మరో కుట్ర జరగబోతోందంటూ హీరో శివాజీ ఒక్క సారిగా సంచలన వ్యాఖ్యలు చేశారు. కొంత మంది అధికారులు చంద్రబాబుకు వ్యతిరేకంగా పనిచేస్తున్నట్టు కూడా ఆయన చెప్పారు. చంద్రబాబు అపాయింట్‌మెంట్‌ను కోరినట్టు, చంద్రబాబును కలిశాక ఈ కుట్ర వెనుక ఎవరున్నారో ఆయనకే చెబుతానంటూ శివాజీ తెలిపారు. అయితే గుంటూరులోని అచ్చంపేటలో జరిగిన జన్మభూమి కార్యక్రమంలో చంద్రబాబు ప్రసంగించారు. ఏపీకి అన్యాయం చేస్తోందని కేంద్రంపై తీవ్ర వ్యాఖ్యలు చేశారు. కేంద్రంపై పవన్‌కల్యాణ్‌ కూడా పోరాడాలని, రాష్ట్రం కోసం పవన్‌ కల్యాణ్‌ తమతో కలిసిరావాలని కోరారు. ఒకరు బీజేపీతో పూర్తిగా కలిసిపోయారని, ఇంకొకరు వన్‌సైడ్‌గా పనిచేస్తున్నారన్నారు. పవన్ కలిసి వస్తారో లేక ఒంటరిగా పోటీ చేస్తారో ఆయన వ్యక్తిగత విషయమన్నారు. అదే విధంగా శివాజీ చేసిన వ్యాఖ్యలపై స్పందిస్తూ..ఎస్టేట్‌, కోఆపరేటివ్‌ భూముల సమస్యలను ఈ నెలాఖరులోపు పరిష్కరించాలన్నారు. శివాజీ చెబుతున్నట్లు అధికారులు వ్యవహరిస్తే ఆధారాలు ఇవ్వండి.. చర్యలు తీసుకుంటామన్నారు.

దీర్ఘకాలంగా ఉన్న చుక్కల భూముల సమస్యను పరిష్కరించేందుకు ప్రభుత్వం చర్యలు తీసుకుంటోంది. ఈనెల 24 నాటికి పరిష్కరించాలని ప్రభుత్వం శుక్రవారం జిల్లా కలెక్టర్లకు ఆదేశాలు జారీ చేసింది. ప్రభుత్వం తనంతట తానుగా చుక్కల భూములు పునఃపరిశీలించాలని నిర్ణయం తీసుకుంది. 1954లో భూముల రీసర్వే జరిగినప్పుడు రెవెన్యూ రికార్డుల్లో సర్వేనంబర్‌ వారీగా ఖాతాదారుల పేర్లు, విస్తీర్ణం నమోదు చేశారు. అయితే ఎవరూ యాజమాన్య హక్కు కోరని భూముల వద్ద రికార్డుల్లో చుక్కలు (డాట్స్‌) పెట్టారు. దీంతో అప్పటి నుంచి ఈ భూములను చుక్కల భూములు (డాటెడ్‌ ల్యాండ్స్‌)గా పిలుస్తున్నారు. 1954 తర్వాత ఆ భూములను సాగు చేసుకునే వారికి ఎటువంటి యాజమాన్య హక్కులూ లేవు. వాటిని బదిలీ చేసుకునే, అమ్ముకునే అవకాశం లేదు.

దాంతో రైతులు అనేక ఇబ్బందులు పడుతున్నారు. భూమి హక్కుల కోసం ప్రభుత్వానికి విజ్ఞప్తులు చేస్తున్నారు. ఏళ్లు గడుస్తున్నకొద్దీ ఇది పెద్దసమస్యగా తయారైంది. అందుకే ఈ సమస్యను పరిష్కరించాలని ప్రభుత్వం నిర్ణయం తీసుకుంది. రిజిస్ర్టేషన్‌ చట్టం-1908లోని 22(ఏ1)లో నిషేధిత ఆస్తుల జాబితా నుంచి చుక్కల భూములను తొలగిస్తూ 2017 జూలై 14న ప్రభుత్వం ఉత్తర్వులు జారీ చేసింది. వీటి ప్రకారం... రైతుల ఆధీనంలో సాగులో ఉన్న చుక్కల భూములను ప్రైవేటు పట్టాభూములుగా పరిగణిస్తారు. చుక్కల భూములకు సంబంధించిన సర్వేనంబర్లు, ఇతర వివరాలను రెవెన్యూశాఖ ఆయా జిల్లాల్లోని రిజిస్ట్రేషన్‌ కార్యాలయాలకు పంపుతుంది. ఆ భూములను స్వాధీనంలో ఉంచుకున్నవారు, సాగు చేసుకుంటున్నవారు ప్రభుత్వం నిర్ణయించిన పత్రాలలో ఏదో ఒకటి చూపిస్తే ఆ భూమి వారికి సంబంధించినదిగా రిజిస్టర్‌లో నమోదు చేస్తారు. 2017 జూలై 14వ తేదీకి ముందు 12 ఏళ్లు ఆధీనంలో ఉన్నట్లు ఏవైనా ఆధారాలు చూపినా రిజిస్టర్‌లో వారి పేరు నమోదు చేస్తారు.