news

మహిళల రక్షణకు అత్యంత ప్రాధాన్యం ఇచ్చి ‘శక్తి’ బృందం ద్వారా ఆంధ్రప్రదేశ్‌ను సురక్షితమైన, ఆనందకరమైన రాష్ట్రంగా తీర్చిదిద్ది ప్రజల్లో ఆత్మవిశ్వాసం పెంపొందిస్తామని డీజీపీ ఆర్‌.పి.ఠాకూర్‌ పేర్కొన్నారు. రాష్ట్రంలో చేరువ కార్యక్రమాల్లో భాగంగా ప్రవేశపెట్టిన ‘శక్తి’ టీమ్‌ను సోమవారం సాయంత్రం విజయవాడలో ఆయన ప్రారంభించారు. కార్యక్రమానికి ముఖ్యఅతిథిగా హాజరైన డీజీపీ ఆర్‌.పి.ఠాకూర్‌ మాట్లాడుతూ ఆత్మవిశ్వాసం, శిక్షణ, అంకితభావంతో పనిచేసేలా మహిళలతో ఒక బలమైన శక్తి టీం ఏర్పాటు చేశామన్నారు. ఈ బృందానికి కమ్యూనికేషన్‌ స్కిల్స్‌, ఆత్మరక్షణ పద్ధతులు, ఈత, డ్రైవింగ్‌ తదితర అంశాల్లో పూర్తిగా శిక్షణ ఇచ్చినట్లు తెలిపారు.

శక్తి బృందం మహిళలకు పూర్తి భరోసా ఇస్తుందని వివరించారు. వివిధ జిల్లాల్లో రకరకాలుగా పిలిచే పోలీసింగ్‌ను ఇక నుంచి శక్తిగా పిలుస్తారన్నారు. నేటి నుంచి ఈ బృందమే ప్రజల వద్దకు వెళ్తుందని తెలిపారు. యువతలో ఆత్మవిశ్వాసం పెంపొందించేందుకు వారికి సలహాలు, సూచనలు ఇచ్చేందుకు త్వరలో ఒక హెల్ప్‌లైన్‌ ఏర్పాటు చేస్తామని తెలిపారు. అనంతరం శక్తి లోగోను డీజీపీ ఆవిష్కరించారు. ఈ కార్యక్రమంలో అదనపు డీజీపీ (శాంతిభద్రతలు) హరీష్‌గుప్తా, అదనపు డీజీపీ (సీఐడీ) అమిత్‌గర్గ్‌, విజయవాడ పోలీస్‌ కమిషనర్‌ ద్వారకా తిరుమలరావు, జిల్లా పరిషత్‌ ఛైర్‌పర్సన్‌ గద్దె అనురాధ, విజయవాడ క్రైం డీసీపీ, శక్తి బృందం ఇన్‌ఛార్జి బి.రాజకుమారి తదితరులు పాల్గొన్నారు.

సాంకేతిక పరిజ్ఞానం ఉండటం వేరు దానిని అందుబాటులోకి తెచ్చుకుని సద్విని యాగం చేయడం వేరు. ఆంధ్రప్రదేశ్‌లో అదే సరిగ్గా జరిగింది. సంక్షేమ ఫలాలు అందరికీ చేరుతున్నాయా? లేదా? ఫైళ్లు వేగంగా కదులుతున్నాయా? లేదా? ఇలా అన్ని పనుల్లోనూ ఎంతో కీలకంగా ఉన్న ఆర్టీజీఎస్‌ ఇప్పుడు తుపాను నాడినీ పట్టేసింది. పెథాయ్‌ అల్పపీడనం నుంచి పెను తుపానుగా మారి తీరం దాటేదాకా ఆర్టీజీఎస్‌ రాత్రింబవళ్లు సమీక్షించింది. తాజా సమాచారాన్ని ఎప్పటికప్పుడు ముఖ్యమంత్రి చంద్రబాబు, ప్రభుత్వ ప్రధాన కార్యదర్శి, జిల్లా కలెక్టర్లు, ఇతర ఉన్నతాధికారులకు అందిస్తూ అప్రమత్తం చేసింది. సాంకేతికతను అందిపుచ్చుకుని పెథాయ్‌ తుపాన్‌కు ప్రభుత్వం స్పందించిన తీరు భారీ నష్టాలను కట్టడి చేయ గలిగింది. అంతే కాకుండా ముందస్తు చర్యలు బాధితులకు పెను నష్టం జరగకుండా నివారించగలిగాయి.

మూడు రోజుల ముందుగానే తుపాను కదలికలను పసిగట్టడం అందుకు తగ్గట్టుగా యంత్రాంగాన్ని మోహరిం చడం తుఫాను తీరాన్ని దాటాక జరిగిన నష్టం ప్రభావం ఎక్కువగా బాధితులపై పడకుండా చూడటంలో యంత్రాం గం సఫలీకృతమైంది. ప్రభావం ఎక్కువగా ఉన్న తూర్పు గోదావరి జిల్లాలో ప్రాథమిక సమాచారం ప్రకారం 52 చోట్ల చెట్లు కూలితే వెంటనే ఆ మార్గాలను సుగుమం చేయడం విశేషం. అలాగే దాదాపు 200 వరకు విద్యుత్‌ స్థంభాలు దెబ్బ తింటే వెంటనే వాటిని పునరుద్ధరించే కార్యక్రమం చేపట్టారు. లక్షలాది మందికి ఫోన్‌ కాల్స్‌ వెళ్లడంతో అవి ఎంతో ఉపకరించాయని ప్రజలే స్వయంగా చెబుతున్నారు. ఆయా ప్రాంతాల ప్రజలు సమీపంలోని పునరావాస కేంద్రాల్లో తల దాచుకోవడం, సురక్షిత ప్రాంతాలకు వెళ్లడం జరిగి పోయాయి. కోత యంత్రాలు, టార్పాలిన్లు కావాలని 1100 కాల్‌సెంటర్‌కు రైతుల నుంచి ఫోన్లు రావడంతో వెంటనే అధికారుల దృష్టికి తీసుకెళ్లి గుంటూరుకు 13, కృష్ణాకు 20 యంత్రాలు పంపేలా చర్యలు తీసుకుంది. సహాయ చర్యల్లో భాగంగా ఆది, సోమవారాల్లో 10వేల టార్పాలిన్లు అందించారు.

ఆంధ్రప్రదేశ్‌లో సాంకేతిక విప్లవానికి పునాదులు వేసిన రియల్‌ టైమ్‌ గవర్నెన్స్‌ ముఖ్యమంత్రి చంద్రబాబు వినూత్న ఆలోచనలకు ప్రత్యక్ష సాక్ష్యం. ఒక్క మాటలో చెప్పాలంటే చంద్రబాబుకు ఆర్టీజీఎస్‌ ఓ ఆయు ధం. భూగర్భ జల మట్టాల మొదలుకొని వాతావరణంలోని మార్పులను సైతం ఇట్టే పసిగట్టి ఆధునిక సాంకేతిక విధానంతో ప్రజలను ప్రకృతి విపత్తుల నుండి కాపాడేందుకు ఆర్టీజీఎస్‌ ఎంతగానో దోహదపడుతుంది. తిత్లి, పెథాయ్‌ విపత్తులను ఆంధ్రప్రదేశ్‌ ప్రభుత్వం ధీటుగా ఎదుర్కొందంటే అందుకు ఆర్టీజీఎస్‌ సేవలు కారణం. తిత్లి తుఫాను వజ్రపుకొత్తూరు తీరం దాటుతుందని రెండు రోజుల ముందే ఆర్టీజీఎస్‌ పసిగట్టింది. ఆ దిశగా ప్రభుత్వ యంత్రాంగాన్ని అప్రమత్తం చేసింది. తిత్లి భీభత్సానికి విజయనగరం, విశాఖ జిల్లాలకు బయట ప్రపంచంతో సంబంధాలు తెగిపోగా కేవలం ఒక్క రోజు వ్యవధిలోనే ఫోన్‌ కమ్యునికేషన్‌ పునరుద్ధరించగలిగారంటే ఆ అద్భుతం రియల్‌ టైమ్‌ గవర్నెన్స్‌తోనే సాధ్యమైంది.

‘రాష్ట్రంలో పెథాయ్‌ తుపాన్‌ బాధితులకు ఈ నెల 20వ తేదీనే నష్టపరిహారాన్ని చెల్లిస్తాం. నష్టపోయిన రైతులకు పెట్టుబడి రాయితీని కూడా అదేరోజున అందజేస్తాం. 19వ తేదీ సాయంత్రానికి పంట, ఇతర నష్టాలు అన్నింటిపైనా గణన పూర్తి చేస్తాం. మంగళవారం సాయంత్రానికి విద్యుత్తు, నీటి సరఫరా వంటివన్నీ పునరుద్ధరిస్తాం. 20వతేదీ నాటికి ఇతర పనులన్నింటినీ పూర్తి చేస్తాం...’ అని ముఖ్యమంత్రి చంద్రబాబునాయుడు వెల్లడించారు. మృతుల కుటుంబాలకు పరిహారం అందిస్తామన్నారు. తుపాను ప్రభావిత ప్రాంతాల్లో జరిగిన నష్టానికి సంబంధించిన వివరాలను ప్రజలు తమ ఫేస్‌బుక్‌, ట్విటర్‌ ఖాతాల ద్వారా అధికారుల దృష్టికి తీసుకొచ్చేందుకు ప్రభుత్వం ఏర్పాట్లు చేసింది. ఇందుకోసం 13 జిల్లాలకు అధికారిక ఫేస్‌బుక్‌, ట్విటర్‌ ఖాతాలను రూపొందించింది. అయితే కేవలం రెండు రోజుల్లో పంట నష్టం పరిహారం ఇస్తామని చంద్రబాబు చెప్పటంతో, విలేకరులు అవాక్కయ్యారు.

నష్టం అంచనాపై ఆర్టీజీ రెండు మొబైల్‌ యాప్‌లను రూపొందించింది. ఒకటి అధికార యంత్రాంగానికి, మరొకటి ప్రజల కోసం అందుబాటులో ఉంచింది. అధికారులు వాటి ద్వారా నష్టం ఫొటోలు, వివరాలు పంపాలని ప్రభుత్వం ఆదేశించింది. తుపాన్‌ ప్రభావిత ప్రాంతాల్లో నెలకొన్న పరిస్థితులు, పునరుద్ధరణ చర్యలపై సోమవారం రాత్రి వరకు సచివాలయంలో ఆయన అధికారులతో సమీక్షించారు. అనంతరం ముఖ్యమంత్రి విలేకరుల సమావేశంలో మాట్లాడారు. పెథాయ్‌ చిన్న తుపాను అయినప్పటికీ ఈ అనుభవాన్ని డాక్యుమెంట్‌ చేసి రేపటి అవసరాలకు సిద్ధం చేయాలని అధికారులకు ముఖ్యమంత్రి సూచించారు. హుద్‌హుద్‌, తిత్లీ తుపాను అనుభవాలతో పెథాయ్‌పై అప్రమత్తమై క్షేత్రస్థాయిలో అందరినీ సిద్ధం చేయడంలో సఫలమయ్యామని అన్నారు.

తుపాను ముందు జాగ్రత్తలు, సహాయచర్యల్లో పాల్గొన్న 51 మంది ఐఏఎస్‌లకు ముఖ్యమంత్రి అభినందనలు తెలిపారు. పని ఎక్కువగా లేనందున అందరినీ వెనక్కి రప్పిస్తున్నామని, మంగళవారంనుంచి ఆయా జిల్లాల యంత్రాంగాలే సహాయ చర్యల్లో పాల్గొనాలని చంద్రబాబు ఆదేశించారు. తాగునీరు, ఆహారం అందుబాటులో ఉన్నాయా? అనే అంశంపై ప్రజాభిప్రాయాన్ని తీసుకుంటే 95 శాతానికిపైగా ప్రజలు సానుకూలంగా స్పందించారని వివరించారు. ఇలాంటి విపత్తుల్లో ప్రజలను భాగస్వాములను చేస్తే సత్ఫలితాలు వస్తాయని, ప్రభుత్వం అనుసంధానకర్తగా మాత్రమే వ్యవహరించాలని అభిప్రాయపడ్డారు. తుఫానుకు మూడ్రోజుల ముందే తూర్పుగోదావరి జిల్లా కలెక్టర్‌ కార్తికేయ మిశ్రా సన్నద్ధమయ్యారు. చురుకైన అధికారులతో సైక్లోన్‌ టీంను ఎంపిక చేసుకున్నారు.