news

తన సర్టిఫికెట్లతో ఉన్న బ్యాగును పోగొట్టుకుని తిరిగి బ్యాగును దక్కించుకున్న ఓ తమిళనాడు వాసి ఎపిఎస్ ఆర్టీసికి, ముఖ్యమంత్రికి ధన్యవాదాలు తెలుపుతూ సిఎం కార్యాలయానికి మెయిల్ చేశారు. దీనికి సంబంధించిన వివరాలను ఆర్టీసీ అధికారులు శనివారం ఒక ప్రకటనలో వెల్లడించారు. ఎపిఎస్ఆర్టీసీ బస్సులో చెన్నైకి ప్రయాణించిన తమిళనాడు వాసి తన ఒరిజినల్ సర్టిఫికెట్లు ఉన్న బ్యాగును బస్సులో మర్చిపోయాడు. తొలుత కోయంబేడు, పొన్నేరి బస్టాండ్లలో బ్రాంచ్ మేనేజర్ల ద్వారా, తమిళనాడు ఆర్టీసీ వెబ్ సైట్ ద్వారా ఆర్టీసికి సంబంధించిన కాంటాక్ట్ వివరాలను తెలుసుకునేందుకు ప్రయత్నించినా ఫలితం లేకుండా పోయింది. చివరికి ఎపిఎస్ఆర్టీసి హెల్ప్లైన్ నంబరుకు ఫోన్ చేశారు.

దీంతో ఎపిఎస్ఆర్టీసి సిబ్బంది వెంటనే స్పందించిమ, బస్సు డ్రైవర్ నెంబరును, బస్సు ఉన్న ప్రాంతాన్ని ఆన్లైన్ ద్వారా ట్రేస్ చేసి సిబ్బంది ఇచ్చారు. దాంతో ఆ ప్రయాణికుడు తన బ్యాగును సురక్షితంగా తీసుకోగలిగాడు. ఎపిఎస్ఆర్టీసి బస్సుల్లో ఏర్పాటు చేసే జీపీఎస్ వ్యవస్థ ద్వారా, బస్సు ఎక్కడ ఉందో ట్రేస్ చేసే అవకాసం ఉండటంతో, వెంటనే బస్సు ఎక్కడ ఉందో కనిపెట్టారు. దీంతో ఆటను కృతజ్ఞత తెలుపుతూ, ఫేస్ బుక్ లో తన అనుభవం పంచుకోవటమే కాకుండా, ముఖ్యమంత్రి చంద్రబాబుని, ఎపిఎస్ఆర్టీసి సిబ్బంది ప్రశంసిస్తూ, ఆంధ్రప్రదేశ్ ప్రభుత్వానికి ఈమెయిల్ కూడా రాసి, తన కృతజ్ఞత తెలుపుకున్నాడు. ఇలాంటి సంఘటనే మరొకటి కూడా జరిగింది. మరో సందర్భంలో, పరీక్షకు హాజరయ్యేందుకు ఆర్టీసీ సిబ్బంది సహకరించారు. ఆ వివరాలు ఇలా ఉన్నాయి.

పరీక్షకు హాజరయ్యేందుకు బయలేరి, బస్సు సమయానికి చేరుకోలేక బస్సును మిస్సయ్యి నిస్సహాయ స్థితిలో ఉన్న తన కుమారునికి ఆర్టీసీ సిబ్బంది సహకరించడం పై ఓ తండ్రి ఆర్టీసి ఏండీలో ధన్యవాదాలు తెలిపారు. డిసెంబర్ 7న విజయవాడ నుంచి బెంగళూరు వెళ్లేందుకు స్నేహితులిద్దరూ బస్సుల్లో సీట్లు బుక్ చేసుకున్నారు. ట్రాఫిక్ వల్ల బస్సు సమయానికి చేరుకోలేకపోయారు. నిస్సహాయ స్థితిలో ఉన్న వారు తాము చాలా ముఖ్యమైన పరీక్షకు వెళ్లాలనీ, ఎలాగైనా సాయం చేయాలనీ ఆర్టీసి కంట్రోలర్ లక్ష్మణరావును వేడుకున్నారు. సర్వీస్ బస్సులో ఎస్ఆర్ షీటులో నమోదు చేసి ఇద్దరినీ బెంగళూరుకు పంపారు. తన కుమారుడు పరీక్షకు హాజరయ్యేందుకు సహకరించిన ఆర్టీసికి మోహన్ ధన్యవాదాలు తెలుపుతూ ఉద్వేగపూరితమైన ఇమెయిల్ ను పంపినట్లు ఆర్టీసీ అధికారులు వెల్లడించారు. అంకిత భావంతో వ్యవహరించిన కంట్రోలర్ లక్ష్మణరావును ఆర్టీసి ఏండీ సురేంద్రబాబు అభినందించారు. ఆయనను ఆదర్శంగా తీసుకుని సిబ్బంది అందరూ ప్రయాణికులకు సేవలందించాలన్నారు.

పెథాయ్‌ తుపాను ప్రజానీకానికి కంటి మీద కునుకులేకుండా చేస్తోంది. తీవ్ర తుపానుగా మారిన ‘పెథాయ్‌’‌ ప్రస్తుతం కాకినాడ‌కు 200 కిలోమీట‌ర్ల దూరంలో కేంద్రీకృత‌మై ఉంది. ఇది గంటకు 19 కి.మీ వేగంతో తూర్పుగోదావ‌రి జిల్లావైపు వేగంగా క‌దులుతోంది. ఈరోజు మధ్యాహ్నం నుంచి సాయంత్రంలోపు తుని-యానాంల మ‌ధ్య తీరం దాటే అవకాశం ఉంది. తీరం దాటే సమయంలో గంట‌కు 100 నుంచి 110 కిలోమీట‌ర్ల వేగంతో కూడిన బ‌ల‌మైన గాలులు వీస్తాయని వాతావరణ శాఖ అధికారులు తెలిపారు. మరో పక్క, పెథాయ్ తుఫానుతో కోస్తా తీరంలోని జిల్లాల్లో ఒక్కసారిగా వాతావరణంలో మార్పులు చోటు చేసుకున్నాయి. నెల్లూరు జిల్లా తుమ్మలపెంట, హంసలదీవి, బాపట్ల, బోగాపురం, ఉప్పాడలో 50 అడుగుల మేర సముద్రం ముందుకు వచ్చింది.

ఈదురుగాలుల ధాటికి దివిసీమలో 10 వేల ఎకరాల్లో వరికి నష్టం వాటిల్లింది. అటు నిజాంపట్నం ఓడరేవులో అధికారులు 5వ నెంబర్‌ ప్రమాద హెచ్చరికను జారీ చేశారు. తూర్పుగోదావరి జిల్లాలోని 17 మండలాలపై తుపాను ప్రభావం ఉంటుందని అంచనా వేస్తున్నారు. ఈ క్రమంలో జిల్లాలో దాదాపు 283 పునరావాస కేంద్రాలను అధికారులు ఏర్పాటు చేశారు. నిత్యావసరాలను ప్రభుత్వం మండల కేంద్రాలకు తరలించింది. సమాచార వ్యవస్థకు అంతరాయం కలగకుండా జనరేటర్లు ఏర్పాటు చేసింది. కృష్ణా, గుంటూరు, పశ్చిమగోదావరి, తూర్పుగోదావరి, విశాఖ, విజయనగరం, శ్రీకాకుళం జిల్లాలపై పెథాయ్‌ తుఫాను ప్రభావం ఎక్కువగా ఉంది.

పగటిపూట ఉష్ణోగ్రతలు భారీగా పడిపోయాయి. చలి గాలులు ప్రజలను వణికిస్తున్నాయి. తుఫాను హెచ్చరికల నేపథ్యంలో ప్రజలను సురక్షితప్రాంతాలకు తరలించాలని కలెక్టర్లకు సీఎం చంద్రబాబు నాయుడు ఆదేశాలు జారీ చేశారు. ఎలాంటి పరిస్థితినైనా ఎదుర్కొనేందుకు సిద్ధంగా ఉండాలని చంద్రబాబు సూచించారు. పెథాయ్ తుపాను ప్రభావంపై ఏపీ సీఎం చంద్రబాబు నాయుడు సోమవారం ఉదయం టెలికాన్ఫరెన్స్ నిర్వహించారు. ఇది అత్యవసర పరిస్థితిగా భావించాలని, తుపాను ప్రభావిత జిల్లాలలో రెడ్ అలర్ట్ ప్రకటించాలని ఆదేశించారు. అలాగే అధికారులు, సిబ్బంది తప్పనిసరిగా విధులకు హాజరుకావాలన్నారు. విపత్తును ఎదుర్కోవడంపై ప్రతిశాఖ ప్రణాళికలు తయారు చేసుకోవాలని సూచించారు. ముంపు గ్రామాల ప్రజలను సురక్షిత ప్రాంతాలకు తరలించాలని బాబు తెలిపారు. పునరావాస కేంద్రాలలో అన్ని వసతులు కల్పించాలని ఆదేశించారు. తుఫాను కారణంగా కూలిన చెట్లను తొలగించాలని...విద్యుత్ స్థంభాలను వెంటనే పునరుద్ధరించాలన్నారు. సహాయ చర్యలలో పార్టీ నేతలు, కార్యకర్తలు చురుగ్గా పాల్గొనాలని సీఎం చంద్రబాబు పిలుపునిచ్చారు. టెలికాన్ఫరెన్స్‌లో జిల్లాల కలెక్టర్లు, నోడల్ అధికారులు, సిబ్బంది పాల్గొన్నారు.

కోస్తా తీరప్రాంతాన్ని గజగజలాడిస్తున్న పెథాయ్‌ తుపానును ఎదుర్కొనేందుకు అధికార యంత్రాంగం సన్నద్ధమైంది. భారత వాతావరణ విభాగం (ఐఎండీ), రియల్‌ టైం గవర్నెన్స్‌ (ఆర్‌టీజీఎస్‌) నుంచి వచ్చే సూచనలతో అధికారులు ఎప్పటికప్పుడు పరిస్థితిని సమీక్షిస్తున్నారు. తూర్పుగోదావరి, విశాఖ జిల్లాల మధ్య తీరం దాటే అవకాశం ఉందని రాష్ట్ర హోంశాఖ, విపత్తుల నిర్వహణ మంత్రి చినరాజప్ప ప్రకటించారు. దీంతో తూర్పుగోదావరి జిల్లాకు సమీపంలోని అయిదు మండలాలపై జిల్లా అధికార యంత్రాంగం పూర్తి దృష్టి సారించింది. రెవెన్యూ మొదలుకొని విద్యుత్తు, ఆరోగ్యం, పంచాయతీరాజ్‌, జలవనరులు, వ్యవసాయ, మత్స్యశాఖలతోపాటు ఇతర శాఖల ఉన్నతాధికారులంతా తీరప్రాంత గ్రామాల బాట పట్టారు. ఆయాశాఖల పరంగా తుపాను ప్రభావిత ప్రాంతాల్లో చేపట్టాల్సిన ముందస్తు ఏర్పాట్లను పరిశీలించారు. ఎటువంటి విపత్తు ఎదురైనా సమర్థంగా ఎదుర్కొనేందుకు అవసరమైన సామగ్రిని, అదనపు సిబ్బందిని ఉంచారు.

తుపాను ప్రభావిత ప్రాంతాల్లో తాగునీటి ఇబ్బందులు తలెత్తకుండా ముందస్తు జాగ్రత్తలను తీసుకుంటున్నారు. తీర ప్రాంతంలో సమగ్ర రక్షిత నీటి పథకాలున్నాయి. గాలులు తీవ్రత..విద్యుత్తు అంతరాయం వల్ల ఈ పథకాలకు నీరందే పరిస్థితి ఉండదని ఆలోచించి ఒక్కో రక్షిత నీటి పథకం వద్ద ఒక్కో పెద్ద జనరేటర్‌ను ఏర్పాటు చేశారు. గ్రామాల్లో తాగునీటి సరఫరా కోసం నీళ్ల ట్యాంకులను మాట్లాడి సిద్ధం చేసుకున్నారు. విపత్కర పరిస్థితులు వస్తే వీటిని గ్రామాలకు పంపిస్తారు. పెథాయ్‌ తీరం దాటే సమయంలో గంటకు వంద కిలోమీటర్ల పైబడి వేగంతో గాలులు వీచే ఆస్కారం ఉందని వాతావరణ శాఖ హెచ్చరికల నేపథ్యంలో తూర్పుప్రాంత విద్యుత్తు పంపిణీ సంస్థ (ఈపీడీసీఎల్‌) అందుకు తగ్గ ముందస్తు ఏర్పాట్లు చేసుకుంది.

గ్రామాల్లో చీకట్లు అలముకోకుండా ఉండేందుకు జనరేటర్లను ఏర్పాట్లు చేస్తున్నారు. స్తంభాలు పడిపోతే వాటి స్థానంలో వెంటనే కొత్తవి వేయడం కోసం 4 వేల స్తంభాలను రాజమండ్రిలో సిద్ధం చేసి ఉంచారు. ఇప్పటికే 500 స్తంభాలు ప్రభావిత ప్రాంతాలకు తరలించారు. సత్వర పునరుద్ధరణ పనుల్లో పాల్గొనే విధంగా 1500 మంది కార్మికులను గుత్తేదారులతో మాట్లాడి ఆయా మండలాల్లో పెట్టారు. అలాగే క్రేనులు కూడా ఎక్కడికక్కడ సిద్ధంగా ఉంచారు. వరిపైరు కోయకుండా పొలాల్లోనే ఉంది. ఈ పంట వర్షంతో కూడిన గాలి వల్ల నేలకొరిగితే కొంత వరకు నష్టం వాటిల్లే అవకాశం ఉందని వ్యవసాయశాఖ అంచనా వేస్తుంది. ఆదివారం ఆ శాఖ రైతులతో సమావేశమై పంట కోతలేవీ ఇప్పుడు పెట్టుకోవద్దని.. నేలకొరిగి నీటి మునిగితే రెండుశాతం ఉప్పు ద్రావణాన్ని పిచికారీ చేసుకోవాలని సూచించారు. వరిపైరు కుప్పలు ఉంటే, వీటిపై వెంటనే టార్పాలిన్లు కప్పుకోవాలన్నారు. గతేడాది టార్పాలిన్లు (పరదాలు) పంపిణీ చేశామని వాటిని ఈ సమయంలో ఉపయోగించుకోవాలని, లేని పక్షంలో కొత్తవి ఇస్తామని చెప్పారు. కోసి పనలుగా ఉన్న వాటిని వెంటనే దిబ్బలు పెట్టించారు.

తుపాను ప్రభావిత ప్రాంతాల్లోని సాగునీటి కాలువలు..చెరువులు గండ్లు పడకుండా ఉండేందుకు ముందస్తు ఏర్పాట్లు చేస్తున్నారు. తుపాను ప్రభావిత మండలాల్లో ప్రత్యేక పారిశుద్ధ్య పనుల కోసం కార్మికులను ఇప్పటికే ఆయా మండలాలకు చేర్చారు. తుపాను సహాయక చర్యల నిమిత్తం ఏజెన్సీ నుంచి ఒక్కో మండలానికి అదనంగా పది మంది చొప్పున కార్యదర్శులకు విధులు అప్పజెప్పారు. ఒక్కో మండలంలో నాలుగు పొక్లెయిన‌్ర్ల చొప్పున పెట్టినట్లు తెలిపారు. తుపాను ప్రభావిత ప్రాంతాల్లో 36 ప్రాథమిక ఆరోగ్య కేంద్రాలున్నాయి. వాటి పరిధిలో నిరాటంకంగా వైద్యసేవలు అందించేందుకు వైద్యుల సెలవులను సైతం రద్దుచేశారు. పశువుల సంరక్షణ వైద్యం కోసం ఒక్కో మండలానికి ఒక్కో సహాయ సంచాలకున్ని ప్రత్యేకాధికారిగా నియమించారు. ప్రతి మండలానికి లారీతో పశువుల దాణాను సిద్ధం చేసి ఉంచుతామని అవసరమైన పక్షంలో వినియోగిస్తామంటున్నారు. మరో పక్క, బియ్యం నిల్వలు కూడా ఎక్కడిక్కడ చేసారు.