news

జమ్ముకశ్మీర్‌ అసెంబ్లీని అర్ధాంతరంగా రద్దు చేయడం, కేంద్రంలో బీజేపీ నేతల ఫాసిస్ట్ చర్యలకు పరాకాష్ఠ అని ఆంధ్రప్రదేశ్ ముఖ్యమంత్రి చంద్రబాబు అన్నారు. జమ్ముకశ్మీర్‌ అసెంబ్లీని నిన్న రాత్రి గవర్నర్ అర్థాంతరంగా రద్దు చేయడాన్ని ఆయన ఖండించారు. గడువు తీరకముందే శాసనసభను రద్దు చేయడం అప్రజాస్వామికమని, కేంద్రంలో నరేంద్ర మోదీ ప్రభుత్వం రాజ్యాంగ వ్యతిరేక చర్యలకు పాల్పడుతోందని మండిపడ్డారు. రాజ్యాంగ నిర్మాతల ఆదర్శాలను కాలరాస్తూ సమాఖ్య స్ఫూర్తికి తూట్లు పొడిచే చర్యలకు పాల్పడుతోందని దుయ్యబట్టారు. భాజపా నిరంకుశ, పెత్తందారీ పోకడలకు ఈ చర్య అద్దంపడుతోందన్నారు. దీన్ని యావత్‌ దేశం ముక్తకంఠంతో ఖండించాలని విజ్ఞప్తి చేశారు.

రాజకీయాలకు అతీతంగా అన్ని పార్టీలు, ప్రజాసంఘాలు, అభ్యుదయ వాదులు ఈ దుశ్చర్యను ఖండించాల్సిన అవసరం ఉందన్నారు. రాజ్యాంగ ఔన్నత్యాన్ని కాపాడే ప్రయత్నం చేయలేదని, రాజ్‌భవన్‌ హుందాతనం ఏమాత్రం కనబడటం లేదన్నారు. నరేంద్ర మోదీ నేతృత్వంలోని బీజేపీ ప్రభుత్వం కేంద్ర, రాష్ట్ర ప్రభుత్వాల మధ్య సంబంధాలను దెబ్బతీస్తోందని చెప్పారు. సర్కారియా కమిషన్ సిఫారసులను బేఖాతరు చేయడమే కాకుండా పూంఛి కమిటీ సిఫార్సులను మోదీ సర్కార్‌ అటకెక్కించిందని ఆరోపించారు. మణిపూర్, గోవా, మేఘాలయాలో ఏవిధంగా ప్రజాతీర్పును కాలరాశారో దేశం మొత్తం చూసిందని, భారతదేశానికి ఉన్న మంచి పేరును చెడగొడుతున్నారని ఆవేదన వ్యక్తంచేశారు.

ప్రపంచానికే తలమానికంగా ఉన్న భారత రాజ్యాంగ ఔన్నత్యాన్ని భాజపా దెబ్బతీస్తోందన్నారు. భారతదేశం నియంతలను భరించదని, పెత్తందారీ పోకడలను అసలే సహించదని వ్యాఖ్యానించారు. ఇలాంటి చర్యలకు తగిన మూల్యం భాజపా చెల్లించక తప్పదని హెచ్చరించారు. రాబోయే ఎన్నికల్లో భాజపాకు తగిన గుణపాఠం చెప్పేందుకు ప్రజలు ఎదురు చూస్తున్నారన్నారు. కేంద్రం చర్యలను దేశం మొత్తం ముక్తకంఠంతో ఖండించాలన్నారు. 56 మంది సభ్యుల బలం ఉందని గవర్నర్‌ను పీడీపీ కోరినా స్పందించకపోవడం దారుణమని వ్యాఖ్యానించారు. అన్నింటి వెనుక బీజేపీ నేతల ప్రమేయం ఉందన్నారు. మోదీ ప్రభుత్వం కేంద్ర, రాష్ట్ర సంబంధాలను దెబ్బతీస్తోందని మండిపడ్డారు.

జమ్ముకశ్మీర్‌లో ప్రభుత్వ ఏర్పాటుకు పీడీపీ-నేషనల్ కాన్ఫరెన్స్‌లు చేతులు కలపడం వెనక పాకిస్థాన్ ప్రమేయం ఉందంటూ చేసిన వ్యాఖ్యలను బీజేపీ జాతీయ ప్రధాన కార్యదర్శి రాంమాధవ్ వెనక్కి తీసుకున్నారు. జమ్ముకశ్మీర్ అసెంబ్లీని ఆ రాష్ట్ర గవర్నర్ సత్యాపాల్ మాలిక్ రద్దు చేశారు. ఈ నేపథ్యంలో రాంమాధవ్ మాట్లాడుతూ.. పీడీపీ-నేషనల్ కాన్ఫరెన్స్ చేతులు కలపడం వెనక పాకిస్థాన్ ప్రమేయం ఉందని, అక్కడి నుంచి వచ్చిన ఆదేశాలతోనే వారు చేతులు కలిపినట్టు తీవ్రస్థాయిలో ఆరోపించారు. రాంమాధ్ వ్యాఖ్యలపై నేషనల్ కాన్ఫరెన్స్ అధినేత, మాజీ ముఖ్యమంత్రి ఒమర్ అబ్దుల్లా తీవ్ర ఆగ్రహం వ్యక్తం చేశారు.

రాంమాధవ్ తాను చేసిన ఆరోపణలను నిరూపించాలని, లేకపోతే బేషరతుగా క్షమాపణలు చెప్పాలని డిమాండ్ చేశారు. రా, ఐబీ, ఎన్ఐఏ తో కానీ లేదా మీ పంజరంలో ఉన్న చిలుక సీబీఐతో కానీ విచారణ జరిపించి... ఆధారాలను ప్రజలు ముందు ఉంచాలని అన్నారు. కపట రాజకీయాలను బీజేపీ మానుకోవాలని హితవు పలికారు. ఒమర్ డిమాండ్‌తో దిగివచ్చిన రాంమాధవ్ తన వ్యాఖ్యలను వెనక్కి తీసుకున్నారు. తన ఆరోపణలు రాజకీయమే తప్ప వ్యక్తిగతం కాదని తేల్చి చెప్పారు. ఎన్సీపీ-పీడీపీలు ప్రభుత్వాన్ని ఏర్పాటు చేసేందుకు ప్రయత్నించి విఫలమయ్యాయని పేర్కొన్నారు. ఆ రెండు పార్టీలు తమ కలయిక నిజమైనదే అయితే వచ్చే ఎన్నికల్లో ఉమ్మడిగా పోటీ చేయాలని రాంమాధవ్ సవాలు విసిరారు.

బుధవారం రాత్రి ఉన్నపళంగా జమ్మూ కశ్మీర్‌ అసెంబ్లీని రద్దు చేస్తూ గవర్నర్‌ సత్యపాల్‌ మాలిక్‌ నిర్ణయం తీసుకున్న నేపథ్యంలో సరిహద్దు రాష్ట్రంలో రాజకీయాలు ఒక్కసారిగా వేడెక్కాయి. అసెంబ్లీని రద్దు చేయడం సరైన నిర్ణయమేనంటూ రామ్‌ మాధవ్‌ గవర్నర్‌ను వెనకేసుకొచ్చారు. దాయాది దేశం ఆదేశాల మేరకే పీడీపీ, నేషనల్‌ కాన్ఫరెన్స్‌ పార్టీలు గత నెలలో జరిగిన స్థానిక సంస్థల ఎన్నికలను బహిష్కరించాయని ఆరోపించారు. కలిసికట్టుగా ప్రభుత్వాన్ని ఏర్పాటు చేయాలని తాజాగా వారికి సరిహద్దు అవతలి నుంచి ఆదేశాలు వచ్చినట్టున్నాయి. వాళ్ల చర్యల వల్లే గవర్నర్‌ ఈ మొత్తం వ్యవహారంలో జోక్యం చేసుకున్నారు… అని రామ్‌ మాధవ్‌ పేర్కొన్నారు. ఈ వ్యాఖ్యలపై కొద్ది సేపట్లోనే అబ్దుల్లా ట్విటర్‌ వేదికగా స్పందించారు. రామ్‌ మాధవ్‌ తన ఆరోపణలను నిరుపించుకోవాలనీ, లేకుంటే క్షమాణలు చెప్పడానికి తగిన మనిషిగా మిగిలిపోతారంటూ ధ్వజమెత్తారు.

భారతీయ జనతా పార్టీ ఉనికి విశాఖపట్నంలోనే కొద్దో గొప్పో ఉంది. గత ఎన్నికల్లో ఇక్కడి నుంచి ఒక ఎంపీతో పాటు మరో ఎమ్మెల్యే కూడా ఎన్నికయ్యారు. మొన్నటి వరకు రాష్ట్ర పార్టీ అధ్యక్షునిగా ఎంపీ కంభంపాటి హరిబాబే వ్యవహరించారు. ఉప రాష్ట్రపతి వెంకయ్యనాయుడిని కూడా పార్టీ పెద్దలు విశాఖ నాయకునిగానే భావిస్తారు. దాంతో రాష్ట్రంలో బీజేపీ రాజకీయాలు విశాఖపట్నం చుట్టూనే పరిభ్రమిస్తుంటాయి. తాజాగా ఆ పార్టీ పార్లమెంటరీ నియోజకవర్గాలకు చేపట్టిన కన్వీనర్ల నియామకం చర్చనీయాంశంగా మారింది. విశాఖపట్నంలో సీనియర్‌ నాయకుడు, రాష్ట్ర పూర్వ అధ్యక్షులు, సిట్టింగ్‌ ఎంపీ హరిబాబు వుండగా కాశీ విశ్వనాథరాజును కన్వీనర్‌గా నియమించింది. ఈ విషయమై రాజకీయ వర్గాల్లో చర్చ జరుగుతోంది.

బీజేపీ తప్పనిసరిగా బరిలో ఉంటుంది. విశాఖపట్నం పార్లమెంటు స్థానం ఆ పార్టీకి చాలా కీలకం. గత ఎన్నికల్లో తెలుగుదేశం పార్టీతో పొత్తు వుండడంతో హరిబాబు సులువుగా విజయం సాధించారు. ఈసారి బీజేపీ ఒంటరిగానే బరిలో దిగాల్సి ఉంటుంది. అటువంటి నేపథ్యంలో హరిబాబును కాదని కాశీ విశ్వనాథరాజును కన్వీనర్‌గా నియమించారంటే...ఏమి జరిగి వుంటుందనే అనుమానాలు తలెత్తుతున్నాయి. పార్టీ ఆదేశిస్తే..మళ్లీ పోటీ చేయడానికి తనకు ఎటువంటి అభ్యంతరం లేదని ఇటీవల ఒకసారి ఎంపీ హరిబాబు విలేకరుల ప్రశ్నకు సమాధానం ఇచ్చారు. పార్టీ వర్గాలు మాత్రం ఆయన పెద్దగా ఆసక్తి చూపడం లేదని చెబుతున్నాయి.

విశాఖ ఉత్తరం ఎమ్మెల్యే విష్ణుకుమార్‌రాజు ఎటు వైపు అడుగులు వేస్తారనే దానిపై రాజకీయ వర్గాల్లో చర్చ జరుగుతోంది. బీజేపీపైరాష్ట్రంలో తీవ్ర వ్యతిరేకత వున్న నేపథ్యంలో ఆయన తన రాజకీయ భవిష్యత్తుపై కీలక నిర్ణయం తీసుకునే అవకాశాలు వున్నాయని ప్రచారం జరుగుతోంది. తెలుగుదేశం పార్టీ నుంచి ఆయనకు ఆహ్వానం వుందని ఆయన సన్నిహితులు చెబుతున్నారు. అయితే ప్రస్తుతం ఎమ్మెల్యేగా, శాసనసభాపక్ష నేతగా చేసి వున్నందున ఈసారి ఎంపీగా పోటీ చేస్తే ఎలా వుంటుందో అనిఆయన అభిమాన వర్గాలు చర్చించుకుంటున్నాయి. ఇదిలావుంటే విశాఖపట్నంలో ఎంపీగా చేసిన దగ్గుబాటి పురందేశ్వరి విశాఖ ఎంపీగా మళ్లీ బరిలో దిగినా ఆశ్చర్యపోవలసిన అవసరం లేదని కొన్నివర్గాలు పేర్కొంటున్నాయి. ఆమెను తాజాగా ఒంగోలు కన్వీనర్‌గా నియమించారు.