news

పశ్చిమ గోదావరి జిల్లాలోని పట్టిసం ఎత్తిపోతల పథకం మోటార్లకు విద్యుత్ సరఫరా అయ్యే కేబుల్ కాలిపోవటంతో మంగళవారం ఉదయం మోటార్లు పూర్తిగా నిలిచిపోయాయి. ఈ సంఘటన ఉదయం 8గంటలకు జరగ్గా, తక్షణం స్పందించిన ఇంజినీరింగ్ అధికారులు కాలిపోయిన కేబుళ్లను సరిచేసి ఉదయం 10.30 గంటలకు తిరిగి మోటార్లను ఆన్‌చేసి గోదావరి నీటిని కుడి కాలువ ద్వారా కృష్ణా జిల్లాకు తరలించే ప్రక్రియను ప్రారంభించారు. కేబుల్స్ కాలిపోయిన మోటార్ల వద్దే కాకుండా విద్యుత్ ప్లాంటు నుంచి మోటార్లకు వచ్చే అన్ని కేబుళ్లను విద్యుత్ శాఖ అధికారులు నిశితంగా పరిశీలించారు.

గత జూన్ నెల నుంచి ఎత్తిపోతలలోని మోటర్లు ఆన్‌చేసి కృష్ణా డెల్టాకు గోదావరి నీటిని తరలించే ప్రక్రియను ప్రారంభించారు. మధ్యలో అధిక వర్షాల కారణంగా రెండుసార్లు మోటర్లను పూర్తిగా నిలిపివేశారు. ఇప్పటి వరకూ కృష్ణా జిల్లాకు 75 టీఎంసీల గోదావరి నీటిని తరలించారు. ప్రస్తుతం గోదావరి నీటి మట్టం 14మీటర్ల వద్ద ఉండగా, మరికొద్దిగా నీటి మట్టం తగ్గితే మోటార్లను పూర్తిగా నిలిపివేసే అవకాశం ఉంది. 2018 ఖరీఫ్‌ సీజన్‌లో తూర్పు కాలువ కింద 99 శాతం, పశ్చిమ కాలువ కింద 98 శాతం చొప్పున మొత్తమ్మీద 98 శాతం మేర ఆయకట్టులో నాట్లు పడ్డాయి. కృష్ణా జిల్లాలో అయితే 5.14 లక్షల ఎకరాలకు గాను 5.32 లక్షల ఎకరాలలో వరి వేశారు.

దాదాపు 18 వేల ఎకరాల మేర అదనంగా ఆయకట్టు సాగులోకి వచ్చింది. కృష్ణా పరివాహక ప్రాంతంలో పెద్దగా నీరు లేకపోయినా పట్టిసీమ నుంచి ఎత్తిపోసి కాలువలకు ఇచ్చారు. గత రెండేళ్ల నుంచి ఇస్తున్నట్లే.. నీటికి ఆటంకాలు లేకుండా చూశారు. ఇప్పటి వరకు కృష్ణా డెల్టాకు మొత్తం 128 టీఎంసీల వరకు నీటిని బ్యారేజి నుంచి విడుదల చేశారు. ఇందులో 75 టీఎంసీలు గోదావరి జలాలు కావడం విశేషం. ఆయకట్టులో దాదాపపు 60 విస్తీర్ణం పట్టిసీమ నీటితోనే సాగైంది. గతంలో ఎకరానికి 35 బస్తాలు వచ్చే దిగుబడి. నేడు పట్టిసీమ పుణ్యమా అని 45నుంచి 50 బస్తాలు వస్తుంది.. రైతన్న ఇంట ధాన్యం సిరులు కురిపిస్తోంది.

ప్రకాశం, గుంటూరు జిల్లాల్లోని రైతాంగానికి గోదావరి జలాలను అందించే లక్ష్యంతో చేపట్టిన గోదావరి -పెన్నా నదుల అనుసంధాన కార్యక్రమాన్ని ఈ నెల 26న ముఖ్యమంత్రి చంద్రబాబునాయుడు శంకుస్థాపన చేయనున్నట్లు రాష్ట్ర జలవనరుల శాఖమంత్రి దేవినేని ఉమామహేశ్వరరావు వెల్లడించారు. విలేఖర్ల సమావేశంలో ఆయన మాట్లాడుతూ ఏడు వేల క్యూసెక్కుల గోదావరి జలాలను నాగార్జునసాగర్ కుడి కాలువలోకి మళ్లించే విధంగా ఈ పథకాన్ని రూపొందించామన్నారు. గుంటూరు జిల్లా నకిరేకల్ వద్ద గోదావరి - పెన్నా నదుల అనుసంధాన కార్యక్రమాన్ని చేపడుతున్నట్లు తెలిపారు. రూ.6020 కోట్ల వ్యయంతో చేపట్టే ఈ పథకాన్ని ఐదు దశల్లో పూర్తి చేస్తామన్నారు. గోదావరి-పెన్నా నదుల అనుసంధానంతో ప్రకాశం, గుంటూరు జిల్లాల్లోని 79 మండలాలకు బంగారు భవిష్యత్తు ఉంటుందన్నారు.

రైతులు రెండు పంటలు పండించుకునే అవకాశాలు స్పష్టంగా ఉంటాయని ఆయన భరోసా ఇచ్చారు. ఈ కార్యక్రమానికి రెండు జిల్లాలలోని రైతులందరినీ ఆహ్వానిస్తున్నట్లు తెలిపారు. కృష్ణానది ఎగువ ప్రాంతాల్లో ఇష్టం వచ్చినట్లుగా చెక్‌డ్యాంలు నిర్మించడంతో ఈ సంవత్సరం సాగర్ ఆయకట్టు రైతులకు సకాలంలో నీరు అందడం లేదన్నారు. ఈ సమస్యలను అధిగమించి రైతాంగాన్ని ఆదుకోవాలన్న లక్ష్యంతో గోదావరి -పెన్నా నదుల అనుసంధాన కార్యక్రమానికి శ్రీకారం చుట్టామన్నారు. ఈ సంవత్సరం సాగర్ ఆయకట్టు కింద ప్రకాశం, గుంటూరు జిల్లాల పరిధిలో 11లక్షల 90వేల ఎకరాల్లో రైతులు పంటలు సాగు చేశారన్నారు.

రైతులు సాగుచేసిన పంటలు కాపాడాల్సిన బాధ్యత ప్రభుత్వంపై ఉందన్నారు. అలాగే ప్రకాశం -గుంటూరు జిల్లాల్లో 750 తాగునీటి చెరువులు కూడా సాగర్ నీటితో నింపామన్నారు. ఇప్పటివరకు సాగర్ నుంచి 70 టిఎంసిల నీటిని రైతాంగానికి అందించామని, మరో 21 టిఎంసిల నీరు రైతులకు అవసరం ఉంటుందని అధికారులు అంచనాలు వేశారని, ఈ నీటిని కూడా త్వరలో అందిస్తామన్నారు. ఒక్క ఎకరం పంట కూడా ఎండిపోకుండా ఆదుకుంటామని రైతాంగానికి భరోసా ఇచ్చారు. వెలుగొండ మొదటి సొరంగం పనులు శనివారం నుంచి తిరిగి ప్రారంభమయ్యాయని, పనులను పూర్తిస్ధాయిలో వేగవంతం చేసి 2019 ఫిబ్రవరి నాటికి వెలుగొండకు నీరు అందిస్తామన్నారు. రెండో సొరంగం పనులు కూడా మరో వారంరోజుల్లో తిరిగి ప్రారంభిస్తామని తెలిపారు. చింతలపూడి ఎత్తిపోతల పథకం పనులు రూ.5వేల కోట్లతో చురుగ్గా సాగుతున్నాయని తెలిపారు. దీనివలన 577 మెగావాట్ల విద్యుత్ ఉత్పత్తి అవుతుందన్నారు. 5 లక్షల 12వేల 159 ఎకరాలకు సాగునీరు అందుతుందన్నారు.

మరోసారి చంద్రబాబు, తెలుగుదేశం నాయకులకు, జాతీయ రాజకీయాల పై స్పష్టత ఇచ్చారు. తనకు ప్రధాని పదవి పై ఆశ లేదని చంద్రబాబు మరోమారు స్పష్టం చేశారు. తాను ప్రధాని అవుతానని పార్టీ నేతలు ఎవరూ ఎక్కడా మాట్లాడవొద్దని సూచించారు. తాను రాష్ట్రాన్ని వదిలేసి దేశం కోసం తిరుగుతున్నానన్న విమర్శల్ని ఖండించారు. రాష్ట్రాన్ని అన్ని రంగాల్లో నంబర్‌ వన్‌గా నిలిపానని చెప్పారు. టీడీపీ నేతలతో టెలీకాన్ఫరెన్స్ సందర్భంగా పలు అంశాలపై చంద్రబాబు కీలక వ్యాఖ్యలు చేశారు. రాష్ట్రంలో తెలుగుదేశం పటిష్టంగా ఉండాలని, తనతో సహా అందరూ బాధ్యతాయుతంగా ఉండాల్సిందేనని స్పష్టం చేశారు.

లీడర్లు అభద్రతకు గురై.. పార్టీని కూడా అభద్రతలోకి నెట్టొద్దని సూచించారు. ప్రతిపక్షాలు కుల, మతాలతో రాజకీయం చేస్తున్నాయని మండిపడ్డారు చంద్రబాబు. బీజేపీ, టీఆర్‌ఎస్‌, వైసీపీ, జనసేన ఒకే తాను గుడ్డలని విమర్సించారు చంద్రబాబు. జగన్, పవన్, కేసీఆర్ ఎప్పుడూ మోడీని విమర్శించరని, బీజేపీయేతర పార్టీలు ఏకతాటిపైకి రావడం వాళ్లకిష్టం లేదని అన్నారు. తెలంగాణలో తెరాస ఎమ్మెల్యేలను ప్రజలు ఎక్కడికక్కడ అడ్డుకుంటున్నారని, ఆ పరిస్థితి లీడర్లు తెచ్చుకోవద్దని హితవు పలికారు. తెలంగాణలో టీఆర్ఎస్ ఎమ్మెల్యేలను ప్రజలు గ్రామాల్లోకి రానివ్వడం లేదని గుర్తు చేశారు చంద్రబాబు. స్వయం కృతాపరాధమే దీనికి ప్రధాన కారణమని వ్యాఖ్యానించారు. నిత్యం ప్రజలకు అందుబాటులో ఉంటే ప్రజల నుంచి తిరస్కారం ఉండేది కాదన్నారు.

సమర్ధంగా పనిచేసినంత వరకే ప్రజలు ఆదరిస్తారని.. ప్రజా సేవ విషయంలో తనతో సహా ఎవరికీ మినహాయింపు ఉండదని గుర్తు చేశారు. రాష్ట్రంలో టీడీపీ పటిష్టంగా ఉండాలని.. నేతలంతా బాధ్యతగా పనిచేయాలని సూచించారు. సభ్యత్వ నమోదు ఇప్పటి వరకు 16,21,738కు చేరుకుందని.. నమోదులో ఇంకా వేగం పెంచాలన్నారు. గత నాలుగున్నరేళ్లలో ఎంతో మందికి పదవులు ఇచ్చామని.. రాబోయే 5 ఏళ్లలో ఇంతకు మించి పదవులు వస్తాయన్నారు చంద్రబాబు. అభివృద్ధే మనందరి కులమని.. పేదల సంక్షేమమే మన మతమని వ్యాఖ్యానించారు. ప్రతిపక్షాలు కుల, మత విభేదాలతో రాజకీయం చేస్తున్నాయని మండిపడ్డారు. బీజేపీ, వైసీపీ, టీఆర్ఎస్, జనసేన ఒకే తానులో మొక్కలని.. జగన్, కేసీఆర్, పవన్ కళ్యాణ్ ఎజెండా కూడా ఒక్కటనేన్నారు. ఈ ముగ్గురు మోదీని విమర్శించరని.. టీడీపీనే టార్గెట్ చేస్తున్నారని మండిపడ్డారు. బీజేపీయేతర పార్టీలు ఏకతాటిపైకి రాకుండా చేయాలనేదే వీరి లక్ష్యమన్నారు.