news

ఆంద్రప్రదేశ్ సీఎం చంద్రబాబు తన పార్టీ ఎమ్మెల్యేలతో వన్‌ టూ వన్‌ భేటీలు నిర్వహిస్తున్నారు. ఈ సందర్భంగా వారి ఒక్కొకరి పని తీరు పై ఆరా తీస్తున్నారు. వారి ప్రోగ్రెస్‌ రిపోర్టులను చూపించి ఏకరువుపెడుతున్నారు. ఒకవేళ ఏ ఎమ్మెల్యే అయినా లేనిపోనివి కల్పించి చెప్పబోతే నిజంగా ఏమి జరిగిందో చెప్పండంటూ, మీ గురించి నా దగ్గర స్పష్టమైన డాటాని ఉందంటూ, అబద్ధం చెప్పకుండా నిజమే చెప్పాలని వారికి సూచించారు. తనకు అందిన అయిదు సర్వేల నివేదికల నుంచి నివేదిక తీసుకొని సదరు ఎమ్మెల్యేలని ముఖాముఖీ కడిగేస్తున్నారు చంద్రబాబు. దీంతో సదరు ఎమ్మెల్యేలకు గొంతులో వెలక్కాయపడుతోంది.

ఒక్కొక్క ఎమ్మెల్యేలతో, సీఎం సుమారు పదిహేను నిముషాల సేపు మాట్లాడుతున్నారు. వారి వారి నియోజకవర్గంలో పార్టీ ఉన్నపరిస్థితి గురించి అడిగి తెలుసుకున్నారు. ప్రభుత్వం పట్ల ప్రజల్లో ఉన్న అభిప్రాయం, ఎమ్మెల్యే పనితీరును ప్రస్తావిస్తూ నియోజకవర్గంలో ఆ ఎమ్మెల్యేకు ఎవరితోనన్నవిభేదాలు ఉన్నాయా ప్రశ్నించారు. ఇటీవల కోస్తా జిల్లాలకు చెందిన ఓ ఎమ్మెల్యే బాబుతో ముఖాముఖికి వెళ్లారు. ఆ నియోజకవర్గంలో ముఖ్యమంత్రి పని తీరును 76 శాతం మంది మెచ్చుకోగా, ఎమ్మెల్యే పనితీరుపై కేవలం 22 శాతం మందే సంతృప్తిగా ఉన్నారన్న నిర్ధిష్ట సమాచారం సీఎం వద్ద అప్పటికే ఉంది.

దీని పై ఆ ఎమ్మెల్యేని చంద్రబాబు సూటిగా ప్రశ్నించారు. ఆ ఎమ్మెల్యే కొద్దిసేపు ఆశ్చర్యపోయి తన నియోజకవర్గంలో తెలుగుదేశం ప్రభుత్వంపైనే వ్యతిరేకత ఉందని దబాయించే ప్రయత్నం చేశారు. వెంటనే చంద్రబాబు ప్రభుత్వం పై వ్యతిరేఖత ఉంటే నా పనితీరు పై 76 శాతం మంది ప్రజలు ఎలా సంతృప్తి వ్యక్తంచేస్తారని నిలదీశారు. నువ్వు నీ నియోజకవర్గంలో ఉండకుండా హైదరాబాద్‌లో ఎందుకు ఉంటున్నావు' అని సీఎం ప్రశ్నించారు. దీంతో ఆ ఎమ్మెల్యే బిత్తరపోయారు. అంతే కాకుండా పార్టీ క్యాడర్‌తో ఉన్న విభేదాలపై కూడా బాబు ఆ ఎమ్మెల్యే కు షాక్‌లు ఇచ్చారు.

చంద్రబాబు సీరియస్ అవ్వడంతో ఆ ఎమ్మెల్యేకి తత్త్వం బోధపడింది. "వ్యాపార పనుల నిమిత్తమై నియోజకవర్గం నుంచి బయటకు వెళ్లాను'' అని సర్దిచెప్పే ప్రయత్నం చేశారు. "వ్యాపారం చేయవద్దని నేను చెప్పడం లేదు, కానీ నియోజకవర్గంలో ఎందుకు ఉండటం లేదు'' అని చంద్రబాబు మరోసారి గట్టిగా ప్రశ్నించారు. "నీకంటే పెద్ద వ్యాపారవేత్తలే పార్టీలో ఉన్నార''ని గుర్తుచేస్తూ ఆయా నేతల పేర్లను కూడాప్రస్తావించారట. ఈ తరుణంలో చంద్రబాబు ముఖాముఖి భేటీలకు అత్యంత ప్రాముఖ్యత ఏర్పడింది. గతంలో పార్టీ మారి తెలుగుదేశంలోకి వచ్చిన కొందరు ఎమ్మెల్యేలకి కూడా సీఎం చంద్రబాబు గట్టి చురకలు అన్తిస్తున్నారట.

ఉదయాన్నే ఇంటికి వచ్చే ప్రజలను వెయిట్ చేయింఛి, తొమ్మిదిన్నర వరకు బయటకు రాకపోవడం వంటి విషయాల పట్ల ఆగ్రహం వ్యక్తంచేశారు. జిల్లా పార్టీ నేతలతోనూ, ఎంపీలతోనూ ఉన్న విభేదాలను కూడా పక్కనపెట్టి పార్టీ విజయాన్ని వన్‌సైడ్ చేయాలని ఎమ్మెల్యేలకు సీఎం గట్టిగానే సూచిస్తున్నారు. ఈ సారి సుమారు 30 నుంచి 40 మంది సిట్టింగ్‌లకు ఈసారి టిక్కెట్లు ఉండవని విస్తృతంగా ప్రచారం జరుగుతోంది. ఏదేమైనా ఈ భేటీలలో చంద్రబాబు విప్పుతున్న రాజకీయగుట్టు ఎమ్మెల్యేలకు చెమటలు పట్టిస్తోంది. చూద్దాం ఇప్పటికైనా వారిలో మార్పు వస్తుందో లేదో...

బాబ్లీ ప్రాజెక్టు ఆందోళన వ్యవహారంలో ఆంధ్రప్రదేశ్ ముఖ్యమంత్రి చంద్రబాబు నాయుడి పై మహారాష్ట్రలోని ధర్మాబాద్ కోర్టు నాన్ బెయిలబుల్ వారెంట్ జారీ చేసిన సంగతి ప్రస్తుతం రాష్ట్రంలో హాట్ టాపిక్ గా మారింది. ఎప్పుడో 8 ఏళ్ళ నాటి కేసు ఉన్నట్టు ఉండి ఎందుకు తిరగదోడారు ? ఎవరు ఈ పని చేసారు ? ఇప్పుడు ఈ రాజకీయ కక్ష ఎందుకు అనే చర్చ మొదలైంది. ఈ తరుణంలో, చంద్రబాబు స్వయంగా ఈ విషయం పై స్పందించారు. ఈ రోజు మధ్యాహ్నం శ్రీశైలం ప్రాజెక్టు దగ్గర జలసిరికి చంద్రబాబు హారతిచ్చారు. ఈ సందర్భంగా ఆ కార్యక్రమంలో బహిరంగ సభలో మాట్లాడిన ముఖ్యమంత్రి చంద్రబాబు, బాబ్లీ ఎపిసోడ్, నాన్ బెయిలబుల్ వారెంట్ల పై మొదటి సారి స్పందించారు.

"బాబ్లీ ప్రాజెక్టుకు వ్యతిరేకంగా పోరాడాను. ఉత్తర తెలంగాణ ఎడారి అవుతుందని పోరాటం చేశాను. కానీ బాబ్లీ కేసులో నాకు నోటీలిచ్చామని అంటున్నారు. నేను నేరం చేయలేదు.. ఘోరాలు చేయలేదు.. అన్యాయం అస్సలే చేయలేదు. ఉత్తర తెలంగాణ ఎడారిగా మారుతుందని బాబ్లీని వ్యతిరేకించాను. నేనేం తప్పు చేయలేదు.. ఏం చేస్తారో చేయండి అని ఆ రోజే పోలీసులకు చెప్పాను. ఇప్పుడు నోటీసులు.. అరెస్ట్ వారెంట్లు అంటున్నారు. అధికారం ఉన్నా లేకున్నా ప్రజల కోసమే పనిచేస్తాను. ఏ రాజకీయ పార్టీ వల్ల ప్రజల జీవితాల్లో వెలుగు వచ్చిందో ఆలోచించాలి" అని ఈ సందర్భంగా బాబు చెప్పుకొచ్చారు.

ఎనిమిదేళ్ల తర్వాత బాబ్లీ కేసును బయటకు తీయడం ఆశ్చర్యంగా ఉందని ఈ కేసులో చంద్రబాబుతో పాటు నోటీసు అందుకున్న, మంత్రి నక్కా ఆనందబాబు అన్నారు. చంద్రబాబు వెంట ఏపీకి చెందిన 20 మంది ఎమ్మెల్యేలం ఉన్నామని...బాబ్లీకి వ్యతిరేకంగా మహారాష్ట్ర సరిహద్దులో పోరాటం చేశామని తెలిపారు. సరిహద్దులో మహారాష్ట్ర పోలీసులు లాఠీచార్జ్‌ చేసి తమను చితకబాదారని గుర్తు చేశారు. ఆరోజు కేసు ఉపసంహరించుకున్నామని మహారాష్ట్ర పోలీసులు చెప్పారని మంత్రి తెలిపారు. ఆనాడు ఏపీ, మహారాష్ట్ర, కేంద్రంలో కాంగ్రెస్‌ ప్రభుత్వాలు ఉన్నాయని, వాళ్లే మాట్లాడుకుని ఖర్చులు భరించి విమానంలో తమని పంపారని పేర్కొన్నారు. కేసు ఉపసంహరించుకోకుండా తమని ఎలా పంపించారని ఆయన ప్రశ్నించారు. కేసు నమోదు అయ్యిందని బెయిల్‌ ఇచ్చామని కూడా చెప్పలేదన్నారు. కేసు ఉపసంహరించుకోకుండా తమని పంపించిన వారిపై చర్యలు తీసుకోవాలని మంత్రి నక్కా ఆనందబాబు డిమాండ్ చేశారు.

ఆంధ్రప్రదేశ్ ముఖ్యమంత్రి చంద్రబాబుకు ఓ రాజ్యాంగబద్ధ సంస్ధ నుంచి నాలుగైదు రోజుల్లో నోటీసులు అందబోతున్నాయంటూ, నాలుగు రోజుల క్రిందట హీరో శివాజీ కొద్దిరోజుల క్రితం ప్రకటించి కలకలం రేపిన సంగతి తెలిసిందే. శివాజీ చెప్పిన దగ్గర నుంచి రాష్ట్రంలో చర్చ జరుగుతూనే ఉంది. శివాజీ చెప్పినట్టు గానే, 8 ఏళ్ళ క్రిందట కేసు తిరగదోడి, తెలంగాణలో ముందస్తు ఎన్నికలు జరుగుతున్న తరుణంలో చంద్రబాబుకు బాబ్లీ కేసులో మళ్లీ నోటీసులివ్వడం తెలుగు రాష్ట్రాల్లో చర్చకు దారితీస్తోంది. ఈ కేసు అటు మహారాష్ట్ర ఇటు తెలంగాణ, ఏపీకి ముడిపడి ఉంది.

నిజానికి అప్పట్లో చంద్రబాబుపై కేసులను మహారాష్ట్ర ప్రభుత్వం ఉపసంహరించుకుందని మీడియాలో వార్తలు కూడా వచ్చాయి. అయితే తెలంగాణలో ఎన్నికలు జరుగబోతున్న సమయంలో ఇప్పడు ఈ నోటీసుల అంశం తెరపైకి రావడం కొత్త చర్చకు దారితీసింది. అయితే, ఈ రోజు హీరో శివాజీ మరో సారి స్పందించారు. ఈ సారి, మరో పెద్ద బాంబు పేల్చారు. చంద్రబాబుకు మరో రెండుమూడు నోటీసులు రాబోతున్నట్లు చెప్పారు. చంద్రబాబు వారి ట్రాప్‌లో పడకుండా జాగ్రత్తగా ఉండాలని శివాజీ సూచించారు. అతి త్వరలోనే చంద్రబాబుకి ఆ రెండు నోటీసులు రాబోతున్నాయని కూడా చెప్పారు.

ప్రజలు ఎన్నుకున్న ప్రభుత్వాన్ని కూలదోయడం సరికాదని వ్యాఖ్యానించారు. కుర్చీ కాంక్ష మొదలైనప్పుడే విధ్వంసం మొదలవుతుందని శివాజీ చెప్పారు. జనవరిలో ఎన్నికలు వస్తాయని జగన్ ఎలా చెప్పగలుగుతున్నారని ఆయన ప్రశ్నించారు. ఏదో విధంగా చంద్రబాబును ఒంటరి చేసి, ప్రభుత్వాన్ని కూలదోయాలని చూస్తున్నారని ఆరోపించారు. దేశంలో మోదీకి ఎదురుగా నిలబడ్డ వ్యక్తి చంద్రబాబు ఒక్కరేనని శివాజీ వ్యాఖ్యానించారు. ఐక్యరాజ్యసమితిలో మాట్లాడే అవకాశం చంద్రబాబుకు దక్కడం తెలుగుజాతికి గౌరవమని శివాజీ అభిప్రాయపడ్డారు.