news

సహజంగా పార్లమెంట్ లో రాష్ట్రానికి సంబందించిన ప్రశ్నలు ఎంపీలు అడుగుతూ ఉంటారు. రాష్ట్రంలో వివిధ ప్రాజెక్ట్ ల పురోగతి, కేంద్రం నుంచి రావాల్సిన నిధులు, కేంద్రం రాష్ట్రానికి ఇచ్చే డబ్బులు, ఇలా రకరకాల ప్రశ్నలు వేస్తూ ఉంటారు. సహజంగా అధికారంలో ఉన్న పార్టీ , తమ గొప్ప చెప్పుకునే విధంగా, ప్రశ్నలు వేస్తూ ఉంటుంది. అలాగే ప్రతిపక్ష పార్టీ, అధికార పక్షాన్ని ఇరుకున పెట్టే ప్రశ్నలు వేస్తుంది. ఇది సహజంగా అన్ని రాష్ట్రాల ఎంపీలు కేంద్రాన్ని ప్రశ్నలు అడిగే తీరు. అయితే వైఎస్ఆర్ కాంగ్రెస్ పార్టీ ఎంపీలు మాత్రం, తమ ప్రభుత్వానికి మంచి కంటే, చెడు చేసే ప్రశ్నలు వేస్తూ, టిడిపి పాత్ర కూడా వారే పోషిస్తున్నారు. ఇది తెలియక చేస్తున్నారో, సమాచారం లేక చేస్తున్నారో, లేదా అత్యుత్సాహంతో చేస్తున్నారో కానీ, ఎంపీలు అడిగే ప్రశ్నలు, కేంద్రం చెప్పే సమాధానాలతో, జగన్ సర్కార్ డొల్లతనం బయట పడుతుంది. ఇక వివరాల్లోకి వెళ్తే, 2019లో హైదరాబాద్ లో దిశ సంఘటన జరిగిన తరువాత, ఏపి ప్రభుత్వం మహిళల కోసం అని దిశ చట్టం తీసుకుని వచ్చింది. ఇప్పటికే అనేక చట్టాలు ఉండగా, అవి సరిగ్గా ఉపయోగిస్తే చాలు, ఈ చట్టం, చట్ట ప్రకారం నిలబడదు, ఇది కేవలం ప్రచారం కోసం చేస్తున్న హడావిడి అని అనేక మంది అప్పట్లోనే విమర్శలు చేసినా, వైసీపీ సర్కార్ వినిపించుకోలేదు.

వైసీపీ ప్రతి విషయంలో చేసిన అతి ఎలా బెడిసికొడుతుందో, ఇది కూడా అలాగే రివర్స్ అయ్యింది. ఈ చట్టాన్ని కేంద్రం ఆమోదించకుండా, కొన్ని అభ్యంతరాలు తిప్పి పంపింది. అంటే ఈ చట్టం అమలులో లేనట్టే కదా. అయినా దిశ చట్టం ప్రకారం శిక్షలు విధించాం అంటారు, దిశ పోలీస్ స్టేషన్ లు అంటారు, దిశ వాహనాలు అంటారు, దిశ యాప్ అంటారు, లేని చట్టం మీద, గత రెండేళ్లుగా హడావిడి చేస్తున్నారు. ఇదే విషయం ఇప్పుడు కేంద్రం పార్లమెంట్ లో చెప్పిన సమాధానంతో బట్టబయలు అయ్యింది. వైసీపీ ఎంపీ గోరంట్ల మాధవ్ దిశ చట్టం ఆమోదం గురించి కేంద్రాన్ని ప్రశ్నించగా, కేంద్రం హోంశాఖ సమాధానం ఇస్తూ, దిశ బిల్లు పై పలు అభ్యంతరాలు ఉంటే, రాష్ట్ర ప్రభుత్వానికి తిప్పి పంపామని, అయితే ఇప్పటి వరకు తాము లేవనెత్తిన అభ్యంతరాలకు రాష్ట్ర ప్రభుత్వం తిరిగి వివరణ ఇవ్వలేదని, ఎలాంటి స్పందన రాలేదని, తమ సమాధానంలో తెలిపింది. మరి ఇంత ప్రచారం చేస్తున్న రాష్ట్ర ప్రభుత్వం, ఎందుకు అభ్యంతరాలకు సమాధానం చెప్పలేదు, ఎందుకు బిల్లు ఆమోదం చేపించలేదు అనేది, మిలియన్ దాలర్ల ప్రశ్న.

ఆంధ్రప్రదేశ్ జీవనాడి పోలవరం ప్రాజెక్ట్, గత చంద్రబాబు హయాంలో పరుగులు పెట్టింది. ఏమి లేని చోట, దాదాపుగా 72 శాతం పనులు చేసి, చంద్రబాబు ఆశ్చర్య పరిచారు. మరో ఆరు నెలలు చంద్రబాబు ప్రభుత్వం ఉండి ఉంటే, గ్రావిటీ ద్వారా నీళ్ళు వచ్చే అవకాసం ఉండేది. అయితే జగన్ మోహన్ రెడ్డి ప్రభుత్వం వచ్చిన తరువాత, రివర్స్ టెండరింగ్ అంటూ, మొదలు పెట్టటంతో, ప్రాజెక్ట్ దాదాపుగా ఏడాది పాటు ఆగిపోయింది. తరువాత అయినా వేగం పెంచారా అంటే, ఏదో చేస్తున్నాం అంటే చేస్తున్నాం అనిపిస్తున్నారు. మరో పక్క కేంద్రం నుంచి వరుస షాకులు వస్తున్నాయి. ముఖ్యంగా ప్రాజెక్ట్ నిర్మాణ వ్యయం విషయంలో, గత చంద్రబాబు హయాంలో ఒప్పుకున్న వాటిని కూడా ఇప్పడు ఒప్పుకోవటం లేదు. ఇది ఇలా ఉంటే ఈ రోజు రాజ్యసభ సాక్షిగా పోలవరం ప్రాజెక్ట్ కు మరో షాక్ ఇచ్చింది కేంద్రం. వైసీపీ ఎంపీ విజయసాయి రెడ్డి అడిగిన ప్రశ్నకు, కేంద్రం షాకింగ్ సమాధానం ఇచ్చింది. విజయసాయి రెడ్డి అడిగిన ప్రశ్నకు కేంద్ర జల శక్తి మంత్రి సమాధానం ఇస్తూ, పోలవరం వ్యయం విషయంలో, 2014లో ఏ రేటు అయితే ఉందో, అదే రేటు ప్రకారం, కేంద్రం నిధులు ఇస్తుందని తేల్చి చెప్పారు. 2014 తరువాత పెరిగిన అంచనాలను కేంద్రం చెల్లించలేదు అంటూ, మంత్రి షాకింగ్ సమాధనం ఇచ్చారు.

ఆ పెరిగిన ఖర్చు అంతా రాష్ట్ర ప్రభుత్వమే భరించాలని తేల్చి చెప్పారు. డిజైన్ మార్పు వల్ల, పోలవరం హెడ్ వర్క్స్ అంచనాలు పెరిగాయని, ఆ ఖర్చుని కేంద్ర ప్రభుత్వం భరించలేదని తేల్చి చెప్పారు. హెడ్ వర్క్స్ పనుల్లో డిజైన్ మార్పుల వల్ల రూ.5,535 కోట్ల నుంచి రూ.7,192 కోట్లకు పెరిగింది. అయితే ఈ అంచనా కూడా తమకు సంబంధం లేదని చెప్పారు. ప్రాజెక్ట్ డిజైన్ల బాధ్యత కూడా రాష్ట్ర ప్రభుత్వానిదే అని మంత్రి తేల్చి చెప్పారు. అయితే ఆ డిజైన్ లు నిబంధనలు ప్రకారం ఉన్నాయో లేవో, సిడబ్ల్యుసి చూస్తుందని అన్నారు. ఇవన్నీ చెప్తూనే, పెరిగిన అంచనాలు మాత్రం కేంద్ర ప్రభుత్వానికి సంబంధం లేదని, అది రాష్ట్ర ప్రభుత్వమే భరించాలని అన్నారు. అయితే సుమారుగా 55 వేల కోట్ల వరకు పోలవరం ప్రాజెక్ట్ ఖర్చు అవుతుందనే అంచనాల మధ్య, కేలవం 20 వేల కోట్లకే పరిమితం అయితే, రాష్ట్ర ప్రభుత్వం అంత భారం వెచ్చించి, ఈ ప్రాజెక్ట్ నిర్మాణం చేయగలుగుతుందా అనే సందేహం వ్యక్తం అవుతుంది. అయితే గత నాలుగు రోజులుగా హడావిడి చేస్తున్న మన ఎంపీలు,ఈ అంశం పై, వెల్ లోకి దూసుకువెళ్లి పోరాటం చేస్తారో లేదో చూడాలి.

ఆంధ్రప్రదేశ్ హైకోర్టు, ఈ రోజు మాన్సాస్ ట్రస్ట్ ఈవో పై, తీవ్ర ఆగహ్రం వ్యక్తం చేసింది. తమ ఆదేశాలు పాటించకపోవటమే కాకుండా, వాటిని ఉల్లంఘించటం, ఉద్యోగులకు జీతాలు ఇవ్వకుండా ఉండటం పై ఆగ్రహం వ్యక్తం చేసింది. మాన్సాస్ ట్రస్ట్ ఈవో కావాలని ఉద్యోగులను ఇబ్బంది పెడుతున్నారని, హైకోర్టు ఆదేశాలు పాటించటం లేదని, మాన్సాస్ చైర్మెన్ అశోక్ గజపతి రాజు హైకోర్టులో పిటీషన్ దాఖలు చేసారు. ఈ పిటీషన్ పై నిన్న విచారణ జరిగి, ఈ రోజుకు వాయిదా పడింది. ఈ రోజు విచారణ సందర్భంగా అశోక్ గజపతి రాజు తరుపు న్యాయవాదులు, సీతారామమూర్తి, అశ్వినీ కుమార్ వాదనలు వినిపించారు. ఈ వాదనలు సందర్భంగా హైకోర్టు మాన్సాస్ ఈవోని నిలదీసింది. ఈవో పాత్ర ఏమిటి, ఈవో బాధ్యతులు ఏమిటి, పరిమితులు ఏమిటో కూడా చెప్పాలని ప్రభుత్వ న్యాయవాదిని ప్రశ్నించింది. ఈ నేపధ్యంలోనే హైకోర్టు ఆర్డర్ ను మీరు ఎందుకు అమలు చేయలేక పోతున్నారో చెప్పాలని, ఈవోని హైకోర్టు ప్రశ్నించింది. దీంతో పాటు ఇక నుంచి ఈవో, చైర్మెన్ ఏవైతే ఆదేశాలు ఇస్తారో, ఆ ఆదేశాలు తప్పనిసరిగా పాటించి తీరాల్సిందే అని హైకోర్ట్ స్పష్టం చేసింది. హైకోర్టు ఇచ్చిన ఉత్తర్వులు ఒకసారి చదువుకోవాలని అని, గతంలో ఇచ్చిన తీర్పుని ఈ సందర్భంగా హైకోర్టు గుర్తు చేసింది. అదే విధంగా మాన్సాస్ ట్రస్ట్ ఈవో వెంకటేశ్వర రావు, చైర్మెన్ కు లెటర్లు రాసే ముందు ఇష్టం వచ్చినట్టు రాయవద్దు అని చెప్పి, హైకోర్టు హెచ్చరికలు జారీ చేసింది.

హైకోర్టు ఇచ్చిన జడ్జిమెంట్ ని పూర్తిగా చదివి, దాన్ని పూర్తిగా అవగాహన చేసుకున్న తరువాత మాత్రమే లేఖలు రాయాలని చెప్పి, స్పష్టం చేసింది. అయితే ఈ సందర్భంగా ఆడిట్ పేరుతో, ఎవరు ఎవరో వచ్చి, మాన్సాస్ ట్రస్ట్ లో రికార్డులు పరిశీలిస్తున్నారని, ఇది సమంజసం కాదని, ఇది నిబంధనలకు విరుద్ధం అని, అశోక్ గజపతి రాజు తరుపు న్యాయవాదులు ఇద్దరూ కూడా రాష్ట్ర హైకోర్టు దృష్టికి తీసుకొచ్చారు. దీంతో హైకోర్టు ఒక్కసారిగా ఆగ్రహం వ్యక్తం చేసింది. అసలు ఆడిట్ తో ఈవోకి సంబంధం ఏమిటి అంటూ హైకోర్టు ప్రశ్నించింది. ఆ జిల్లా ఆడిట్ అధికారి మాత్రమే , ఆడిట్ నిర్వహించేందుకు అర్హుడని, ఆయనకు మాత్రమే రికార్డులు సమర్పించాలని ఆదేశాలు జారీ చేసింది. ఇక నుంచి మాన్సాస్ ట్రస్ట్ చైర్మెన్ అశోక్ గజపతి రాజు ఇచ్చే ఆదేశాలు అన్నీ కూడా అమలు చేసి తీరాలని హైకోర్టు స్పష్టం చేస్తూ, ఈవో పై తీవ్ర ఆగ్రహం వ్యక్తం చేసింది. అలాగే ఈవోని కోర్టు ముందుకు వచ్చి వివరణ ఇవ్వాలని ఆదేశాలు జారీ చేసింది హైకోర్టు.