news

జస్టిస్ ఎన్వీ రమణ.. మన ఆంధ్రప్రదేశ్ రాష్ట్రానికే గర్వ కారణం. గుంటూరు జిల్లాలో పుట్టి, దేశ అత్యున్నత న్యాయస్థానంలో చీఫ్ జస్టిస్ అఫ్ ఇండియాగా ప్రమాణస్వీకారం చేసి, బాధ్యతలు చేపట్టారు. ఆయన తెలుగు వారు కావటం, అదీ మన ఆంధ్రప్రదేశ్ వారు కావటం మనకు గర్వ కారణం. ఆయన వచ్చిన నెల రోజుల్లోనే ఆయన మార్క్ ఏమిటో చూపించారు. ఇది ఇలా ఉంటే, చీఫ్ జస్టిస్ అఫ్ ఇండియాగా బాధ్యతలు స్వీకరించిన తరువాత, జస్టిస్ ఎన్వీ రమణ మొదటిసారిగా రెండు తెలుగు రాష్ట్రాల్లో పర్యటించారు. నిన్న తిరుమల వెళ్లి వెంకన్నను దర్శనం చేసుకున్న ఎన్వీ రమణ, ఈ రోజు హైదరాబాద్ వెళ్ళారు. అయితే ఇక్కడ రెండు రాష్ట్రాల ప్రభుత్వాలు వ్యవహరించిన తీరు ఇప్పుడు చర్చనీయంసం అయ్యింది. చీఫ్ జస్టిస్ అఫ్ ఇండియాకు, కొన్ని ప్రోటోకాల్స్ ఉంటాయి. ప్రెసిడెంట్ అఫ్ ఇండియాకు ఉన్న ప్రోటోకాల్స్ దాదాపుగా ఉంటాయి. అయితే నిన్న చీఫ్ జస్టిస్ ఎన్వీ రమణ తిరుమల వచ్చిన సందర్భంలో, అదీ మొదటి సారి చీఫ్ జస్టిస్ అయిన తరువాత, సొంత రాష్ట్రం వచ్చిన సందర్భంలో, ఆయనకు ఘన స్వాగతం లభిస్తుందని అందరూ అనుకున్నారు. అయితే సాదా సీదాగా ఆయనకు స్వాగతం లభించిందనే చర్చ జరుగుతుంది. కేవలం టిడిపి చైర్మెన్, టిటిడి అధికారులు, స్థానిక ఎమ్మెల్యే ఆయనకు స్వాగతం పలికారు.

చిత్తూరు జిల్లా మంత్రులు కూడా రాకపోవటం చర్చనీయాంశం అయ్యింది. మంత్రి పెద్దిరెడ్డి కూడా హాజరు కాలేదు. ఎమ్మెల్యే భూమన కరుణాకర్ రెడ్డి, చెవిరెడ్డిలాంటి వాళ్ళు మాత్రమే కనిపించారు. ముఖ్యమంత్రి ఢిల్లీలో ఉన్నారు, గవర్నర్ పెద్ద వయసు కాబట్టి వచ్చి ఉండరు, మంత్రులు కూడా ఎవరూ వెళ్ళలేదు. ఇక ఆయన తిరుమల పర్యటన ముగించుకుని హైదరబాద్ చేరుకున్నారు. ఇక్కడ పూర్తి భిన్న వాతావరణం నెలకొంది. మంత్రి కేటీఆర్ సహా ఇతర మంత్రులు స్వాగతం పలికారు. ఆయన బస చేసిన దగ్గరకు, సియం కేసీఆర్, గవర్నర్ కూడా వెళ్లి ఆయనకు స్వాగతం పలికారు. తెలంగాణా క్యాబినెట్ సగం వరకు మంత్రులు వచ్చి ఆయన్ను కలిసారు. తమ రాష్ట్రం కాకపోయినా, సాటి తెలుగువారు అనే మమకారంతో, కేసీఆర్ ఘన స్వాగతం పలికారు. ఆంధ్రప్రదేశ్ , జస్టిస్ ఎన్వీ రమణ సొంత రాష్ట్రం కాబట్టి, మొదటి సారి చీఫ్ జస్టిస్ అయిన తరువాత వచ్చారు కాబట్టి, ఇక్కడ కూడా అంతలా ఆయనకు ఘన స్వాగతం పలికి ఉండాల్సిందని పలువురు అభిప్రాయ పడుతున్నారు. మరి ఈ విమర్శలకు ఏపి ప్రభుత్వం ఏమి సమాధానం చెప్తుందో.

జగన్ మోహన్ రెడ్డి రెండు రోజులు పాటు ఢిల్లీ పర్యటన ముగిసింది. ఆయన విజయవాడ తిరుగు ప్రయాణం అయ్యారు. నిన్న మధ్యానం ఢిల్లీ చేరుకున్న జగన్ మోహన్ రెడ్డి, కొంత మంది కేంద్ర మంత్రులను కలిసారు. ముఖ్యంగా న్యాయ శాఖా మంత్రి, పెట్రోలియం మంత్రి, జల శక్తి మంత్రి, హోం మంత్రి, ఇలా మొత్తం ఆరుగురిని కలిసారు. అయితే ఆయన ఆర్ధిక మంత్రి, రక్షణ మంత్రి అపాయింట్మెంట్ కోసం ప్రయత్నం చేయగా, వారి అపాయింట్మెంట్ మాత్రం దొరకలేదు. అయితే ఇది ఇలా ఉంటే, జగన్ మోహన్ రెడ్డి ఢిల్లీ పర్యటనలో వివిధ కేంద్ర మంత్రులను కలిసి, వారిని ఏమి అడిగారో, ఆ లిస్టు బయటకు వచ్చింది. అయితే ఆ లిస్టు చూస్తే మాత్రం, కొంచెం తేడాగా ఉంది. ఏది నిజం, ఏది అబద్ధం అనేది అర్ధం కావటం లేదు. కేంద్ర మంత్రులు అబద్ధం చెప్తున్నారో, మీడియాలో జగన్ మోహన్ రెడ్డి ఇవి అడిగారు అంటూ వస్తున్న విషయాలు అబద్ధమో అర్ధం కావటం లేదు. యధావిధిగా ప్రత్యెక హోదా నుంచి విభజన హామీలు దాకా అన్నీ కేంద్రాన్ని అడిగేసారని వార్తలు వచ్చాయి. మరి మెడలు వంచారా ? రాష్ట్రానికి ఏమైనా వస్తుందా అనే దాని పై మాత్రం, ఎక్కడా స్పష్టత లేదు. ఇది ఇలా ఉంటే జగన్ మోహన్ రెడ్డి అడిగారు అంటూ చెప్పిన మూడు అంశాలు మాత్రం, ప్రజలను కన్ఫ్యూషన్ లో పడేస్తున్నాయి.

ముందుగా జగన్ మోహన్ రెడ్డి పోలవరం గురించి, జలశక్తి మంత్రిని అడిగారని, అంచనాలు ఆమోదం గురించి త్వరగా తెల్చమన్నారని, అలాగే ప్రభుత్వానికి రావాల్సిన రీయింబర్స్మెంట్ గురించి అడిగారు అంటూ వార్తలు వచ్చాయి. అయితే తీరా చూస్తే జలశక్తి మంత్రి మాత్రం, ట్వీట్ చేస్తూ అసలు పోలవరం విషయమే రాయలేదు. జగన్ మోహన్ రెడ్డి మర్యాదపూర్వకంగా కలిసారని, ఇంటింటికీ తాగునీరు ప్రాజెక్ట్ పై చర్చించామని అన్నారు. ఇక మరో మంత్రిని కలసిన సందర్భంలో హైకోర్టు త్వరగా షిఫ్ట్ చేయమని అడిగినట్టు వార్తలు వచ్చాయి. అయితే ఇప్పటికే కేంద్ర ప్రభుత్వం పార్లమెంట్ సాక్షిగా, హైకోర్టు మార్పుకి , మాకు సంబంధం లేదని, అది హైకోర్టు చీఫ్ జస్టిస్, సుప్రీం కోర్టుతో తేల్చుకోవాలని ఇప్పటికే చెప్పింది. ఇక మరో అంశం మెడికల్ కాలేజీలకు పర్మిషన్ ఇవ్వాలని జగన్ కరినట్టు వార్తలు వచ్చాయి. అంటే ఇప్పటి వరకు వాటికీ అనుమతులు లేకుండానే, ఫుల్ పేజి ఆడ్స్ ఇచ్చి, మీడియాలో ప్రచారం చేసుకున్నారా ? ఇలా అనేక అంశాల్లో, ప్రజలకు కన్ఫ్యూషన్ ఉంది. ఏపి ప్రభుత్వం వైపు నుంచి అసలు దేని మీద చర్చించారు అనేది మాత్రం, ఇప్పటి వరకు ప్రెస్ నోట్ రాలేదు.

సుప్రీం కోర్టు చీఫ్ జస్టిస్ ఎన్వీ రమణ తనదైన శైలిలో, ముందుకు వెళ్తున్నారు. న్యాయ శాఖ పై తన మార్క్ చూపించాలనే ఉద్దేశంతో, కొన్ని కీలక నిర్ణయాలు ఈ మధ్య కాలంలో తీసుకుని, ప్రజల మన్ననలు పొందారు. చివరకు అవసరం అయితే కేంద్ర ప్రభుత్వానికి కూడా చురకలు అంటిస్తూ, తనదైన మార్క్ చూపిస్తున్నారు. ఈ సందర్భంగా జస్టిస్ ఎన్వీ రమణ చేసిన పని, ఇప్పుడు తెలంగాణా రాష్ట్రానికి మంచి బెనిఫిట్ అయ్యింది. తెలంగాణా రాష్ట్రం విషయంలో సంచలన నిర్ణయం తీసుకున్నారు జస్టిస్ ఎన్వీ రమణ. ఆయన నిర్ణయం పై తెలంగాణా వ్యాప్తంగా హర్షం వ్యక్తం చేస్తున్నారు. తెలంగాణా హైకోర్టులో ఉన్న జడ్జీల సంఖ్యను అమాంతం పెంచేశారు. తెలంగాణా హైకోర్టులో ఇప్పటి వరకు కేవలం 24 మంది న్యాయమూర్తులు ఉండగా, ఇప్పుడు ఆ సంఖ్యను ఏకంగా 42కి పెంచుతూ జస్టిస్ ఎన్వీ రమణ కీలక నిర్ణయం తీసుకున్నారు. జడ్జిల సంఖ్య పెంచాలి అంటూ గత కొన్నేళ్లుగా అక్కడ డిమాండ్ ఉంది. ఆంధ్రప్రదేశ్ హైకోర్టు విభజన జరిగిన సమయం నుంచి, తెలంగాణా హైకోర్టుకు జడ్జిల సమస్య వేధిస్తూనే ఉంది. తెలంగాణా రాష్ట్ర ప్రభుత్వం, అక్కడ హైకోర్టు, కేంద్రం, సుప్రీం కోర్టు మధ్య అనేక సార్లు ఈ విషయంలో చర్చ జరిగినా, ఇది ముందుకు వెళ్ళలేదు.

జస్టిస్ ఎన్వీ రమణ , సుప్రీం కోర్టు చీఫ్ జస్టిస్ అయిన తరువాత, సత్వరం న్యాయం గురించి స్పందిస్తూ, జడ్జిల కొరత పై మాట్లాడుతూ, తెలంగాణా హైకోర్టు గురించి ప్రత్యేకంగా ప్రస్తావించారు. అక్కడ జడ్జిల కొరత వల్ల, అనేక కేసులు పెండింగ్ లో ఉన్నాయని, సత్వరం న్యాయం జరగటం లేదని ఆయన చెప్పారు. దేశంలో అన్ని హైకోర్టుల్లో ఉన్న ఈ సమస్య పై దృష్టి పెట్టాలని అన్నారు. చెప్పినట్టుగానే, జస్టిస్ ఎన్వీ రమణ తెలంగాణా హైకోర్టు విషయంలో, జడ్జిల నియామకం ఫైల్ ను ముందుకు నడిపారు. కేంద్రం నుంచి కూడా పాజిటివ్ స్పందన రావటంతో, జడ్జిల సంఖ్యను పెంచుతూ, జస్టిస్ ఎన్వీ రమణ నిర్ణయం తీసుకుంటూ సంతకం పెట్టారు. ఇదే విషయం తెలంగాణా హైకోర్టు చీఫ్ జస్టిస్ కు తెలియ చేసారు. ఇక కేంద్ర న్యాయ శాఖ నుంచి ఉత్తర్వులు అందటమే తరువాయి. ఈ పెంపుతో, ఆంధ్రప్రదేశ్ కంటే, తెలంగాణాకు 5 గురు న్యాయమూర్తులు అధికంగా ఉన్నారు. ఆంధ్రప్రదేశ్ రాష్ట్రానికి 37 ఉండగా, తెలంగాణా రాష్ట్రానికి 42 మంది ఉన్నారు.