news

అమరావతి రాజధానిపై వైసీపీ ప్రభుత్వం మరొక కుట్ర చేస్తోందని మాజీ మంత్రి, తెలుగుదేశం పార్టీ పొలిట్ బ్యూరో సభ్యులు కొల్లు రవీంద్ర అనుమానం వ్యక్తం చేశారు. మచిలీపట్నంలో ఆయన మీడియాతో మాట్లాడుతూ ఓడ దాటే వ‌ర‌కు ఓడ మల్లన్న ఓడ దాటిన తర్వాత బోడి మల్లన్న అన్నట్లుగా వైసిపి వ్యవహరం ఉంద‌న్నారు. ప్రతిపక్షంలో ఉండగా అధికారం కోసం అమ‌రావ‌తి రాజ‌ధానిని అడ్డం పెట్టుకుని అధికారంలోకి వ‌చ్చిన త‌ర్వాత ఎప్పుడెప్పుడు అమ‌రావ‌తిని చంపాలా అని చూస్తున్నార‌ని మండిప‌డ్డారు. అమ‌రావ‌తిపై ఇప్ప‌టి వ‌ర‌కు కాల‌కుట విషాన్ని చిమ్మ‌ర‌ని ఆ విష ప్ర‌చారాన్ని ప్ర‌జ‌లు న‌మ్మ‌క‌పోవ‌డంతో ఇప్పుడు ప్ర‌త్య‌క్షంగా వైసీపీ నేత‌లు రంగంలోకి దిగార‌ని తెలిపారు. తుళ్లురు మండలం, తాళ్ళాయ పాలెం సమీపంలో కరకట్ట వద్ద కృష్ణా నది నుండి ఇసుకను డ్రెడ్జింగ్ కోసం ప్రయత్నాలు చేస్తున్నార‌ని మండిప‌డ్డారు. అమ‌రావ‌తి రాజధాని మునిగిపోయే ప్రాంతం అంటూ గతంలో వైసీపీ నేత‌లు విమ‌ర్శలు చేశార‌ని కానీ వైసీపీ ప్ర‌భుత్వం అధికారంలోకి వ‌చ్చిన త‌ర్వాత కృష్ణాన‌దికి నాలుగైదు సార్లు వ‌ర‌ద‌లు వ‌చ్చినా అమ‌రావ‌తి ప్రాంతంలో చుక్కునీరు కూడా లేద‌న్నారు. ముంపు ప్రాంతం అని వారు చేస్తున్న విమ‌ర్శ‌ల‌ను నిజం చేయాల‌నే క‌ర‌క‌ట్ట ప‌క్క‌నే డ్రెడ్జింగ్ పనులు చేస్తున్నార‌ని పేర్కొన్నారు. కరకట్ట ప్రక్కన డంపింగ్ పాయింట్లను కూడా ఏర్పాటు చేస్తున్నార‌ని చెప్పారు. దీని వ‌ల్ల కరకట్ట బలహీనపడుతుందని అమ‌రావ‌తి రాజ‌ధాని గ్రామాల‌కు చెందిన స్థానికులు ఆందోళ‌న వ్య‌క్తం చేస్తున్నారని అన్నారు.

కృష్ణానది ఒడ్డు నుండి 500 మీటర్ల లోనికి నీటిలోకి వెళ్లి డ్రెడ్జింగ్ చేపట్టాలని రైతులు డిమాండ్ చేస్తున్న అధికారులు కానీ, వైసీపీ ప్ర‌జా ప్ర‌తినిధులు కానీ ప‌ట్టించుకోవ‌డ లేద‌ని మండిప‌డ్డారు. క‌ర‌క‌ట్ట బ‌ల‌హీన ప‌డితే భ‌విష్య‌త్ లో న‌దికి వ‌ర‌ద‌లు వ‌స్తే అమ‌రావ‌తి పంట పొలాల్లోకి వ‌ర‌ద నీరు వ‌స్తుంద‌ని అప్పుడు గ‌తంలో అమ‌రావ‌తి ముంపు ప్రాంత‌మంటూ వారు చేసిన విమ‌ర్శ‌ల‌ను నిజం చేసుకోవాల‌ని చూస్తున్నార‌ని ఆరోపించారు. వైసీపీ అధికారంలోకి వచ్చిన ద‌గ్గ‌ర నుంచి అమ‌రావ‌తి ఎప్పుడు నాశ‌నం చేయాలా అని జ‌గ‌న్ కంకణం కట్టుకున్నార‌ని తెలిపారు. రాజ‌ధాని నిర్మాణం కోసం రైతులు భూములు ఇస్తే దానిలో ఇసుక నిల్వ‌లు చేయ‌డం ఏంట‌ని ప్ర‌శ్నించారు. అమ‌రావ‌తిని అభివృద్ది చేయ‌డం రాదు కానీ మ‌ళ్లీ మూడు రాజ‌ధానులు పెడ‌తామ‌ని ప్ర‌గ‌ల్బ‌లు ప‌లుకుతున్నార‌ని ఎద్దేవా చేశారు. అమ‌రావ‌తి అంశం కోర్టు ప‌రిధిలో ఉన్న సంగ‌తి మంత్రి బొత్స స‌త్య‌నారాయ‌ణ మ‌ర్చిపోయి మాట్లాతున్నార‌ని తెలిపారు. రైతుల‌ను, అమ‌రావ‌తి రాజ‌ధాని ప్రాంతాల‌ గ్రామ‌స్తుల‌కు ఇబ్బందులు క‌లుగ‌కూండా డ్రెడ్జింగ్ చేసుకోవాల‌న్నారు. అమ‌రావ‌తిపై ప్ర‌భుత్వం ఎన్ని కుయుక్తులు ప‌న్నినా అంతీమంగా న్యాయమే విజ‌యం సాధిస్తుంద‌ని, అమ‌రావ‌తిపై దుష్ప‌చారం చేయాల‌నుకుంటే ప్ర‌జ‌లేవ్వ‌రు న‌మ్మ‌ర‌ని తెలిపారు.

చిత్తూరు జిల్లాలో జడ్జి రామకృష్ణ వ్యవహారం హాట్ టాపిక్ గా మారింది. ముఖ్యంగా మంత్రి పెద్దిరెడ్డి తనను ఇబ్బంది పెడుతున్నారు అంటూ, గతంలో ఆయన అనేక సార్లు వ్యాఖ్యలు చేసిన సంగతి తెలిసిందే. అయితే ఒక టీవీ ఇంటర్వ్యూ లో జగన్ పై అసభ్య వ్యాఖ్యలు చేసారు అంటూ ఆయన పై రాజద్రోహం కేసు పెట్టి, ఆయనను అరెస్ట్ చేసారు. ఇప్పటికే ఆయన్ను అరెస్ట్ చేసి రెండు నెలలు అవుతుంది. ఇప్పటికీ ఆయనకు బెయిల్ లభ్యత లేదు. వేసవి సెలవులు కావటం, వెకేషన్ బెంచ్ మాత్రమే పని చేస్తూ ఉండటంతో, ఆయన బెయిల్ పిటీషన్ విచారణ లేట్ అవుతుంది. ఈ రోజు ఆయన బెయిల్ పిటీషన్ పై విచారణ జరిగింది. ఈ సందర్భంగా హైకోర్టు సంచలన వ్యాఖ్యలు చేసింది. ఈ కేసు విచారణను 15వ తేదీకి వాయిదా వేస్తూ, కోర్టు ఈ వ్యాఖ్యలు చేసింది. ప్రస్తుతం ఉన్న పరిస్థితిలో జడ్జి రామకృష్ణ జ్యూడిషల్ కస్టడీ లో ఉండటమే మంచిదని, కోర్టు అభిప్రాయపడింది. కోర్టు చేసిన ఈ వ్యాఖ్యలు ఇప్పుడు చర్చకు దారి తీసాయి. జడ్జి రామకృష్ణ తరుపున, మాజీ అడ్వొకేట్ జనరల్ దమ్మాలపాటి శ్రీనివాస్ రావు వాదనలు వినిపించారు. ఈ కేసు విచారణ వచ్చే మంగళవారానికి వాయిదా పడింది. ఇప్పటికే జడ్జి రామకృష్ణ ఉంటున్న బ్యారెక్ లోని వ్యక్తి బెదిరించారని, తరువాత క-త్తి లభ్యం అవ్వటం, ఆయన్ను హాస్పిటల్ కు తరలించటం ఇవన్నీ జరిగిన విషయం తెలిసిందే.

మహారాష్ట్రకు చెందిన లీగల్ రైట్స్ అడ్వైజరీ కన్వీనర్ వినయ్ జోషి , నిన్న కేంద్ర హోం శాఖ కార్యదర్శికి, ఆంధ్రప్రదేశ్ సిఐడి చీఫ్ సునీల్ కుమార్ పై ఫిర్యాదు చేసిన సంగతి తెలిసిందే. ఏపి సిఐడి చీఫ్ సునీల్ కుమార్, హిందూ మతానికి వ్యతిరేకంగా ప్రచారం చేస్తున్నారని, సర్వీస్ రూల్స్ నిబంధనలకు వ్యతిరేకంగా ఆయన వ్యావహరిస్తున్నారని, ఆయన ప్రసంగాలు మతాల మధ్య, కులాల మధ్య చిచ్చుకి ప్రయత్నం చేస్తున్నారని, సర్వీస్ రూల్స్ కు వ్యతిరేకంగా ఆయన చేస్తున్న ప్రచారం పై, దర్యాప్తు జరిపి, ఆయన పై చర్యలు తీసుకోవాలని, ఆయన్ను సర్వీస్ నుంచి తొలగించాలని కేంద్రానికి నిన్న ఫిర్యాదు చేసారు. దీంతో పాటుగా, ఆయన ఎస్సీ రిజర్వేషన్ అంటూ, ఆ రిజర్వేషన్ పొంది, మతం మార్చుకున్నారని, మతం మార్చుకుంటే, ఆయన తన పదవికి అనర్హుడు అవుతారని, తొలగించాలని డిమాండ్ చేసారు. గతంలో మద్రాస్ హైకోర్టు కూడా ఇలాంటి కేసులు పై తీర్పు ఇచ్చిందని, ఆయన పై చర్యలు తీసుకోవాలని సునీల్ కుమార్ పై, ఫిర్యాదు చేసారు. అయితే ఫిర్యాదు చేస్తూ, సునీల్ కుమార్ ఏవైతే ప్రసంగాలు చేసారో, ఆ ప్రసంగాలకు సంబంధించిన ఆధారాలు అన్నీ, కూడా ఆ ఫిర్యాదులో పొందు పరిచారు. ఈ ఆధారాలు అన్నీ కూడా youtube, ట్విట్టర్ లో ఆయన చేసిన ప్రసంగాల, URL లింక్ లు అన్నీ కూడా తన ఫిర్యాదులో తెలిపారు.

ఆ వీడియో క్లిప్ లు కూడా డౌన్లోడ్ చేసి ఫిర్యాదులో ఇచ్చారు. అయితే, ఈ రోజు ఆయన ఇచ్చిన ఫిర్యాదులోని URL లింక్ లు క్లిక్ చేస్తే, వీడియోలు ఏమి అందులో లేవని, ఆ లింకులు నుంచి వీడియోలు తొలగించినట్టు తెలుస్తుందని, ఫిర్యాదుదారుడు ఆరోపిస్తున్నారు. ఇదే విషయం పై ఆ సంస్థ పీవీ సునీల్ కుమార్ ను ట్విట్టర్ ద్వారా ప్రశ్నించింది. ఎందుకు ట్విట్టర్ నుంచి, youtube నుంచి ఆ వీడియోలు అన్నీ మాయం అయ్యాయి ? ఆ నేరాన్ని మీరు అంగీకరిస్తున్నారా అంటూ ట్విట్టర్ ద్వారా ప్రశ్నించింది. ఈ లింక్ ల్లో ఉన్న వీడియోలు అన్నీ మాయం కావటం పై, ఇది ఎవరు చేసారు అనే విషయం కూడా దర్యాప్తు చేయలని కేంద్రాన్ని కోరింది లీగల్ రైట్స్ అడ్వైజరీ. కేంద్ర హోం శాఖ ఈ విషయం పై ఇప్పుడు ఎలా స్పందిస్తుందో చూడాలి. తమకు ఫిర్యాదు అందిన తరువాత, ఆ వీడియోలు మాయం అయినట్టు విచారణలో తేలితే మాత్రం, బాధ్యుల పై చర్యలు తప్పవనే చెప్పాలి. మరి ఈ విషయం ఎంత వరకు వెళ్తుందో చూడాలి.